Romanos 6 - Mixteco del suroeste de Tlaxiaco Oaxaca

Níꞌiꞌ‑ó nu̱u̱nꞌ kua̱chi‑ó ya̱ ntu yɨ́ꞌɨ́‑ó ka̱ꞌ nu̱u̱nꞌ‑u soo tékúꞌ‑ó jín Ndiosíꞌ jie̱ꞌe̱ꞌ ya̱ yɨ́ꞌɨ́‑ó nu̱u̱nꞌ Cristo

¹ Saájee, ¿ná kúvi ya̱ kachiꞌ‑ó? ¿Á kunikɨnꞌ‑ó ka̱ꞌ saꞌá‑ó kua̱chi sáva kukueꞌeꞌ ka̱ꞌ ya̱ koo ma̱ni̱ꞌ iniꞌ Ndiosíꞌ kune̱ꞌyá re̱ꞌ yó, rúsa?

² ¡Vankée sukuán!, chi ya ni̱ꞌi̱ꞌ‑ó nu̱u̱nꞌ kua̱chi‑ó, ¿na̱sa kuvi kueꞌnu i̱i̱ꞌ‑órán ka̱ꞌ jín kua̱chi‑ó, rúsa?

³ ¿Á ntu jíníꞌ rán ya̱ ntáká‑ó ya̱ ña̱nuté‑ó sáva ku̱ꞌvayuꞌú‑ó ya̱ kɨꞌɨ‑ó nu̱u̱nꞌ Cristo Jesús, jee suni ña̱nuté‑ó sáva ku̱ꞌvayuꞌú‑ó ya̱ suni ni̱ꞌi̱ꞌ‑ó jín re̱ꞌ?

⁴ Saáva kuéntáꞌ nyɨse̱ꞌí nkáá‑ó jín Cristo sáá ña̱nuté‑ó, chi yɨ́ꞌɨ́‑ó nu̱u̱nꞌ re̱ꞌ ya̱ suni jíꞌín‑ó ni̱ꞌi̱ꞌ‑ó jín re̱ꞌ. Sáva sánikua̱ꞌ nnako̱o Cristo nna̱tekuꞌ re̱ꞌ nkene re̱ꞌ nteñu rá níꞌiꞌ nsa̱ꞌá Tátáꞌ re̱ꞌ jín fuersáꞌ ííꞌ kúñáꞌnú níso‑o jee suni sukuán kúvi nakaka‑ó ichi jiáá.

⁵ Chi nu̱u̱nꞌ yɨ́ꞌɨ́‑ó nu̱u̱nꞌ re̱ꞌ ya̱ ni̱ꞌi̱ꞌ‑ó kuéntáꞌ níꞌiꞌ re̱ꞌ jee suni sukuán kɨꞌɨ‑ó nu̱u̱nꞌ re̱ꞌ sáva nakueꞌnu jiáá‑ó jín re̱ꞌ kuéntáꞌ nna̱tekuꞌ i̱i̱ꞌ re̱ꞌ.

⁶ Jee jíníꞌ‑ó ya̱ ya nnaanꞌ na̱ ñɨvɨ nkuvi‑ó tiempúꞌ ya̱ta̱ꞌ, chi jíꞌín‑i ni̱ꞌi̱ꞌ nkáá‑a jín Cristo nu̱u̱nꞌ kurúsiꞌ, sáva naanꞌ ya̱ kúneí kua̱chi jín ñunéꞌyúꞌ‑ó, sáva nkɨ́tíñú‑ó ka̱ꞌ nu̱u̱nꞌ kua̱chi.

⁷ Chi retú ya ni̱ꞌi̱ꞌ ɨɨn ñɨvɨ jee nna̱kui̱ñɨ̱ꞌ núne‑e nu̱u̱nꞌ kua̱chi.

⁸ Jee jie̱ꞌe̱ꞌ níꞌiꞌ‑ó jín Cristo, jee ínúꞌ iniꞌ‑ó ya̱ suni kutekuꞌ‑ó jín re̱ꞌ.

⁹ Jee jie̱ꞌe̱ꞌ nna̱tekuꞌ i̱i̱ꞌ Cristo jee nnako̱o re̱ꞌ nkene re̱ꞌ nteñu rá ni̱yɨ, jee saáva jíníꞌ‑ó ya̱ ni nsáꞌ kuviꞌ re̱ꞌ ka̱ꞌ. Jee ntu̱ví ka̱ꞌ yɨ́ꞌɨ́ re̱ꞌ xi̱ntíín ya̱ jíꞌíꞌ.

