Maatoosa 13 - ኦሮ ጫቆዘር ዘርዝ አይ ኣዝሶ ( ማር. 4:1-9 ፤ ሉቃ. 8:4-8 ) 1 የ ጋላስ የሱሳ ካራፕ ከዚ አባ ካንታ በቴዛ። 2 ጋመ ዎያ ኤ ላንቀ ሺቅን አሳ አባ ጋጻ አሺ ዎጎሎ ጋንጨ ገሊ በቴዛ። 3 አሳይስ ጋመ ባዝ ኣዝሶር ዬጊ ኦዴዛ፦ «ፐቲ ቢታ ኦዝ አይ ዘር ዘሮዳይስ ከዜዝ። 4 ኤ ዘሮዳር ፐቲ ፐቲ ዘርይ ኦገ ጋጻ ዎዛ፤ ኡንታናካ ካፍታይ ይኢ ማጺ ሜዛ። 5 ፐቲ ፐቲ ዘርታይ ስስልቆ ቢታል አፋ ዎዛ። ጋመ ቢታ ባ ግሾስ ኤልሲ ዶሌዛ። 6 ዝን አዋ ኬዝን ሹሌዛ፤ ጻጶ ባዛይ ግሾስ መሌዛ። 7 ፐቲ ፐቲ ዘርይ አንጉ ጋንጨ ዎዛ፤ አንጉይ ድጪ የ ዶላ ጩሌዛ። 8 Ꮊንክታይ ማ እርኮ ቢታል አፋ ዎዛ፤ ዶሊ ኣፈ ኣፌዛ። ፐታይ ጼት፥ ፐታይ ኡሱፑንታም፥ ፐታይ ማ ሀስታም ኣፌዛ። 9 ስእዝ ሀየር የዝ አይ ስኦ» ዬጌዛ። 10 የሱሳ ታማርታይ ኤዝኮ ሺቂ፥ «አብስ ኔኒ ዎያይስ ኣዝሶር ኦዴ?» ዬጊ ኦይጬዛ። 11 ኤ ማሂ፥ «ይንትስ ሳሎ ካተት ጹራ እንግንቴዛ፥ ዝን ኡንትስ እንግንተካያ። 12 የዛ ኡባይስ ጉዥንቶዳ፥ ኤዝስ ጋንጎዳ፥ ዝን ባዛይፕ ሀራ አቶዝን ኤዝስ የዛናካ ኤክንቶዳ። 13 የይ ግሾስ፥ ታኒ ኡንቲ፥ ብእታር ደንጋማይ ጋርክ፥ ስእታር ስአም ጋርክ ዎይ አካካማይ ጋርክ ኡንትስ ኣዝሶር ኦድዛ። 14 «ኢሳያሳ ፋ ማጻፋይ ግዶ ኦዴዛይ ኡንታል አፋ ፖልንቴዛ። ኤ ኦድታር፥ « ‹ይ ስስ ስእዛ፥ ዝን አካኮያ፤ ይ ብእ ብእዛ፥ ዝን ደንጎያ። 15 አብስ ጊኮ፥ Ꮊ አሳይ ዎዝናይ ኦርዴዛ፤ ፋ ሀያ ኤርታር ቱልሴዛ፥ ፋ ኣፋ ጎዜዛ። የይ ባዛኮ ኡ ፋ ኣፋትር ብኢ፥ ፋ ሀየር ስኢ፥ ፋ ዎዝናር አካኪ፥ ታኮ ማቆዳ፥ ታካ ኡንታን ፓዳዝን› ዬጌዛ። 16 «ዝን ይ ኣፋይ ብእዛ ግሾ ይ ሀያይ ስእዝ ግሾስ ይ አንጅንቴዝታ። 17 ታ ይንትስ ቱሮ ኦድዛ፤ ጋመ ናብታይኔ ጌሽ አስታይ ይ በኤዛና በአዳይስነ ይ ስእዛና ስኦዳይስ አሞቴዛ፥ ዝን ኡንትስ ሀነካያ። 18 «ይኬ፥ Ꮊ ዘር ዘርዝ አይ ኣዝሳ ስኦይታ። 19 ኦገ ጋጻ ዎዝ ዘር ኣዝሳይ Ꮊያ፦ ሳሎ ካተት ቃላ ስኢ አካኮዋ አይ ዎዝናይፕ ጻላሄ ይኢ ኤ ዎዛና ጋንጨ የዝ ዘር ማጺ ሃሴዛ። 20 ስስልቆ ቢታል አፋ ዘርንቴዛይ ቤዝዛይ ቃላ ስኢ ኤልሲ ኡፋይሳር ኤክዝታ። 21 ዝን Ꮊተሳፕ አትን ጻጶ ዳከካያ። ቃላ ግሾ መቶ ዎይ ባይእ ይእዛ ዎደ ኤልሲ ብንትዛ። 