Hechos 11 - Mixteco del suroeste de Tlaxiaco Oaxaca

Nákúꞌva Pedro tu̱ꞌun ya̱ nkuvi sukuán jín rává nu̱u̱nꞌ rá ñɨvɨ ya̱ kúneí iniꞌ ráa Jesús, ya̱ nééꞌ ráa ñuunꞌ Jerusalén

¹ I̱ña̱jée rá te̱e nísotíñú apóstol jín rá ñaniꞌ yɨ́ꞌɨ́ nu̱u̱nꞌ Jesús, nɨꞌɨ sánitɨ́ɨn Judea, nteso̱ꞌo ráa, ya̱ suni rá ñɨvɨ ntu kúvi Israel, ntɨɨn ráa Tu̱ꞌun Ndiosíꞌ.

² Sáá nenta Pedro ñuunꞌ Jerusalén, jee sava ñɨvɨ Israel ya̱ yɨ́ꞌɨ́ nu̱u̱nꞌ Jesús, nka̱ntátúꞌun ráa jín re̱ꞌ.

³ Jee nkachiꞌ ráa: ―Ntu váꞌa ya̱ nkívɨ nú veꞌi ñɨvɨ ya̱ ntu kúvi Israel ya̱ ntu níso ráa seña Ndiosíꞌ nu̱u̱nꞌ yɨkɨkúñu ráa, jín ya̱ nyajiꞌ nú jín ráa.

⁴ I̱ña̱jée nyɨ̱yuꞌú nna̱kani Pedro nu̱u̱nꞌ ráa nɨꞌɨ ya̱ nkuvi, jee nkachiꞌ re̱ꞌ:

⁵ ―Nuꞌuꞌ nneeꞌ ni̱ꞌ ñuunꞌ Jope, sáá káꞌánꞌ ni̱ꞌ jín Ndiosíꞌ. Jee kájíkuitɨꞌ niniꞌ ni̱ꞌ ya̱ nxi̱nénu̱u̱nꞌ Ndiosíꞌ nu̱u̱nꞌ ni̱ꞌ. Niniꞌ ni̱ꞌ súkún va̱ji kuun ɨɨn nantíñú, jee túvi kuéntáꞌ ɨɨn saꞌma káꞌnú. Va̱ji kuun‑u kuéntáꞌ réáꞌ tɨɨn ráa ni kúmíꞌ esquina saꞌma káꞌnú vá, jee va̱ji kuun‑u nu̱u̱nꞌ ni̱ꞌ.

⁶ Jee sáá nne̱ꞌyá va̱ꞌa ni̱ꞌ nu̱u̱nꞌ saꞌma káꞌnú vá, jee niniꞌ ni̱ꞌ ya̱ nééꞌ rá kitɨ ya̱ jíka ku̱mi̱ꞌ nu̱u̱nꞌ ñuꞌun, jín rá kitɨ yúkú, jín rá kitɨ ya̱ siúꞌun maáa nu̱u̱nꞌ ñuꞌun, jín rá saaꞌ, ya̱ íyó súkún.

⁷ Jee suni nteso̱ꞌo ni̱ꞌ ɨɨn ta̱chi̱ꞌ yuꞌú nkachiꞌ nu̱u̱nꞌ ni̱ꞌ: “Nakuiñɨꞌ, Pedro. Kaꞌniꞌ maa jee kajiꞌ nú.”

⁸ ’Soo nna̱xiníkó ni̱ꞌ: “I̱toꞌoꞌ ni̱ꞌ. Ntu̱ví. Chi ni nsáꞌ nkívɨ yuꞌú ni̱ꞌ ɨɨn nantíñú ya̱ ntu íyó noo nu̱u̱nꞌ rá ñɨvɨ Israel jín ya̱ ntu íyó ninuꞌun.”

⁹ Jee ta̱chi̱ꞌ yuꞌú vá nkachiꞌ tuku‑u nu̱u̱nꞌ ni̱ꞌ ne̱ súkún ya̱ uvíꞌ ichi: “Ya̱ nsa̱ꞌá noo Ndiosíꞌ, koto káchíꞌ nú ka̱ꞌ ya̱ ntu íyó noo.”

¹⁰ Jee u̱ni̱ꞌ íchí nkuvi yaꞌá suꞌva. Jee nɨꞌɨ yaꞌá nnaa ne̱ súkún.

¹¹ ’Jee máá hora yukuán u̱ni̱ꞌ te̱e íñɨ́ ichinúúnꞌ veꞌi nu̱u̱nꞌ nééꞌ ni̱ꞌ, ya̱ nta̱jí Cornelio ne̱ Cesarea va̱ji ráa nu̱u̱nꞌ ni̱ꞌ.

