ዋንሳ ቆንጭ 5 - ኦሮ ጫቆ

ዱራኔ ማጻፍቶ

¹ የይፕ ጉየ፥ ዙፋናይል አፋ በቴዛይ ኡሻች ኩሻይድ ጋንጨራኔ አፋር ጻፍንቲ ላፑን ማታመር ጎርድንቴዝ ጻ ማጻፍቶ ታ በኤዛ።

² ፐቲ ምኖ ኪታንቻይ ፋ ቃላ ቅ ኡዲ፥ «ማታማ ብሎዳይስኔ ማጻፍቶ ዶዮዳይስ ቤዝዛይ ኦኖ?» ዬጊ አዋጆዳር በኤዛ።

³ ዝን ሳሎ ማቅን ሳአ ዎይ ሳአፕ ኦሞ ማቅን የ ጻ ማጻፍቶ ዶዮዳይስኔ ጋንጫ በአዳይስ ዳንዳኤዝ ኦንካ ባያ።

⁴ ጻ ማጻፍቶ ዶዮዳይስኔ እ ጋንጫ በአዳይስ ቤዝዛ አስ ቤዝ ግሾስ ታ ኢታ ዬኬዛ።

⁵ የ ዎደ፥ ጭምታይፕ ፐታይ ታኮ፥ «ዬክፐ! ይሁዳ ዘረ ማቄዝ ጋማይ፥ ዳዉተ ሼሻይ፥ ላፑን ማታምታ ብሎዳይስኔ ማጻፍቶ ዶዮዳይስ ዳንዳኤዛ» ዬጌዛ።

⁶ የይፕ ጉየ፥ ዙፋናይል ኦይዲ መተታይስኔ ጭምታይስ ጋንጨ፥ ሹክንቴዝ ዱር ጋርክ ኤቄዛና ታ በኤዛ። ኤስ ላፑን ካጭታይኔ ላፑን ኣፍታይ የዛ። የይትታይ ሳአ ኡባይል ኪትንቴዝ ጾስ አያና ላፑንታ።

⁷ የ ዱራይ ይኢ፥ ዙፋናይል አፋ በቴዛይ ኡሻች ኩሸፕ ጻ ማጻፍቶ ኤኬዛ።

⁸ ኤ የ ጻ ማጻፍቶ ኤኬዝ ዎደ ኦይዲ መትታይኔ ላታማኔ ኦይዲ ጭምታይ ዱራይ ቲናይድ ጉጲንጌዛ። ኡንቲ ፐታይ ፐታይ ዲኔ ጌሽታይ ዎሳ ማቄዝ እጻኔ ኩሜዝ ዎርቃ ሻተ አይኬዛ።

⁹ ኡንቲ፥ «ጻ ማጻፍቶ ኤኮዳይስ፥ ማታመ ብልኦዳይስ ኔስ ቤዝዛ። አብስ ጊኮ፥ ኔኒ ሹክንቴዛያ፤ ዘረ ኡባይፕ፥ ዱማ ዱማ ዶናፕ፥ ያርታይፐኔ ካተት ኡባይፕ፥ ነ ሱይር ጾሳይስ ዎዜዛ።

¹⁰ ኑ ጾሳይስ ካተትኔ ቄሰ ማቃዳይ ጋርክ ኡዴዛ ኡንቲ ቢታል አፋ ካዉቶዳ። ኡንትካ ጋደ ኡባ ሞዶዳይ» ዬጊ ኦሮ ማዝሙረ የጼዛ።

¹¹ ታ በአዳር ዙፋናይ፥ ኦይዲ መትታይኔ ጭምታይ ዩሻይድ ጋመ ኪታንችታይ የዛ። ኡ ጋመትይ ሙኩሎ ቶኬ ሙኩሎኔ ታጲ ሙኩሎ ቶኬ ታጲ ሙኩሎ ማቄዝ ጊር ስኤዛ።

¹² የ ኪታንችታይ ቅ ጌዝ ቃላር፥ «ሹክንቴዝ ዱራይ ዎልቃ፥ ዱረት፥ ኤጨትኔ ምኖት፥ ቦንቾ፥ ሳባኔ አንጆ ኤኮዳይስ ቤዝዛ» ዬጌዛ።

¹³ የይፕ ጉየ፥ ሳአ፥ ሳሎ፥ ሳአፕ ኦሞራኔ አባ ጋንጨ የዝ መት ኡባይ፥ «ዙፋነል አፋ በቴዛይስኔ ዱራይስ፥ ጋላታ፥ ቦንቾ፥ ሳባኔ ዎልቃ መፐ መናስ ማቆ» ዬጊ የጾዳር ስኤዛ።

¹⁴ ኦይዲ መትታይካ፥ «አምንኤ» ዬጌዛ፤ ማ ጭምታይካ ጹጉኒ ጎይኔዛ።