Marqqoosa 16 - Oroth Caaqo

Yesuusa yhayiqopp dendeeza

¹ Maala gallasay aadheezaypp guye Magdeelawe Mayramo, Yayqqooba indat Mayramannee Saloome yhanigii, Yesuusa aha tizhodayis shitto wonggeeza.

² Wogga gallas guura zherkkizherkko xalqqe kezodar, duufo yhanigeeza.

³ U fa gancce pettatii pettatira, «Duufay doonapp nuus shuchch oonoo gol7isii haasoday?» yeegii wolla odintteeza.

⁴ U be7adar ye damm atteez shuchchay goli7alii hali7eezana be7eeza.

⁵ Yesuusa moogintteez duufay gancce gelodar pettii yelaga athay booth afila ma77ii, ushachch baggar betteezana bi7ii dagammeeza.

⁶ Zin E unttiko, «Dagammippate; mazqalel afa sotintteez, Naazirete Yesuusa yi koyizana ta eriza. E yhaydd baaya, yhayqqopp dendeeza. U eza moogeez aqa yhaya bo7oytta.

⁷ Yhatti yhanigii Yesuusa tamaaritayisnnee Phixiroosas, ‹Yesuusa yinttapp tiinatii Galila aadhiza. E yinttis odeezay garkk yi eza ezayid be7ada› yeegii odoytta» yeegeeza.

⁸ Maachchitay yashshar kukkurttar duufaypp kezii laasii qiteeza. Ma u yashitteez gishos yeya ooskka abikka odekkaya.

Yesuusa Magdeela Mayramis bentteeza

⁹ Yesuusa yhayqqopp dendeezaypp guye wogga gallas guura, laappun tuna ayyanita izpp e kesseez Magdeela Mayramis tiinatii bentteeza.

¹⁰ Iza yhanigii tiina ezar yezitayis, u azanttarannee yeekkittar yezin odeeza.

¹¹ Zin Yesuusa pathi yezanannee izis bentteezana u si7eez wode iza giza ammanekkaya.

Yesuusa fa nam7i tamaaritayis bentteeza

¹² Yeypp guye, unttapp nam7itay katamapp kezii yhammadar, ogella Yesuusa tiinaasaypp dummatii unttis bentteeza.

¹³ U guye maaqqii, hara asayis odeeza, Zin hara asaykka u oda tuma geekkaya.

Yesuusa fa taphpho pettii tamaaritayis bentteeza

¹⁴ Guyepp taphpho pettii e tamaaritay katha maadar, Yesuusa unttis bentteeza. Unttis ammano baazay gishonnee yhayiqopp e dendeezana be7eez asay odin u ammanaam ixxeezayis e unttan boreeza.

¹⁵ E unttiko, «Biitta ubbayil yhanigii as ubbayis Wongile odoytta.

¹⁶ Ammaneezaynnee xammaqintteezay attoda, zin ammanekkazay pirddinttoda.

¹⁷ Ammanizitayis yha malatitay inginttoda. U ta sunthayir tuna ayyanita kessoda, oroth doona nashshoda.

¹⁸ U shoosh aykkiko woy wodhiza baz uzhikokka unttan qohaamii. Ma u fa kushe hargintteezitayil afa gaddii unttan pathoda» yeegeeza.

Yesuusa pude dendii salo kezeeza

¹⁹ Goda Yesuusa tamaaritayira nashsheezaypp guye pude dendii salo kezeeza; Xoossapp ushachch baggar betteeza.

²⁰ E tamaaritay yhanigeez aqo ubbayid qaala odeeza. Godaykka unttar wolla oothiza. U odiza qaalay tuma maaqqeeza Xoossay unttisi ingiza mallayir fa qaala miintheeza.