¹² Jee nkachiꞌ Ta̱chi̱ꞌ Ííꞌ Ndiosíꞌ nu̱u̱nꞌ ni̱ꞌ, ya̱ nkáni iniꞌ ni̱ꞌ jee kɨ̱ꞌɨ̱nꞌ ni̱ꞌ jín ráa. Jee suni i̱ñu̱ꞌ ñaniꞌ yaꞌá, yɨ́ꞌɨ́ ráa nu̱u̱nꞌ Jesús, ña̱ꞌa̱nꞌ ráa jín ni̱ꞌ jee nki̱vɨ ránꞌ veꞌi te̱e vá.

¹³ Jee nna̱kani re̱ꞌ nu̱u̱nꞌ ránꞌ, ya̱ niniꞌ re̱ꞌ ɨɨn najiáꞌáꞌ ííꞌ Ndiosíꞌ íñɨ́‑ɨ iniꞌ veꞌi re̱ꞌ, jee nkachiꞌ‑i: “Tají kéꞌín te̱e nu̱u̱nꞌ ñuunꞌ Jope, ya̱ kikeꞌen ráa Simón, ya̱ suni naní Pedro.

¹⁴ Jee suvire̱ꞌ kachiꞌ nu̱u̱nꞌ nú tu̱ꞌun, ya̱ natavaꞌ‑a noꞌó jín táꞌán nú nu̱u̱nꞌ kua̱chi rán jee xinánitáꞌvíꞌ‑i ránoꞌó”, nkachiꞌ najiáꞌáꞌ ííꞌ vá.

¹⁵ ’Jee sáá nka̱jiéꞌé ni̱ꞌ káꞌánꞌ ni̱ꞌ, jee nki̱vɨ Ta̱chi̱ꞌ Ííꞌ Ndiosíꞌ iniꞌ ráa, kuéntáꞌ kua̱ꞌ nkívɨ re̱ꞌ yó ya̱ xíꞌnañúꞌún.

¹⁶ Jee nna̱ku̱ꞌun iniꞌ ni̱ꞌ tu̱ꞌun ya̱ nkachiꞌ I̱toꞌoꞌ‑ó Jesús, ya̱: “Juan nsi̱kuánuté nijia jín nute, soo ránoꞌó kuanuté jín Ta̱chi̱ꞌ Ííꞌ Ndiosíꞌ, jee kɨꞌɨ re̱ꞌ iniꞌ rán”, nkachiꞌ Jesús.

¹⁷ Jee suni nkachiꞌ Pedro: ―I̱ña̱jée, ré nsi̱kútaꞌviꞌ Ndiosíꞌ Ta̱chi̱ꞌ Ííꞌ nu̱u̱nꞌ ráa, kuéntáꞌ kua̱ꞌ ntaji re̱ꞌ maa nu̱u̱nꞌ‑ó ya̱ nku̱neí iniꞌ‑ó I̱toꞌoꞌ‑ó Jesús ya̱ kúvi Cristo, jee, ¿né ɨɨn kúvi ni̱ꞌ ya̱ kasɨꞌ ni̱ꞌ nu̱u̱nꞌ Ndiosíꞌ, résa? ―nkachiꞌ Pedro nu̱u̱nꞌ ráa.

¹⁸ Jee sáá nteso̱ꞌo ráa tu̱ꞌun yaꞌá, ña̱kui̱ñɨ̱ꞌ ráa ya̱ kántátúꞌun ráa, jee nna̱kuetúꞌún ráa Ndiosíꞌ: ―I̱ña̱jée suni Ndiosíꞌ jiáꞌa ya̱ rá ñɨvɨ, ya̱ ntu kúvi Israel, nakani iniꞌ ráa jie̱ꞌe̱ꞌ ichi jiáꞌnu ráa, sáva ki̱vɨ ráa nu̱u̱nꞌ re̱ꞌ, sáva kutekuꞌ ráa nɨ́ɨ́nkání jín re̱ꞌ.

Rá ñɨvɨ kúneí iniꞌ ráa Jesús ya̱ kútútú ráa ñuunꞌ Antioquía

¹⁹ Rá ñɨvɨ kúneí iniꞌ ráa Jesús, ya̱ nkene ráa Jerusalén, sáá ñaꞌniꞌ ñɨvɨ Esteban, jee ñe̱te̱nuun ráa, chi nsa̱ꞌá kini ñɨvɨ ráa. Jee rá ñɨvɨ yaꞌá nkenta ráa ne̱ sánitɨ́ɨn Fenicia, jín ñuunꞌ káá ma̱ꞌñú nteñúꞌún naní Chipre, jín ñuunꞌ Antioquía. Jee nste̱kútu̱ꞌún kue̱ꞌe̱ꞌ ráa tu̱ꞌun Jesús kua̱chi nu̱u̱nꞌ rá ñɨvɨ Israel ni, ya̱ nééꞌ yukuán. Ntu nstékútu̱ꞌún ráa maa nu̱u̱nꞌ ni ɨɨn rá inka ñɨvɨ.

