Mateo 3 - Mixteco del suroeste de Tlaxiaco Oaxaca

Tu̱ꞌun ya̱ stékútu̱ꞌún Juan te̱e síkuánuté

¹ Jee sáá njia̱ꞌa tiempúꞌ jee nkenta rá ki̱vɨ̱ꞌ yukuán ya̱ nkenta Juan síkuánuté jee ne̱ nu̱u̱nꞌ ñuꞌún saɨn tɨ́ɨn Judea nste̱kútu̱ꞌún re̱ꞌ nu̱u̱nꞌ rá ñɨvɨ,

² jee nkachiꞌ re̱ꞌ: ―Nakani iniꞌ rán xinóo rán kua̱chi rán, chi ya nkikuyatin nu̱u̱nꞌ rán ya̱ kuvi ki̱vɨ rán naꞌá Ndiosíꞌ ya̱ nééꞌ re̱ꞌ antivɨ́ súkún sáva tatúníꞌ re̱ꞌ nu̱u̱nꞌ rán ―nkachiꞌ Juan.

³ Jie̱ꞌe̱ꞌ Juan yaꞌá kúvi ya̱ nkaꞌanꞌ Ndiosíꞌ sáá njia̱ꞌa re̱ꞌ tu̱ꞌun sákachiꞌ Isaías ɨɨn te̱e nna̱kani tu̱ꞌun nkene yuꞌú máá maá Ndiosíꞌ ne̱ yanaꞌán sáá nkachiꞌ‑i: Nusuyuꞌú ɨɨn te̱e ya̱ kánajíín ne̱ nu̱u̱nꞌ ñu̱ꞌún sáɨn nu̱u̱nꞌ ntu̱ví ñɨvɨ, jee káchíꞌ re̱ꞌ: “[Satúꞌva rán ánímaꞌ rán sáva koo maniꞌ rán natuꞌva rán nu̱u̱nꞌ I̱toꞌoꞌ‑ó kuéntáꞌ] satúꞌva rán ichi kiji re̱ꞌ, kuéntáꞌ nasaꞌá na̱a̱ꞌ ichi kiaaꞌ re̱ꞌ”, káchíꞌ‑i, nkachiꞌ Isaías nu̱u̱nꞌ Tutuꞌ Ííꞌ.

⁴ Jee ñúꞌún Juan saꞌma láꞌví ya̱ kúvi ixi kitɨ kameyúꞌ, jín ɨɨn manchíjí ñɨɨn yɨ́ꞌɨ́ chi̱ji re̱ꞌ, jee nyajiꞌ re̱ꞌ lito̱o̱ꞌ jín nu̱xi ñu̱ñu̱ꞌ yúkú.

⁵ Jee rá ñɨvɨ ñuunꞌ Jerusalén, jín rá ñɨvɨ ntáká rá inka ñuunꞌ nu̱u̱nꞌ sánitɨ́ɨn Judea, jín suni ntáká rá ñuunꞌ káá yatin yuꞌú ntekáꞌnú Jordán kéne ráa jiáꞌánꞌ ráa nu̱u̱nꞌ re̱ꞌ tésóꞌo ráa rá tu̱ꞌun stékútu̱ꞌún re̱ꞌ.

⁶ Jee sáá néne yuꞌú ráa kua̱chi ráa nu̱u̱nꞌ Ndiosíꞌ, jee síkuánuté Juan ráa nu̱u̱nꞌ ntekáꞌnú Jordán.

⁷ Soo sáá niniꞌ re̱ꞌ ya̱ kénta kue̱ꞌe̱ꞌ víꞌí rá te̱e yɨ́ꞌɨ́ ñujiínꞌ fariseo jín rá te̱e yɨ́ꞌɨ́ ñujiínꞌ saduceo nu̱u̱nꞌ síkuánuté re̱ꞌ, jee nkachiꞌ re̱ꞌ nu̱u̱nꞌ ráa: ―Ránoꞌó, kuéntáꞌ tataꞌ ko̱o̱ꞌ xe̱e̱nꞌ kúvi rán. ¿Né ɨɨn nxtúꞌva ya̱chi̱ꞌ nu̱u̱nꞌ rán, ya̱ kene kunu rán ka̱ku rán nu̱u̱nꞌ tu̱nóꞌó xéénꞌ kiji ya̱ xinóꞌo Ndiosíꞌ ránoꞌó chi kítɨ́ꞌ iniꞌ re̱ꞌ néꞌyá re̱ꞌ kua̱chi rán rúja?

⁸ ’Saáva íyó saꞌá rán tiñu na̱a̱ꞌ váꞌa, ya̱ stúvi nijia rán ya̱ nna̱kani nijia iniꞌ rán nxi̱nóo rán tiñu niváꞌa. Jee suꞌva kuvi rán kuéntáꞌ yutun kúun ya̱ vixíꞌ váꞌa.

⁹ Jee saáva koto káchíꞌ rán iniꞌ ánímaꞌ rán: “[Ka̱ku ráníꞌ] chi jííꞌ yanaꞌán ránꞌ ví Abraham.” Chi káchíꞌ ni̱ꞌ nu̱u̱nꞌ rán ya̱ Ndiosíꞌ kuvi saꞌá re̱ꞌ ya̱ nuvi ne̱ rá yu̱u̱ꞌ yaꞌá sáva kuvi ráa tataꞌ se̱ꞌya Abraham.