¹⁰ Chi sáá ni̱ꞌi̱ꞌ Cristo, jee ɨɨn íchíni jie̱ꞌe̱ꞌ nɨꞌɨ tiempúꞌ ni̱ꞌi̱ꞌ re̱ꞌ nu̱u̱nꞌ kua̱chi‑ó, soo tékúꞌ re̱ꞌ vitan sáva kɨtíñú re̱ꞌ nu̱u̱nꞌ Ndiosíꞌ.

¹¹ Jee suni sukuán ránoꞌó kuꞌun iniꞌ rán kuéntáꞌ ya̱ ya ni̱ꞌi̱ꞌ rán nu̱u̱nꞌ kua̱chi, soo tékúꞌ rán sáva kɨtíñú rán nu̱u̱nꞌ Ndiosíꞌ jie̱ꞌe̱ꞌ yɨ́ꞌɨ́ rán nu̱u̱nꞌ Cristo Jesús.

¹² Saáva koto jiáꞌa rán ka̱ꞌ ya̱ kuneí kosoꞌ kua̱chi jín yɨkɨkúñu rán ya̱ jíꞌíꞌ‑i, sáva nkáníjiá rán ka̱ꞌ rá néꞌí níyo iniꞌ yɨkɨkúñu rán.

¹³ Jee ni koto jiáꞌa rán ka̱ꞌ maárán nu̱u̱nꞌ kua̱chi sáva ntu kuatíñú rán yɨkɨkúñu rán saꞌá rán tiñu ya̱ ntu íyó na̱a̱ꞌ. Chisaꞌ ku̱ꞌva rán maárán nu̱u̱nꞌ Ndiosíꞌ, kuéntáꞌ ɨɨn ñɨvɨ ya̱ níꞌiꞌ jee nna̱tekuꞌ‑u nkene‑e nteñu rá ni̱yɨ. Jee ku̱ꞌva rán yɨkɨkúñu rán nu̱u̱nꞌ Ndiosíꞌ sáva kuvi‑i ɨɨn nantíñú ya̱ kuatíñú re̱ꞌ saꞌá re̱ꞌ tiñu na̱a̱ꞌ.

¹⁴ Chi ntu íyó kuneí kua̱chi jín rán, chi ntu yɨ́ꞌɨ́ rán ka̱ꞌ xi̱ntíín tu̱ꞌun ley ya nta̱túníꞌ Ndiosíꞌ, chisaꞌ yɨ́ꞌɨ́ rán chi̱ji tu̱ꞌun ya̱ íyó mániꞌ iniꞌ Ndiosíꞌ néꞌyá re̱ꞌ ránoꞌó.

Tu̱ꞌun kúnkunuún káꞌánꞌ jie̱ꞌe̱ꞌ musúꞌ yɨ́ꞌɨ́ xi̱ntíín kua̱chi

¹⁵ Saájee, ¿ná kachiꞌ‑ó? ¿Á saꞌá‑ó ka̱ꞌ kua̱chi chi ntu ka̱ꞌ yɨ́ꞌɨ́‑ó xi̱ntíín tu̱ꞌun ley nta̱túníꞌ Ndiosíꞌ, chisaꞌ yɨ́ꞌɨ́‑ó xi̱ntíín tu̱ꞌun íyó mániꞌ iniꞌ Ndiosíꞌ néꞌyá re̱ꞌ yó, rúsa? ¡Ntu̱ví kuitɨꞌ!

¹⁶ ¿Á ntu jíníꞌ rán ya̱ retú chiꞌi rán maárán xi̱ntíín inka ñɨvɨ kuéntáꞌ ɨɨn musúꞌ kéꞌen ñɨvɨ sáva kaníjiá rán maa, saájee kúvi rán musúꞌ kéꞌen ya̱ yɨ́ꞌɨ́ rán xi̱ntíín ñɨvɨ vá ya̱ káníjiá rán? Jee suni sukuán kúvi rán musúꞌ yɨ́ꞌɨ́ rán xi̱ntíín kua̱chi retú chiꞌi rán maárán xi̱ntíín kua̱chi kaníjiá rán maa, jee kenta kuéntáꞌ jíꞌíꞌ rán nu̱u̱nꞌ Ndiosíꞌ. Áxí kúvi rán musúꞌ yɨ́ꞌɨ́ rán xi̱ntíín Ndiosíꞌ ya̱ káníjiá rán re̱ꞌ jee kenta kino̱o na̱a̱ꞌ rán nu̱u̱nꞌ re̱ꞌ.

