Hebreos 9 - Mixteco del suroeste de Tlaxiaco Oaxaca

Veꞌi ííꞌ iniꞌ ñɨ̱vɨ́ yaꞌá xínéꞌénꞌ‑e na̱sa íyó veꞌi ííꞌ íyó antivɨ́

¹ Saájee tratúꞌ xíꞌnañúꞌún vá nta̱túníꞌ‑i na̱ja kuneñu̱ꞌun rá ñɨvɨ Ndiosíꞌ, jín na̱ja koo veꞌi ííꞌ nasɨ́kuitɨꞌ iniꞌ ñɨ̱vɨ́ yaꞌá.

² Chi nsa̱ꞌá stákoo veꞌi ííꞌ saꞌma suꞌva: iniꞌ veꞌi xíꞌnañúꞌún, naní Nu̱u̱nꞌ Ííꞌ, jee yukuán ni̱ñɨ kantilerúꞌ jín mesa, nu̱u̱nꞌ yósóꞌ i̱xta̱tíláꞌ ííꞌ.

³ Jee nni̱nta ɨɨn saꞌma ya̱ chúmáꞌñu maa. Jee ya̱ta̱ꞌ saꞌma uvíꞌ vá, yukuán nkuvi inka ka̱ꞌ iniꞌ‑i, nu̱u̱nꞌ naní Nu̱u̱nꞌ Ííꞌ Nasɨ́kuitɨꞌ Ka̱ꞌ.

⁴ Jee yukuán ni̱ñɨ ɨɨn altar oro nu̱u̱nꞌ káyúꞌ su̱jie ííꞌ, jee suni ni̱ñɨ kajúnꞌ ya̱tu̱nꞌ nu̱u̱nꞌ ñúꞌún tratúꞌ ley, jee maa oro ña̱noꞌonꞌ kua̱íyó ya̱ta̱ꞌ ya̱tu̱nꞌ vá. Jee suni iniꞌ‑i nñu̱ꞌun ɨɨn ki̱sɨ oro ya̱ nñu̱ꞌun maná iniꞌ‑i ya̱ kúvi i̱xta̱tíláꞌ nki̱nkuun súkún, jee suni iniꞌ ya̱tu̱nꞌ vá nñu̱ꞌun karútíꞌ Aarón ya̱ nnene naꞌá yu̱ku̱ꞌ, jee suni nñu̱ꞌun rá tukúnú yu̱u̱ꞌ tiáxín ya̱ nniso rá tu̱ꞌun tratúꞌ.

⁵ Jee ya̱ta̱ꞌ yuꞌú ya̱tu̱nꞌ vá nyosoꞌ ñunéꞌyúꞌ ka̱a, naní querubine, ya̱ stúvi ráa ya̱ nééꞌ xika Ndiosíꞌ kúñáꞌnú yukuán. Jee jín chi̱yo̱ꞌ ráa ñasɨꞌ kátɨ́‑ɨ ya̱ta̱ꞌ yuꞌú ya̱tu̱nꞌ vá. Jee yukuán ví nu̱u̱nꞌ nékáꞌnú iniꞌ jie̱ꞌe̱ꞌ rá kua̱chi. Soo jie̱ꞌe̱ꞌ rá nantíñú yaꞌá jee ntu kúvi kaꞌanꞌ kávii jie̱ꞌe̱ꞌ‑e vitan.

⁶ Jee sáá ya̱ íyó stákoo ntáká rá nantíñú vá, jee yɨ́táꞌán yɨ́táꞌán kívɨ rá su̱tu̱ꞌ iniꞌ nu̱u̱nꞌ xíꞌnañúꞌún iniꞌ veꞌi ííꞌ saꞌma, sáva sikúnkuvi ráa rá tiñu íyó saꞌá ráa nu̱u̱nꞌ Ndiosíꞌ.

