Ibraawe 1 - Oroth Caaqo

Na7ay kiitanchchitaypp aathii

¹ Binii binkko Xoossii, nu aditayis nabitay baggar duma duma oger gaame wode odeeza.

² Zini yha wurssith wode ubba baz eza laatiseez ma alamakka e baggar medhdheez fa Na7ay baggar nuus odeeza.

³ Na7ay Xooss bonchcha pocithinnee hanayir muumer Xooss aazii kunth Xooss Xoossatith ekkii, fa mawute qaalayir yha alama miinthii aykkeeza. Asa u nagaraypp shaagishsheezaypp guye Ubbapp afa Xooss ushachch salo betteeza.

⁴ Ees inggintteez sunthay kiitanchchitay sunthaypp aath maaqqeezay garkk E unttapp lo7ithii aadhiz gishosii.

⁵ Yikkee, Xooss kiitanchchitaypp ooko, «Neenii ta Na7a; ta yhayino nees ade maaqqeeza» yeegeenee? woy ooko, «Taanii ees ade maaqqoda; eekka taas na7a maaqqoda» yeegeenee?

⁶ Ma Xoossii fa bayra Na7a yha alame kiittittar, «Xoossii kiitanchchitay ubbay ees goynno» yeegeeza.

⁷ Xoossii kiitanchchitay bagga odittar, «Xoossii fa Kiitanchchita carkkita, fa ayllita tama lath udiza» yeegiza.

⁸ Zini fa Na7ay bagga odittar, «Xoosso, ne kaatetithay medhinas yeziza. Ne kaatetitha ne xillotithar aqisoda.

⁹ Neenii xillotithi doseeza; iitatith ixxeeza. Xoossay, ne Goday, nena ne zhamitaypp aathii dooreeza, ufayss zayite nena tizheeza» yeegiza.

¹⁰ Xoossii mahii, «Godayyo, tiina neenii sa7a medhdheeza; salitay ne kushe oosita.

¹¹ Yeyititay ubbay dhaboda; zin neenii yezoda. Unttii ubbay afila garkk wuroda.

¹² Neenii unttan saline garkk xaaxoda; ma unttii afila garkk laaminttoda. Zini neenii ubba wode nena; ne laythitayiskka wuristhii baaya» yeegiza.

¹³ Zini Xooss kiitanchchitaypp ooko, «Taanii ne morkkita ne tokay yedhdhiz aqo udod hellodayis, yhaydda taapp ushachch baggar bettoba» yeegeenee?

¹⁴ Kiitanchchitay ubbay atotith denggodayis yez asita maaddodayis Xoossii kiitteez ayyanita baasannee?