Hechos 16 - Mixteco del suroeste de Tlaxiaco Oaxaca

Timoteo kútáꞌán‑a jín Pablo jín Silas

¹ Jee suni ña̱ꞌa̱nꞌ Pablo ñuunꞌ Derbe jín Listra. Jee yukuán nneeꞌ ɨɨn te̱e ya̱ níkɨ́nꞌ‑ɨ ñujiínꞌ Jesús, naní Timoteo. Kúvi re̱ꞌ se̱ꞌya yɨ́ɨ́ ɨɨn ñaꞌan ñuunꞌ Israel ya̱ kúneí iniꞌ ña Jesús. Soo tááꞌ re̱ꞌ kúvi te̱e Grecia.

² Rá ñaniꞌ ñuunꞌ Listra jín Iconio, ya̱ kúneí iniꞌ ráa Jesús, nkaꞌanꞌ va̱ꞌa ráa jie̱ꞌe̱ꞌ re̱ꞌ.

³ Nkuini Pablo kutáꞌán Timoteo jín‑i, saáva nsa̱ꞌá circuncidar Pablo maa, ya̱ keꞌneꞌ‑e ntíꞌ ñɨɨn Timoteo sáva stúvi ya̱ kúvi re̱ꞌ te̱e Israel. Nsa̱ꞌá Pablo suꞌva jín re̱ꞌ sáva nsíkítɨ́ꞌ ráa iniꞌ rá ñɨvɨ Israel nééꞌ rá ñuunꞌ yukuán, chi nɨꞌɨ ráa jíníꞌ ya̱ tááꞌ re̱ꞌ kúvi te̱e Grecia.

⁴ I̱ña̱jée sáá njia̱ꞌa ráa rá ñuunꞌ yukuán, nna̱ku̱ꞌva ráa tu̱ꞌun nu̱u̱nꞌ rá ñɨvɨ ya̱ kúneí iniꞌ ráa Jesús, ya̱ nkuna̱a̱ꞌ iniꞌ rá te̱e nísotíñú apóstol jín rá te̱e kúñáꞌnú nééꞌ Jerusalén, jín ya̱ nta̱túníꞌ rává sáva sikúnkuvi rá ñɨvɨ maa.

⁵ Saáva rá ñɨvɨ ya̱ yɨ́ꞌɨ́ ráa nu̱u̱nꞌ Jesús, jee nnu̱neí iniꞌ ráa kuneí iniꞌ ráa Jesús. Jee ni ki̱vɨ̱ꞌ nku̱kueꞌeꞌ ráa ka̱ꞌ nki̱vɨ nu̱u̱nꞌ Jesús.

Kájíkuitɨꞌ ntu̱vi ya̱ nxi̱néꞌénꞌ Ndiosíꞌ nu̱u̱nꞌ Pablo jie̱ꞌe̱ꞌ ɨɨn te̱e Macedonia

⁶ Jee njia̱ꞌa ráa kua̱ꞌa̱nꞌ ráa sánitɨ́ɨn Frigia jín Galacia, chi ntu njiáꞌa Ta̱chi̱ꞌ Ííꞌ Ndiosíꞌ stekútu̱ꞌún ráa tu̱ꞌun va̱ꞌa sánitɨ́ɨn Asia.

⁷ Soo sáá nkenta ráa sánitɨ́ɨn Misia, jee nnu̱kú ráa ki̱vɨ ráa sánitɨ́ɨn Bitinia, soo ntu njia̱ꞌa Ta̱chi̱ꞌ Ííꞌ Jesús ki̱vɨ ráa maa.

⁸ Saáva njia̱ꞌa ráa sánitɨ́ɨn Misia jee nkenta ráa ñuunꞌ Troas.

⁹ Jee kájíkuitɨꞌ ntu̱vi ya̱ nxi̱néꞌénꞌ Ndiosíꞌ nu̱u̱nꞌ Pablo yakuááꞌ. Ntu̱vi nu̱u̱nꞌ re̱ꞌ ɨɨn te̱e Macedonia íñɨ́ nichiꞌ, jee ni̱ka̱nꞌ táꞌvíꞌ‑i nu̱u̱nꞌ re̱ꞌ: “Kiji nú nu̱u̱nꞌ Macedonia jee chineí nú ránuꞌuꞌ.”

