Romanos 16 - Mixteco del suroeste de Tlaxiaco Oaxaca

Nákúꞌva Pablo tu̱ꞌun jíkátu̱ꞌún re̱ꞌ jie̱ꞌe̱ꞌ ráa

¹ Jee nákutíñú ni̱ꞌ jie̱ꞌe̱ꞌ ku̱ꞌva‑ó Febe nu̱u̱nꞌ rán. Suviña suni kúvi ña ñaꞌan ya̱ chíneí ña rá ñɨvɨ kúneí iniꞌ ráa Cristo ya̱ nééꞌ ráa ñuunꞌ Cencrea jee yukuán kútútú ráa.

² Jee sáá kenta ña i̱ña̱ꞌ jee nákutíñú ni̱ꞌ jie̱ꞌe̱ꞌ ña nu̱u̱nꞌ rán sáva nakuatáꞌví rán ña jie̱ꞌe̱ꞌ yɨ́ꞌɨ́ ña nu̱u̱nꞌ Cristo, sánikua̱ꞌ íyó nakuatáꞌví‑ó ñɨvɨ ya̱ nsa̱ꞌá sɨ́ɨ́n Ndiosíꞌ nkene‑e nu̱u̱nꞌ ya̱ niváꞌa sáva kɨtíñú ráa nu̱u̱nꞌ re̱ꞌ. Jee chineí rán ña rénákúvi ya̱ jíniñúꞌún ña ránoꞌó. Chi nchi̱neí nijia ña kue̱ꞌe̱ꞌ víꞌí rá ñɨvɨ, ne̱ suni nuꞌuꞌ ranika̱ꞌ.

³ Ku̱ꞌva rán xá nu̱u̱nꞌ Priscila jín Aquila tu̱ꞌun jíkátu̱ꞌún ni̱ꞌ jie̱ꞌe̱ꞌ ráa, chi nchi̱neí táꞌán ráa jín nuꞌuꞌ jín tiñu Cristo Jesús sáꞌá ránꞌ.

⁴ Njia̱ꞌa ráa maáráa jie̱ꞌe̱ꞌ nuꞌuꞌ súka̱ꞌ kuviꞌ ráa, nékúvi. Jee nsú kua̱chi kuitɨꞌ maáníꞌ vá jiáꞌa ya̱ kútaꞌviꞌ ni̱ꞌ nu̱u̱nꞌ ráa, chisaꞌ suni jiáꞌa ya̱ kútaꞌviꞌ ne̱ nta̱ká rá ñɨvɨ yɨ́ꞌɨ́ ráa nu̱u̱nꞌ Cristo ya̱ ntu kúvi ráa ñɨvɨ Israel ya̱ kútútú ráa ntáká rá ñuunꞌ.

⁵ Jee ku̱ꞌva rán xá tu̱ꞌun jíkátu̱ꞌún ni̱ꞌ jie̱ꞌe̱ꞌ rá ñanitáꞌán‑ó ya̱ kútútú nu̱u̱nꞌ veꞌi Priscila jín Aquila. Jee ku̱ꞌva rán xá nu̱u̱nꞌ Epeneto tu̱ꞌun jíkátu̱ꞌún ni̱ꞌ jie̱ꞌe̱ꞌ re̱ꞌ. Suvire̱ꞌ ví ya̱ ñúnúunꞌ ni̱ꞌ jee kúvi te̱e xíꞌnañúꞌún ña̱ko̱so̱ꞌ re̱ꞌ nu̱u̱nꞌ ni̱nu̱ꞌ iniꞌ re̱ꞌ ntɨɨn re̱ꞌ tu̱ꞌun Cristo nu̱u̱nꞌ ñɨvɨ ñuunꞌ Asia.

⁶ Jee ku̱ꞌva rán xá nu̱u̱nꞌ María tu̱ꞌun jíkátu̱ꞌún ni̱ꞌ jie̱ꞌe̱ꞌ ña, ya̱ nsa̱tíñú ni̱ꞌin víꞌí ña ya̱ kúvi ya̱ váꞌa nu̱u̱nꞌ ránoꞌó.

