Hebreos 8 - Mixteco del suroeste de Tlaxiaco Oaxaca

Níso Jesús tiñu ñujiínꞌ jie̱ꞌe̱ꞌ tratúꞌ jiáá

¹ Jee saáva ya̱ ñáꞌnú nasɨ́kuitɨꞌ ka̱ꞌ kúvi jie̱ꞌe̱ꞌ rá tu̱ꞌun ya̱ káchíꞌ ráníꞌ kúvi ya̱ íyó ɨɨn su̱tu̱ꞌ kúñáꞌnú‑ó, sáni nkachiꞌ ránꞌ, ya̱ maáréꞌ ví ya̱ ña̱kuneeꞌ re̱ꞌ ichi kuáꞌá teyuꞌ nu̱u̱nꞌ nééꞌ Ndiosíꞌ kúñáꞌnú tátúníꞌ‑i ne̱ antivɨ́.

² Jee kúvi re̱ꞌ su̱tu̱ꞌ ya̱ yɨ́tíñú re̱ꞌ nu̱u̱nꞌ Ndiosíꞌ jie̱ꞌe̱ꞌ‑ó ne̱ antivɨ́, nu̱u̱nꞌ kúvi nu̱u̱nꞌ ííꞌ nasɨ́kuitɨꞌ, ya̱ kúvi nijia maá veꞌi ííꞌ ya̱ nsa̱ꞌá maá I̱toꞌoꞌ‑ó Ndiosíꞌ, jee nsú ñɨvɨ nsa̱ꞌá maa.

³ Chi ntáká su̱tu̱ꞌ kúñáꞌnú jiáni Ndiosíꞌ ráa sáva so̱ko̱ꞌ ráa nu̱u̱nꞌ re̱ꞌ rá nantíñú jín rá sa̱na̱ꞌ jiáꞌníꞌ ráa. Jee jie̱ꞌe̱ꞌ saáva Jesús suni niniñúꞌún re̱ꞌ ya̱ so̱ko̱ꞌ re̱ꞌ, chi maáréꞌ kúvi su̱tu̱ꞌ vá.

⁴ Soo retánꞌ íyó i̱i̱ꞌ re̱ꞌ ka̱ꞌ iniꞌ ñɨ̱vɨ́ yaꞌá, jee ni ntu̱né kúvi re̱ꞌ su̱tu̱ꞌ retánꞌ sukuán, jee suni níní íyó i̱i̱ꞌ ka̱ꞌ rá su̱tu̱ꞌ ya̱ sókóꞌ i̱i̱ꞌ ráa ka̱ꞌ nantíñú kuéntáꞌ kua̱ꞌ tátúníꞌ ley Moisés yanaꞌán.

⁵ Chi rá su̱tu̱ꞌ vá jee rá tiñu sáꞌá ráa kúvi tiñu kuéntáꞌ xi̱ne̱ꞌñu̱ꞌ, chi xínéꞌénꞌ‑e jie̱ꞌe̱ꞌ ya̱ naáꞌ nijia ya̱ íyó iniꞌ antivɨ́, sú ntu íyó máá maáa. Chi kúvi‑i kuéntáꞌ kua̱ꞌ nxtúꞌva ya̱chi̱ꞌ Ndiosíꞌ Moisés sáá sukuán kijiéꞌé re̱ꞌ kani re̱ꞌ veꞌi sayo ííꞌ nu̱u̱nꞌ nneñu̱ꞌun rá ñɨvɨ Ndiosíꞌ, jee nkachiꞌ Ndiosíꞌ: “Nito koo nú, jee nasaꞌá nú ntáká kuitɨꞌ rá nantíñú sánikua̱ꞌ íyó kuitɨꞌ rá nantíñú niniꞌ nú ya̱ nxi̱néꞌénꞌ ni̱ꞌ nu̱u̱nꞌ nú ne̱ xi̱ni̱ꞌ yuku.”

⁶ Soo vitan jee su̱tu̱ꞌ‑ó ya̱ kúvi Cristo nni̱ꞌi̱nꞌ re̱ꞌ tiñu máá ñáꞌnú nasɨ́kuitɨꞌ ka̱ꞌ nsú káꞌ rá tiñu nsa̱ꞌá rá su̱tu̱ꞌ vá. Jee suni sukuán níso re̱ꞌ tiñu ñujiínꞌ jie̱ꞌe̱ꞌ tratúꞌ jiáá ya̱ kúvi va̱ꞌa nasɨ́kuitɨꞌ ka̱ꞌ nsú káꞌ tratúꞌ túꞌú. Jee suni ñakɨnꞌ Ndiosíꞌ tratúꞌ jiáá vá jie̱ꞌe̱ꞌ rá tiñu váꞌa nasɨ́kuitɨꞌ ka̱ꞌ nchi̱sóyuꞌú re̱ꞌ ya̱ saꞌá re̱ꞌ maa.

