ዋንሳ ቆንጭ 15 - Oroth Caaqo

Wurssith boshita

¹ Taanii salol hara dammannee pala malabaz be7eeza. Xooss wurssitha kachch poliza laappun boshita aykkeez laappun kiitanchchita ta be7eeza.

² Yeypp guye tamar walakintteez burccuko abba aaziza baz ta be7eeza. Ye abbay gaxa do7a, e misilannee e sunthay tayba gameezita ta be7eeza. Xoossii unttis inggeez diitha aykkii burcuko abbal eqqeeza.

³ Unttii Xooss aylle Muse mazmurannee Duray mazmuura yhay garkk yeegii yexxeeza. «Godayyo, Ubbapp Wolqqama Xoossayyo, ne oosay dammannee malabazii. Woya ubbayis kaatayyo, ne ogay xillonnee tuma.

⁴ Geeshshii ne aadda maaqqeez gishos Godayyo, nees yashittoozayinnee ne suntha bonchchoozay oonoo? Ne xillo oosay as ubbayis qoncce maaqqeez gishos woya ubbay ne tiina yi7ii goynnoda» yeegii yexiza.

⁵ Yeypp guye, salo dooyinttii yez Markkatith Dunkkaane maaqqeez Xooss Keetha ta be7eeza.

⁶ Laappun boshita aykkeez laappun kiitanchchitay Xooss keethaypp kezeeza. Unttii geeshshinnee pociz liino ma7o ma77eeza; fa tiral worqqe dancco dancceeza.

⁷ Oyddii medhetithitaypp pettay, medhinas yez Xooss kachchii kumeez laappun worqqa xuu7ita laappun kiitanchchitayis inggeeza.

⁸ Xooss bonchchayppennee e wolqqaypp denddeezayid Xooss Keethay cuyar kumeeza. Laappun kiitanchchitay aykkeez laappun boshitay polinttod hellodayis Xooss Kara oonkka gelodayis danda7ekkaya.