Hechos 18 - Mixteco del suroeste de Tlaxiaco Oaxaca

Pablo nneeꞌ ñuunꞌ Corinto

¹ Sáá nkuvi rá yaꞌá, jee nkene Pablo ñuunꞌ Atenas, jee kua̱ꞌa̱nꞌ‑a ñuunꞌ Corinto.

² Jee yukuán ninita̱ꞌán‑a jín ɨɨn te̱e Israel naní Aquila. Kúvi re̱ꞌ se̱ꞌya ñuunꞌ Ponto. Sukuán nkenta re̱ꞌ ñuunꞌ Corinto, ya̱ nkene re̱ꞌ nación Italia. Nkenta re̱ꞌ jín ñasɨ́ꞌɨ́ re̱ꞌ Priscila. Nkene ráa chi Claudio, te̱e nísotíñú tátúníꞌ re̱ꞌ nu̱u̱nꞌ ñuunꞌ Roma, jee nta̱túníꞌ re̱ꞌ ya̱ íyó kene nɨꞌɨ rá ñɨvɨ Israel ñuunꞌ Roma. Kua̱ne̱ꞌyá Pablo ráa.

³ Jee nkino̱o re̱ꞌ jín ráa jee nsa̱tíñú re̱ꞌ jín ráa. Chijie̱ꞌ ɨɨn nu̱u̱nꞌ ni tiñu yɨ́tíñú‑u jín ráa, ya̱ sáꞌá ráa vesayo saꞌma.

⁴ Jee ta ki̱vɨ̱ꞌ nájiáví, jiáꞌánꞌ‑a nkua̱yuꞌú‑u iniꞌ veꞌi sinagoga nu̱u̱nꞌ kútútú rá ñɨvɨ Israel. Nnu̱nasɨ́‑ɨ nsi̱ínúꞌ‑u iniꞌ rá ñɨvɨ Israel jín suni rá ñɨvɨ griego sáva tɨɨn ráa tu̱ꞌun Jesús.

⁵ Sáá nkene Silas jín Timoteo Macedonia, jee sáá nkenta ráa ñuunꞌ Corinto, nka̱jiéꞌé Pablo máá tiñu stékútu̱ꞌún‑u tu̱ꞌun jie̱ꞌe̱ꞌ Jesús. Jee ístúvi‑i nu̱u̱nꞌ rá ñɨvɨ Israel ya̱ Jesús ví Cristo, [ya̱ ñani Ndiosíꞌ sáva natavaꞌ‑a ñɨvɨ nu̱u̱nꞌ kua̱chi ráa].

⁶ Soo sáá nnuni̱ꞌin ráa jín Pablo, jee sáá káꞌánꞌ niva̱ꞌa ráa si̱kɨ̱ꞌ re̱ꞌ, jee nkisɨ re̱ꞌ ti̱ka̱cha̱a̱ꞌ saꞌma re̱ꞌ, sáva naistúvi re̱ꞌ ya̱ íyó si̱kɨ̱ꞌ ráa. Jee nkachiꞌ‑i: ―Si̱kɨ̱ꞌ maárán ví ya̱ kiji ya̱ xinóꞌo Ndiosíꞌ ránoꞌó. Nsú ka̱ꞌ si̱kɨ̱ꞌ ni̱ꞌ ví‑i. Ne̱ ntañúꞌún, kɨ̱kaꞌanꞌ ni̱ꞌ jín rá ñɨvɨ ntu kúvi Israel.

⁷ Jee nkene‑e veꞌi sinagoga, jee kua̱ꞌa̱nꞌ‑a veꞌi ɨɨn te̱e naní Ticio Justo, ya̱ néñu̱ꞌun re̱ꞌ Ndiosíꞌ. Jee nééꞌ veꞌi re̱ꞌ máá xiín veꞌi sinagoga.

⁸ Jee Crispo ví te̱e kúñáꞌnú sinagoga. Suvire̱ꞌ jín nɨꞌɨ táꞌán veꞌi re̱ꞌ nku̱neí iniꞌ ráa I̱toꞌoꞌ‑ó. Jee sáá nteso̱ꞌo kue̱ꞌe̱ꞌ ñɨvɨ ñuunꞌ Corinto tu̱ꞌun yaꞌá, jee ni̱nu̱ꞌ iniꞌ ráa jee ña̱nuté ráa.

⁹ Jee yakuááꞌ kájíkuitɨꞌ ntu̱vi ya̱ ni̱stúvi I̱toꞌoꞌ‑ó nu̱u̱nꞌ Pablo jee nkachiꞌ‑i: ―Koto yúꞌví nú. Kaꞌanꞌ nú ka̱ꞌ tu̱ꞌun ni̱ꞌ. Koto jiákui̱ñɨ̱ꞌ nú nu̱u̱nꞌ káꞌánꞌ nú.

