Hechos 14 - Mixteco del suroeste de Tlaxiaco Oaxaca

Nneeꞌ Pablo jín Bernabé ñuunꞌ Iconio

¹ Jee sukuán nkuvi ñuunꞌ Iconio, jee nki̱vɨ nkáá Pablo jín Bernabé veꞌi sinagoga nu̱u̱nꞌ kútútú rá ñɨvɨ Israel súkuáꞌa ráa Tu̱ꞌun Ndiosíꞌ. Jee va̱ꞌa túníꞌ nkaꞌanꞌ ráa tu̱ꞌun jie̱ꞌe̱ꞌ Jesús, ya̱ ni̱nu̱ꞌ iniꞌ kue̱ꞌe̱ꞌ víꞌí rá ñɨvɨ Israel jín suni rá ñɨvɨ ntu kúvi Israel.

² Soo rá ñɨvɨ Israel ya̱ kújiááꞌ iniꞌ, nsi̱sáá ráa xi̱ni̱ꞌ rá ñɨvɨ ntu kúvi Israel nne̱ꞌyá rává rá ñaniꞌ jín rá ku̱ꞌva yɨ́ꞌɨ́ nu̱u̱nꞌ Jesús. Jee nsi̱ínúꞌ ráa iniꞌ rává ya̱ kani niva̱ꞌa iniꞌ rává kune̱ꞌyá rává rá ñaniꞌ.

³ Soo kue̱ꞌe̱ꞌ tiempúꞌ nkino̱o Pablo jín Bernabé yukuán, jee nkaꞌanꞌ neí iniꞌ ráa, chi kúneí iniꞌ ráa I̱toꞌoꞌ‑ó. Jee I̱toꞌoꞌ‑ó nsa̱ꞌá re̱ꞌ ya̱ saꞌá ráa rá seña jín a̱nasɨ́ sáva nstúvi ya̱ íyó na̱a̱ꞌ tu̱ꞌun káꞌánꞌ ráa, jie̱ꞌe̱ꞌ íyó mániꞌ iniꞌ re̱ꞌ néꞌyá re̱ꞌ rá ñɨvɨ ya̱ síkáku re̱ꞌ yó ya̱ ntu íyó ni̱ꞌi̱nꞌ‑ó maa.

⁴ Soo kue̱ꞌe̱ꞌ rá ñɨvɨ ñuunꞌ sɨ́ɨ́n sɨ́ɨ́n jiáni iniꞌ ráa. Sava ráa íñɨ́ jín rá ñɨvɨ Israel. Jee rá inka ka̱ꞌ íñɨ́ jín rá te̱e nísotíñú apóstol.

⁵ Saájee rá ñɨvɨ ntu kúvi Israel jín rá ñɨvɨ Israel nna̱túꞌún ráa jín rá te̱e nísotíñú nu̱u̱nꞌ ráa, ya̱ saꞌá kini ráa rává jee kuun ráa yu̱u̱ꞌ rává kaꞌniꞌ ráa rává, nékúvi.

⁶ Sáá nku̱káꞌnú iniꞌ Pablo jín Bernabé maa, jee nka̱ku ráa kua̱ꞌa̱nꞌ ráa nu̱u̱nꞌ rá ñuunꞌ Listra jín Derbe sánitɨ́ɨn Licaonia jín nu̱u̱nꞌ rá kuaríáꞌ káá yatin jín‑i.

⁷ Jee yukuán nste̱kútu̱ꞌún ráa tu̱ꞌun va̱ꞌa Jesús.

Ñuunꞌ Listra nu̱u̱nꞌ nkuun rá ñɨvɨ yu̱u̱ꞌ Pablo

⁸ Ñuunꞌ Listra, ni̱yo ɨɨn te̱e kuéꞌí rá jie̱ꞌe̱ꞌ‑e. Íyó lénkó re̱ꞌ ne̱ nkaku re̱ꞌ, jee íchí ntu níka re̱ꞌ.

⁹ Tésóꞌo re̱ꞌ ya̱ káꞌánꞌ Pablo. Jee nkino̱o Pablo nne̱ꞌyá‑a re̱ꞌ, jee niniꞌ‑i ya̱ kúneí iniꞌ re̱ꞌ Ndiosíꞌ ya̱ kuvi xinúvi‑i re̱ꞌ.

¹⁰ Jee nkachiꞌ ni̱ꞌin Pablo nu̱u̱nꞌ re̱ꞌ: ―¡Nakui̱ñɨ̱ꞌ nichiꞌ! Jee íchíni nnava re̱ꞌ jee nnakui̱ñɨ̱ꞌ nichiꞌ re̱ꞌ, jee kuísá nika re̱ꞌ.

