Tito 3 - Mixteco del suroeste de Tlaxiaco Oaxaca

Na̱sa kueꞌnu rá ñɨvɨ kúneí iniꞌ ráa Cristo

¹ Xinákúꞌun nú iniꞌ rá ñɨvɨ kúneí iniꞌ ráa Cristo ya̱ kɨꞌɨ ráa chi̱ji naꞌá rá te̱e tátúníꞌ jín rá te̱e nísotíñú, ya̱ kaníjiá ráa rává, jín ya̱ koo káñá iniꞌ ráa saꞌá ráa nta̱ká tiñu váꞌa,

² jín ya̱ nkákuíyuꞌú ráa jie̱ꞌe̱ꞌ ni ɨɨn ñɨvɨ, jín ya̱ nkántátúꞌún ráa, chisaꞌ koo ñunkúún iniꞌ ráa, jín ya̱ koo másúꞌ iniꞌ ráa jín nɨꞌɨ ñɨvɨ.

³ Chi nékúvi sunisaá maáó nkuvi‑ó ñɨvɨ naanꞌ, jee nku̱jiááꞌ iniꞌ‑ó, jee maáó nika̱ꞌ ni̱nu̱ꞌ iniꞌ rá tu̱ꞌun xínáꞌví, jee nyɨ̱ꞌɨ‑ó chi̱ji xi̱ntíín kéꞌín ya̱ níyo iniꞌ jín xi̱ntíín kéꞌín ya̱ sɨ̱ɨ̱ꞌ iniꞌ, jee niva̱ꞌa ñaꞌnu‑ó, jee ni̱yo uꞌvi iniꞌ‑ó, jee nta̱ꞌvi̱ꞌ iniꞌ ñɨvɨ nne̱ꞌyá ráa yó, jee nta̱ꞌvi̱ꞌ iniꞌ‑ó nne̱ꞌyá‑ó ɨɨn inka‑ó.

⁴ Soo Ndiosíꞌ, ya̱ nátavaꞌ re̱ꞌ yó nu̱u̱nꞌ kua̱chi‑ó síkáku re̱ꞌ yó, sáá nstúvi re̱ꞌ ya̱ kúváꞌa iniꞌ re̱ꞌ néꞌyá re̱ꞌ yó, jín ya̱ ñúnúunꞌ re̱ꞌ ñɨvɨ,

⁵ jee sikáku re̱ꞌ yó nsú jie̱ꞌe̱ꞌ tiñu na̱a̱ꞌ nsa̱ꞌá‑ó ví‑i, chisaꞌ sikáku re̱ꞌ yó chi nku̱náꞌví iniꞌ re̱ꞌ nne̱ꞌyá re̱ꞌ yó. Jee nsi̱káku re̱ꞌ yó jie̱ꞌe̱ꞌ ya̱ Ta̱chi̱ꞌ Ííꞌ re̱ꞌ nna̱sánoo ánímaꞌ‑ó, jee suꞌva nsa̱ꞌá re̱ꞌ ya̱ nna̱kaku jiáá tuku‑ó, jín jie̱ꞌe̱ꞌ ya̱ nsama re̱ꞌ iniꞌ‑ó sáva nujiáá‑ó.

⁶ Ta̱chi̱ꞌ Ííꞌ vá ví ya̱ ntaji Ndiosíꞌ nu̱u̱nꞌ‑ó jie̱ꞌe̱ꞌ Jesucristo, ya̱ nátavaꞌ re̱ꞌ yó nu̱u̱nꞌ kua̱chi‑ó síkáku re̱ꞌ yó, jee ntu nñúkúꞌva iniꞌ re̱ꞌ ntaji re̱ꞌ maá.

⁷ Ntaji Ndiosíꞌ maa sáva ni̱ꞌi̱nꞌ‑ó ta̱ꞌvi̱ꞌ ya̱ kutekuꞌ‑ó nɨ́ɨ́nkání jín re̱ꞌ, ya̱ íyó tu̱neí iniꞌ‑ó, chi nsiíyo re̱ꞌ kua̱chi nsa̱ꞌá‑ó sáva ku̱ꞌvayuꞌú re̱ꞌ ya̱ kino̱o na̱a̱ꞌ‑ó nu̱u̱nꞌ re̱ꞌ, chi íyó mániꞌ iniꞌ re̱ꞌ néꞌyá re̱ꞌ yó, ya̱ ntu íyó ni̱ꞌi̱nꞌ‑ó maa.

