Ibraawe 8 - ኦሮ ጫቆ

የሱሳ ኦሮ ጫቆ ቄስታይ ሀላቃ

¹ ኑኒ ኦዴዝ ባዛይፕ ኣፈ ቆፋይ የያ። ሳሎ ኡባፕ አፋ ጾስ ዙፋናይፕ ኡሻች ባጋ በቴዝ Ꮊይ ጋርክ ቄሰ ሀላቃይ ኑስ የዛ።

² ኤ ኦዛይ ቱማ ዱንካነ ማቄዝ ጌሽ አቆ፥ የ ዱንካናት ቱክንቴዛና አስ ኩሸር ባዝን ጎዳይ ኩሸራ።

³ ቄሰ ሀላቃ ኡባይ ሙጻታስኔ ያርሾ ያርሾዳይስ ሹምንትዛ። የይ ግሾስ፥ Ꮊ ቄሳይ ያርሾዳይስ ፐትባዚ የዞዳይስ ኮሽዛ።

⁴ ህገ ኪትዛይ ጋርክ ያርሽዛ ቄስታይ የዝ ግሾስ ክርስቶሳ ሳአ የዛ ባዝ ማቄዛኮ ቄሰ ባያ።

⁵ ኡንቲ ቄሰት ኦዛ ዱንካናይ ሳሎ የዛይስ ኣዝሶኔ ኤሾ። ሙሰ ዱንካና ኤስዛ ዎደ ጾሲ ኤኮ፥ «ታኒ ነና ደረል አፋ ቤዜዝ ኣዝሳ ካሊ ናግንቶር ኦባ» ዬጌዛ።

⁶ Ꮊት ማቅኮ የሱሳ ጋንጨ ገሊ ዳቦዛ ቃላ ጫቃይ፥ ቲና ቃላ ጫቃይፕ ኣዛይ ግሾስ ኤ ኤኬዝ ኦሳይ ኡንቲሳይፕ ኣዛ። የይ ኤቄዛይ ኣዝ ኡፋይስ ቃላይዳ።

⁷ ቲና ቃላ ጫቃይድ ቦሮ ባ ማቄዛኮ ናምእን ቃላ ጫቆ ኮሾያ።

⁸ ዝን ጎዳይ ኤዛ ቦሪ፥ Ꮊይ ጋርክ ዬጌዛ፦ «ታኒ እስሬለ አሳይራኔ ይሁዳ አሳይራ ኦሮ ቃላ ጫቆ ጫቂዛ ዎደ የኦዳ።

⁹ የ ቃላ ጫቃይ ታ ኡ አድታይ ግብጸ ቢታፕ ኩሸ አይኪ፥ ጎቺ ከሴዝ ዎደ ኡንታር ጫቄዝ ጫቃይ ጋርክ ባያ። ጎዳይ ኡንቲ ታ ጫቃይድ አማንንተካዛይ ግሾስ ታኒ ኡንታን ኦሊ አሼዛ ዬግዛ።

¹⁰ ዝን ይከፕ ጉየ እስሬለ አሳይራ ታ ጫቆድ ጫቃይ Ꮊያ ዬግዛ ጎዳይ። ታኒ ታ ህጋ ኡ ካሃይድ ጋዶዳ፤ ኡ ዎዝናይዳካ ጻፎዳ። ታኒ ኡ ጾሳ ማቆዳ፤ ኡንትካ ታ ወያ ማቆዳ።

¹¹ ኡንታፕ ኦንካ ፋ ሾራ ዎይ ፋ እሻ፥ ‹ጎዳ ኤሮባ› ዬጊ ታማርሳሚ። ኡንቲ ጽቃፕ ዳማ ሄሎዳይስ ኡባይ ታና ኤሮዳ።

¹² ታኒ ኡ ናቃ አቶ ጎዳ፤ ኡ ቆሃ ማሂ ቆፓሚ» ዬግዛ።

¹³ ጾሲ Ꮊ ጫቃ «ኦሮ ቃላ ጫቆ» ጉሳይ ቲናሳ ጭማ ማሄዛ። ይኬ፥ ጭማይኔ ጬጋይ ብዛ ዎደ ሄሌዛ።