⁷ Soo iniꞌ nu̱u̱nꞌ kúvi ya̱ uvíꞌ vá Nu̱u̱nꞌ Ííꞌ Nasɨ́kuitɨꞌ Ka̱ꞌ, yukuán kívɨ kua̱chi métúꞌún kuitɨꞌ su̱tu̱ꞌ kúñáꞌnú ka̱ꞌ iniꞌ‑i ɨɨn ni íchí ya̱ kui̱ya̱ꞌ. Soo suni ntu kúvi ki̱vɨ‑ɨ retú ntu ínaꞌá‑a ni̱ñɨ̱ꞌ sa̱na̱ꞌ, sáva so̱ko̱ꞌ‑o vá nu̱u̱nꞌ Ndiosíꞌ jie̱ꞌe̱ꞌ kua̱chi maáa jín suni jie̱ꞌe̱ꞌ kua̱chi sáꞌá rá ñɨvɨ sú ntu jíníꞌ ráa ya̱ nsa̱ꞌá ráa maa.

⁸ Jee jín yukuán stúvi Ta̱chi̱ꞌ Ííꞌ Ndiosíꞌ nu̱u̱nꞌ‑ó ya̱ ni íyó i̱i̱ꞌ iniꞌ nu̱u̱nꞌ xíꞌnañúꞌún iniꞌ veꞌi saꞌma vá, jee ntiáꞌan kunune ichi ya̱ kuvi ki̱vɨ ñɨvɨ iniꞌ Nu̱u̱nꞌ Ííꞌ Nasɨ́kuitɨꞌ Ka̱ꞌ.

⁹ Chi jie̱ꞌe̱ꞌ ntáká rá yaꞌá xínéꞌénꞌ‑e nu̱u̱nꞌ‑ó na̱ja kúvi tiempúꞌ vitan. Chi sókóꞌ ñɨvɨ nantíñú jín sa̱na̱ꞌ nu̱u̱nꞌ Ndiosíꞌ, soo rá nantíñú jín rá sa̱na̱ꞌ ya̱ sókóꞌ maa nu̱u̱nꞌ Ndiosíꞌ yukuán jee ntu kúvi kuitɨꞌ saꞌá‑a ya̱ kino̱o noo ánímaꞌ ñɨvɨ ya̱ néñu̱ꞌun Ndiosíꞌ sukuán jee saáva ntu kénta kuniꞌ ráa ya̱ ntu níso ráa kua̱chi.

¹⁰ Chi ntáká rá tiñu yukuán, jee kua̱chi kuitɨꞌ kúvi‑i tu̱ꞌun ya̱ tátúníꞌ‑i na̱ja saꞌá‑ó jín yɨkɨkúñu‑ó. Chi tátúníꞌ‑i jie̱ꞌe̱ꞌ ya̱ yájíꞌ, jín ya̱ jíꞌi, jín jie̱ꞌe̱ꞌ na̱ja nasaꞌá noo‑ó yɨkɨkúñu‑ó. Jee ñakɨnꞌ Ndiosíꞌ tiñu vá ne̱kua̱ꞌ tiempúꞌ nasaꞌá jiáá na̱a̱ꞌ re̱ꞌ nɨꞌɨ.

¹¹ Soo vitan jee ya nkiji Cristo, jee maáréꞌ ví su̱tu̱ꞌ kúñáꞌnú nasɨ́kuitɨꞌ ka̱ꞌ ya̱ nísotíñú re̱ꞌ rá tiñu váꞌa ya̱ váji vitan ya̱ táji Ndiosíꞌ. Jee yɨ́tíñú re̱ꞌ nu̱u̱nꞌ kúvi nu̱u̱nꞌ ííꞌ nasɨ́kuitɨꞌ íyó ne̱ antivɨ́, nu̱u̱nꞌ kúñáꞌnú‑u ka̱ꞌ jín va̱ꞌa nasɨ́kuitɨꞌ ka̱ꞌ nsú ka̱ꞌ veꞌi ííꞌ yanaꞌán. Jee ntu nsa̱ꞌá ñɨvɨ maa, chi ntu íyó‑o iniꞌ ñɨ̱vɨ́ yaꞌá.