¹⁰ Jee [maárán ya̱ ntu nákani iniꞌ rán jie̱ꞌe̱ꞌ kua̱chi rán kúvi rán kuéntáꞌ] yutun ya̱ ntu jiáꞌa ya̱ vixíꞌ váꞌa jee ya íyó tu̱ꞌva hacha ya̱ keꞌneꞌ‑e ne̱ yoꞌo ntáká rá yutun ya̱ ntu jiáꞌa ya̱ vixíꞌ váꞌa jee chuꞌun maa nu̱u̱nꞌ ñúꞌúnꞌ ka̱yu̱ꞌ‑u.

¹¹ ’Jee nuꞌuꞌ chi máá naáꞌ nijia ya̱ síkuánuté ni̱ꞌ ránoꞌó jín nute kuíí ni, ya̱ stúvi ya̱ nna̱kani nijia iniꞌ rán nu̱u̱nꞌ Ndiosíꞌ jie̱ꞌe̱ꞌ kua̱chi rán. Soo ya̱ta̱ꞌ ni̱ꞌ kiji ɨɨn ya̱ kúñáꞌnú nasɨ́kuitɨꞌ re̱ꞌ ka̱ꞌ nsú káꞌ nuꞌuꞌ, ya̱ ni ntu̱né íyó ni̱ꞌi̱nꞌ ni̱ꞌ ya̱ kunaꞌá ni̱ꞌ sú kua̱chi ni̱jia̱nꞌ re̱ꞌ. Jee maáréꞌ chi sikuánuté re̱ꞌ sava ránoꞌó jín Ta̱chi̱ꞌ Ííꞌ re̱ꞌ sáva kɨꞌɨ‑ɨ ánímaꞌ ránú ya̱ nákani iniꞌ rán, jee rá inka rán, ya̱ ntu nákani iniꞌ rán, sikuánuté re̱ꞌ jín ñuꞌunꞌ xinóꞌo re̱ꞌ ránoꞌó.

¹² Chi sukuán saꞌá sɨ́ɨ́n re̱ꞌ rá ñɨvɨ váꞌa jín rá ñɨvɨ niváꞌa, kuéntáꞌ ínaꞌá ɨɨn te̱e pala nu̱u̱nꞌ kúyutún trigúꞌ sáva ke̱in‑i trigúꞌ jín pala jee sikáa‑a vá sáá nátivɨ‑ɨ vá, jee saꞌá sɨ́ɨ́n re̱ꞌ nikɨn trigúꞌ jín ya̱ká. Jee nakeꞌen‑e trigúꞌ nachuꞌun iniꞌ yakaꞌ jee chuꞌun‑u rá ya̱ká nu̱u̱nꞌ ñuꞌúnꞌ ya̱ ni ntu náꞌváꞌ‑a nɨ́ɨ́nkání ―nkachiꞌ Juan.

Sáá jiánuté Jesús

¹³ Sáá njia̱ꞌa tiempúꞌ jee nkene Jesús ñuꞌun Galilea, jee nkenta re̱ꞌ ne̱ ntekáꞌnú Jordán nu̱u̱nꞌ íñɨ́ Juan sáva sikuánuté Juan re̱ꞌ.

¹⁴ Soo xíꞌna ka̱ꞌ ninii̱yo Juan ya̱ sikuánuté re̱ꞌ Jesús, jee nkachiꞌ re̱ꞌ: ―Nuꞌuꞌ vá jíniñúꞌún ni̱ꞌ ya̱ íyó sikuánuté nú nuꞌuꞌ. Jee, ¿á noꞌó saꞌ váji nú nu̱u̱nꞌ nuꞌuꞌ rúja? ―nkachiꞌ Juan.

¹⁵ Jee nkachiꞌ Jesús nu̱u̱nꞌ re̱ꞌ: ―Kɨnetuꞌ nú saꞌá‑ó maa, chi saá íyó sikúnkuvi‑ó ntáká rá tiñu na̱a̱ꞌ sáni kuíni Ndiosíꞌ saꞌá‑ó ―nkachiꞌ re̱ꞌ. Saájee ñɨ̱netuꞌ Juan sikuánuté re̱ꞌ Jesús.

¹⁶ Jee sáá nkuvi ña̱nuté Jesús, jee máá nkene re̱ꞌ nu̱u̱nꞌ nute, jee máá hora yukuán nnine ne̱ antivɨ́ súkún nu̱u̱nꞌ nééꞌ Ndiosíꞌ, jee niniꞌ Jesús Ta̱chi̱ꞌ Ííꞌ Ndiosíꞌ ya̱ va̱ji nkuun kuéntáꞌ ɨɨn paloma, ña̱ko̱so̱ꞌ‑o re̱ꞌ.

¹⁷ Saájee ɨɨn ta̱chi̱yuꞌú nteso̱ꞌo ne̱ antivɨ́ súkún, jee nkachiꞌ‑i: ―Yaꞌá kúvi Se̱ꞌya ni̱ꞌ jee ñúnúunꞌ ni̱ꞌ maa, jee kúváꞌa víꞌí iniꞌ ni̱ꞌ néꞌyá ni̱ꞌ maa ―nkachiꞌ Ndiosíꞌ.