22 አንጉ ጋንጨ ዘርንቴዛይ Ꮊያ ቃላ ስኤዛ፥ ዝን Ꮊ አላመ የስስ ህርጋይኔ ዱረትስ ቆፋይ ቃላ ጩልዛ ግሾስ ኣፈ ኣፈካዛር አትዛ። 23 ዝን አራዳ ቢታል ዘርንቴዝ ዘርይ Ꮊያ አካካር ቃላ ስኤዝ አ። ኤ ኣፈ ኣፍዛ፤ ፐታይ ጼት፥ ፐታይ ኡሱፑንታም ፐታይ ማ ሀስታም እንግዛ» ዬጌዛ። ሌሾር ኣዝሶ 24 የሱሳ ኡንትስ ሀራ ኣዝሶ ኦዴዛ፥ «ጾስ ካተትይ ፋ ዎታ ጋንጨ ሎኦ ዘር ዘሬዝ አ ኣዝዛ። 25 ዝን አስ ኡባይ ገንትን ኤ ሞርካይ ይኢ ግስተ ጋንጨ ሌሾ ዘሪ ቅቴዛ። 26 ግስታይ ድጪ ካእዝ ዎደ ሌሾካ ኤ ጋንጨ በንቴዛ። 27 «ጋደ ጎዳይ አይልታይ ጎዳይኮ Ꮊንጊ፥ ‹ጎዳዮ፥ ነ ዎታይድ ነ ሎኦ ዘር ዘረካሳ? የዝን፥ ሌሾ አናፕ የኤኔ?› ዬጌዛ። 28 «ኤ ኡንትኮ፥ ‹የያ ሞርከ ኦዛ› ዬጌዛ። «አይልታይ ጎዳይኮ፥ ‹ኑ Ꮊንጊ ሌሻ ሾዶድ ጋርክ ነ ኮይኔ?› ዬጌዛ። 29 «ዝን ኤ፥ ‹አቶ ቦችፓተ፤ ይ ሌሻ ሾድዝ ጎዳር ግስተካ ሾድንቶዳ። 30 ቦችፓተ፤ ማጾ ዎደ ሄሎዳይስ ዎላ ድጮ። የ ዎደ ማጽዛ አስታይ ሌሻ ቲናቲ ማጺ ታማ ጋንጨ ጹጎዳይስ ምርቀር ምርቀር ምርቆይታ። ዝን ግስታ ሺሺ ታ ሻላይድ ኦሎይታ› ዬጎዳ» ዬጌዛ። ሳናፍጨ ኣፈ ኣዝሶ ( ማር. 4:30-32 ፤ ሉቃ. 13:18-19 ) 31 ማ ሀራ ኣዝሶ ዬጊ ኦዴዛ፤ «ሳሎ ካተትይ ፐቲ አሲ ፋ ዎታ ጋንጨ ባኬዝ ሳናፍጨ ኣፈ ኣዝዛ። 32 የ ምት ኣፋይ ሀራ ም ኣፍታይፕ ጽቃ፥ ዝን ዶሊ ድጪ ሀራ ም ኡባይፕ ኣ ዳሚ ድጭዛ። እ ሻቅታይል አፋ ካፍታይ ኬጺ በቶድ ሄሎዳይስ ዳማ ም ማቅዛ» ዬጌዛ። እርሾ ኣዝሶ ( ሉቃ. 13:20-21 ) 33 ማቅካ፥ የሱሳ ሀራ ኣዝሶ ኦዴዛ፤ «ሳሎ ካተትይ ፐቲ ማቺ ሀይ ጎንገ ላ ኤኪ ሙኑቂ፥ ሙኑቃይ ደንዶዳይ ጋርክ ኤዛይድ ዳኬዝ እርሾ ኣዝዛ» ዬጌዛ። 34 የሱሳ ዎያይስ የ ኣዝሶ ኡባ ኦዴዛ። ኣዝሶ ባዝን ፐትባዝካ ኦደካያ። 35 ናባይ ፋ ማጻፋይ ጋንጨ፥ «ታኒ ታ ዶና፥ ኣዝሶር ዶዮዳ፤ ሳሎኔ ሳአ መንቴዛይፐ፥ ጌመዛና ታ ኦድዛ» ዬጊ ኦዴዛይ የይድ ፖልንቴዛ። ሌሾ ኣዝሳይስ ብርሽ 36 የሱሳ ዎይታ አሺ ካራ ገሌዛ። ኤ ታማርታይ ኤዝኮ ሺቂ፥ «ዎታይድ የዝ ሌሻይ ብል ኑስ ኦዶባ» ዬጌዛ። 37 ኤ ማሂ፥ «ሎኦ ዘር ዘሬዛይ አስ ናአ፥ 38 ዎታይ Ꮊ አላማ። ሎኦ ዘርይ ሳሎ ካተት ናእታ። ሌሻይ ጻላሄ ናእታ። 