Mateo 6 - Mixteco del suroeste de Tlaxiaco Oaxaca

Xínéꞌénꞌ Jesús jie̱ꞌe̱ꞌ na̱ja kunima̱ni̱ꞌ‑ó ya̱ jíniñúꞌún ɨɨn ñɨvɨ

¹ ’Kumí rán maárán ya̱ koto saꞌá rán tiñu na̱a̱ꞌ váꞌa ichinúúnꞌ rá ñɨvɨ sáva kune̱ꞌyá ráa maa, chi retú saꞌá rán maa suꞌva jee Tátáꞌ rán ya̱ nééꞌ antivɨ́ súkún nsáꞌ nataji re̱ꞌ ta̱ꞌvi̱ꞌ nu̱u̱nꞌ rán.

² Jee saáva sáá jiáꞌa nú karidáꞌ nu̱u̱nꞌ ñɨvɨ jíniñúꞌún maa jee koto káchítu̱ꞌún nijinꞌ nú ya̱ sáꞌá nú sukuán kuéntáꞌ tivɨꞌ trompeta, kuéntáꞌ kua̱ꞌ sáꞌá rá ñɨvɨ íyó sansuꞌva iniꞌ rá veꞌi sinagoga áxí iniꞌ ichi. Sukuán sáꞌá ráa sáva nakuetúꞌún rá ñɨvɨ ráa. Soo máá naáꞌ vá káchíꞌ ni̱ꞌ nu̱u̱nꞌ rán, ya̱ nɨꞌɨ ta̱ꞌvi̱ꞌ ya̱ ni̱ꞌi̱nꞌ ráa ví kua̱chi nákuetúꞌún ñɨvɨ ráa [jee nsú ta̱ꞌvi̱ꞌ naku̱ꞌva Ndiosíꞌ].

³ Soo sáá jiáꞌa nú karidáꞌ nu̱u̱nꞌ ñɨvɨ jíniñúꞌún, jee saꞌá yuꞌuꞌ maa sáva nku̱níꞌ ni ɨɨn ñɨvɨ maa kuéntáꞌ ntu jíníꞌ naꞌá sátín nú ná kúvi ya̱ sáꞌá naꞌá kuáꞌá nú.

⁴ Saꞌá nú suꞌva sáva koo yuꞌuꞌ ya̱ ku̱ꞌva nú karidáꞌ nu̱u̱nꞌ ñɨvɨ jíniñúꞌún maa, jee maá Tátáꞌ nú Ndiosíꞌ ya̱ jíníꞌ re̱ꞌ ya̱ íyó yuꞌuꞌ, jee maáréꞌ nataji re̱ꞌ ta̱ꞌvi̱ꞌ nu̱u̱nꞌ nú.

Xínéꞌénꞌ Jesús na̱ja kaꞌanꞌ‑ó jín Ndiosíꞌ

⁵ ’Jee sáá káꞌánꞌ rán jín Ndiosíꞌ, jee koto íyó rán kuéntáꞌ sáꞌá rá ñɨvɨ sansuꞌva, chi táꞌánꞌ iniꞌ ráa kuiñɨ nichiꞌ ráa iniꞌ rá veꞌi sinagoga nu̱u̱nꞌ kútútú rá ñɨvɨ Israel, jín rá nu̱u̱nꞌ náketáꞌán rá ichi, jee káꞌánꞌ ráa jín Ndiosíꞌ, sáva kune̱ꞌyá rá ñɨvɨ ráa. Soo máá naáꞌ vá káchíꞌ ni̱ꞌ nu̱u̱nꞌ rán ya̱ nɨꞌɨ ta̱ꞌvi̱ꞌ ya̱ ni̱ꞌi̱nꞌ ráa ví kua̱chi nákuetúꞌún ñɨvɨ ráa, jee nsú ta̱ꞌvi̱ꞌ jiáꞌa Ndiosíꞌ.