⁷ Jee ku̱ꞌva rán xá tu̱ꞌun káva̱ꞌa nu̱u̱nꞌ Andrónico jín Junias ya̱ jíkátu̱ꞌún ni̱ꞌ jie̱ꞌe̱ꞌ ráa, ya̱ kúvi ráa táꞌán ñɨvɨ ñuunꞌ ni̱ꞌ, jín rá táꞌán nyɨ̱ꞌɨ jín ni̱ꞌ iniꞌ veka̱a ví ráa. Jee níꞌínꞌ ráa ya̱ nákuetúꞌún rá te̱e kúvi apóstol ráa. Jee suviráa xíꞌna ráa ka̱ꞌ nki̱vɨ ráa nu̱u̱nꞌ Cristo nsú káꞌ nuꞌuꞌ.

⁸ Jee ku̱ꞌva rán xá nu̱u̱nꞌ Amplias tu̱ꞌun jíkátu̱ꞌún ni̱ꞌ jie̱ꞌe̱ꞌ re̱ꞌ. Yɨ́ꞌɨ́ re̱ꞌ nu̱u̱nꞌ I̱toꞌoꞌ‑ó jee ñúnúunꞌ ni̱ꞌ re̱ꞌ.

⁹ Jee ku̱ꞌva rán xá nu̱u̱nꞌ Urbano tu̱ꞌun jíkátu̱ꞌún ni̱ꞌ jie̱ꞌe̱ꞌ re̱ꞌ, ya̱ táꞌán sátíñú jín ráníꞌ ví re̱ꞌ nu̱u̱nꞌ tiñu Cristo. Jee suni ku̱ꞌva rán xá nu̱u̱nꞌ Estaquis tu̱ꞌun jíkátu̱ꞌún ni̱ꞌ jie̱ꞌe̱ꞌ re̱ꞌ, ya̱ ñúnúunꞌ ni̱ꞌ re̱ꞌ.

¹⁰ Jee ku̱ꞌva rán xá nu̱u̱nꞌ Apeles tu̱ꞌun jíkátu̱ꞌún ni̱ꞌ jie̱ꞌe̱ꞌ re̱ꞌ, ya̱ túvi nijinꞌ nu̱u̱nꞌ nɨꞌɨ ñɨvɨ ya̱ íñɨ́ ni̱ꞌin re̱ꞌ nu̱u̱nꞌ Cristo. Jee ku̱ꞌva rán xá nu̱u̱nꞌ rá ñɨvɨ táꞌán veꞌi Aristóbulo tu̱ꞌun jíkátu̱ꞌún ni̱ꞌ jie̱ꞌe̱ꞌ ráa.

¹¹ Jee ku̱ꞌva rán xá nu̱u̱nꞌ Herodión tu̱ꞌun jíkátu̱ꞌún ni̱ꞌ jie̱ꞌe̱ꞌ re̱ꞌ, ya̱ kúvi te̱e táꞌán ñɨvɨ ñuunꞌ ni̱ꞌ. Jee ku̱ꞌva rán xá tu̱ꞌun jíkátu̱ꞌún nu̱u̱nꞌ rá ñɨvɨ táꞌán veꞌi Narciso, ya̱ yɨ́ꞌɨ́ ráa nu̱u̱nꞌ I̱toꞌoꞌ‑ó.

¹² Jee ku̱ꞌva rán xá nu̱u̱nꞌ Trifena jín nu̱u̱nꞌ Trifosa tu̱ꞌun jíkátu̱ꞌún ni̱ꞌ jie̱ꞌe̱ꞌ ráa, ya̱ sátíñú ni̱ꞌin ráa nu̱u̱nꞌ I̱toꞌoꞌ‑ó. Jee ku̱ꞌva rán xá nu̱u̱nꞌ Pérsida tu̱ꞌun jíkátu̱ꞌún ni̱ꞌ ña, ya̱ ñúnúunꞌ‑ó ña, ya̱ sátíñú ni̱ꞌin kue̱ꞌe̱ꞌ víꞌí ña nu̱u̱nꞌ I̱toꞌoꞌ‑ó.

¹³ Jee ku̱ꞌva rán xá nu̱u̱nꞌ Rufo tu̱ꞌun jíkátu̱ꞌún ni̱ꞌ jie̱ꞌe̱ꞌ re̱ꞌ, ya̱ jíníꞌ nta̱ká ñɨvɨ ya̱ va̱ꞌa sáꞌá re̱ꞌ tiñu I̱toꞌoꞌ‑ó. Jee suni ku̱ꞌva rán xá nu̱u̱nꞌ nánáꞌ re̱ꞌ tu̱ꞌun jíkátu̱ꞌún ni̱ꞌ jie̱ꞌe̱ꞌ ña, ya̱ nkuvi kuéntáꞌ nánáꞌ ni̱ꞌ ranika̱ꞌ.