39 ሌሾ ዘሬዛይ ሞርከ ጻላሄ፥ ማጾ ዎዳይ ዎደ ዉርስ፥ ማጽዝታይ ኪታንችታ። 40 «ሌሻይ ማጽንቲ ታማ ጋንጨ ጹግንትዛይ ጋርክ ዎደ ዉርስላ Ꮊይ ጋርክ ሀኖዳ። 41 አስ ናአይ ፋ ኪታንችታ ኪቶዳ። ኡ ናጋራስ ሳንከ ማቄዝታኔ ኢታ ኦዝ ኡብታ ማጺ ኤ ካተትይፕ ከሶዳ። 42 ማጺ ሺሺ ዬፎኔ አች ጮንቺ የዝ ቶኦዋ ታማ ጋንጨ ኦሎዳ። 43 የ ዎደ ጽልታይ ፋ አዳይ ካተትይድ አዋ ጋርክ ፖኦዳ። ስእዝ ሀየ የዛይ ስኦ! 44 «ጾስ ካተትይ ዎታ ጋንጨ ሞግንቴዝ ሚሸ ኣዝዛ። ፐቲ አሲ የ ሚሻ ደንጊ ማሂ ሞጌዛ። ጋመ ኡፋይቲ Ꮊንጊ ፓስ የዛ ባዝ ኡባ ባይዚ የ ጋዳት ዎንጌዛ። 45 «የይ ጋርክ፥ ማ ሳሎ ካተትይ እንቆ ግዝ አልኦ ሹችታ ኮይዝ ዛልኤ አስ ኣዝዛ። 46 ጋመ አልኦ እንቆ ደንጊ Ꮊንጊ ፓስ የዛ ባዝ ኡባ ባይዚ ኤ ዎንጌዛ። ሞሎ አይክዝ ግተ ኣዝሶ 47 «ማ ጾስ ካተትይ አባ ጋንጨ ኦልንቴዝ ዱማ ዱማ ሞሎ ኮች አይክዝ ግተ ኣዝዛ። 48 ሞሎ አይክዝ አሳይ ሞሎ ግታይድ ኩምን አባፕ ጋጻ ከሴዛ። ኤዛይድ በቲ ሎኣ ሎኣ ቁሪ ዳቾ ጋንጨ ኦሌዛ፥ ዝን ኢታ ሞልታ አላ ኦሌዛ። 49 ዎደ ዉርስል የይ ጋርክ ሀኖዳ። ኪታንችታይ ይኢ ናጋራ ኦዝታ ጽልታይፕ ቁሮዳ። 50 ዬፎኔ አች ጮንቺ የዛ ቶኦዋ ታማ ጋንጨ ኦሎዳ። 51 «Ꮊ ኡቢታይ ይንትስ ገሌኔ?» ዬጊ ኡንታን ኦይጬዛ። ኡ ማሂ፥ «ኤ» ዬጌዛ። 52 የሱሳ፥ «ይኬ፥ ሳሎ ካተት ጹራ ኤኪ ህገ ታማርስዛ ኡቢታይ፥ ፋ ምንጄዝ ሻላይፕ ኦሮኔ ጭማ ከስዛ ሻሎ ጎዳ ኣዝዛ» ዬጌዛ። የሱሳና ናዝረተ ሄሌዝ እጾ ( ማር. 6:1-6 ፤ ሉቃ. 4:16-30 ) 53 የሱሳ Ꮊ ኣዝሳ ኦዲ ዉርሴዛይፕ ጉየ ኤዛይፕ ደንዲ ቅቴዛ። 54 ፋ የልንቴዝ ቢታ Ꮊንጊ አይሁድታይ ዎሳ ካራ ታማርሶ አይኬዛ። ኡ ማላ ባዝ ግ፥ «Ꮊ አይ Ꮊ ኤጨትኔ Ꮊ ማላታ ኦዛ ዎልቃ አናፕ ኤኬኔ? 55 Ꮊይ አናጻይ ናአ ባሳኔ? ኤ እንዳቲ ሱንይ ማይራሞ ባሳኔ? ኤ እሽታይ ያይቆባ፥ ዮሴፋ፥ ስሞናራኔ ይሁዳ ባሳኔ? 56 ኤ ምሹንካ ኑር የዙንና ባሳኔ? የዝን፥ Ꮊ አይ Ꮊ ኡባ አናፕ ኤኬኔ?» ዬጌዛ። 57 የይ ግሾስ፥ ኤ ግዝ ባዛ ኤካም እጼዛ። ዝን የሱሳ፥ «ናበ ፋ የልንቴዝ ቢታይዳኔ ፋ ካራ አሳይ ካለ ቦንችንቶያ» ዬጌዛ። 58 ኡ አማናም እጼዝ ግሾስ ጋመ ማላታ የ አቃይድ ኦካያ። |
The Word for the World Ethiopia