Mateo 16 - Mixteco del suroeste de Tlaxiaco Oaxaca

Rá te̱e yɨ́ꞌɨ́ ñujiínꞌ fariseo jín saduceo jíkánꞌ ráa ɨɨn seña a̱nasɨ́ váꞌa

¹ Rá te̱e yɨ́ꞌɨ́ ñujiínꞌ fariseo jín rá saduceo nkenta ráa nu̱u̱nꞌ Jesús, sáva sikúvi ráa iniꞌ re̱ꞌ sáva kototúníꞌ ráa re̱ꞌ. Jee saáva ni̱ka̱nꞌ ráa nu̱u̱nꞌ re̱ꞌ ya̱ saꞌá re̱ꞌ ɨɨn seña a̱nasɨ́ ya̱ stúvi re̱ꞌ ya̱ níso re̱ꞌ fesáꞌ ííꞌ váji ne̱ nu̱u̱nꞌ Ndiosíꞌ nééꞌ antivɨ́ súkún.

² Soo nna̱xiníkó Jesús nkachiꞌ re̱ꞌ nu̱u̱nꞌ ráa: ―Sáá nini kuíí jee káchíꞌ rán: “Va̱ꞌa koo tiempúꞌ, chi jíchi kuéꞌé súkún.”

³ Jee sáá kunijinꞌ jee káchíꞌ rán: “Vitan koo ta̱chi̱ꞌ sa̱vi̱ꞌ xéénꞌ chi jíchi kuéꞌé súkún, jee íyó vikó”, káchíꞌ rán. ¡Te̱e sansuꞌva kúvi rán! Chi jie̱ꞌe̱ꞌ na̱ja túvi súkún jíníꞌ va̱ꞌa rán nákuniꞌ rán na̱ja jiáꞌa súkún tiempúꞌ, soo ni ntu̱ví kúvi nákuniꞌ rán na̱ja jiáꞌa rá seña ya̱ sáꞌá ni̱ꞌ tiempúꞌ vitan.

⁴ Rá ñɨvɨ kánéꞌén íyó tiempúꞌ vitan, ya̱ ntu náaꞌ ráa nu̱u̱nꞌ Ndiosíꞌ, jee jíkánꞌ ráa ya̱ saꞌá ni̱ꞌ milagrúꞌ ya̱ kúvi seña a̱nasɨ́. Soo ni nsáꞌ saꞌá ni̱ꞌ ni ɨɨn seña a̱nasɨ́ ya̱ ku̱ꞌva ni̱ꞌ nu̱u̱nꞌ ráa, chisaꞌ kua̱chi ku̱ꞌva ni̱ꞌ nu̱u̱nꞌ ráa máá seña kuéntáꞌ kua̱ꞌ máá seña a̱nasɨ́ ya̱ nsa̱ꞌá Ndiosíꞌ jín Jonás ―nkachiꞌ Jesús, jee nxi̱nóo re̱ꞌ ráa jee kua̱ꞌa̱nꞌ re̱ꞌ.

Tu̱ꞌun xínéꞌénꞌ rá te̱e kúvi grupo fariseo, kúvi‑i kuéntáꞌ levadura

⁵ Jee sáá njia̱ꞌa rá te̱e súkuáꞌa Jesús vá íyo ka̱ꞌ ichi yúnteñúꞌún, jee nnaanꞌ iniꞌ ráa kunaꞌá ráa i̱xta̱tíláꞌ kɨ̱ꞌɨ̱nꞌ jín ráa.

⁶ Saájee nkachiꞌ Jesús nu̱u̱nꞌ ráa: ―Kumí rán maárán, nito koo rán maárán nu̱u̱nꞌ levadura rá te̱e kúvi fariseo, jín rá saduceo ―nkachiꞌ re̱ꞌ.

⁷ Saájee nku̱kuéntú ráa jín táꞌán ráa jee nkachiꞌ ráa: ―Káchíꞌ re̱ꞌ nu̱u̱nꞌ‑ó sukuán, chi ntu váji‑ó jín i̱xta̱tíláꞌ.

⁸ Soo ya jíníꞌ Jesús ya̱ káchíꞌ ráa, jee nkachiꞌ re̱ꞌ: ―¡Na̱ ka̱ꞌ te̱e ya̱ yakuꞌ kúneí iniꞌ kúvi rán! ¿Na̱ kuvi chi káchíꞌ rán ya̱ ntu váji rán jín i̱xta̱tíláꞌ?