¹⁰ Chi íñɨ́ ni̱ꞌ jín nú. Ni ɨɨn ntu̱náꞌ kasɨꞌ nu̱u̱nꞌ nó sáva nsáꞌ saꞌá kini ráa nó. Chi íyó kue̱ꞌe̱ꞌ víꞌí ñɨvɨ ni̱ꞌ ki̱vɨ nu̱u̱nꞌ ni̱ꞌ ñuunꞌ yaꞌá.

¹¹ Jee nneeꞌ re̱ꞌ ɨɨn kui̱ya̱ꞌ i̱ñu̱ꞌ yo̱o̱ꞌ yukuán, jee xínéꞌénꞌ re̱ꞌ Tu̱ꞌun Ndiosíꞌ nu̱u̱nꞌ ráa.

¹² Jee sáá kúvi Galión te̱e nísotíñú ya̱ tátúníꞌ sánitɨ́ɨn Acaya, jee íchí nkaꞌanꞌ nuún rá ñɨvɨ Israel, jee nta̱vi̱ꞌ ráa Pablo, jee ña̱na̱ka ráa maa vetíñú.

¹³ Jee káchíꞌ ráa: ―Síínú te̱e yaꞌá iniꞌ rá ñɨvɨ sáva kuneñu̱ꞌun ráa Ndiosíꞌ nsú káꞌ kua̱ꞌ tátúníꞌ ley‑ó.

¹⁴ Mááíyó Pablo kaꞌanꞌ‑a nékúvi, jee nkachiꞌ Galión nu̱u̱nꞌ rá ñɨvɨ Israel: ―Retú máá naáꞌ nsa̱ꞌá kini re̱ꞌ áxí na̱ kua̱chi ni̱ꞌin nsa̱ꞌá re̱ꞌ, máá naáꞌ ya̱ néíká keꞌneꞌ iniꞌ ni̱ꞌ teso̱ꞌo ni̱ꞌ ránoꞌó, ñɨvɨ Israel, nékúvi.

¹⁵ Soo retú kua̱chi jie̱ꞌe̱ꞌ tu̱nkáꞌánꞌ rán ví‑i, jín jie̱ꞌe̱ꞌ rá súví, jín jie̱ꞌe̱ꞌ tu̱ꞌun ley rán, jee maárán sanáaꞌ maa. Ntu kuíni ni̱ꞌ kuvi ni̱ꞌ te̱e jiéꞌnéꞌ tiñu ya̱ sanáaꞌ jie̱ꞌe̱ꞌ rá tiñu yaꞌá.

¹⁶ Jee ntavaꞌ‑a ráa iniꞌ vetíñú.

¹⁷ I̱ña̱jée ntɨɨn nɨꞌɨ ráa te̱e kúñáꞌnú nu̱u̱nꞌ veꞌi sinagoga rá ñɨvɨ Israel, naní Sóstenes. Jee njia̱ꞌa ráa maa ichinúúnꞌ vetíñú. Soo ntu̱né nsa̱ꞌá Galión kuéntáꞌ ya̱ sáꞌá ráa.

Nni̱kó Pablo ñuunꞌ Antioquía jee nka̱jiéꞌé re̱ꞌ ya̱ uníꞌ íchí nika‑a jín tu̱ꞌun Jesús

¹⁸ Sáá nkuvi nneeꞌ Pablo ñuunꞌ Corinto kue̱ꞌe̱ꞌ ki̱vɨ̱ꞌ ka̱ꞌ, jee nkaꞌanꞌ‑a ka̱ꞌ jín rá ñaniꞌ yɨ́ꞌɨ́ ñujiínꞌ Jesús, jee ntɨɨn‑ɨ barkúꞌ kua̱ꞌa̱nꞌ‑a ñuunꞌ Siria, jín Priscila jín Aquila. Ne̱ ntiáꞌan nkene‑e, jee ni nééꞌ i̱i̱ꞌ‑i ñuunꞌ Cencrea, nu̱u̱nꞌ néne nívɨ rá barkúꞌ. Jee yukuán nsa̱ñɨɨ́n‑ɨ xi̱ni̱ꞌ‑i, chi suꞌva stúvi ya̱ nsi̱kúnkuvi‑i ɨɨn tiñu ya̱ nchi̱sóyuꞌú‑u saꞌá‑a nu̱u̱nꞌ Ndiosíꞌ.

¹⁹ Jee nkenta ráa ñuunꞌ Éfeso. Jee nxi̱nóo re̱ꞌ Priscila jín Aquila yukuán. Jee nki̱vɨ re̱ꞌ veꞌi sinagoga nu̱u̱nꞌ kútútú rá ñɨvɨ Israel jee nkua̱yuꞌú‑u jín rá ñɨvɨ Israel.

