Luqaasa 3 - ኦሮ ጫቆ

ጻማቅዛ ዋንሳ ስብካተ

¹ ካታይ ጽባሮሳ ኦሮመ ቢታል ካዉትን፥ ታጶ እችን ላይር፥ ጰንጸ ጵላጾሳ ይሁዳ አቅስዛ ላይ ሄሮዶሳ ጋልላ አቅስዛ ላይ ኤ እሻ ፍልጶሳ ኢጹራሳኔ ጽራኮንዶሳ አቅስዛ ዎደ ልሳኖሳ አብላንሳና አቅስዛ ዎደ

² ሃናራኔ ቃያፋራ ቄሰ ሀላቃ ማቂ የዝን፥ ጾስ ቃላይ ዛክሬሳ ናአ ዋንሳኮ ሊዦ ጋ የኤዛ።

³ ዋንሳ፥ «ይ ናጋራይፕ ማቆይታኔ ጻማቅንቶይታ። ጾሳይ ይ ናጋራ አቶ ጎዳ» ዬጊ ታማርስታር ዮርዳኖሳ ቦርካ ሄራ የዝ ቢታ ኡባ Ꮊንጌዛ።

⁴ የይካ ናበ ኢስያሳ ፋ ማጻፋይድ፥ «ሊዦ ጋ ፋ ቃላ ቅ ኡዲ፥ ኡክዛ አይ ቃላይ፥ ‹ጎዳይስ ኦገ ሎእይታ፥ ጎሳካ ፕድ ኡዶይታ።

⁵ ሎጳ ኡቢታይ ኩሞ፥ አምባይኔ ደራይ ዝቂ ጎ። ዎቦ ኦጋይ ሉሎ፥ ጊገካ ጎሳይ ቅንጺ ጎ።

⁶ አሾ ማኤዝ አስ ኡብታይ፥ ጾሲ አሽዛና ቦኦ› » ግ ጻፍንቴዛይ ሀኔዛ።

⁷ ዋንሳ፥ ኤ ኩሸ ጻማቅንቶዳይስ የኤዝ ጋመ አሳይኮ፥ «ይንታኖ፥ ሾሽ ናኡን የኦዳይስ የዝ ቦቻይፕ ቡቶድ ጋርክ ይንታን ዞሬዛይ ኦኖ?

⁸ ይኬ፥ ይ ማቅ ቤዝዛ ሎኦ ኦሶ ኦይታ፥ ይ ዎዝናር፥ ‹ኑስ፥ ኑ አዳይ አፍራመ የዛ ግ ጋይርፓተ።› Ꮊና ስኦይታ፥ Ꮊ ሹችታይፕ ጾሳይ አፍራመስ ናአ ከሶዳይስ ዳንዳእዛ።

⁹ ዬዛኮ፥ ጋንደ ምንጻይስ ጻጳይድ የዛ። ይኬ፥ ሎኦ ኣፈ ኣፎዋ ም ኡቢታይ ጋችንቲ ታማ ጋንጨ ዎዳ» ዬጌዛ።

¹⁰ አሳይ፥ «የዝን ኑኒ አብ ኦ?» ዬጊ ኦይጬዛ።

¹¹ ዋንሳ ማሂ፥ «ናምኢ አፍላ የዛ አሲ ባዛይስ እንጎ። ካ የዛይ ባዛይስ ሻጎ» ዬጌዛ።

¹² ቃራጸ ጋችስዝታይ ጻማቅንቶዳይስ ይኢ፥ «አስታማራዮ፥ ኑ አብ ኡዶ?» ዬጌዛ።

¹³ ኤ ማሂ፥ «ይንታን ኪቴዛንፕ ኣ ኤክፓተ» ዬጌዛ።

¹⁴ ማ ዎታዳርታይ ይኢ፥ «ኑ አብ ኡዶ» ዬጊ ኦይጬዛ። ዋንሳ፥ «ኦባዝካ ዎልቃር ዳፍ ኤክፓተ፥ ኦናካ ዎርዶር ሞትፓተ፥ ይ ዳሞዛይ ይንትስ ግዶዳ» ዬጌዛ።

¹⁵ አሳይ ክርስቶሳ ኡፋይሳር ናግታር የዛ ግሾ ዋንሳና፥ «ኤ ክርስቶሳ ማቃደሻ?» ዬጊ ኡ ፋ ዎዝናይድ ቆፕዛ።

¹⁶ ዋንሳ ኡብታይስ ማሂ፥ «ታኒ ይንታን ሃር ጻማቅዛ፥ ዝን ታፕ ኣ ዎልቃምዛይ የኦዳ። ታኒ ኤ ጫማይ ዎዶራ ብሎዳይስ ቤዞዋ አሲ። ኤ ይንታን ጌሻ አያናራኔ ታማር ጻማቆዳ።

