Romanos 9 - Mixteco del suroeste de Tlaxiaco Oaxaca

Nka̱ji Ndiosíꞌ rá ñɨvɨ Israel

¹ Yɨ́ꞌɨ́ ni̱ꞌ nu̱u̱nꞌ Cristo jee ya̱ naáꞌ vá káchíꞌ ni̱ꞌ jee ntu kátúꞌún ni̱ꞌ, jee yɨ́ꞌɨ́ ni̱ꞌ naꞌá Ta̱chi̱ꞌ Ííꞌ Ndiosíꞌ jee ne̱ ánímaꞌ ni̱ꞌ jíníꞌ ni̱ꞌ ya̱ naáꞌ

² ya̱ íyó ni̱ꞌ jín tu̱nkuéká iniꞌ ni̱ꞌ jee yɨ́táꞌán ne̱ yájíꞌ iniꞌ ánímaꞌ ni̱ꞌ

^3-4 jie̱ꞌe̱ꞌ rá ñanitáꞌán ni̱ꞌ, ya̱ kúvi ñɨvɨ táꞌán tataꞌ ni̱ꞌ, ya̱ kúvi rá ñɨvɨ tataꞌ Israel. Chi kuvi niyo iniꞌ ni̱ꞌ ya̱ xinóꞌo Ndiosíꞌ nuꞌuꞌ jín ya̱ kusɨ́ɨ́n ni̱ꞌ nu̱u̱nꞌ Cristo nékúvi, sáva chunáán ni̱ꞌ maáníꞌ nu̱u̱nꞌ Ndiosíꞌ nu̱u̱nꞌ kua̱chi ráa nékúvi, retú sukuán kúvi natavaꞌ ni̱ꞌ ráa nu̱u̱nꞌ kua̱chi ráa sikáku ni̱ꞌ ráa nékúvi. Chi nna̱keꞌen Ndiosíꞌ ráa sáva kuvi ráa se̱ꞌya re̱ꞌ. Jee nteñu vi̱ko̱ꞌ ñanu̱te̱ꞌ re̱ꞌ nneeꞌ re̱ꞌ jín ráa. Jee nsa̱ꞌá re̱ꞌ tratúꞌ jín ráa. Jee nni̱ꞌi̱nꞌ ráa tu̱ꞌun nta̱túníꞌ re̱ꞌ ya̱ njia̱ꞌa re̱ꞌ nu̱u̱nꞌ Moisés. Jee nxi̱néꞌénꞌ re̱ꞌ ráa na̱sa kuneñu̱ꞌun ráa re̱ꞌ. Jee kue̱ꞌe̱ꞌ jie̱ꞌe̱ꞌ nchi̱sóyuꞌú re̱ꞌ nu̱u̱nꞌ ráa ya̱ saꞌá re̱ꞌ ya̱ váꞌa nu̱u̱nꞌ ráa.

⁵ Jee suviráa kúvi ichiyúkúnꞌ váji ráa nu̱u̱nꞌ rá tátáꞌ jííꞌ ráa ya̱ nku̱ñáꞌnú nu̱u̱nꞌ Israel yanaꞌán. Jee nu̱u̱nꞌ tataꞌ ichiyúkúnꞌ ráa nkene Cristo sáá nkiji re̱ꞌ nkuvi re̱ꞌ te̱e ñunéꞌyúꞌ. Jee suvire̱ꞌ vá kúvi Ndiosíꞌ ya̱ tátúníꞌ re̱ꞌ nu̱u̱nꞌ kua̱íyó ya̱ íyó, jee netuꞌ kúvi re̱ꞌ nɨ́ɨ́nkání. ¡Suꞌva koo, amén!

⁶ Soo nsáꞌ jíta Tu̱ꞌun Ndiosíꞌ, chi nsú ntáká rá ñɨvɨ ya̱ kúvi se̱ꞌya ichiyúkúnꞌ váji nu̱u̱nꞌ Israel kúvi nijia ráa rá ñɨvɨ Israel [ya̱ níꞌínꞌ ráa ya̱ nchi̱sóyuꞌú re̱ꞌ].