⁸ Tu̱ꞌun yaꞌá ví máá na̱a̱ꞌ nijia. Jee kuíni ni̱ꞌ, ya̱ íchí sanáaꞌ ni̱ꞌin nú rá tu̱ꞌun yaꞌá nu̱u̱nꞌ rá ñɨvɨ kúneí iniꞌ ráa Ndiosíꞌ, sáva kɨtíñú ráa saꞌá ráa rá tiñu váꞌa. Jee ya̱ váꞌa víꞌí ví rá tu̱ꞌun yaꞌá, jee íyótiñu‑u nu̱u̱nꞌ rá ñɨvɨ.

⁹ Soo chusává nú nu̱u̱nꞌ tu̱ꞌun naanꞌ jie̱ꞌe̱ꞌ kántátúꞌun ñɨvɨ, jín nu̱u̱nꞌ tu̱ꞌun káꞌánꞌ jie̱ꞌe̱ꞌ na̱sa va̱ji rá jííꞌ‑ó yanaꞌán, jín nu̱u̱nꞌ tuntíxín, jín nu̱u̱nꞌ kántátúꞌun ñɨvɨ jie̱ꞌe̱ꞌ tu̱ꞌun ley njia̱ꞌa Ndiosíꞌ nu̱u̱nꞌ Israel, chi ntu íyótiñu rá tu̱ꞌun vá, chi tu̱ꞌun saɨn ni ví.

¹⁰ Retú íyó ɨɨn ñɨvɨ ya̱ núkú ya̱ sasɨ́ɨ́n‑ɨ rá ñanitáꞌán‑ó ya̱ yɨ́ꞌɨ́ ichi Cristo, stúꞌva maa ɨɨn íchí áxí ya̱ uvíꞌ íchí. Jee retú ntu sáma‑a, tavaꞌ maa nu̱u̱nꞌ grupo vá kɨ̱ꞌɨ̱nꞌ‑ɨ.

¹¹ Chi jíníꞌ nú ya̱ ñɨvɨ suꞌva stívɨ́‑ɨ maáa, jín ya̱ sáꞌá‑a kua̱chi, jee maáa sáꞌá kini maáa.

Tu̱ꞌun ya̱ nta̱túníꞌ Pablo nu̱u̱nꞌ Tito

¹² Sáá tají ni̱ꞌ Artemas áxí Tíquico nu̱u̱nꞌ nú, jee saꞌá fesáꞌ kɨ̱ꞌɨ̱nꞌ ñamaꞌ nú kɨ̱ne̱ꞌyá nú nuꞌuꞌ ñuunꞌ Nicópolis. Chi ñani xi̱ni̱ꞌ ni̱ꞌ kuneeꞌ ni̱ꞌ yukuán rá yo̱o̱ꞌ kúvíjin.

¹³ Kuniꞌvɨꞌ iniꞌ nú chineí nú Zenas, te̱e nsu̱kuáꞌa ley ya̱ chíneí‑i rá ñɨvɨ, jín nu̱u̱nꞌ Apolos, sáva kuvi kɨ̱ꞌɨ̱nꞌ ráa nu̱u̱nꞌ kɨ̱ꞌɨ̱nꞌ ráa. Jee koto nú ráa ya̱ jíniñúꞌún ráa, sáva ntu̱náꞌ kumaniꞌ nu̱u̱nꞌ ráa.

¹⁴ Jee rá ñanitáꞌán‑ó íyó kutu̱ꞌva ráa kɨtíñú ráa saꞌá ráa tiñu váꞌa, sáva kɨtuvi ráa jín rá ñɨvɨ jíniñúꞌún ya̱ kutekuꞌ rává, jee sáva nkuéꞌnu ka̱ꞌá ráa.

Nu̱u̱nꞌ nɨꞌɨ nta̱jí Pablo tu̱ꞌun káva̱ꞌa jee ni̱ka̱nꞌ táꞌvíꞌ re̱ꞌ nu̱u̱nꞌ Ndiosíꞌ jie̱ꞌe̱ꞌ Tito

¹⁵ Nta̱ká ñɨvɨ nééꞌ jín ni̱ꞌ yaꞌá táji ráa ɨɨn tu̱ꞌun káva̱ꞌa nu̱u̱nꞌ nú. Ku̱ꞌva xá ɨɨn tu̱ꞌun káva̱ꞌa nu̱u̱nꞌ rá ñɨvɨ nuún kúneí iniꞌ ráa Cristo, ya̱ ñúnúunꞌ ránuꞌuꞌ. Na̱ ka̱ꞌ koo ma̱ni̱ꞌ iniꞌ Ndiosíꞌ ka̱ꞌ kune̱ꞌyá re̱ꞌ nta̱ká ránoꞌó. Suꞌva koo. Amén.