⁶ Soo noꞌó, sáá káꞌánꞌ nú jín Ndiosíꞌ, jee ni̱vɨ iniꞌ veꞌi nu̱u̱nꞌ koo métúꞌún nú, jee nakasɨꞌ nú yuvéꞌí yukuán, jee kaꞌanꞌ nú jín Tátáꞌ nú Ndiosíꞌ ya̱ íyó yuꞌuꞌ re̱ꞌ jín nú, jee Tátáꞌ nú chi jíníꞌ re̱ꞌ ya̱ sáꞌá yuꞌuꞌ nú sukuán, jee taji re̱ꞌ ta̱ꞌvi̱ꞌ kuvi nú.

⁷ Jee sáá káꞌánꞌ rán jín Ndiosíꞌ, koto na̱ni jie̱ꞌe̱ꞌ tu̱ꞌun nékáíyó káꞌánꞌ kachiꞌ rán, kuéntáꞌ sáꞌá rá ñɨvɨ ntu kúvi Israel ya̱ ntu̱ví jíníꞌ ráa Tu̱ꞌun Ndiosíꞌ, chi jiáni iniꞌ ráa ya̱ saꞌ víꞌí káꞌ níkó níkó ráa káꞌánꞌ ráa, jee tésóꞌo ka̱ꞌ Ndiosíꞌ jie̱ꞌe̱ꞌ rá káchíꞌ ráa.

⁸ Koto íyó rán kuéntáꞌ kua̱ꞌ íyó ráa, chi Tátáꞌ nú Ndiosíꞌ ya̱ jíníꞌ re̱ꞌ ná kúvi ya̱ jíniñúꞌún rán, ne̱ ntiáꞌan ka̱ꞌ ka̱ka̱nꞌ rán maa nu̱u̱nꞌ re̱ꞌ.

⁹ ’Saáva kaꞌanꞌ rán jín Tátáꞌ rán Ndiosíꞌ suꞌva: Tátáꞌ ránꞌ, ya̱ nééꞌ antivɨ́ súkún, na̱ ka̱ꞌ kɨñúꞌún ñɨvɨ nu̱u̱nꞌ noꞌó ya̱ ííꞌ kúvi nú,

¹⁰ Na̱ ka̱ꞌ sikíji nú ki̱vɨ̱ꞌ ya̱ tatúníꞌ nú nu̱u̱nꞌ ñɨ̱vɨ́ yaꞌá. Jee saꞌá nú rá tiñu iniꞌ ñɨ̱vɨ́ yaꞌá sáni kuíni nú koo, sánikua̱ꞌ sáꞌá nú antivɨ́ súkún.

¹¹ Jee taji nú ya̱ kajiꞌ ránꞌ vitan nteenꞌ.

¹² Jee kunekáꞌnú iniꞌ nú kune̱ꞌyá nú ránuꞌuꞌ jie̱ꞌe̱ꞌ kua̱chi sáꞌá ráníꞌ, kuéntáꞌ kua̱ꞌ suni nékáꞌnú iniꞌ ráníꞌ rá niváꞌa sáꞌá ráa ránuꞌuꞌ.

¹³ Jee koto chuꞌun nú ichi ránuꞌuꞌ kininkava ránꞌ sikúvi iniꞌ ráníꞌ nu̱u̱nꞌ kua̱chi. Jee sikáku nú ránuꞌuꞌ nu̱u̱nꞌ ya̱ níváꞌa, [chi maánú kúvi ya̱ tátúníꞌ nu̱u̱nꞌ kua̱íyó, jee níso nú fuersáꞌ ííꞌ níꞌinꞌ, jee viiꞌ nasɨ́kuitɨꞌ kúñáꞌnú nú nɨ́ɨ́nkání. Sukuán koo, Amén.] Sukuán kachiꞌ ránú.