¹¹ Sáá niniꞌ rá ñɨvɨ ya̱ nsa̱ꞌá Pablo, jee nka̱jiéꞌé ráa nka̱najíín ráa tu̱ꞌun káꞌánꞌ ráa ya̱ kúvi Licaonia jee nkachiꞌ ráa: ―¡Rá ndiosíꞌ nnuvi ráa kuéntáꞌ te̱e, jee nkikuun ráa nu̱u̱nꞌ ránꞌ!

¹² Nkachiꞌ ráa ya̱ Bernabé kúvi re̱ꞌ ndiosíꞌ Zeus. Jee nkachiꞌ ráa ya̱ Pablo kúvi re̱ꞌ ndiosíꞌ Hermes, chi nkuvi re̱ꞌ ya̱ nkaꞌanꞌ ka̱ꞌ.

¹³ Jee yuñúúnꞌ káá veñu̱ꞌun nu̱u̱nꞌ néñu̱ꞌun rá ñɨvɨ Zeus. Jee nkenta su̱tu̱ꞌ yɨ́tíñú nu̱u̱nꞌ Zeus yuvéꞌí nu̱u̱nꞌ kívɨ rá ñɨvɨ ñuunꞌ vá, jee yukuán nkenta re̱ꞌ jín rá xi̱ni̱kɨ̱ꞌ jín rá yoꞌo ítáꞌ. Suvire̱ꞌ jín rá ñɨvɨ nkuini ráa kaꞌniꞌ ráa rátíꞌ, sáva so̱ko̱ꞌ ráa maa nu̱u̱nꞌ Bernabé jín Pablo sáva kuneñu̱ꞌun ráa rává.

¹⁴ Soo Bernabé jín Pablo, ya̱ kúvi ráa apóstol, sáá nteso̱ꞌo ráa ya̱ kuneñu̱ꞌun rá ñɨvɨ ráa, jee nna̱tá ráa saꞌma ráa, sáva xtúvi ráa ya̱ kúkuíꞌyáꞌ iniꞌ ráa. Jee numíjiꞌíꞌ nki̱vɨ ráa nteñu rá ñɨvɨ, jee nka̱najíín ráa:

¹⁵ ―¡Ránoꞌó tátáꞌ! ¿Na̱chi sáꞌá rán rá tiñu yaꞌá! Suni ñɨvɨ ví ránuꞌuꞌ, kuéntáꞌ ránoꞌó. Stékútu̱ꞌún ránꞌ nu̱u̱nꞌ rán ya̱ íyó nikó iniꞌ rán rá ñujiínꞌ ka̱ꞌá sáꞌá rán, ya̱ néñu̱ꞌun rán rá nantíñú ya̱ ntu kúvi Ndiosíꞌ, jee ntu íyótiñu‑u. Jee kunikɨnꞌ rán Ndiosíꞌ, ya̱ tékúꞌ. Nsa̱ꞌá re̱ꞌ súkún jín ñuꞌun jín nteñúꞌún jín nɨꞌɨ ya̱ íyó nu̱u̱nꞌ rává.

¹⁶ Rá tióꞌ ya̱ta̱ꞌ, Ndiosíꞌ njia̱ꞌa nu̱u̱nꞌ rá ñɨvɨ ñɨ̱vɨ́, ya̱ ntu kúvi ñɨvɨ Israel, kunikɨnꞌ ráa rá ñujiínꞌ maáráa.

¹⁷ Sú sáꞌá re̱ꞌ suꞌva, sukuáni nástúvi re̱ꞌ ya̱ naáꞌ jie̱ꞌe̱ꞌ né ɨɨn kúvi re̱ꞌ, jie̱ꞌe̱ꞌ ya̱ váꞌa sáꞌá re̱ꞌ. Ne̱ súkún síkúun re̱ꞌ sa̱vi̱ꞌ, jee jiáꞌa re̱ꞌ tiempúꞌ kúun tataꞌ sáꞌá. Táji re̱ꞌ ya̱ yájíꞌ rán, jee kúsɨ́ɨꞌ ánímaꞌ rán sáꞌá re̱ꞌ.

¹⁸ Jee jie̱ꞌe̱ꞌ káchíꞌ Bernabé jín Pablo rá tu̱ꞌun yaꞌá, kua̱chi ni nsi̱kɨ́kui̱ñɨ̱ꞌ ráa rá ñɨvɨ ya̱ kaꞌniꞌ rává rátíꞌ sáva kuneñu̱ꞌun rává ráa.