¹⁷ Soo nkútaꞌviꞌ‑ó nu̱u̱nꞌ Ndiosíꞌ, ya̱ súnika̱ꞌ nyɨ̱ꞌɨ rán xi̱ntíín kua̱chi kuéntáꞌ musúꞌ kéꞌen, nékúvi, soo vitan jee nka̱níjiá rán ne̱ ánímaꞌ rán Tu̱ꞌun Ndiosíꞌ ya̱ nxi̱néꞌénꞌ ráa nu̱u̱nꞌ ránoꞌó.

¹⁸ Jee ya nna̱kani núne Ndiosíꞌ ránoꞌó nkɨ́ꞌɨ rán ka̱ꞌ xi̱ntíín kua̱chi, jee saájee ya̱ nki̱vɨ rán xi̱ntíín máá tiñu na̱a̱ꞌ kuéntáꞌ musúꞌ kéꞌen.

¹⁹ (Káꞌánꞌ ni̱ꞌ tu̱ꞌun láꞌví sukuán kuéntáꞌ káꞌánꞌ néni ɨɨn ñɨvɨ chi táyáꞌ iniꞌ rán ya̱ víjí jiáku̱ꞌun iniꞌ rán tu̱ꞌun yaꞌá.) Jee njia̱ꞌa rán yɨkɨkúñu rán sáva kɨtíñú rán nu̱u̱nꞌ tiñu ya̱ ntu íyó ninuꞌun jín nu̱u̱nꞌ ya̱ niváꞌa saꞌá néꞌí rán ka̱ꞌ nékúvi, jee suni sukuán vitan ku̱ꞌva rán yɨkɨkúñu rán nu̱u̱nꞌ máá tiñu na̱a̱ꞌ kuéntáꞌ musúꞌ sáva kusɨ́ɨ́n rán ya̱ nkɨ́ꞌɨ rán ka̱ꞌ nu̱u̱nꞌ ya̱ niváꞌa sáva kɨtíñú rán nu̱u̱nꞌ Ndiosíꞌ.

²⁰ Chi ne̱ sáá nyɨ̱ꞌɨ rán xi̱ntíín kua̱chi, jee niñɨ núne rán ntu nyɨ́ꞌɨ rán nu̱u̱nꞌ tiñu na̱a̱ꞌ Ndiosíꞌ.

²¹ Soo ¿ná nkuvi ya̱ váꞌa ya̱ nníꞌinꞌ rán sáá nyɨ̱ꞌɨ rán nu̱u̱nꞌ kua̱chi rúja? Jee jie̱ꞌe̱ꞌ vá tu̱nkánuun kúvi‑i nu̱u̱nꞌ rán vitan. Chi kua̱chi vá sáꞌá‑a ya̱ jiánaanꞌ rán ya̱ kuéntáꞌ jíꞌíꞌ rán nu̱u̱nꞌ Ndiosíꞌ.

²² Soo vitan ya nna̱kani núne Ndiosíꞌ ránoꞌó nkene rán nu̱u̱nꞌ kua̱chi. Jee nchiꞌi Ndiosíꞌ ránoꞌó xi̱ntíín re̱ꞌ yɨ́tíñú rán nu̱u̱nꞌ re̱ꞌ kuéntáꞌ musúꞌ re̱ꞌ, jee saáva ya̱ níꞌínꞌ rán ya̱ váꞌa ya̱ kénta kusɨ́ɨ́n rán ya̱ nkɨ́ꞌɨ rán ka̱ꞌ nu̱u̱nꞌ ya̱ niváꞌa sáva kɨtíñú rán nu̱u̱nꞌ Ndiosíꞌ, jee kenta kutekuꞌ rán nɨ́ɨ́nkání jín re̱ꞌ.

²³ Chi ya̱ꞌvi ya̱ níꞌínꞌ ñɨvɨ jie̱ꞌe̱ꞌ kua̱chi ráa kúvi ya̱ naanꞌ ráa kuéntáꞌ jíꞌíꞌ ráa nu̱u̱nꞌ Ndiosíꞌ, soo ta̱ꞌvi̱ꞌ ya̱ síkútaꞌviꞌ Ndiosíꞌ ví ya̱ kutekuꞌ‑ó jín re̱ꞌ nɨ́ɨ́nkání jie̱ꞌe̱ꞌ yɨ́ꞌɨ́‑ó nu̱u̱nꞌ I̱toꞌoꞌ‑ó Cristo Jesús.