¹⁰ Sáá niniꞌ re̱ꞌ ya̱ nxi̱néꞌénꞌ nu̱u̱nꞌ Ndiosíꞌ nu̱u̱nꞌ re̱ꞌ, jee nsa̱ꞌá stákoo ráníꞌ sáva kene ránꞌ kɨ̱ꞌɨ̱nꞌ ránꞌ Macedonia, chi niniꞌ kájí ránꞌ ya̱ kána Ndiosíꞌ ránuꞌuꞌ stekútu̱ꞌún ránꞌ tu̱ꞌun va̱ꞌa re̱ꞌ nu̱u̱nꞌ ráa.

Pablo jín Silas nneeꞌ ñuunꞌ Filipos

¹¹ Nkene ránꞌ ñuunꞌ Troas kua̱ꞌa̱nꞌ ránꞌ jín barkúꞌ. Jee kua̱ꞌa̱nꞌ na̱a̱ꞌ ránꞌ nu̱u̱nꞌ ñuꞌun naní Samotracia káá ma̱ꞌñú. Jee ne̱ ki̱vɨ̱ꞌ steñu̱ꞌún nkenta ránꞌ ñuunꞌ Neápolis.

¹² Jee ne̱ yukuán ña̱ꞌa̱nꞌ ránꞌ ñuunꞌ Filipos, ya̱ kúvi ñuunꞌ maá ñáꞌnú ka̱ꞌ ya̱ tɨ́ɨn Macedonia. Rá ñɨvɨ ñuunꞌ Roma nkenta ña̱kuneeꞌ ñuunꞌ Filipos. Jee kéꞌín ki̱vɨ̱ꞌ nneeꞌ ráníꞌ ñuunꞌ yukuán.

¹³ Ki̱vɨ̱ꞌ nájiáví, nkene ránꞌ yuvéꞌí koo yu̱u̱ꞌ nu̱u̱nꞌ kívɨ rá ñɨvɨ nu̱u̱nꞌ ñuunꞌ. Jee ña̱ꞌa̱nꞌ ránꞌ yúntekáꞌnú, nu̱u̱nꞌ káꞌvi iniꞌ ránꞌ ya̱ íyó nu̱u̱nꞌ káꞌánꞌ rá ñɨvɨ Israel jín Ndiosíꞌ. Jee ña̱kuneeꞌ ránꞌ jee nkaꞌanꞌ ránꞌ jín rá ñaꞌan nku̱kútú.

¹⁴ Ɨɨn rá ñaꞌan vá naní Lidia. Xíkó ña saꞌma líꞌí nééꞌ ya̱ꞌvi. Va̱ji ña ne̱ ñuunꞌ Tiatira. Néñu̱ꞌun ña Ndiosíꞌ. Jee tésóꞌo ña, jee nsa̱ꞌá I̱toꞌoꞌ‑ó nkajiaꞌ iniꞌ ña ya̱ ntɨɨn ña rá tu̱ꞌun ya̱ nkachiꞌ Pablo.

¹⁵ Jee sáá ña̱nuté ña jín rá táꞌán veꞌi ña, nkana ña ránuꞌuꞌ jee ni̱ka̱nꞌ táꞌvíꞌ ña: ―Ré káꞌvi iniꞌ rán ya̱ kúneí nijia iniꞌ ni̱ꞌ Jesús, kiji rán kino̱o rán veꞌi ni̱ꞌ. Jee nsi̱ínúꞌ ña iniꞌ ránꞌ.

¹⁶ Nkuvi‑i ɨɨn íchí sáá kua̱ꞌa̱nꞌ ránꞌ nu̱u̱nꞌ káꞌánꞌ ránꞌ jín Ndiosíꞌ, jee nke̱táꞌán ránꞌ ɨɨn ñasúchí ya̱ kúvi musúꞌ nkeꞌen ñɨvɨ. Jee nijin iniꞌ ña, chi yɨ́ꞌɨ́ ta̱chi̱ꞌ kíni iniꞌ ña. Nni̱ꞌi̱nꞌ víꞌí rá i̱toꞌoꞌ ña xu̱ꞌún sáꞌá ña, chi nkachiꞌ ña ná kuvi ichinúúnꞌ.

¹⁷ Jee suviña níkɨ́nꞌ ña Pablo jín ránꞌ, jee kánajíín ña: ―Rá te̱e yaꞌá kúvi rá musúꞌ ya̱ jiátíñú Ndiosíꞌ, ya̱ kúñáꞌnú ka̱ꞌ nu̱u̱nꞌ nɨꞌɨ. Stékútu̱ꞌún ráa nu̱u̱nꞌ ránoꞌó na̱ja nanitáꞌvíꞌ rán ―nkachiꞌ ñasúchí vá.