¹⁹ I̱ña̱jée nkenta kéꞌín rá ñɨvɨ Israel, ya̱ váji ne̱ rá ñuunꞌ Antioquía jín Iconio. Jee nsi̱ínúꞌ ráa iniꞌ rá ñɨvɨ nkenta si̱kɨ̱ꞌ Bernabé jín Pablo, jee nkuun ráa yu̱u̱ꞌ Pablo. Jee nsi̱yúꞌun ráa maa ne̱ yuñúúnꞌ, chi va̱ níꞌiꞌ re̱ꞌ nkaꞌvi iniꞌ ráa.

²⁰ Soo sáá nkuti̱yu̱ꞌ rá ñɨvɨ yɨ́ꞌɨ́ nu̱u̱nꞌ Jesús nu̱u̱nꞌ re̱ꞌ, jee nnako̱o re̱ꞌ, jee ni̱vɨ re̱ꞌ ñuunꞌ. Jee ki̱vɨ̱ꞌ xtéñu̱ꞌún, nkene re̱ꞌ jín Bernabé kua̱ꞌa̱nꞌ ráa ñuunꞌ Derbe.

²¹ Nste̱kútu̱ꞌún ráa tu̱ꞌun váꞌa nu̱u̱nꞌ rá ñɨvɨ ñuunꞌ vá, jee kue̱ꞌe̱ꞌ ñɨvɨ ntɨɨn ichi Jesús. Jee kuíre nni̱kó ráa ñuunꞌ Listra, jín ñuunꞌ Iconio, jín ñuunꞌ Antioquía.

²² Yukuán, nna̱chituvi ráa ánímaꞌ rá ñɨvɨ yɨ́ꞌɨ́ nu̱u̱nꞌ Jesús. Nna̱xiníꞌvɨ́ꞌ ráa iniꞌ rává kuni̱ꞌin rává kúneí iniꞌ rává Jesús. Nkachiꞌ ráa: ―Kue̱ꞌe̱ꞌ tu̱nóꞌó nínísaá kunoꞌo‑ó jee ki̱vɨ‑ó nu̱u̱nꞌ tátúníꞌ Ndiosíꞌ.

²³ Jee ñani Pablo jín Bernabé rá te̱e kúñáꞌnú, sáva kosoꞌ rává nu̱u̱nꞌ ta grupo rá ñɨvɨ kúneí iniꞌ ráa Jesús. Jee nneeꞌ niteꞌ ráa sáá nkaꞌanꞌ ráa jín Ndiosíꞌ, sáva nxi̱nóo ráa rává naꞌá I̱toꞌoꞌ‑ó, ya̱ kúneí iniꞌ ráa, sáva nachituvi re̱ꞌ ráa.

Pablo jín Bernabé nnenta i̱i̱ꞌ ráa ñuunꞌ Antioquía ya̱ tɨ́ɨn Siria

²⁴ Njia̱ꞌa ráa sánitɨ́ɨn Pisidia, jee nkenta ráa Panfilia.

²⁵ Jee sáá ya̱ nkachiꞌ ráa tu̱ꞌun váꞌa ñuunꞌ Perge, jee ña̱ꞌa̱nꞌ ráa ñuunꞌ Atalia.

²⁶ Nkene ráa yukuán jee kua̱ꞌa̱nꞌ ráa jín barkúꞌ nu̱u̱nꞌ ñuunꞌ Antioquía. Yukuán ví nu̱u̱nꞌ nkene ráa xíꞌnañúꞌún, jee ne̱ ntiáꞌan nkene ráa, jee rá ñɨvɨ kúneí iniꞌ Jesús, ni̱ka̱nꞌ rává nu̱u̱nꞌ Ndiosíꞌ ya̱ nachituvi re̱ꞌ Bernabé jín Pablo, sáva saꞌá ráa tiñu ya̱ ya nsi̱kúnkuvi ráa.

²⁷ Sáá nnenta i̱i̱ꞌ ráa Antioquía, jee nstútú ráa rá ñɨvɨ ya̱ kúneí iniꞌ rává Jesús. Jee nna̱kani ráa rá nsa̱ꞌá Ndiosíꞌ jín ráa. Jee nna̱kani ráa ya̱ kuéntáꞌ nine Ndiosíꞌ ɨɨn yuvéꞌí, sáva ki̱vɨ rá ñɨvɨ ntu kúvi Israel nu̱u̱nꞌ Ndiosíꞌ, chi suni kúneí iniꞌ ráa Jesús.

²⁸ Jee kue̱ꞌe̱ꞌ tiempúꞌ nneeꞌ Bernabé jín Pablo jín rá ñɨvɨ yukuán ya̱ níkɨ́nꞌ ñujiínꞌ Jesús.