⁷ Ni nsú ntáká rá se̱ꞌya ichiyúkúnꞌ nkene nu̱u̱nꞌ Abraham kúvi nijia ráa se̱ꞌya re̱ꞌ. Chisaꞌ nkachiꞌ Ndiosíꞌ nu̱u̱nꞌ re̱ꞌ: “Nu̱u̱nꞌ se̱ꞌya nú Isaac kiji ráa ya̱ kuvi se̱ꞌya ichiyúkúnꞌ nú.”

⁸ Tu̱ꞌun yaꞌá kuíni kachiꞌ ya̱ nsú kua̱chi jie̱ꞌe̱ꞌ rá se̱ꞌya ni̱ñɨ̱ꞌ Abraham kúvi ráa se̱ꞌya Ndiosíꞌ. Chisaꞌ rá se̱ꞌya ya̱ nchi̱sóyuꞌú Ndiosíꞌ nu̱u̱nꞌ ráa ví rá nkuna̱a̱ꞌ iniꞌ Ndiosíꞌ ya̱ kúvi nijia ráa se̱ꞌya ichiyúkúnꞌ Abraham.

⁹ Chi tu̱ꞌun ya̱ nchi̱sóyuꞌú Ndiosíꞌ nu̱u̱nꞌ Abraham ví yaꞌá: “Nɨ́ tiempúꞌ yaꞌá kiji ni̱ꞌ, jee koo ɨɨn se̱ꞌya yɨ́ɨ́ ñasɨ́ꞌɨ́ nú Sara”, nkachiꞌ Ndiosíꞌ nu̱u̱nꞌ re̱ꞌ.

¹⁰ Jee nsú kua̱chi yaꞌá ni, chi sunisaá nna̱nise̱ꞌya Rebeca u̱vi̱ꞌ nchíkɨ́n nsa̱ꞌá métúꞌún yɨɨ́ ña, ya̱ kúvi Isaac ya̱ kúvi jííꞌ‑ó yanaꞌán,

^11-13 Chi ne̱ sáá ntiáꞌan ka̱ꞌ kaku ni núvíꞌ ráa, jee ni ntiáꞌan ka̱ꞌ ná saꞌá ráa, ni ya̱ váꞌa, ni ya̱ niváꞌa, jee nkachiꞌ Ndiosíꞌ nu̱u̱nꞌ Rebeca: “Ya̱ ñáꞌnú káꞌ kɨtíñú re̱ꞌ nu̱u̱nꞌ ya̱ súchí ka̱ꞌ.” Suni sukuán níso nu̱u̱nꞌ Tutuꞌ Ííꞌ: “Nñunu̱u̱nꞌ ni̱ꞌ Jacob, soo Esaú chi nta̱ꞌvi̱ꞌ iniꞌ ni̱ꞌ néꞌyá ni̱ꞌ maa.” Sukuán nkachiꞌ Ndiosíꞌ sáva kino̱o kutú ya̱ nkuna̱a̱ꞌ iniꞌ re̱ꞌ sáni nka̱ji re̱ꞌ ɨɨn ráa, sáva nsú jie̱ꞌe̱ꞌ ya̱ nsa̱ꞌá ni núvíꞌ ráa nka̱ji re̱ꞌ maa, chisaꞌ jie̱ꞌe̱ꞌ sáni kuíni maáréꞌ ya̱ nkana re̱ꞌ maa.

¹⁴ ¿Ná kúvi ya̱ kachiꞌ‑ó, résa? ¿Á kachiꞌ‑ó ya̱ ntu náaꞌ sáꞌá Ndiosíꞌ? ¡Ni ntu̱ví kuitɨꞌ!