¹⁸ Kue̱ꞌe̱ꞌ ki̱vɨ̱ꞌ nsa̱ꞌá ña yaꞌá, jee nku̱níní víꞌí iniꞌ Pablo. Jee nna̱ikó re̱ꞌ jee nkachiꞌ re̱ꞌ nu̱u̱nꞌ ta̱chi̱ꞌ kíni vá: ―Nu̱u̱nꞌ súví Jesús ya̱ kúvi Cristo, tátúníꞌ ni̱ꞌ nu̱u̱nꞌ nú, kene nú ñasúchí vá. Jee kuísá nkene‑e ña.

¹⁹ Sáá niniꞌ rá i̱toꞌoꞌ ña ya̱ nnɨꞌɨ tu̱neí iniꞌ ráa ya̱ nsáꞌ ni̱ꞌi̱nꞌ ráa ka̱ꞌ xu̱ꞌún saꞌá ña, jee ntɨɨn ráa Pablo jín Silas, jee nsi̱úꞌun ráa rává nu̱yáꞌvi, nu̱u̱nꞌ sánáaꞌ ráa rá kua̱chi ichinúúnꞌ rá te̱e néetiñu.

²⁰ Jee sáá ña̱na̱ka ráa rává nu̱u̱nꞌ rá te̱e nísotíñú, nkachiꞌ ráa: ―Rá te̱e yaꞌá, sáꞌá ráa tuntíxín jín rá ñɨvɨ ñuunꞌ‑ó, chi te̱e Israel ví ráa.

²¹ Jee stékútu̱ꞌún ráa nu̱u̱nꞌ‑ó rá ñujiínꞌ néen ráa, soo ntu yɨ́netuꞌ tɨɨn‑ó maa, ni ya̱ saꞌá‑o maa chi kúvi‑ó ñɨvɨ Roma ―nkachiꞌ rá te̱e vá.

²² Jee nta̱vi̱ꞌ rá ñɨvɨ si̱kɨ̱ꞌ Pablo jín Silas. Jee rá te̱e néetiñu ntavaꞌ ráa saꞌma rává, jee nta̱túníꞌ ráa ya̱ ku̱ꞌva rá soldado rává jín tu̱xíi.

²³ Jee sáá nkuvi njia̱ꞌa víꞌí rá soldado rává, jee ntu̱ví ráa rává iniꞌ veka̱a. Jee nta̱túníꞌ ráa nu̱u̱nꞌ mayóríꞌ kúmí veka̱a, ya̱ nito kumí re̱ꞌ rává.

²⁴ Jee sáá nkuvi nta̱túníꞌ ráa nu̱u̱nꞌ re̱ꞌ suꞌva, jee ntu̱ví re̱ꞌ rává ne̱ nu̱u̱nꞌ kúnú ka̱ꞌ iniꞌ veka̱a, jee ntu̱ví kutú re̱ꞌ jie̱ꞌe̱ꞌ rává ma̱ꞌñú rá u̱vi̱ꞌ yutun véi.

²⁵ Soo yatin kuvi ñuún, Pablo jín Silas káꞌánꞌ ráa jín Ndiosíꞌ jee jíta ráa nákuetúꞌún ráa Ndiosíꞌ. Jee tésóꞌo rá inka ñɨvɨ násɨ́ꞌ iniꞌ veka̱a.

²⁶ Sa̱naanꞌ jee nta̱an nasɨ́kuitɨꞌ ne̱ nkisɨ nu̱u̱nꞌ nsamaꞌ jie̱ꞌe̱ꞌ veka̱a. Jee va̱ꞌa̱ni jee nine nɨꞌɨ rá yuvékáa, jee nna̱najiꞌ maá rá ka̱a nnuꞌniꞌ ntáká rá yɨ́ꞌɨ́ veka̱a.

²⁷ Jee sáá nnoto mayóríꞌ, jee niniꞌ re̱ꞌ ya̱ núne rá yuvékáa, jee ntavaꞌ‑a yuchiꞌ espada‑a, jee yakuꞌ ka̱ꞌ kaꞌniꞌ‑i maáa, chi nkaꞌvi iniꞌ‑i ya̱ nka̱ku rá násɨ́ꞌ iniꞌ veka̱a.

²⁸ Soo ni̱ꞌin nka̱najíín Pablo: ―¡Koto na̱ni saꞌá kini nú maánú! Chi nééꞌ i̱i̱ꞌ ntáká ránꞌ yaꞌá.

²⁹ Jee ni̱ka̱nꞌ re̱ꞌ ñuꞌunꞌ, jee numíjiꞌíꞌ nki̱vɨ re̱ꞌ. Jee nkisɨ re̱ꞌ jee ña̱kui̱ñɨ̱ꞌ ítɨ́ re̱ꞌ ichinúúnꞌ Pablo jín Silas.