¹⁴ ’Chi retú nékáꞌnú iniꞌ rán ya̱ niváꞌa sáꞌá rá ñɨvɨ ránoꞌó, jee Tátáꞌ rán Ndiosíꞌ ya̱ nééꞌ re̱ꞌ antivɨ́ súkún suni kunekáꞌnú iniꞌ re̱ꞌ kune̱ꞌyá re̱ꞌ ránoꞌó.

¹⁵ Soo retú ntu̱ví nékáꞌnú iniꞌ rán jie̱ꞌe̱ꞌ ya̱ sáꞌá ñɨvɨ ránoꞌó, jee suni ni nsáꞌ kunekáꞌnú iniꞌ Tátáꞌ rán Ndiosíꞌ kune̱ꞌyá re̱ꞌ ránoꞌó.

Xínáku Jesús jie̱ꞌe̱ꞌ tu̱ꞌun kuneeꞌ niteꞌ‑ó

¹⁶ ’Jee sáá nééꞌ niteꞌ rán sáá néñu̱ꞌun rán Ndiosíꞌ, jee koto sáꞌá xií rán, kuéntáꞌ sáꞌá rá ñɨvɨ íyó sansuꞌva, chi nínta xií nu̱u̱nꞌ ráa sáva stúvi ráa nu̱u̱nꞌ rá ñɨvɨ ya̱ nééꞌ niteꞌ ráa. Soo máá naáꞌ vá káchíꞌ ni̱ꞌ nu̱u̱nꞌ rán, ya̱ nɨꞌɨ ta̱ꞌvi̱ꞌ ya̱ ni̱ꞌi̱nꞌ ráa ví kua̱chi nákuetúꞌún ñɨvɨ ráa, [jee nsú ta̱ꞌvi̱ꞌ jiáꞌa Ndiosíꞌ].

¹⁷ Soo noꞌó, sáá nééꞌ niteꞌ nú, jee nachiꞌi nú aceite xi̱ni̱ꞌ nú, jee nakete nu̱u̱nꞌ nú,

¹⁸ sáva ntu stúvi nú nu̱u̱nꞌ rá ñɨvɨ ya̱ íyó niteꞌ iniꞌ nú, chisaꞌ stúvi maa nu̱u̱nꞌ métúꞌún ni Tátáꞌ nú Ndiosíꞌ ya̱ íyó yuꞌuꞌ re̱ꞌ jín nú, jee suni maáréꞌ ya̱ jíníꞌ yuꞌuꞌ re̱ꞌ maa jee nataji re̱ꞌ ta̱ꞌvi̱ꞌ kutaꞌviꞌ nú.

Chuva̱ꞌa‑ó ya̱ yɨ́yáꞌvi ne̱ antivɨ́ súkún

¹⁹ ’Koto na̱ nantíñú síkuéꞌnu rán chuva̱ꞌa rán maa ya̱ sakúká rán maárán iniꞌ ñɨ̱vɨ́ yaꞌá, nu̱u̱nꞌ stívɨ́ ti̱kixinꞌ jín su̱jieyóó maa jee náánꞌ‑a, jín nu̱u̱nꞌ kívɨ rá kui̱ꞌná sákuíꞌná ráa maa.

²⁰ Chisaꞌ kueꞌnu sánikua̱ꞌ kuíni Ndiosíꞌ sáva chuva̱ꞌa rán ya̱ yɨ́yáꞌvi nijia iniꞌ antivɨ́ súkún, nu̱u̱nꞌ ntu̱ví xínáánꞌ ti̱kixinꞌ ni su̱jieyóó maa, jín nu̱u̱nꞌ ni ntu̱ví kúvi ki̱vɨ rá kui̱ꞌná sakuíꞌná maa.

²¹ Chi nu̱u̱nꞌ ñúꞌún váꞌa ta̱ꞌvi̱ꞌ yɨ́yáꞌvi nú, suni yukuán ñúꞌún iniꞌ ánímaꞌ rán.

