Mateo 4 - Mixteco del suroeste de Tlaxiaco Oaxaca

Nkuini kui̱ꞌna̱ꞌ kúñáꞌnú sikúvi‑i iniꞌ Jesús

¹ Saájee náka Ta̱chi̱ꞌ Ííꞌ Ndiosíꞌ Jesús kua̱ꞌa̱nꞌ nu̱u̱nꞌ ñu̱ꞌún saɨn nu̱u̱nꞌ ntu̱náꞌ ñɨvɨ nééꞌ sáva sikúvi kui̱ꞌna̱ꞌ iniꞌ re̱ꞌ.

² Jee yukuán nneeꞌ niteꞌ Jesús u̱vi̱xiko (40) ki̱vɨ̱ꞌ ne̱ jín u̱vi̱xiko (40) yakuááꞌ, jee kuíre nkenta so̱ko iniꞌ re̱ꞌ.

³ Saájee nkenta kui̱ꞌna̱ꞌ kúñáꞌnú ya̱ sikúvi‑i iniꞌ ñɨvɨ, jee nkachiꞌ‑i nu̱u̱nꞌ Jesús: ―Ya̱ kúvi nú Se̱ꞌya Ndiosíꞌ, jee kachiꞌ nu̱u̱nꞌ rá yu̱u̱ꞌ yaꞌá ya̱ nuvi ráa i̱xta̱tíláꞌ kajiꞌ nú ―nkachiꞌ‑i.

⁴ Jee nkachiꞌ Jesús nu̱u̱nꞌ‑u: ―Nu̱u̱nꞌ Tutuꞌ níso Tu̱ꞌun Ndiosíꞌ káchíꞌ: “Nsú kua̱chi kuitɨꞌ ya̱ yájíꞌ ñɨvɨ sáꞌá ya̱ kutekuꞌ‑u, chisaꞌ ntáká tu̱ꞌun ya̱ kéne yuꞌú Ndiosíꞌ sáꞌá ya̱ kutekuꞌ‑u.”

⁵ Saájee kua̱ꞌa̱nꞌ kui̱ꞌna̱ꞌ nnaka‑a Jesús ñuunꞌ Jerusalén ííꞌ jee kua̱na̱ka‑a re̱ꞌ ne̱ nu̱u̱nꞌ súkún víꞌí xi̱ni̱ꞌ veñu̱ꞌun káꞌnú.

⁶ Jee nkachiꞌ‑i nu̱u̱nꞌ Jesús: ―Ya̱ kúvi nú Se̱ꞌya Ndiosíꞌ, ku̱te̱ꞌ nú maánú ne̱ nu̱u̱nꞌ ñu̱ꞌún, chi káchíꞌ tu̱ꞌun níso nu̱u̱nꞌ Tutuꞌ Ííꞌ: Tatúníꞌ re̱ꞌ nu̱u̱nꞌ rá najiáꞌáꞌ ííꞌ re̱ꞌ jie̱ꞌe̱ꞌ noꞌó, jee kunaꞌá ráa noꞌó, sáva ntu kachiꞌi jie̱ꞌe̱ꞌ nú nu̱u̱nꞌ yuúꞌ jee tu̱fi̱ꞌ nú.

⁷ Saájee nkachiꞌ Jesús nu̱u̱nꞌ‑u: ―Suni níso nu̱u̱nꞌ Tutuꞌ Ííꞌ: “Koto jítotúníꞌ nú iniꞌ I̱toꞌoꞌ‑ó Ndiosíꞌ nú jie̱ꞌe̱ꞌ tiñu sáꞌá re̱ꞌ.”

⁸ Soo tukuni kua̱ꞌa̱nꞌ kui̱ꞌna̱ꞌ nnaka‑a Jesús ne̱ ɨɨn yuku máá súkún, jee yukuán nxi̱néꞌénꞌ‑e re̱ꞌ kua̱íyó rá ñuunꞌ íyó ñɨ̱vɨ́ jín rá nantíñú viiꞌ íyó nu̱u̱nꞌ rává.

⁹ Jee nkachiꞌ‑i nu̱u̱nꞌ re̱ꞌ: ―Nu̱u̱nꞌ noꞌó taji ni̱ꞌ ntáká rá yaꞌá, retú nakui̱ñi̱ꞌ ítɨ́ nú nu̱u̱nꞌ nuꞌuꞌ, kuneñu̱ꞌun nú nuꞌuꞌ ―nkachiꞌ‑i.