¹⁵ Chi nkachiꞌ Ndiosíꞌ nu̱u̱nꞌ Moisés: “Koo tu̱náꞌví iniꞌ ni̱ꞌ kune̱ꞌyá ni̱ꞌ ne̱ ni ɨɨn ya̱ kuíni ni̱ꞌ koo tu̱náꞌví iniꞌ ni̱ꞌ maa, jee kunáꞌví iniꞌ ni̱ꞌ kune̱ꞌyá ni̱ꞌ néni ɨɨn ya̱ kuíni ni̱ꞌ kunáꞌví iniꞌ ni̱ꞌ maa.”

¹⁶ Saáva káji Ndiosíꞌ ñɨvɨ nsú jie̱ꞌe̱ꞌ ya̱ kuíni ñɨvɨ ví‑i, ni nsú jie̱ꞌe̱ꞌ ya̱ núnasɨ́ ñɨvɨ ví‑i, chisaꞌ jie̱ꞌe̱ꞌ Ndiosíꞌ ya̱ íyó tu̱náꞌví iniꞌ re̱ꞌ maa.

¹⁷ Chi káchíꞌ nu̱u̱nꞌ Tutuꞌ Ííꞌ ya̱ nkaꞌanꞌ Ndiosíꞌ jín Faraón [ya̱ nkuvi te̱e ya̱ nta̱túníꞌ ñuunꞌ Egipto]: “Jie̱ꞌe̱ꞌ yaꞌá nxi̱náa ni̱ꞌ noꞌó kunisotíñú nú, sáva kuatíñú ni̱ꞌ noꞌó sáva stúvi ni̱ꞌ fuersáꞌ ííꞌ ni̱ꞌin ni̱ꞌ, sáva te̱ku̱tu̱ꞌún jie̱ꞌe̱ꞌ ni̱ꞌ nu̱u̱nꞌ ñɨvɨ kua̱íyó ñɨ̱vɨ́”, nkachiꞌ Ndiosíꞌ.

¹⁸ Saáva íyó tu̱náꞌví iniꞌ re̱ꞌ néꞌyá re̱ꞌ néni ɨɨn ñɨvɨ ya̱ kuíni re̱ꞌ. Jee saꞌá ni̱ꞌin re̱ꞌ ánímaꞌ néni ɨɨn ñɨvɨ ya̱ kuíni re̱ꞌ ya̱ kuni̱ꞌin iniꞌ.

¹⁹ Soo sa̱naanꞌ kachiꞌ ɨɨn rán nu̱u̱nꞌ ni̱ꞌ: “Retú sukuán kuíni re̱ꞌ, ¿na̱ jie̱ꞌe̱ꞌ chi chíkuáchi Ndiosíꞌ si̱kɨ̱ꞌ‑ó, résa? Chi, ¿né ɨɨn kúvi kasɨꞌ nu̱u̱nꞌ ya̱ kuíni re̱ꞌ saꞌá re̱ꞌ rúsa?”

²⁰ Jee noꞌó, ¿né ɨɨn kúvi nú ya̱ níkó yuꞌú nú nu̱u̱nꞌ Ndiosíꞌ? Jee nantíñú sáꞌá, ¿á kachiꞌ‑i nu̱u̱nꞌ maáréꞌ ya̱ sáꞌá re̱ꞌ maa?: “¿Na̱ kuvi chi nsa̱ꞌá nú nuꞌuꞌ suꞌva?”

²¹ Áxí maá te̱e sáꞌá ki̱sɨ, ¿á ntu íyó kúvi saꞌá re̱ꞌ sáni kuíni re̱ꞌ jín ñuꞌun nkíxín, sáva jín ɨɨn ni ñujien ne̱ꞌyu̱ꞌ ñunkíxín vá kúvi saꞌá re̱ꞌ ɨɨn ki̱sɨ váꞌa máá viiꞌ ya̱ kuatíñú ñunkúún jee inka ka̱ꞌ ki̱sɨ láꞌví?

