Marcos 16 - Mixteco del suroeste de Tlaxiaco Oaxaca

Nna̱tekuꞌ i̱i̱ꞌ Jesús

¹ Sáá njia̱ꞌa ki̱vɨ̱ꞌ nájiáví, jee María ñuunꞌ Magdala, jín Salomé jín María nánáꞌ Jacobo, nkeꞌen ráa aceite jiávi̱xi̱ꞌ sáva kɨ̱chisó ráa maa nu̱u̱nꞌ ñunéꞌyúꞌ Jesús.

² Jee neꞌenꞌ víꞌí domingúꞌ, ki̱vɨ̱ꞌ xíꞌnañúꞌún ya̱ semana, ña̱ꞌa̱nꞌ ráa nu̱u̱nꞌ yaviꞌ vá, sáá ntu̱u̱nꞌ nka̱niiꞌ.

³ Jee jíkátu̱ꞌún táꞌán ráa: ―¿Né ɨɨn xitá yu̱u̱ꞌ káꞌnú yuꞌú yaviꞌ vá?

⁴ Soo sáá nna̱koto ráa, jee niniꞌ ráa ya̱ ya nika xíín yu̱u̱ꞌ vá, súnika̱ꞌ máá káꞌnú nasɨ́kuitɨꞌ ví‑i.

⁵ Jee nki̱vɨ ráa iniꞌ yaviꞌ vá, jee yukuán niniꞌ ráa ɨɨn te̱e súchí nééꞌ re̱ꞌ ichi kuáꞌá ráa. Jee ñúꞌún re̱ꞌ saꞌma kuíjín kání. Jee nyu̱ꞌví nasɨ́kuitɨꞌ ráa.

⁶ Soo nkachiꞌ re̱ꞌ nu̱u̱nꞌ ráa: ―Koto yúꞌví rán. Jesús te̱e ñuunꞌ Nazaret ya̱ nánukú rán, ya̱ níꞌiꞌ nu̱u̱nꞌ kurúsiꞌ, ya nna̱tekuꞌ i̱i̱ꞌ re̱ꞌ, ya nxi̱nákóo Ndiosíꞌ re̱ꞌ nkene re̱ꞌ nteñu rá ni̱yɨ. Ntu̱ví re̱ꞌ ka̱ꞌ yaꞌá. Kune̱ꞌyá rán nu̱u̱nꞌ ñakɨnꞌ ráa re̱ꞌ.

⁷ Soo kuáꞌán kachiꞌ rán nu̱u̱nꞌ rá te̱e nsu̱kuáꞌa jín re̱ꞌ, jín nu̱u̱nꞌ Pedro, ya̱ xíꞌna re̱ꞌ ka̱ꞌ kɨ̱ꞌɨ̱nꞌ ichinúúnꞌ rán ne̱ ñuunꞌ Galilea. Yukuán kuniꞌ rán re̱ꞌ, sáni nkachiꞌ re̱ꞌ nu̱u̱nꞌ rán ―nkachiꞌ te̱e súchí vá.

⁸ Saájee nkenekunu ráa ne̱ iniꞌ yaviꞌ veꞌi ni̱yɨ vá, chi nka̱jiéꞌé nkisɨ‑ɨ ráa jee nti̱vɨ́ xíniꞌ ráa. Jee ni ɨɨn nu̱u̱nꞌ ntu̱náꞌ nkáchíꞌ ráa, chi nyu̱ꞌví ráa.

Ntu̱vi Jesús nu̱u̱nꞌ María ñaꞌan ñuunꞌ Magdala

⁹ [Sáá nna̱tekuꞌ i̱i̱ꞌ Jesús, ya̱neꞌenꞌ domingúꞌ ki̱vɨ̱ꞌ xíꞌnañúꞌún kájiéꞌé semana, jee xíꞌna ka̱ꞌ nu̱u̱nꞌ María ñuunꞌ Magdala ntu̱vi re̱ꞌ. Jee kúvi ña ñaꞌan ya̱ ntavaꞌ re̱ꞌ u̱xa̱ꞌ ta̱chi̱ꞌ néꞌí.

¹⁰ Jee ña̱ꞌa̱nꞌ ña, jee ña̱kachitu̱ꞌún ña nu̱u̱nꞌ rá ñɨvɨ nku̱táꞌán jín re̱ꞌ. Jee kúkuéká iniꞌ ráa, jee náꞌyúꞌ ráa.

¹¹ Soo sáá nteso̱ꞌo ráa ya̱ nna̱tekuꞌ i̱i̱ꞌ re̱ꞌ, jín ya̱ niniꞌ ña maa, soo ntu nínúꞌ iniꞌ ráa ña.