¹² Chisaꞌ Cristo jee nki̱vɨ re̱ꞌ Nu̱u̱nꞌ Ííꞌ Nasɨ́kuitɨꞌ Ka̱ꞌ ya̱ íyó antivɨ́, soo nsú jín sáva so̱ko̱ꞌ re̱ꞌ ni̱ñɨ̱ꞌ rá chuvátúꞌ lúlí jín rá chelu yɨ́ɨ́, chisaꞌ jín sáva so̱ko̱ꞌ re̱ꞌ ni̱ñɨ̱ꞌ maáréꞌ jie̱ꞌe̱ꞌ ya̱ níꞌiꞌ re̱ꞌ. Jee nki̱vɨ re̱ꞌ yukuán métúꞌún ɨɨn ni íchí nu̱u̱nꞌ ntáká tiempúꞌ. Jee sukuán nchu̱náán nkáꞌnú re̱ꞌ nu̱u̱nꞌ Ndiosíꞌ jie̱ꞌe̱ꞌ kua̱chi‑ó sáva ni̱ꞌi̱nꞌ re̱ꞌ ya̱ nakui̱ñɨ̱ꞌ núne‑ó nu̱u̱nꞌ kua̱chi‑ó nɨ́ɨ́nkání.

¹³ Chi ni̱ñɨ̱ꞌ rá toro jín rá chuvátúꞌ lúlí, jín rá ya̱a̱ꞌ rá chelu ya̱ nka̱yu̱ꞌ nu̱u̱nꞌ altar, jee nxi̱náváꞌ yává su̱tu̱ꞌ maa nu̱u̱nꞌ rá ñɨvɨ ya̱ ntu íyó ninuꞌun ráa sáva saꞌá re̱ꞌ ya̱ kɨtíñú ráa nu̱u̱nꞌ Ndiosíꞌ sáva kuvi kuneñu̱ꞌun ráa Ndiosíꞌ. Jee sukuán sáꞌá re̱ꞌ ya̱ nunoo yɨkɨkúñu ráa nu̱u̱nꞌ Ndiosíꞌ.

¹⁴ Retú sukuán kúvi, soo saꞌ víꞌí káꞌ nasánoo ni̱ñɨ̱ꞌ Cristo ánímaꞌ‑ó, chi ntu níso Cristo kua̱chi, jee Ta̱chi̱ꞌ Ííꞌ ya̱ íyó nɨ́ɨ́nkání jee njia̱ꞌa‑a fuersáꞌ ííꞌ nu̱u̱nꞌ re̱ꞌ sáva kuviꞌ re̱ꞌ so̱ko̱ꞌ re̱ꞌ maáréꞌ nu̱u̱nꞌ Ndiosíꞌ. Jee sukuán násánoo ni̱ñɨ̱ꞌ Cristo ánímaꞌ‑ó, sáva kuniꞌ‑ó ya̱ ntu níso‑ó ka̱ꞌ kua̱chi, jín ya̱ ntu yɨ́ꞌɨ́‑ó ka̱ꞌ nu̱u̱nꞌ rá tiñu sáꞌá ya̱ kuviꞌ‑ó nu̱u̱nꞌ Ndiosíꞌ, jín sáva kɨtíñú‑ó nu̱u̱nꞌ Ndiosíꞌ tékúꞌ.

¹⁵ Saáva, níso re̱ꞌ tiñu ñujiínꞌ jie̱ꞌe̱ꞌ tratúꞌ jiáá ya̱ yɨ́tíñú re̱ꞌ nu̱u̱nꞌ Ndiosíꞌ jín nu̱u̱nꞌ ñɨvɨ. Chi ni̱ꞌi̱ꞌ re̱ꞌ sáva chunáán nkáꞌnú re̱ꞌ nu̱u̱nꞌ Ndiosíꞌ sáva nakani núne re̱ꞌ rá ñɨvɨ nu̱u̱nꞌ kua̱chi nsa̱ꞌá rá ñɨvɨ sáá nyɨ̱ꞌɨ ráa chi̱ji tratúꞌ xíꞌnañúꞌún, sáva rá ñɨvɨ ya̱ nkana Ndiosíꞌ ni̱ꞌi̱nꞌ ráa ta̱ꞌvi̱ꞌ ya̱ koo nɨ́ɨ́nkání, ya̱ yukuán vá nchi̱sóyuꞌú re̱ꞌ.