⁹ ¿Á ni ntiáꞌan ki̱ku̱ꞌun iniꞌ rán?, jee, ¿á ni ntu̱ví nákúꞌun iniꞌ rán jie̱ꞌe̱ꞌ rá úꞌúnꞌ i̱xta̱tíláꞌ ya̱ nyajiꞌ u̱ꞌu̱nꞌ mil (5000) te̱e maa, jín na̱ja rá chikívɨ́ꞌ rá léfé nkino̱o ya̱ nyajiꞌ ráa nna̱stútú rán rúja?

¹⁰ Jee, ¿á suni ni ntu̱ví nákúꞌun iniꞌ rán jie̱ꞌe̱ꞌ rá uxáꞌ i̱xta̱tíláꞌ nyajiꞌ ku̱mi̱ꞌ mil (4000) te̱e maa, jín na̱ja chikívɨ́ꞌ rá léfé nkino̱o nna̱stútú rán rúja?

¹¹ Jee, ¿na̱ jie̱ꞌe̱ꞌ chi ntu ñáku̱ꞌun iniꞌ rán ya̱ nsú jie̱ꞌe̱ꞌ i̱xta̱tíláꞌ vá nkaꞌanꞌ ni̱ꞌ, sáá nkachiꞌ ni̱ꞌ ya̱ kumí rán maárán nu̱u̱nꞌ levadura rá te̱e ñujiínꞌ fariseo jín ñujiínꞌ saduceo? ―nkachiꞌ Jesús.

¹² Saájee ña̱ku̱ꞌun iniꞌ ráa ya̱ nsáꞌ nkachiꞌ Jesús ya̱ kumí ráa maáráa nu̱u̱nꞌ yuchi levadura ya̱ yɨ́ꞌɨ́ i̱xta̱tíláꞌ. Chisaꞌ kumí ráa maáráa nu̱u̱nꞌ rá tu̱ꞌun ya̱ xínéꞌénꞌ rá te̱e fariseo jín rá saduceo.

Sánáaꞌ Pedro ya̱ Jesús kúvi Cristo ya̱ nátavaꞌ ñɨ̱vɨ́ nu̱u̱nꞌ kua̱chi ráa

¹³ Sáá nkenta Jesús ñuꞌun ñuunꞌ tɨ́ɨn ñuunꞌ Cesarea Filipo, jee ni̱ka̱tu̱ꞌún re̱ꞌ rá te̱e súkuáꞌa re̱ꞌ vá, jee nkachiꞌ re̱ꞌ: ―¿Né ɨɨn káchíꞌ ñɨvɨ ya̱ kúvi nuꞌuꞌ?, ya̱ nta̱jí Ndiosíꞌ nuꞌuꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ ñɨ̱vɨ́ ―nkachiꞌ re̱ꞌ.

¹⁴ Saájee nkachiꞌ ráa: ―Sava rá ñɨvɨ káchíꞌ ya̱ kúvi nú Juan ya̱ nsi̱kuánuté, jee sava ráa ka̱ꞌ káchíꞌ ya̱ kúvi nú Elías, jee sava ráa ka̱ꞌ káchíꞌ ya̱ kúvi nú Jeremías áxí ɨɨn rá te̱e ya̱ nna̱kani ráa tu̱ꞌun nkene yuꞌú máá maá Ndiosíꞌ tióꞌ chíji nasɨ́kuitɨꞌ ―nkachiꞌ ráa.

¹⁵ Saájee nkachiꞌ re̱ꞌ nu̱u̱nꞌ ráa: ―Soo ránoꞌó, ¿né ɨɨn káchíꞌ rán ya̱ kúvi nuꞌuꞌ? ―nkachiꞌ re̱ꞌ.

¹⁶ Saájee nna̱xiníkó Simón Pedro, jee nkachiꞌ‑i: ―Noꞌó kúvi nú Cristo, Se̱ꞌya Ndiosíꞌ tékúꞌ.

¹⁷ Saájee nkachiꞌ Jesús: ―Na̱ ka̱ꞌ netuꞌ ka̱ꞌ kúvi nú Simón, se̱ꞌya Jonás, chi ni ɨɨn ñɨvɨ ñunéꞌyúꞌ ntu̱ví nstúvi maa nu̱u̱nꞌ nú, chisaꞌ máá Tátáꞌ ni̱ꞌ Ndiosíꞌ ya̱ nééꞌ re̱ꞌ antivɨ́ súkún, ví ya̱ nstúvi maa nu̱u̱nꞌ noꞌó.