²⁰ Sáá ni̱ka̱nꞌ ráa ya̱ kino̱o re̱ꞌ ka̱ꞌ jín ráa, soo ntu nkuíni re̱ꞌ.

²¹ I̱ña̱jée nkaꞌanꞌ re̱ꞌ ka̱ꞌ jín ráa, jee nkachiꞌ re̱ꞌ: ―Tukuni nikó ni̱ꞌ nu̱u̱nꞌ nééꞌ rán, ré Ndiosíꞌ kuíni ―nkachiꞌ‑i. Jee ntɨɨn‑ɨ barkúꞌ ñuunꞌ Éfeso jee kua̱ꞌa̱nꞌ‑a.

²² Sáá nkenta‑a ñuunꞌ Cesarea, ña̱kaꞌanꞌ‑a jín rá ñɨvɨ ya̱ kúneí iniꞌ ráa Jesús. Kuíre kua̱ꞌa̱nꞌ‑a ñuunꞌ Antioquía.

²³ Sáá nkuvi nneeꞌ‑e yukuán yakuꞌ tiempúꞌ, jee nkene‑e kua̱ꞌa̱nꞌ‑a jiáꞌa‑a ta ñuunꞌ sánitɨ́ɨn Galacia jín Frigia. Jee yukuán nachituvi‑i nɨꞌɨ rá ñɨvɨ níkɨ́nꞌ ñujiínꞌ Jesús.

Apolos stékútu̱ꞌún ñuunꞌ Éfeso

²⁴ Nkenta ɨɨn te̱e Israel naní Apolos ñuunꞌ Éfeso. Se̱ꞌya ñuunꞌ Alejandría ví re̱ꞌ. Káꞌánꞌ va̱ꞌa nasɨ́kuitɨꞌ re̱ꞌ, jee jíníꞌ noo‑o Tu̱ꞌun Ndiosíꞌ nééꞌ nu̱u̱nꞌ Tutuꞌ Ííꞌ, ya̱ naní Escrituras.

²⁵ Te̱e vá nku̱tu̱ꞌva‑a ichi I̱toꞌoꞌ‑ó. Jee va̱ne̱ꞌ ñúꞌún víꞌí iniꞌ‑i káꞌánꞌ‑a jie̱ꞌe̱ꞌ Jesús, jee nxi̱néꞌénꞌ na̱a̱ꞌ‑a jie̱ꞌe̱ꞌ vá. Soo jíníꞌ‑i kua̱chi kuitɨꞌ tu̱ꞌun nxi̱néꞌénꞌ Juan jie̱ꞌe̱ꞌ ya̱ síkuánuté re̱ꞌ rá ñɨvɨ.

²⁶ Jee kíjiéꞌé‑e káꞌánꞌ neí iniꞌ‑i iniꞌ veꞌi sinagoga nu̱u̱nꞌ kútútú rá ñɨvɨ Israel. Sáá nteso̱ꞌo Priscila jín Aquila ya̱ káꞌánꞌ‑a, jee ntɨɨn sɨ́ɨ́n ráa maa jee nkachiꞌ na̱a̱ꞌ ráa ka̱ꞌ ichi Ndiosíꞌ nu̱u̱nꞌ‑u.

²⁷ Sáá káꞌvi iniꞌ‑i kɨ̱ꞌɨ̱nꞌ‑ɨ Acaya, jee rá ñaniꞌ ya̱ kúneí iniꞌ ráa Jesús, nna̱sáneí ráa iniꞌ‑i. Jee ntee ráa nu̱u̱nꞌ tutuꞌ nu̱u̱nꞌ rá ñɨvɨ yukuán, ya̱ níkɨ́nꞌ ñujiínꞌ Jesús, sáva nakuatáꞌví ráa re̱ꞌ sáá kantaꞌ re̱ꞌ yukuán. Sáá nkenta‑a yukuán, jee nchi̱neí víꞌí‑i rá ñɨvɨ jínúꞌ iniꞌ tu̱ꞌun Jesús chi íyó mániꞌ iniꞌ Ndiosíꞌ néꞌyá‑a ráa.

²⁸ Chi ni̱ꞌin nna̱chuꞌun náaꞌ nijinꞌ re̱ꞌ rá ñɨvɨ Israel ichi. Chi ña̱tíñú‑u Tutuꞌ Ííꞌ níso Tu̱ꞌun Ndiosíꞌ, sáva nstúvi kájí‑i, ya̱ Jesús ví Cristo, [ya̱ ñani Ndiosíꞌ tatúníꞌ ñɨ̱vɨ́].