³⁰ Jee ntavaꞌ re̱ꞌ ráa jee ni̱ka̱tu̱ꞌún re̱ꞌ ráa: ―¿Ná kúvi ya̱ íyó saꞌá ni̱ꞌ sáva natavaꞌ Ndiosíꞌ nuꞌuꞌ nu̱u̱nꞌ kua̱chi ni̱ꞌ nanitáꞌvíꞌ ni̱ꞌ?

³¹ Jee nkachiꞌ ráa: ―Kuneí iniꞌ nú I̱toꞌoꞌ‑ó Jesús, jee natavaꞌ Ndiosíꞌ noꞌó nu̱u̱nꞌ kua̱chi nú nanitáꞌvíꞌ nú. Suꞌva nanitáꞌvíꞌ nú jín táꞌán veꞌi nú.

³² Nste̱kútu̱ꞌún ráa tu̱ꞌun I̱toꞌoꞌ‑ó nu̱u̱nꞌ re̱ꞌ jín nu̱u̱nꞌ nɨꞌɨ rá nééꞌ veꞌi re̱ꞌ.

³³ Maá hora yakuááꞌ yukuán, jee kua̱ꞌa̱nꞌ re̱ꞌ jín ráa, jee nna̱kete re̱ꞌ rá nu̱u̱nꞌ ntúfiꞌ ráa. Jee kuísá ña̱nuté re̱ꞌ jín nɨꞌɨ rá táꞌán veꞌi re̱ꞌ.

³⁴ Jee nkeꞌen re̱ꞌ ráa kua̱ꞌa̱nꞌ jín re̱ꞌ veꞌi re̱ꞌ. Njia̱ꞌa re̱ꞌ nyajiꞌ ráa. Jee nku̱sɨ̱ɨ̱ꞌ iniꞌ re̱ꞌ jín rá táꞌán veꞌi re̱ꞌ chi ni̱nu̱ꞌ iniꞌ ráa Ndiosíꞌ.

³⁵ Jee sáá nku̱nijinꞌ, jee nta̱jí rá te̱e néetiñu rá najiáꞌáꞌ ráa, jee nkachiꞌ ráa: ―Siaáꞌ rá te̱e vá.

³⁶ Nkachiꞌ mayóríꞌ tu̱ꞌun vá nu̱u̱nꞌ Pablo: ―Nkachiꞌ rá te̱e néetiñu ya̱ siaáꞌ ni̱ꞌ ránó. Saájee ntañúꞌún kene rán jee kuáꞌán va̱ꞌa rán.

³⁷ Soo nkachiꞌ Pablo nu̱u̱nꞌ ráa: ―Njia̱ꞌa nijinꞌ ráa ránuꞌuꞌ, sú ntu nnásanáaꞌ ráa si̱kɨ̱ꞌ ránuꞌuꞌ retáꞌ íyó kua̱chi ránꞌ, súka̱ꞌ kúvi ránꞌ se̱ꞌya ñuunꞌ Roma. Jee ntu̱ví ráa ránuꞌuꞌ veka̱a. Jee ntañúꞌún, ¿á táváꞌ yuꞌuꞌ ráa ránuꞌuꞌ? Ntu̱né íyó saꞌá ráa suꞌva. Nkíji maáráa jee kitavaꞌ ráa ránuꞌuꞌ.

³⁸ Jee nkachiꞌ rá najiáꞌáꞌ tu̱ꞌun yaꞌá nu̱u̱nꞌ rá te̱e néetiñu. Jee nyu̱ꞌví ráa sáá nku̱káꞌnú iniꞌ ráa ya̱ se̱ꞌya Roma ví rává.

³⁹ Jee nkiji ráa, jee nna̱kaꞌanꞌ va̱ꞌa ráa jín rává. Ntavaꞌ ráa rává veka̱a, jee ni̱ka̱nꞌ táꞌvíꞌ ráa nu̱u̱nꞌ rává ya̱ kene rává ñuunꞌ.

⁴⁰ Sáá nkene Pablo jín Silas veka̱a, jee ña̱ꞌa̱nꞌ ráa veꞌi Lidia. Sáá ni̱yo tútú ráa jín rá ñaniꞌ jín rá ku̱ꞌva yɨ́ꞌɨ́ ñujiínꞌ Jesús, jee nna̱sáneí ráa iniꞌ rává. Jee nkene ráa ñuunꞌ.