²² Jee, ¿á ntu̱ví váꞌa ya̱ suni sukuán sáꞌá Ndiosíꞌ?, chi kuíni Ndiosíꞌ stúvi re̱ꞌ ya̱ xinóꞌo re̱ꞌ ñɨvɨ jie̱ꞌe̱ꞌ kua̱chi ráa chi kítɨ́ꞌ iniꞌ re̱ꞌ néꞌyá re̱ꞌ ráa jee kuíni re̱ꞌ saꞌá re̱ꞌ ya̱ kukáꞌnú iniꞌ nɨꞌɨ jie̱ꞌe̱ꞌ fuersáꞌ ííꞌ ni̱ꞌin níso re̱ꞌ, soo neí káꞌnú íyó neí iniꞌ re̱ꞌ jiéꞌnéꞌ iniꞌ re̱ꞌ néꞌyá re̱ꞌ rá ñɨvɨ ya̱ íyó ni̱ꞌi̱nꞌ ráa ya̱ kítɨ́ꞌ iniꞌ re̱ꞌ xinóꞌo re̱ꞌ ráa saá váji ráa ya̱ xináánꞌ re̱ꞌ ráa.

²³ Jee sukuán neí káꞌnú íyó iniꞌ re̱ꞌ sáva sikúkáꞌnú re̱ꞌ iniꞌ kua̱íyó ya̱ viiꞌ nasɨ́kuitɨꞌ kúñáꞌnú re̱ꞌ. Sukuán sáꞌá re̱ꞌ jín‑ó ya̱ nku̱náꞌví iniꞌ re̱ꞌ yó, ya̱ nsa̱ꞌá túꞌva re̱ꞌ yó ne̱ xíꞌna ka̱ꞌ sáva saꞌá re̱ꞌ ya̱ kuñáꞌnú‑ó jín re̱ꞌ.

²⁴ Jee maáórán suni nkana re̱ꞌ yó kɨꞌɨ‑ó nu̱u̱nꞌ re̱ꞌ, jee nsú kua̱chi nteñu rá ñɨvɨ Israel nkana re̱ꞌ ñɨvɨ chi suni rá ñɨvɨ ya̱ ntu kúvi Israel.

²⁵ Suni suꞌva káchíꞌ nu̱u̱nꞌ Tutuꞌ Ííꞌ ya̱ ntee Oseas: Kachiꞌ ni̱ꞌ jie̱ꞌe̱ꞌ rá ñɨvɨ ya̱ ntu nkúvi ñɨvɨ ni̱ꞌ ya̱ ñɨvɨ ni̱ꞌ ví ráa. Jee kachiꞌ ni̱ꞌ jie̱ꞌe̱ꞌ rá ñɨvɨ ya̱ ntu nñúnúunꞌ ni̱ꞌ, ya̱ suviráa ví ya̱ ñúnúunꞌ ni̱ꞌ.

²⁶ Jee ne̱ nu̱u̱nꞌ nkachiꞌ ni̱ꞌ nu̱u̱nꞌ ráa: “Ntu nkúvi rán ñɨvɨ ni̱ꞌ”, jee yukuán kuna̱ní rán se̱ꞌya Ndiosíꞌ tékúꞌ. Nkachiꞌ Ndiosíꞌ.

²⁷ Jee suni nkaꞌanꞌ ni̱ꞌin Isaías suꞌva jie̱ꞌe̱ꞌ rá ñɨvɨ Israel: Súnika̱ꞌ kue̱ꞌe̱ꞌ nasɨ́kuitɨꞌ rá se̱ꞌya ichiyúkúnꞌ váji nu̱u̱nꞌ Israel kuéntáꞌ kúvi kue̱ꞌe̱ꞌ ñuítɨ́ nteñúꞌún, soo kua̱chi yakuꞌ ráa ni vá natavaꞌ Ndiosíꞌ ráa nu̱u̱nꞌ kua̱chi ráa sikáku re̱ꞌ ráa.