¹⁴ Jee ku̱ꞌva rán xá tu̱ꞌun jíkátu̱ꞌún ni̱ꞌ nu̱u̱nꞌ Asíncrito, jín nu̱u̱nꞌ Flegonte, jín nu̱u̱nꞌ Hermas, jín nu̱u̱nꞌ Patrobas, jín nu̱u̱nꞌ Hermes, jín nu̱u̱nꞌ rá ñanitáꞌán‑ó ya̱ nééꞌ jín ráa.

¹⁵ Jee ku̱ꞌva rán xá tu̱ꞌun jíkátu̱ꞌún ni̱ꞌ nu̱u̱nꞌ Filólogo jín Julia, jín nu̱u̱nꞌ Nereo jín ku̱ꞌva re̱ꞌ, jín nu̱u̱nꞌ Olimpas, jín nu̱u̱nꞌ nta̱ká rá ñanitáꞌán‑ó ya̱ nsásɨ́ɨ́n Ndiosíꞌ ráa ya̱ yɨ́tíñú ráa nu̱u̱nꞌ I̱toꞌoꞌ‑ó ya̱ nééꞌ jín rává.

¹⁶ Jee ku̱ꞌva rán tu̱ꞌun káꞌánꞌ va̱ꞌa yɨ́ñúꞌún jín ɨɨn inka rá táꞌán rán teyuꞌú yɨ́ñúꞌún ɨɨn inka rán. Jee nta̱ká rá grupo ñanitáꞌán‑ó ya̱ yɨ́ꞌɨ́ xi̱ntíín Cristo tájí ráa tu̱ꞌun jíkátu̱ꞌún nu̱u̱nꞌ ránoꞌó.

¹⁷ Jee ránoꞌó ñanitáꞌán ni̱ꞌ, jíkánꞌ táꞌvíꞌ ni̱ꞌ ya̱ nito koo rán maárán nu̱u̱nꞌ rá ñɨvɨ ya̱ sáꞌá ráa ya̱ kusɨ́ɨ́n rá táꞌán‑ó jín xíkíninkava ráa táꞌán‑ó jín tu̱ꞌun ya̱ ntu kétáꞌán jín tu̱ꞌun ya̱ ya nku̱tu̱ꞌva rán. Jee kuiyo rán nu̱u̱nꞌ ráa.

¹⁸ Chi rá ñɨvɨ sáꞌá sukuán jee ntu yɨ́tíñú ráa nu̱u̱nꞌ I̱toꞌoꞌ‑ó Cristo, chisaꞌ chíñúꞌún ráa chi̱ji maáráa. Jee ne̱ jiákɨ́nꞌ ráa tu̱ꞌun káꞌánꞌ ráa jín tu̱ꞌun yɨ́ñúꞌún káꞌánꞌ ráa, jee sukuán xínáꞌví ráa ánímaꞌ rá ñɨvɨ ya̱ ntiáꞌan kujia iniꞌ rává Tu̱ꞌun Ndiosíꞌ.

¹⁹ Chi nkenta nteso̱ꞌo nɨꞌɨ ñɨvɨ tu̱ꞌun ya̱ káníjiá váꞌa rán nu̱u̱nꞌ tu̱ꞌun Cristo. Saáva kúsɨ́ɨꞌ iniꞌ ni̱ꞌ jie̱ꞌe̱ꞌ rán. Soo kuíni ni̱ꞌ ya̱ kuꞌun kájí xi̱ni̱ꞌ rán nu̱u̱nꞌ ya̱ váꞌa, jín ya̱ ntu ñúꞌún iniꞌ rán kueꞌnu niva̱ꞌa rán ya̱ ntu kujia iniꞌ rán maa.

²⁰ Jee maá Ndiosíꞌ ya̱ sáꞌá re̱ꞌ ya̱ nééꞌ va̱ꞌa‑ó, jee ya̱chi̱ꞌ ni saꞌá re̱ꞌ ya̱ kuneí rán jín kui̱ꞌna̱ꞌ kúñáꞌnú ya̱ naní Satanás kuéntáꞌ kua̱xin rán maa chi̱ji jie̱ꞌe̱ꞌ rán. Jee na̱ ka̱ꞌ koo ma̱ni̱ꞌ iniꞌ I̱toꞌoꞌ‑ó Jesús kune̱ꞌyá re̱ꞌ ránoꞌó.