¹⁸ Jee nuꞌuꞌ káchíꞌ ni̱ꞌ nu̱u̱nꞌ nú, ya̱ noꞌó kúvi Pedro. Jee [tu̱ꞌun na̱a̱ꞌ vá ya̱ nkachiꞌ nú], yaꞌá kúvi máá kava káꞌnú nu̱u̱nꞌ samaꞌ ni̱ꞌ veñu̱ꞌun ni̱ꞌ, ya̱ kúvi rá ñɨvɨ kúneí iniꞌ ráa nuꞌuꞌ. Jee nu̱u̱nꞌ íyó rá ánímaꞌ rá ñɨvɨ níꞌiꞌ ntu̱náꞌ kuneí‑i jín rá ñɨvɨ kúneí iniꞌ ráa nuꞌuꞌ.

¹⁹ Jee taji ni̱ꞌ nu̱u̱nꞌ noꞌó nakáa ya̱ jíne‑e sáva ki̱vɨ ñɨvɨ xi̱ntíín Ndiosíꞌ ya̱ nééꞌ antivɨ́ súkún tátúníꞌ re̱ꞌ nu̱u̱nꞌ‑u. Jee néni ɨɨn tu̱ꞌun ni̱ꞌ xinéꞌénꞌ nú iniꞌ ñɨ̱vɨ́ yaꞌá ya̱ ntu íyó saꞌá ñɨvɨ maa, jee suni ya nkachiꞌ Ndiosíꞌ ya̱ nééꞌ antivɨ́ súkún ya̱ ntu íyó saꞌá ñɨvɨ maa. Jee néni ɨɨn tu̱ꞌun ni̱ꞌ xinéꞌénꞌ nú iniꞌ ñɨ̱vɨ́ yaꞌá ya̱ kuvi saꞌá ñɨvɨ maa, jee suni ya nkachiꞌ Ndiosíꞌ ya̱ kuvi saꞌá ñɨvɨ maa.

²⁰ Saájee nta̱túníꞌ Jesús nu̱u̱nꞌ rá te̱e súkuáꞌa re̱ꞌ vá, ya̱ koto káchíꞌ ráa nu̱u̱nꞌ ni ɨɨn ñɨvɨ ya̱ maáréꞌ kúvi Cristo.

Stékútu̱ꞌún Jesús ya̱ kuviꞌ‑i

²¹ Ne̱ saájee nka̱jiéꞌé Jesús nakachiꞌ va̱ꞌa na̱a̱ꞌ re̱ꞌ nu̱u̱nꞌ rá te̱e súkuáꞌa re̱ꞌ vá, ya̱ íyó re̱ꞌ kɨ̱ꞌɨ̱nꞌ re̱ꞌ nu̱u̱nꞌ ñuunꞌ Jerusalén. Jee rá te̱e kúñáꞌnú, jín rá su̱tu̱ꞌ kúñáꞌnú, jín rá te̱e xínéꞌénꞌ tu̱ꞌun nta̱túníꞌ Ndiosíꞌ yanaꞌán, xinóꞌo víꞌí ráa re̱ꞌ, jee kaꞌniꞌ ráa re̱ꞌ. Soo ki̱vɨ̱ꞌ uníꞌ jee natekuꞌ i̱i̱ꞌ re̱ꞌ kene re̱ꞌ nteñu rá ni̱yɨ.

²² Saájee kua̱ꞌa̱nꞌ sɨ́ɨ́n Pedro jín re̱ꞌ, jee nka̱jiéꞌé‑e núxeenꞌ‑e nu̱u̱nꞌ re̱ꞌ: ―I̱toꞌoꞌ, na̱ ka̱ꞌ kunáꞌví iniꞌ Ndiosíꞌ kune̱ꞌyá‑a noꞌó. Ni nsáꞌ kunoꞌo nú sukuán ―nkachiꞌ‑i.