Ntu̱vi Jesús nu̱u̱nꞌ u̱vi̱ꞌ rá te̱e ya̱ súkuáꞌa re̱ꞌ ráa

¹² Jee kuíre ni jíka núvíꞌ rá te̱e kua̱ꞌa̱nꞌ ráa nu̱u̱nꞌ kuaríáꞌ, jee sɨ́ɨ́n ka̱ꞌ ntu̱vi Jesús nu̱u̱nꞌ ráa.

¹³ Jee sáá kua̱ꞌa̱nꞌ ráa jee nkachitu̱ꞌún ráa maa nu̱u̱nꞌ rá inka ka̱ꞌ, jee suni ntu nínúꞌ iniꞌ rává.

Síkúnisotíñú Jesús rá te̱e súkuáꞌa re̱ꞌ ráa ya̱ kuvi ráa apóstol

¹⁴ Jee kuéé ka̱ꞌ, ntu̱vi Jesús nu̱u̱nꞌ rá ni u̱ji̱ꞌ ɨɨn te̱e, ni nééꞌ ráa nu̱u̱nꞌ mesa kúxíní ráa. Jee nku̱xeenꞌ re̱ꞌ nu̱u̱nꞌ ráa, ya̱ ntu nínúꞌ iniꞌ ráa, ya̱ ni̱ꞌin ánímaꞌ ráa, chi ntu nínúꞌ iniꞌ ráa rá ñɨvɨ niniꞌ ya̱ nna̱tekuꞌ i̱i̱ꞌ re̱ꞌ.

¹⁵ Jee nkachiꞌ re̱ꞌ nu̱u̱nꞌ ráa: ―Kuáꞌán rán kua̱íyó ñɨ̱vɨ́, jee stekútu̱ꞌún rán tu̱ꞌun váꞌa jie̱ꞌe̱ꞌ nuꞌuꞌ nu̱u̱nꞌ rá ñɨvɨ kua̱íyó ñɨ̱vɨ́, ya̱ nsa̱ꞌá Ndiosíꞌ.

¹⁶ Ɨɨn ñɨvɨ ya̱ kuneí iniꞌ‑i tu̱ꞌun vá, jee kuanuté‑e, jee natavaꞌ Ndiosíꞌ maa nu̱u̱nꞌ kua̱chi‑i sikáku re̱ꞌ maa. Soo ɨɨn ya̱ ntu kúneí iniꞌ tu̱ꞌun vá, jee sanáaꞌ Ndiosíꞌ si̱kɨ̱ꞌ‑ɨ ya̱ kunoꞌo‑o.

¹⁷ Jee rá seña yaꞌá koo jín rá ñɨvɨ, ya̱ kúneí iniꞌ ráa nuꞌuꞌ, sáva stúvi‑i ya̱ íñɨ́ ni̱ꞌ jín ráa: ya̱ nu̱u̱nꞌ súví ni̱ꞌ taníkɨ́nꞌ ráa rá ta̱chi̱ꞌ néꞌí yɨ́ꞌɨ́ ñɨvɨ. Jee kaꞌanꞌ ráa inka ka̱ꞌ nu̱u̱nꞌ tu̱ꞌun, ya̱ ntu jiáku̱ꞌun iniꞌ ráa.

¹⁸ Jee tɨɨn ráa ko̱o̱ꞌ xe̱e̱nꞌ, jee ré koꞌo ráa nute kútáꞌán jín ñuꞌun xéénꞌ, jee ntu̱náꞌ kunoꞌo ráa. Jee suni chisó ráa naꞌá ráa nu̱u̱nꞌ rá kúꞌvíꞌ jee nuvi rává ―nkachiꞌ Jesús.

Nnaa Jesús súkún

¹⁹ Saájee sáá njia̱ꞌa ya̱ nkaꞌanꞌ maá I̱toꞌoꞌ‑ó Jesús jín ráa, jee nxi̱náa Ndiosíꞌ Jesús súkún. Jee ña̱kuneeꞌ re̱ꞌ ichi kuáꞌá Ndiosíꞌ nu̱u̱nꞌ tátúníꞌ re̱ꞌ jín‑i.

²⁰ Jee nke̱i̱chí rá te̱e vá, jee nɨ́ɨ́n nste̱kútu̱ꞌún ráa tu̱ꞌun váꞌa Jesús, jee nchi̱neí maá I̱toꞌoꞌ‑ó ráa, jee nstúvi re̱ꞌ ya̱ naáꞌ ví tu̱ꞌun vá jín seña ííꞌ a̱nasɨ́ nsa̱ꞌá re̱ꞌ. Saá koo. Amén.]