¹⁶ Chi nu̱u̱nꞌ íyó ɨɨn tutuꞌ ya̱ sáꞌá ɨɨn ñɨvɨ ya̱ jiáꞌa ya̱ naáꞌ jie̱ꞌe̱ꞌ ya̱ kínóo nijia ta̱ꞌvi̱ꞌ ya̱ xinóo ñɨvɨ vá, jee íyó stúvi ya̱ naáꞌ nijia ya̱ níꞌiꞌ ñɨvɨ xí tutuꞌ vá sáva kootiñu tutuꞌ vá.

¹⁷ Chi tutuꞌ vá, jee íyótiñu‑u nekuaꞌ retú ni̱ꞌi̱ꞌ ñɨvɨ xí tutuꞌ vá, soo ni ntu̱náꞌ tiñu‑u retú ni tékúꞌ i̱i̱ꞌ ka̱ꞌ ñɨvɨ xí tutuꞌ vá ya̱ nsa̱ꞌá maa.

¹⁸ Saáva tratúꞌ ya̱ ni̱yo xíꞌnañúꞌún vá jee suni niniñúꞌún‑u ña̱kava‑a jie̱ꞌe̱ꞌ ni̱ñɨ̱ꞌ rá sa̱na̱ꞌ ñaꞌniꞌ ráa.

¹⁹ Chi sáá nkuvi nkachitu̱ꞌún Moisés nu̱u̱nꞌ ntáká rá ñɨvɨ jie̱ꞌe̱ꞌ ntáká rá tiñu ya̱ nta̱túníꞌ ley. Jee kuíre, ntɨɨn re̱ꞌ ni̱ñɨ̱ꞌ chelu, jín ni̱ñɨ̱ꞌ lítú, jín nute, jín ka̱chi̱ꞌ lanchi kuéꞌé jín suni ɨɨn naꞌá yu̱ku̱ꞌ naní hisopo, jee nchu̱náji re̱ꞌ maa nu̱u̱nꞌ ni̱ñɨ̱ꞌ vá jee nxi̱náváꞌ yává re̱ꞌ ni̱ñɨ̱ꞌ vá ya̱ta̱ꞌ tutuꞌ níso ley vá jín suni nu̱u̱nꞌ ntáká rá ñɨvɨ vá.

²⁰ Jee nkachiꞌ re̱ꞌ: “Yaꞌá kúvi ni̱ñɨ̱ꞌ ya̱ jiákava kutú tratúꞌ ya̱ nta̱túníꞌ Ndiosíꞌ nu̱u̱nꞌ rán.”

²¹ Jee suni nxi̱náváꞌ yává Moisés ni̱ñɨ̱ꞌ iniꞌ veꞌi saꞌma nu̱u̱nꞌ ííꞌ víꞌí vá, jee suni sukuán nxi̱náváꞌ yává re̱ꞌ ni̱ñɨ̱ꞌ nu̱u̱nꞌ ntáká rá nantíñú ya̱ jiátíñú ráa sáá néñu̱ꞌun ráa Ndiosíꞌ yukuán.

²² Sánikua̱ꞌ tátúníꞌ ley ya̱ yatin nɨꞌɨ rá nantíñú yukuán íyó xináváꞌ yává ni̱ñɨ̱ꞌ nu̱u̱nꞌ ráa sáva nonoo ráa, chi retú ntu jiátɨ ni̱ñɨ̱ꞌ, jee nsáꞌ kunekáꞌnú iniꞌ Ndiosíꞌ jie̱ꞌe̱ꞌ kua̱chi.