²³ Soo nna̱kune̱ꞌyá Jesús nu̱u̱nꞌ Pedro, jee nkachiꞌ re̱ꞌ nu̱u̱nꞌ‑u: ―¡Kuiyo, kuáꞌán iyo! ¡Satanás!, chi núkú nú xinínkava nú nuꞌuꞌ. Nsáꞌ nénu̱u̱nꞌ nú tiñu Ndiosíꞌ, chisaꞌ nénu̱u̱nꞌ nú sáni jiáni iniꞌ rá ñɨvɨ ―nkachiꞌ re̱ꞌ.

²⁴ Saájee nkachiꞌ re̱ꞌ nu̱u̱nꞌ rá te̱e súkuáꞌa re̱ꞌ vá: ―Retú néni ɨɨn ñɨvɨ kuíni‑i kunikɨnꞌ‑ɨ nuꞌuꞌ, jee íyó xináánꞌ‑a iniꞌ‑i rá níyo iniꞌ maáa, jee ɨɨn ni koo iniꞌ‑i kunoꞌo‑o jie̱ꞌe̱ꞌ níkɨ́nꞌ nuꞌuꞌ, kuéntáꞌ ɨɨn ya̱ níso‑o kurúsiꞌ sáva kuviꞌ‑i nu̱u̱nꞌ vá, jee kunikɨnꞌ nuꞌuꞌ.

²⁵ Chi néni ɨɨn ñɨvɨ ya̱ ntu níkɨ́nꞌ nuꞌuꞌ chi níyo iniꞌ‑i kutekuꞌ va̱ꞌa jín ya̱ kaku‑u tu̱nóꞌó kiji nu̱u̱nꞌ‑u jie̱ꞌe̱ꞌ níkɨ́nꞌ‑ɨ nuꞌuꞌ, jee sukuíta‑a ya̱ kutekuꞌ jín Ndiosíꞌ. Soo néni ɨɨn ñɨvɨ ya̱ níkɨ́nꞌ‑ɨ nuꞌuꞌ súka̱ꞌ nóꞌo‑o tu̱nóꞌó ne̱ kuviꞌ‑i jie̱ꞌe̱ꞌ níkɨ́nꞌ‑ɨ nuꞌuꞌ jín jie̱ꞌe̱ꞌ tɨ́ɨn‑ɨ tu̱ꞌun váꞌa ni̱ꞌ, jee ka̱ku nijia‑a chi ni̱ꞌi̱nꞌ‑i ya̱ kutekuꞌ‑u jín Ndiosíꞌ.

²⁶ Chi, ¿na̱ nu̱u̱nꞌ íyótiñu nu̱u̱nꞌ ɨɨn ñɨvɨ, retú súnika̱ꞌ kuneí‑i ni̱ꞌi̱nꞌ‑i kua̱íyó ñɨ̱vɨ́ yaꞌá, retú sukuíta‑a ánímaꞌ‑a ya̱ nsáꞌ nanitáꞌvíꞌ‑i nu̱u̱nꞌ Ndiosíꞌ rúja? Áxí, ¿ná kúvi ya̱ chunáán ɨɨn ñɨvɨ sáva sikáku‑u ánímaꞌ‑a nanitáꞌvíꞌ‑i nu̱u̱nꞌ Ndiosíꞌ rúja? Ntu̱náꞌ íyó ya̱ kúvi ku̱ꞌva‑a.

²⁷ Chi nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, jee kiji tuku ni̱ꞌ iniꞌ ñɨ̱vɨ́ yaꞌá, jee viiꞌ víꞌí kuñáꞌnú ni̱ꞌ jín tiñu níso ni̱ꞌ kuéntáꞌ kua̱ꞌ kúñáꞌnú maá Tátáꞌ ni̱ꞌ Ndiosíꞌ, jee kiji ni̱ꞌ jín rá najiáꞌáꞌ ííꞌ ni̱ꞌ. Saájee nachunáán ni̱ꞌ nu̱u̱nꞌ ta ɨɨn rá ñɨvɨ sánikua̱ꞌ na̱ja íyó tiñu nsa̱ꞌá ráa.

²⁸ Chi máá naáꞌ vá káchíꞌ ni̱ꞌ nu̱u̱nꞌ rán, ya̱ íyó sava rán ya̱ íñɨ́ yaꞌá, nsáꞌ kuviꞌ ráa ne̱kua̱ꞌ kuniꞌ ráa nuꞌuꞌ ya̱ kiji ni̱ꞌ jín tiñu ñáꞌnú níso ni̱ꞌ tatúníꞌ ni̱ꞌ ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ ―nkachiꞌ Jesús.