²¹ Timoteo, táꞌán sátíñú re̱ꞌ jín ni̱ꞌ nu̱u̱nꞌ Cristo, jín Lucio, jín Jasón, jín Sosípater, ya̱ kuvi ráa táꞌán ñɨvɨ ñuunꞌ ni̱ꞌ, tájí ráa tu̱ꞌun jíkátu̱ꞌún ráa nu̱u̱nꞌ ránoꞌó.

²² Nuꞌuꞌ Tercio, tée ni̱ꞌ nu̱u̱nꞌ tutuꞌ yaꞌá sánikua̱ꞌ káchíꞌ Pablo nu̱u̱nꞌ ni̱ꞌ, jee suni tájí ni̱ꞌ tu̱ꞌun jíkátu̱ꞌún ni̱ꞌ nu̱u̱nꞌ ránoꞌó chi yɨ́ꞌɨ́‑ó nu̱u̱nꞌ I̱toꞌoꞌ‑ó.

²³ Jee Gayo, ya̱ táji re̱ꞌ veꞌi re̱ꞌ nééꞌ nuꞌuꞌ, Pablo, jee nɨꞌɨ rá ñɨvɨ kúneí iniꞌ ráa Cristo kútútú ráa veꞌi re̱ꞌ, jee tájí re̱ꞌ tu̱ꞌun jíkátu̱ꞌún re̱ꞌ nu̱u̱nꞌ rán. Jee Erasto, ya̱ kúvi te̱e tɨ́ɨn xu̱ꞌún ñuunꞌ yaꞌá, jín ñanitáꞌán‑ó Cuarto tájí ráa tu̱ꞌun jíkátu̱ꞌún ráa nu̱u̱nꞌ ránoꞌó.

²⁴ [Na̱ ka̱ꞌ koo ka̱ꞌ ya̱ ma̱ni̱ꞌ iniꞌ I̱toꞌoꞌ‑ó Jesús ya̱ kúvi Cristo jín ránoꞌó. Sukuán koo. Amén.]

Nu̱kuáꞌ nɨꞌɨ nákuetúꞌún Pablo Ndiosíꞌ

²⁵ Jee vitan jee nákuetúꞌún‑ó Ndiosíꞌ. Maáréꞌ kúvi sáꞌá re̱ꞌ ya̱ kuiñɨ ni̱ꞌin rán nu̱u̱nꞌ tu̱ꞌun váꞌa ya̱ síkáku Cristo yó, ya̱ stékútu̱ꞌún ni̱ꞌ. Jee kúvi tu̱ꞌun vá ya̱ tékútu̱ꞌún jie̱ꞌe̱ꞌ Jesús ya̱ kúvi Cristo nu̱u̱nꞌ ránoꞌó ya̱ kúvi sánikua̱ꞌ nstúvi Ndiosíꞌ tu̱ꞌun vá ya̱ nyɨse̱ꞌí tu̱ꞌun yaꞌá ne̱ tiempúꞌ yanaꞌán, nékúvi.

²⁶ Soo vitan jee ntu̱vi nijinꞌ tu̱ꞌun yaꞌá, chi rá te̱e nna̱kani tu̱ꞌun nkene yuꞌú re̱ꞌ jee nsa̱ꞌá re̱ꞌ ya̱ tee ráa tu̱ꞌun vá nu̱u̱nꞌ Tutuꞌ Ííꞌ sánikua̱ꞌ nta̱túníꞌ re̱ꞌ. Ndiosíꞌ ví ya̱ tékúꞌ re̱ꞌ nɨ́ɨ́nkání. Saáva nsa̱ꞌá re̱ꞌ sukuán sáva kuvi kukáꞌnú iniꞌ rá ñɨvɨ ntáká nación sáva i̱nu̱ꞌ iniꞌ ráa kaníjiá ráa tɨɨn ráa tu̱ꞌun re̱ꞌ.

²⁷ Ndiosíꞌ ya̱ métúꞌún re̱ꞌ ví Ndiosíꞌ jee níchí re̱ꞌ, nakuatúꞌún‑ó nɨ́ɨ́nkání ya̱ viiꞌ kúñáꞌnú re̱ꞌ jie̱ꞌe̱ꞌ ya̱ nsa̱ꞌá re̱ꞌ jín Jesús ya̱ kúvi Cristo. ¡Sukuán koo! ¡Amén!