Nso̱ko̱ꞌ Cristo maáréꞌ sáva siíyo re̱ꞌ kua̱chi‑ó

²³ Jee saáva, níní niniñúꞌún nso̱ko̱ꞌ rá sa̱na̱ꞌ vá sáva nonoo ntáká rá nantíñú vá sukuán. Jee xínéꞌénꞌ rá nantíñú vá jie̱ꞌe̱ꞌ rá íyó antivɨ́. Soo máá maá ntáká ya̱ íyó antivɨ́ jee jíniñúꞌún‑u nonoo jín ni̱ñɨ̱ꞌ Cristo ya̱ nso̱ko̱ꞌ re̱ꞌ ya̱ kúvi ya̱ váꞌa víꞌí ka̱ꞌ.

²⁴ Chi Cristo ntu̱ví nkívɨ re̱ꞌ nu̱u̱nꞌ ííꞌ víꞌí iniꞌ veꞌi ííꞌ nu̱u̱nꞌ nsa̱ꞌá jín naꞌá rá ñɨvɨ, chi yukuán jee kua̱chi vá xínéꞌénꞌ‑e na̱ja kútúníꞌ sáá íyó nu̱u̱nꞌ ííꞌ nijia nasɨ́kuitɨꞌ ka̱ꞌ ya̱ íyó antivɨ́. Chisaꞌ nki̱vɨ nijia re̱ꞌ ne̱ máá maá antivɨ́ sáva íñɨ́ re̱ꞌ ichinúúnꞌ Ndiosíꞌ yɨ́tuvi re̱ꞌ ya̱ kúvi ya̱ váꞌa jie̱ꞌe̱ꞌ‑ó vitan.

²⁵ Jee nki̱vɨ re̱ꞌ antivɨ́ soo nsú sáva so̱ko̱ꞌ re̱ꞌ maáréꞌ kue̱ꞌe̱ꞌ íchí, kuéntáꞌ kua̱ꞌ sáꞌá rá su̱tu̱ꞌ kúñáꞌnú sáá ki̱vɨ ráa ta kui̱ya̱ꞌ ta kui̱ya̱ꞌ Nu̱u̱nꞌ Ííꞌ Víꞌí sókóꞌ ráa ni̱ñɨ̱ꞌ rá sa̱na̱ꞌ.

²⁶ Chi retánꞌ sukuán nkuvi, soo jíniñúꞌún ya̱ kue̱ꞌe̱ꞌ íchí kunoꞌo re̱ꞌ kuviꞌ re̱ꞌ ne̱ sáá nka̱jiéꞌé ña̱ko̱o ñɨ̱vɨ́ jín ne̱ vitan réáꞌ sukuán. Soo ntu̱ví chi vitan ya̱ kúvi tiempúꞌ kuánɨꞌɨ yaꞌá jee nkiji re̱ꞌ sáva nso̱ko̱ꞌ re̱ꞌ maáréꞌ ɨɨn ni íchí ya̱ kúvi nɨ́ɨ́nkání sáva siíyo re̱ꞌ kua̱chi.

²⁷ Jee sukuán kuéntáꞌ kua̱ꞌ saá íyó va̱ji ya̱ níní kuviꞌ rá ñɨvɨ ɨɨn ni íchí, jee kuíre suni kiji tiñu ya̱ keꞌneꞌ Ndiosíꞌ kua̱chi.

²⁸ Jee suni sukuán Cristo ɨɨn ni íchí nso̱ko̱ꞌ re̱ꞌ maáréꞌ ni̱ꞌi̱ꞌ re̱ꞌ sáva nsiíyo re̱ꞌ kua̱chi rá ñɨvɨ kue̱ꞌe̱ꞌ. Jee niji tuku re̱ꞌ ya̱ uvíꞌ íchí, soo nsú káꞌ sáva so̱ko̱ꞌ tuku re̱ꞌ maáréꞌ jie̱ꞌe̱ꞌ kua̱chi, chisaꞌ kiji re̱ꞌ sáva xinánitáꞌvíꞌ re̱ꞌ rá ñɨvɨ ya̱ nétu kuvi iniꞌ ráa re̱ꞌ.