Nchinúún‑ó kúvi ñuꞌunꞌ nu̱u̱nꞌ yɨkɨkúñu‑ó

²² ’Nchinúún nú kúvi‑i kuéntáꞌ kantil nu̱u̱nꞌ yɨkɨkúñu nú chi kívɨ ñuꞌunꞌ nchinúún stúúnꞌ iniꞌ yɨkɨkúñu nú. Chi retú íyó nijinꞌ va̱ꞌa nchinúún nú, jee ni̱ꞌi̱nꞌ yɨkɨkúñu nú ñuꞌunꞌ túúnꞌ.

²³ Soo retú ntu nijinꞌ va̱ꞌa nchinúún nú, jee kuéntáꞌ íyó nɨꞌɨ yɨkɨkúñu nú nu̱u̱nꞌ ñu̱neenꞌ. Jee suni sukuán retú káchíꞌ nú ya̱ túúnꞌ ñuꞌunꞌ iniꞌ ánímaꞌ nú, soo retú ntu jiáꞌa nú stúúnꞌ Ndiosíꞌ ánímaꞌ nú, yukuán jee saꞌ víꞌí ka̱ꞌ kua̱ꞌa̱nꞌ nú nu̱u̱nꞌ ñu̱neenꞌ.

Jie̱ꞌe̱ꞌ Ndiosíꞌ jín jie̱ꞌe̱ꞌ xu̱ꞌún

²⁴ ’Ni ɨɨn ñɨvɨ ntu kúvi kɨtíñú‑u nu̱u̱nꞌ u̱vi̱ꞌ i̱toꞌoꞌ xí tiñu, chi taꞌvi iniꞌ‑i kune̱ꞌyá‑a ɨɨn, jee kunu̱u̱nꞌ‑u inka, áxí, kɨtíñú‑u nu̱u̱nꞌ ɨɨn, jee kuniichiꞌ‑i inka. Jee saáva ntu kúvi kɨtíñú rán nu̱u̱nꞌ Ndiosíꞌ jín suni nu̱u̱nꞌ xu̱ꞌún.

Kúmí Ndiosíꞌ rá se̱ꞌya re̱ꞌ

²⁵ ’Jee saáva káchíꞌ ni̱ꞌ nu̱u̱nꞌ rán ya̱ koto nániꞌvɨꞌ iniꞌ rán jie̱ꞌe̱ꞌ na̱ja kutekuꞌ rán, va̱ni jie̱ꞌe̱ꞌ rénákúvi ya̱ kajiꞌ rán, áxí, rénákúvi ya̱ koꞌo rán, jee koto nániꞌvɨꞌ iniꞌ rán jie̱ꞌe̱ꞌ yɨkɨkúñu rán, va̱ni ré jie̱ꞌe̱ꞌ na̱ saꞌma kuꞌun rán. Chi, ¿á nsáꞌ ya̱ yɨ́yáꞌvi ka̱ꞌ ví ya̱ sáꞌá Ndiosíꞌ jín‑ó ni tékúꞌ‑ó nsú ka̱ꞌ ya̱ kajiꞌ‑ó rúja?, jee, ¿á nsáꞌ yɨ́yáꞌvi ka̱ꞌ yɨkɨkúñu‑ó, nsú káꞌ saꞌma ñúꞌún‑ó rúja?

²⁶ Kune̱ꞌyá rán rá kiti jíkó súkún, chi ni ntu̱náꞌ tataꞌ sáꞌá rátíꞌ, jee ni ntu̱náꞌ tataꞌ nástútú rátíꞌ náchuva̱ꞌa rátíꞌ maa iniꞌ yakaꞌ. Soo maá Tátáꞌ rán Ndiosíꞌ ya̱ nééꞌ antivɨ́ súkún jiáꞌa re̱ꞌ ya̱ yájíꞌ rátíꞌ. Soo ¿á nsáꞌ yɨ́yáꞌvi ka̱ꞌ ránoꞌó nsú ka̱ꞌ rá kitɨ vá rúja?