⁷ Chi tratúꞌ xíꞌnañúꞌún, jee retánꞌ nsa̱ꞌá‑a ya̱ kuna̱a̱ꞌ va̱ꞌa nɨꞌɨ tiñu, jee ntu̱né jíniñúꞌún ne̱ níní koo tratúꞌ uvíꞌ, nékúvi.

⁸ Soo niniꞌ Ndiosíꞌ ya̱ ntu̱ví nkínóo na̱a̱ꞌ rá ñɨvɨ yanaꞌán sukuán, jee nkachiꞌ re̱ꞌ, káchíꞌ nu̱u̱nꞌ Tutuꞌ Ííꞌ: Káchíꞌ I̱toꞌoꞌ yó Ndiosíꞌ: “Kiji rá ki̱vɨ̱ꞌ ya̱ nakakɨnꞌ ni̱ꞌ ɨɨn tratúꞌ jiáá jín rá ñɨvɨ ñuunꞌ Israel jín rá ñɨvɨ Judá.

⁹ Jee ntu kúvi‑i kuéntáꞌ kua̱ꞌ maá tratúꞌ nsa̱ꞌá ni̱ꞌ jín rá jííꞌ ráa yanaꞌán, ki̱vɨ̱ꞌ kuéntáꞌ ntɨɨn ni̱ꞌ naꞌá ráa jee ntavaꞌ ni̱ꞌ ráa nu̱u̱nꞌ ñuunꞌ Egipto. Chi jie̱ꞌe̱ꞌ ya̱ ntu nsi̱kúnkuvi na̱a̱ꞌ ráa nu̱u̱nꞌ tratúꞌ ni̱ꞌ, jee saáva nkuiyo ni̱ꞌ nu̱u̱nꞌ ráa”, káchíꞌ I̱toꞌoꞌ‑ó Ndiosíꞌ.

¹⁰ “Jee saáva suꞌva koo tratúꞌ ya̱ saꞌá ni̱ꞌ jín rá ñɨvɨ ñuunꞌ Israel, ne̱ retú nkenta rá ki̱vɨ̱ꞌ yukuán”, káchíꞌ I̱toꞌoꞌ‑ó. “Chuꞌun ni̱ꞌ ley ni̱ꞌ iniꞌ antúníꞌ ráa. Jee suni chuꞌun ni̱ꞌ maa iniꞌ ráa kuéntáꞌ tee ni̱ꞌ maa iniꞌ ánímaꞌ ráa. Jee kuvi ni̱ꞌ Ndiosíꞌ ráa jee kuvi ráa ñɨvɨ ni̱ꞌ.

¹¹ Jee ni ɨɨn ntu̱náꞌ kuniñúꞌún‑u ya̱ xinéꞌénꞌ‑e ñanitáꞌán‑a ni táꞌán‑a jee nsáꞌ kachiꞌ‑i: Kuniꞌ va̱ꞌa nú iniꞌ I̱toꞌoꞌ‑ó. Chi ntáká ráa kuniꞌ va̱ꞌa iniꞌ ni̱ꞌ, ne̱ rá lúlí jín ne̱ rá ñáꞌnú ka̱ꞌ.

¹² Chi kunekáꞌnú iniꞌ ni̱ꞌ jie̱ꞌe̱ꞌ rá tiñu niváꞌa nsa̱ꞌá ráa. Jee ni nsáꞌ naku̱ꞌun iniꞌ ni̱ꞌ ka̱ꞌ jie̱ꞌe̱ꞌ rá kua̱chi nsa̱ꞌá ráa.”

¹³ Jee sáá káꞌánꞌ Ndiosíꞌ jie̱ꞌe̱ꞌ ɨɨn tratúꞌ jiáá, jee yukuán kúvi ya̱ nkachiꞌ re̱ꞌ ya̱ tratúꞌ túꞌú ví tratúꞌ xíꞌnañúꞌún, jee ɨɨn ya̱ nku̱túꞌú jee kútúꞌú‑u ka̱ꞌ, chi sa̱néꞌ íyó kɨ̱naanꞌ‑a.