Maatoosa 1 - Oroth Caaqo

Yesuusa yeletith xussii

¹ Dawute na7a Afraame na7a maaqqeez Yesuus Kiristtoosa yeletith.

² Afraame Isaaqa yeleeza; Isaaqa Yayqqooba yeleeza; Yayqqooba Yihudarannee e ishita yeleeza;

³ Yihuda Ti7imaaripp Paaresannee Zaara yeleeza; Paaresa Asroome yeleeza; Asrooma Raame yeleeza;

⁴ Raame Aminadaba yeleeza; Aminadaba Na7asoona yeleeza; Na7asoona Salmoone yeleeza;

⁵ Salmoona Ra7aabppe Boo7eeza yeleeza; Boo7eeza Uritppe Iyobeede yeleeza; Iyobeede Issaye yeleeza;

⁶ Issaye kaata Dawite yeleeza; Kaat Dawite Ooriyo machchattippe Solomone yeleeza;

⁷ Solomone Robi7aama yeleeza; Robi7aame Abiya yeleeza; Abiye Asaafe yeleeza;

⁸ Asaafe Iyosaafexe yeleeza; Iyosaafixe Iyoraame yeleeza; Iyoraame Oozanee yeleeza;

⁹ Oozanee Iyo7ataame yeleeza; Iyo7ataame Akkaza yeleeza; Akkaza Hiziqasa yeleeza;

¹⁰ Hiziqasa Minaase yeleeza; Minaase Amooxa yeleeza; Amooxa Iyosaasa yeleeza;

¹¹ Iyosaasa Ikonaanarannee e ishita yeleez ya laythate Isreele asay di7inttii Baabiloone biitta yhanigeeza.

¹² Baabiloone biitta Isreele asay di7inttii yhanigeezaypp guye Ikonaana Salatiyaale yeleeza. Salatiyaale Zerubaabela yeleeza;

¹³ Zerubaabela Abdiyu yeleeza; Abdiyu Eliyaaqeme yeleeza; Eliyaaqeme Azoora yeleeza;

¹⁴ Azoora Sadooqe yeleeza; Sadooqe Akime yeleeza; Akime Eliyuuda yeleeza;

¹⁵ Eliyuuda Alaazara yeleeza; Alaazare Maatane yeleeza; Maatane Yayqqooba yeleeza;

¹⁶ Yayqqooba Yooseefa yeleeza; Yooseefa Kiristtoosa giz Yesuusana yeleez Mayramii azina.

¹⁷ Yikkee, yeletithii Afraamepp Dawute hellodayis taphpho oydde. Dawutepp yhanigii Baabiloone di7a hellodayis taphpho oydde. Baabiloone di7aypp yhanigii Kiristtoosa hellodayis taphpho oyddii yeletithi maaqqiza.

Yesuus Kiristtoosa yeletithi

¹⁸ Yesuus Kiristtoosa yelintto taarikay yhaypp kaalliza. E indat Mayrama Yooseefas oyccinttii yezar Yooseefar wolla aqekkazar geeshsha Ayyanapp woddexeeza.

¹⁹ Yooseefa geesh as maaqqeez gisho izo asii ododay garkk koyekkazay gishos geemar ashshodayis qoppeeza.

²⁰ E ye qofayil yezin Xoossa kiitanchchay abukkar ees benttii, «Dawute na7a, Yooseefa, Mayrama woddexeezay geesha Ayyanapp maaqqeez gisho izo ekkodayis yashittippe» yeegeeza.

²¹ Iza dhiirath na7a yeloda, E woyita u nagaraypp ashshizay gisho e suntha ne Yesuusa gi xeegoda.

²² Goday nabay doonar,

²³ «Yeezako wudirtta wodexxoda; dhiirath na7a yeloda; e sunthay Amanu7eela ginttinttoda» geezay polinttoday garkk yha ubbay haneeza. Amanu7eela guusayis birshshithay «Xoossay nuuri yeza» guussii.

²⁴ Yooseefa genttapp barkkii Goday kiitanchchay kiitteezay garkk Mayramo fa kara kanggeeza.

²⁵ Zin fa bayra na7a yelod gatho izo bochchekaya; yelintteez na7akka Yesuusa gi xeegeeza.