²⁷ Jee, ¿né ɨɨn ránoꞌó retú nániꞌvɨꞌ níviniꞌ iniꞌ‑i jee á kuvi sikuéꞌnu‑u maáa kusúkún‑u ɨɨn yɨ̱kɨ kání ka̱ꞌ rúja?

²⁸ ’Jee, ¿na̱ jie̱ꞌe̱ꞌ chi nániꞌvɨꞌ iniꞌ rán jie̱ꞌe̱ꞌ saꞌma kuꞌun rán rúja? Kune̱ꞌyá rán na̱ja jiáꞌnu rá itaꞌ ni̱kɨ̱ꞌ xtíláꞌ yúkú ya̱ ni ntu̱ví sátíñú yɨ́ɨ́ ráa, jee ni ntu̱ví táví ráa.

²⁹ Soo káchíꞌ ni̱ꞌ nu̱u̱nꞌ rán, ya̱ Salomón, ya̱ viiꞌ nku̱ñáꞌnú re̱ꞌ nta̱túníꞌ re̱ꞌ ñuunꞌ Israel jee súka̱ꞌ viiꞌ nasɨ́kuitɨꞌ ni̱yo rá saꞌma nñúꞌun re̱ꞌ, soo ni maá Salomón ni ntu̱ví nñúꞌun re̱ꞌ saꞌma kuéntáꞌ kua̱ꞌ viiꞌ nasɨ́kuitɨꞌ níji ɨɨn rá itaꞌ vá.

³⁰ Jee ya̱ sukuán viiꞌ nasɨ́kuitɨꞌ síkúnijin Ndiosíꞌ rá yu̱ku̱ꞌ yúkú íyó nu̱u̱nꞌ kuꞌúꞌ vitan, jee ki̱vɨ̱ꞌ steñu̱ꞌún chuꞌun ñɨvɨ maa nu̱u̱nꞌ ñuꞌúnꞌ sikáyúꞌ‑u maa, jee ya̱ sukuán síkúnijin Ndiosíꞌ rá yu̱ku̱ꞌ yúkú, jee, ¿á nsú saꞌ víꞌí káꞌ sikúnijin re̱ꞌ ránoꞌó rúja? Ránoꞌó chi matíꞌínꞌ nijia kúneí iniꞌ rán re̱ꞌ.

³¹ Jee saáva koto nániꞌvɨꞌ iniꞌ rán jee kachiꞌ rán: “¿Ná kúvi ya̱ kajiꞌ‑ó?”, áxí, “¿ná kúvi ya̱ koꞌo‑ó?”, áxí, “¿ná kúvi ya̱ kuꞌun‑ó?”

³² Chi ntáká rá nantíñú yaꞌá ví ya̱ jítú iniꞌ rá ñɨvɨ ya̱ ntu yɨ́ꞌɨ́ ráa nu̱u̱nꞌ Ndiosíꞌ, soo ránoꞌó chi Tátáꞌ ránoꞌó Ndiosíꞌ ya̱ nééꞌ antivɨ́ súkún, jee ya jíníꞌ re̱ꞌ ya̱ jíniñúꞌún rán ntáká rá nantíñú yaꞌá.

³³ Soo nukú xíꞌna ki̱vi naꞌá Ndiosíꞌ ya̱ tatúníꞌ re̱ꞌ nu̱u̱nꞌ rán, jín ya̱ kino̱o na̱a̱ꞌ rán nu̱u̱nꞌ re̱ꞌ, jee taji re̱ꞌ nɨꞌɨ rá nantíñú yaꞌá.

³⁴ Jee saáva, koto nániꞌvɨꞌ iniꞌ rán jie̱ꞌe̱ꞌ ya̱ kiji ki̱vɨ̱ꞌ steñu̱ꞌún, chi kiji ya̱ naniꞌvɨꞌ iniꞌ rán steñu̱ꞌún. Jee ya̱ nkuvi ni nániꞌvɨꞌ iniꞌ rán jie̱ꞌe̱ꞌ rá tiñu íyó vitan.