¹⁷ ዉዱማ የዝ ካ ጌሾዳይስ ፕይ ኤ ኩሻይድ የዛ። ጌዤዝ ካ ፋ ሻላይድ ቆሎዳ፤ ቡናና ቦዋ ታማር ጹጎዳ» ዬጌዛ።

¹⁸ ማ ዋንሳ አሳ ጋመ ዞረ ዞሪ ዎንግለ ሳባኬዛ።

¹⁹ ዝን ዋንሳ ሄሮዶሳ ፋ እሻይ ማቻት፥ ሄሮድያዳ፥ ኤኬዝ ግሾኔ ሀራ ኢታ ኦስታ ኦዝ ግሾስ ካጬዝ ዎደ

²⁰ ሄሮዶሳ ካሰሳይል አፋ ሀራ ኢታ ባዝ ኡባ ጉጂ ዋንሳና ዎይነ ገልሴዛ።

የሱሳ ጻማቅንቶ

²¹ ዎያይ ኡባይ ጻማቅንቴዛይፕ ጉየ፥ የሱሳካ ማ ጻማቅንቴዛ። ኤ ዎሶዳር ሳሎ ዶይንቴዛ፥

²² ጌሻ አያናይ ሆለ ጋርከ ማቂ ኤዛል አፋ ዎዛ። ሳሎፕ «ታኒ ቃዛ ናአይ ነና፤ ነ ታና ኡፋይስዛ ዬግዝ» ቃላ የኤዛ።

የሱሳ የለት ጹስ

²³ የሱሳ ታማርሶ አይኮዳር ኤስ ሀስታም ላይ ዝን፥ አሳይ ኤዛ ዮሴፋ ናአ ግ ቆፔዛ። ዮሴፋ ኤለ ናአ፥

²⁴ ኤለ ማተ ናአ፥ ማተ ለወ ናአ፥ ለወ ምልካ ናአ፥ ምልካ ዮና ናአ፥ ዮና ዮሴፋ ናአ፥

²⁵ ዮሴፋ ማታተ ናአ፥ ማታተ አሞጸ ናአ፥ አሞጸ ናሆመ ናአ፥ ናሆመ አስሊመ ናአ፥ አስሊመ ናገ ናአ፥

²⁶ ናገ ማአተ ናአ፥ ማአተ ማታትየ ናአ፥ ማታትየ ሳማየ ናአ፥

²⁷ ሳማየ ዮሴፋ ናአ፥ ዮሴፋ ዮዳ ናአ፥ ዮዳ ዮናነ ናአ፥ ዮናነ ራሰ ናአ፥ ራሰ ዘሩባበላ ናአ፥ ዘሩባበላ ሳላትያለ ናአ፥ ሳላትያለ ኔራ ናአ፥

²⁸ ኔራ ምልካ ናአ፥ ምልካ ሃደ ናአ፥ ሃደ ቆሳመ ናአ፥ ቆሳመ ኤልሞዳኔ ናአ፥ ኤልሞዳኔ ኤረ ናአ፥

²⁹ ኤረ ዮሴኤ ናአ፥ ዮሴኤ አላዛራ ናአ፥ አላዛረ ዮራመ ናአ፥ ዮራመ ማጻተ ናአ፥ ማጻተ ለወ ናአ፥

³⁰ ለወ ስሞነ ናአ፥ ስሞና ይሁዳ ናአ፥ ይሁዳ ዮሴፋ ናአ፥ ዮሴፋ ዮናነ ናአ፥ ዮናነ ኤልያቀመ ናአ፥

³¹ ኤልያቀመ ማልየ ናአ፥ ማልየ ማይናነ ናአ፥ ማይናነ ማጻተ ናአ፥ ማጻተ ናታነ ናአ፥ ናታነ ዳዉተ ናአ፥

³² ዳዉተ ኢሳየ ናአ፥ ኢሳየ ኢዮቤደ ናአ፥ ኢዮቤደ ቦኤዛ ናአ፥ ቦኤዛ ሳልሞና ናአ፥ ሳልሞና ናአሶና ናአ፥

³³ ናአሶና አምናዳባ ናአ፥ አምናዳባ ራመ ናአ፥ ራመ አርና ናአ፥ አርነ አስሮመ ናአ፥

³⁴ አስሮመ ፓረሰ ናአ፥ ፓረሰ ይሁዳ ናአ፥ ይሁዳ ያይቆባ ናአ፥ ያይቆባ እሳቃ ናአ፥ ይሳቃ አፍራመ ናአ፥ አፍራመ ታር ናአ፥

³⁵ ታር ናኮረ ናአ፥ ናኮረ ሳሩገ ናአ፥ ሳሩገ ረሁ ናአ፥ ረሁ ፋላቃ ናአ፥ ፋላቃ ኤቤራ ናአ፥ ኤቤሮ ሴላ ናአ፥

³⁶ ሴላ ቃይናመ ናአ፥ ቃይናመ አርፋክሳዳ ናአ፥ አርፋክሳደ ሴመ ናአ፥ ሴመ ኖሄ ናአ፥ ኖሄ ላመ ናአ፥

³⁷ ላመሄ ማቱሳላ ናአ፥ ማቱሳላ እኖኬ ናአ፥ ሄኖኬ ያረደ ናአ፥ ያረደ ማላልኤላ ናአ፥ ማላልኤላ ቃይናነ ናአ፥

³⁸ ቃይናነ ሄኖሳ ናአ፥ ሄኖሰ ሴተ ናአ፥ ሴተ አዳማ ናአ፥ አዳማ ጾስ ናአ።