¹⁰ Saájee nkachiꞌ Jesús nu̱u̱nꞌ‑u: ―Kuiyo nu̱u̱nꞌ ni̱ꞌ, Satanás, chi káchíꞌ tu̱ꞌun níso nu̱u̱nꞌ Tutuꞌ Ííꞌ ya̱: “Íyó kuneñu̱ꞌun nú I̱toꞌoꞌ nú ya̱ kúvi Ndiosíꞌ nú, jee nu̱u̱nꞌ métúꞌún maáréꞌ ni íyó kɨtíñú nú” ―nkachiꞌ Jesús.

¹¹ Saájee nkuiyo kui̱ꞌna̱ꞌ vá nu̱u̱nꞌ Jesús jee kua̱ꞌa̱nꞌ‑a, jee nkenta rá najiáꞌáꞌ ííꞌ Ndiosíꞌ nchi̱neí ráa Jesús.

Kájiéꞌé Jesús rá tiñu re̱ꞌ nu̱u̱nꞌ ñuꞌun Galilea

¹² Jee sáá nku̱káꞌnú iniꞌ Jesús ya̱ ntɨ́ɨn ráa Juan nchiꞌi ráa maa veka̱a, jee nkene re̱ꞌ ñuꞌun Judea jee nni̱kó re̱ꞌ ñuꞌun Galilea.

¹³ Jee nxi̱nóo re̱ꞌ ñuunꞌ Nazaret jee kua̱ꞌa̱nꞌ re̱ꞌ kuneeꞌ re̱ꞌ ñuunꞌ Capernaum, ya̱ káá yúnteñúꞌún, nu̱u̱nꞌ káá ñuꞌun rá ñɨvɨ ya̱ kúvi ráa rá se̱ꞌya ichiyúkúnꞌ nkene ráa nu̱u̱nꞌ Zabulón jín Neftalí.

¹⁴ Nkuvi suꞌva sáva nsi̱kúnkuvi tu̱ꞌun njia̱ꞌa Ndiosíꞌ sákachiꞌ Isaías te̱e nna̱kani tu̱ꞌun nkene yuꞌú máá maá Ndiosíꞌ ne̱ yanaꞌán sáá nkachiꞌ‑i:

¹⁵ Ñuꞌun Zabulón jín ñuꞌun Neftalí, ya̱ káá ichi jiáꞌa yatin yúnteñúꞌún, íyo ka̱ꞌ ichi ntekáꞌnú Jordán, ñuꞌun Galilea nu̱u̱nꞌ nééꞌ rá ñɨvɨ ya̱ ntu kúvi ñɨvɨ ñuunꞌ Israel.

¹⁶ Rá ñɨvɨ ya̱ íyó ráa nu̱u̱nꞌ ñu̱neenꞌ jee kuniꞌ ráa ñuꞌunꞌ mánasɨ́ jiánu̱te̱ꞌ Ndiosíꞌ. Jee rá ñɨvɨ vá ya̱ yɨ́ꞌɨ́ ráa nu̱u̱nꞌ ñu̱neenꞌ ya̱ ntu kúneí ráa kaku ráa nu̱u̱nꞌ ya̱ jíꞌíꞌ ráa, soo nastúúnꞌ Ndiosíꞌ ñuꞌunꞌ re̱ꞌ nu̱u̱nꞌ ráa jín tu̱ꞌun ya̱ natavaꞌ re̱ꞌ ráa nu̱u̱nꞌ kua̱chi ráa sikáku re̱ꞌ ráa.

¹⁷ Jee ne̱ tiempúꞌ yukuán nka̱jiéꞌé Jesús stékútu̱ꞌún re̱ꞌ jee nkachiꞌ re̱ꞌ: ―Nakani iniꞌ rán xinóo rán kua̱chi rán, chi ya nkikuyatin nu̱u̱nꞌ rán ya̱ kuvi ki̱vɨ rán naꞌá Ndiosíꞌ ya̱ nééꞌ re̱ꞌ antivɨ́ súkún sáva tatúníꞌ re̱ꞌ nu̱u̱nꞌ rán ―nkachiꞌ Jesús.