²⁸ Chi I̱toꞌoꞌ‑ó Ndiosíꞌ jee ñamani sikúnkuvi na̱a̱ꞌ re̱ꞌ tu̱ꞌun re̱ꞌ ya̱ nsa̱náaꞌ re̱ꞌ ya̱ chunáán rá ñɨvɨ ñɨ̱vɨ́ jie̱ꞌe̱ꞌ kua̱chi ráa. Káchíꞌ nu̱u̱nꞌ Tutuꞌ Ííꞌ.

²⁹ Jee suꞌva nkachiꞌ ya̱chi̱ꞌ Isaías ya̱ koo ichinúúnꞌ: Chi máá maá Ndiosíꞌ ya̱ kúvi I̱toꞌoꞌ nɨꞌɨ rá najiáꞌáꞌ ííꞌ re̱ꞌ, jee retánꞌ ntu nxínóo re̱ꞌ yakuꞌ tataꞌ ichiyúkúnꞌ‑ó, nékúvi, jee vitan naanꞌ‑ó, nékúvi, íyó‑ó kuéntáꞌ ñɨvɨ ñuunꞌ Sodoma jín ñuunꞌ Gomorra, ya̱ nɨꞌɨ ráa nxi̱náánꞌ re̱ꞌ. Nkachiꞌ Isaías.

Rá ñɨvɨ Israel nkininkava ráa nu̱u̱nꞌ ntu ntɨ́ɨn ráa tu̱ꞌun váꞌa jie̱ꞌe̱ꞌ Jesús

³⁰ ¿Ná kúvi ya̱ kachiꞌ‑ó, résa? Káchíꞌ‑ó ya̱ rá ñɨvɨ ya̱ ntu̱ví kúvi ráa Israel, ya̱ ntu nnúkú ráa na̱sa kino̱o na̱a̱ꞌ ráa nu̱u̱nꞌ Ndiosíꞌ jee nni̱ꞌi̱nꞌ ráa ya̱ kino̱o na̱a̱ꞌ ráa nu̱u̱nꞌ re̱ꞌ. Soo nsa̱ꞌá re̱ꞌ ya̱ kino̱o na̱a̱ꞌ ráa nu̱u̱nꞌ re̱ꞌ jie̱ꞌe̱ꞌ ya̱ kúneí iniꞌ ráa re̱ꞌ.

³¹ Soo rá ñɨvɨ Israel nnu̱kú ráa sikúnkuvi ráa ɨɨn ley sáva kino̱o na̱a̱ꞌ ráa nu̱u̱nꞌ Ndiosíꞌ soo ntu̱ví nkúneí ráa ni̱ꞌi̱nꞌ ráa maa.

³² ¿Na̱ kuvi chi? Chi ntu nnúkú ráa kino̱o na̱a̱ꞌ ráa jie̱ꞌe̱ꞌ kúneí iniꞌ ráa Jesús, chisaꞌ nnu̱kú ráa kino̱o na̱a̱ꞌ ráa jie̱ꞌe̱ꞌ tiñu sáꞌá ráa. Nkininkava ráa kuéntáꞌ nkakɨ̱ꞌɨ jie̱ꞌe̱ꞌ ráa yu̱u̱ꞌ ya̱ sáꞌá‑a ya̱ kakɨ̱ꞌɨ jie̱ꞌe̱ꞌ ñɨvɨ, [ya̱ suvi kúvi Jesús].

³³ Suꞌva káchíꞌ tu̱ꞌun níso nu̱u̱nꞌ Tutuꞌ Ííꞌ: Ne̱ nu̱u̱nꞌ ñuunꞌ Sión kani ni̱ꞌ maáréꞌ ya̱ kuvi re̱ꞌ kuéntáꞌ ɨɨn yu̱u̱ꞌ ya̱ kakɨ̱ꞌɨ jie̱ꞌe̱ꞌ ñɨvɨ jee yu̱u̱ꞌ yaꞌá vá sáꞌá‑a ya̱ naniso ráa. Jee rá ñɨvɨ ya̱ kúneí iniꞌ ráa re̱ꞌ, jee nkóo ráa jín tu̱nkánuun. Nkachiꞌ Ndiosíꞌ.