²⁰ Soo sava ráa kúvi te̱e Chipre jín ñuunꞌ Cirene, jee sáá nkenta ráa nu̱u̱nꞌ ñuunꞌ Antioquía jee suni nste̱kútu̱ꞌún ráa jie̱ꞌe̱ꞌ I̱toꞌoꞌ‑ó Jesús nu̱u̱nꞌ rá ñɨvɨ ntu kúvi Israel.

²¹ Jee nchi̱neí I̱toꞌoꞌ‑ó rá te̱e vá, jee kue̱ꞌe̱ꞌ víꞌí ñɨvɨ nku̱neí iniꞌ ráa Jesús, jee nna̱kani iniꞌ ráa ichi ráa, sáva ki̱vɨ ráa nu̱u̱nꞌ I̱toꞌoꞌ‑ó.

²² Jee rá ñɨvɨ ñuunꞌ Jerusalén, ya̱ kúneí iniꞌ ráa Jesús, jee sáá nteso̱ꞌo ráa tu̱ꞌun jie̱ꞌe̱ꞌ ya̱ nkuvi jín rá ñɨvɨ ñuunꞌ Antioquía, jee nchu̱ichí ráa Bernabé kua̱ꞌa̱nꞌ re̱ꞌ yukuán.

²³ Sáá nkenta re̱ꞌ yukuán, niniꞌ re̱ꞌ ya̱ va̱ꞌa nsa̱ꞌá Ndiosíꞌ nu̱u̱nꞌ ráa chi ma̱ni̱ꞌ re̱ꞌ néꞌyá re̱ꞌ ráa. Jee nnusɨ̱ɨ̱ꞌ iniꞌ Bernabé. Jee nna̱chuꞌun neí re̱ꞌ iniꞌ ráa kukáñá víꞌí iniꞌ ánímaꞌ ráa ya̱ kuiñɨ na̱a̱ꞌ ráa jín I̱toꞌoꞌ‑ó.

²⁴ Jee kúvi re̱ꞌ te̱e va̱ꞌa jee Ta̱chi̱ꞌ Ííꞌ kúneí‑i jín re̱ꞌ jee kúneí víꞌí iniꞌ re̱ꞌ. Saáva kue̱ꞌe̱ꞌ ka̱ꞌ ñɨvɨ nki̱vɨ nu̱u̱nꞌ I̱toꞌoꞌ‑ó.

²⁵ Saájee kua̱ꞌa̱nꞌ re̱ꞌ ñuunꞌ Tarso nna̱nukú re̱ꞌ Saulo. Sáá nna̱niꞌinꞌ re̱ꞌ maa jee kua̱ꞌa̱nꞌ re̱ꞌ jín‑i ñuunꞌ Antioquía.

²⁶ Yukuán nku̱tútú ráa ɨɨn kui̱ya̱ꞌ nɨ́ɨ́n jín rá ñɨvɨ kúneí iniꞌ rává Jesús. Jee nxi̱néꞌénꞌ ráa kue̱ꞌe̱ꞌ víꞌí ñɨvɨ. Ñuunꞌ Antioquía ví nu̱u̱nꞌ ya̱ xíꞌnañúꞌún nsi̱kúnání rá ñɨvɨ cristiano rá ñɨvɨ kúneí iniꞌ rává Jesús.

²⁷ Rá ki̱vɨ̱ꞌ yukuán, rá te̱e, ya̱ nákani tu̱ꞌun kéne yuꞌú Ndiosíꞌ, jee nkene ráa ñuunꞌ Jerusalén, jee nkenta ráa ñuunꞌ Antioquía.

²⁸ Ɨɨn ráa naní Agabo, jee nnakui̱ñɨ̱ꞌ nichiꞌ re̱ꞌ, jee njia̱ꞌa Ta̱chi̱ꞌ Ííꞌ Ndiosíꞌ sákachiꞌ re̱ꞌ, jee nste̱kútu̱ꞌún ya̱chi̱ꞌ re̱ꞌ, ya̱ kutámá ntántúníꞌ nɨꞌɨ rá ñuunꞌ. (Nkuvi suꞌva rá tiempúꞌ nta̱túníꞌ Claudio nu̱u̱nꞌ ñuunꞌ Roma.)

²⁹ Saáva rá ñɨvɨ yukuán, ya̱ níkɨ́nꞌ ráa Jesús, jee ñani iniꞌ ráa chineí ráa rá ñaniꞌ ráa ñuunꞌ Judea, rá yɨ́ꞌɨ́ nu̱u̱nꞌ Jesús. Ta ɨɨn ku̱ꞌva sánikua̱ꞌ kénta néen‑e.

³⁰ Jee sukuán nsa̱ꞌá ráa. Jee nta̱jí ráa maa jín Bernabé jín Saulo nu̱u̱nꞌ ñuunꞌ Judea. Jee yukuán njia̱ꞌa ráa maa nu̱u̱nꞌ rá te̱e kúñáꞌnú nu̱u̱nꞌ rá ñɨvɨ yɨ́ꞌɨ́ nu̱u̱nꞌ Jesús.