Kána Jesús ku̱mi̱ꞌ rá te̱e tɨ́ɨn tia̱ká

¹⁸ Jee jíka Jesús kua̱ꞌa̱nꞌ re̱ꞌ yúnteñúꞌún Galilea, jee niniꞌ re̱ꞌ u̱vi̱ꞌ rá te̱e ya̱ kúvi ñaniꞌ maáráa, ɨɨn ví Simón, ya̱ naní Pedro, jee inka kúvi ñaniꞌ re̱ꞌ, Andrés. Síkéne ráa ñunu yúꞌvé nu̱u̱nꞌ nteñúꞌún, chi te̱e tɨ́ɨn tia̱ká kúvi ráa.

¹⁹ Jee nkachiꞌ Jesús nu̱u̱nꞌ ráa: ―Kunikɨnꞌ rán kutáꞌán rán jín nuꞌuꞌ, jee saꞌá ni̱ꞌ ránoꞌó te̱e, ya̱ stútú rán rá ñɨvɨ ki̱vɨ ráa naꞌá Ndiosíꞌ, kuéntáꞌ kua̱ꞌ tɨ́ɨn rán tia̱ká ntañúꞌún ―nkachiꞌ Jesús.

²⁰ Saájee kuísá ntañúꞌún kuitɨꞌ nxi̱nóo ráa ñunu yúꞌvé ráa, jee nchi̱nikɨnꞌ ráa re̱ꞌ.

²¹ Sáá nkene re̱ꞌ yukuán, jee niniꞌ re̱ꞌ u̱vi̱ꞌ ka̱ꞌ rá te̱e, ya̱ kúvi ñaniꞌ maáráa, ɨɨn ví Jacobo jee inka ví ñaniꞌ‑i Juan, jee kúvi ráa se̱ꞌya Zebedeo. Ñúꞌún ráa iniꞌ barkúꞌ jín tátáꞌ ráa Zebedeo, jee násaꞌá ráa rá ñunu yúꞌvé tɨ́ɨn ráa tia̱ká. Jee nkana Jesús ráa kunikɨnꞌ ráa re̱ꞌ.

²² Jee kuísá ntañúꞌún kuitɨꞌ nxi̱nóo ráa barkúꞌ jín tátáꞌ ráa, jee nchi̱nikɨnꞌ ráa Jesús.

Xínéꞌénꞌ Jesús tu̱ꞌun váꞌa Ndiosíꞌ nu̱u̱nꞌ kue̱ꞌe̱ꞌ víꞌí rá ñɨvɨ

²³ Jee jíkónúun Jesús kua̱íyó rá ñuunꞌ sánitɨ́ɨn Galilea, xínéꞌénꞌ re̱ꞌ Tu̱ꞌun Ndiosíꞌ iniꞌ rá veꞌi sinagoga nu̱u̱nꞌ kútútú rá ñɨvɨ Israel yukuán, jee stékútu̱ꞌún re̱ꞌ tu̱ꞌun váꞌa jie̱ꞌe̱ꞌ ya̱ kuvi ki̱vɨ ñɨvɨ naꞌá Ndiosíꞌ nu̱u̱nꞌ tátúníꞌ‑i, jee xínúvi re̱ꞌ ntáká rá ñɨvɨ kúꞌvíꞌ jín ntáká rá ñɨvɨ ya̱ táyáꞌ ñunéꞌyúꞌ ráa.

²⁴ Jee ñe̱te̱nuun tu̱ꞌun jie̱ꞌe̱ꞌ Jesús nu̱u̱nꞌ ntáká rá ñuunꞌ sánitɨ́ɨn ñuunꞌ Siria. Jee nki̱naka rá ñɨvɨ nu̱u̱nꞌ Jesús ntáká rá ñɨvɨ kúꞌvíꞌ ya̱ nóꞌo sɨ́ɨ́n sɨ́ɨ́n kéꞌín nu̱u̱nꞌ kue̱ꞌi̱ꞌ, jín rá yájíꞌ yatúꞌ, jín rá yɨ́ꞌɨ́ ta̱chi̱ꞌ kíni, jín rá jíꞌíyɨ̱ꞌɨ́ jín rá ñɨvɨ ya̱ ntu kúvi kantaꞌ ñunéꞌyúꞌ jee nxi̱núvi Jesús ráa.

²⁵ Jee níkɨ́nꞌ kue̱ꞌe̱ꞌ víꞌí rá ñɨvɨ kútáꞌán ráa jín Jesús. Jee maáráa ví rá ñɨvɨ rá ñuunꞌ Galilea jín rá ñuunꞌ Decápolis jín ñuunꞌ Jerusalén jín rá inka ñuunꞌ Judea jín rá ñuunꞌ ya̱ káá íyo ka̱ꞌ ichi ntekáꞌnú Jordán.