Hebreos 7 - Mixteco del suroeste de Tlaxiaco Oaxaca

Kúvi Jesús su̱tu̱ꞌ máá kúñáꞌnú ka̱ꞌ kuéntáꞌ mákua nkuvi su̱tu̱ꞌ Melquisedec

¹ Jee Melquisedec yaꞌá, nkuvi re̱ꞌ te̱e nísotíñú ya̱ nta̱túníꞌ ñuunꞌ Salem, jee suni nkuvi re̱ꞌ su̱tu̱ꞌ nu̱u̱nꞌ Ndiosíꞌ máá kúñáꞌnú nasɨ́kuitɨꞌ ka̱ꞌ. Jee ña̱taꞌanꞌ re̱ꞌ Abraham sáá nni̱kó‑o ya̱ ña̱kantáꞌán‑a sáá nku̱neí‑i ñakɨnꞌ‑ɨ ya̱ta̱ꞌ rá te̱e tátúníꞌ vá. Jee ni̱ka̱nꞌ táꞌvíꞌ re̱ꞌ nu̱u̱nꞌ Ndiosíꞌ ya̱ saꞌá‑a ya̱ netuꞌ ka̱ꞌ kuvi Abraham.

² Saájee njia̱ꞌa Abraham nu̱u̱nꞌ Melquisedec ni u̱ji̱ꞌ ni u̱ji̱ꞌ ta sientúꞌ nta̱ká nu̱u̱nꞌ ya̱ níꞌinꞌ re̱ꞌ sáá nku̱neí re̱ꞌ nka̱ntáꞌán re̱ꞌ. Jee xíꞌnañúꞌún, súví Melquisedec kuíni kachiꞌ “te̱e nísotíñú ya̱ na̱a̱ꞌ sáꞌá re̱ꞌ tiñu”, jee suni naní re̱ꞌ te̱e tátúníꞌ nu̱u̱nꞌ Salem, ya̱ kuíni kachiꞌ “te̱e tátúníꞌ ya̱ sáꞌá ya̱ kuneeꞌ ñunkúún”.

³ Chi ntu̱náꞌ káꞌánꞌ Tutuꞌ Ííꞌ jie̱ꞌe̱ꞌ tátáꞌ re̱ꞌ, ni jie̱ꞌe̱ꞌ nánáꞌ re̱ꞌ, ni jie̱ꞌe̱ꞌ tataꞌ ichiyúkúnꞌ re̱ꞌ, ni jín jie̱ꞌe̱ꞌ sáá nkaku re̱ꞌ, ni jín jie̱ꞌe̱ꞌ sáá ni̱ꞌi̱ꞌ re̱ꞌ. Jee suni suꞌva kúnkunuún íyó jín jie̱ꞌe̱ꞌ Se̱ꞌya Ndiosíꞌ, ya̱ kúvi re̱ꞌ su̱tu̱ꞌ nɨ́ɨ́nkání.

⁴ Soo íyó kani va̱ꞌa iniꞌ‑ó jie̱ꞌe̱ꞌ na̱ja ka̱ꞌ vá nku̱ñáꞌnú Melquisedec, ya̱ ne̱ maá tátáꞌ jííꞌ‑ó Abraham, jee njia̱ꞌa re̱ꞌ nu̱u̱nꞌ‑u ni u̱ji̱ꞌ ni u̱ji̱ꞌ ta sientúꞌ rá níꞌinꞌ re̱ꞌ sáá nka̱ntáꞌán re̱ꞌ.

⁵ Jee sava rá te̱e kúvi ichiyúkúnꞌ tataꞌ nkene nu̱u̱nꞌ Leví nni̱ꞌi̱nꞌ ráa kúvi ráa su̱tu̱ꞌ. Jee nta̱túníꞌ Ndiosíꞌ nu̱u̱nꞌ ráa ya̱ tɨɨn ráa ni u̱ji̱ꞌ ni u̱ji̱ꞌ ta sientúꞌ ntáká nu̱u̱nꞌ nantíñú nu̱u̱nꞌ rá ñɨvɨ ñuunꞌ ráa ya̱ jiáꞌa rává nu̱u̱nꞌ ráa kuéntáꞌ kua̱ꞌ tátúníꞌ tu̱ꞌun ley ya̱ njia̱ꞌa Ndiosíꞌ nu̱u̱nꞌ Moisés yanaꞌán, asúnika̱ꞌ ñanitáꞌán ráa kuvi rává ya̱ suni ɨɨn ni kúvi ráa se̱ꞌya ichiyúkúnꞌ ya̱ kéne ráa jín rává ne̱ nu̱u̱nꞌ Abraham.

⁶ Soo súnika̱ꞌ Melquisedec, ntu kúvi re̱ꞌ ichiyúkúnꞌ váji nu̱u̱nꞌ Leví, jee suni njia̱ꞌa Abraham nu̱u̱nꞌ re̱ꞌ ni u̱ji̱ꞌ ni u̱ji̱ꞌ ta sientúꞌ ntáká nu̱u̱nꞌ nantíñú. Jee ni̱ka̱nꞌ táꞌvíꞌ re̱ꞌ nu̱u̱nꞌ Ndiosíꞌ ya̱ na̱ ka̱ꞌ netuꞌ ka̱ꞌ kuvi Abraham. Asúnika̱ꞌ Abraham ví te̱e ya̱ nchi̱sóyuꞌú Ndiosíꞌ nu̱u̱nꞌ‑u ya̱ ku̱ꞌva re̱ꞌ ya̱ váꞌa nu̱u̱nꞌ‑u.

⁷ Chi ntu̱né íyó na̱ jie̱ꞌe̱ꞌ kantátúꞌun‑ó ya̱ ɨɨn te̱e kúñáꞌnú ka̱ꞌ ví ya̱ jíkánꞌ táꞌvíꞌ nu̱u̱nꞌ Ndiosíꞌ ya̱ na̱ ka̱ꞌ netuꞌ ka̱ꞌ kuvi ɨɨn te̱e núun ka̱ꞌ.

⁸ Jee jie̱ꞌe̱ꞌ rá su̱tu̱ꞌ yaꞌá, tɨ́ɨn ráa rá ni u̱ji̱ꞌ ni u̱ji̱ꞌ ta sientúꞌ ntáká nu̱u̱nꞌ rá nantíñú ya̱ jiáꞌa rá ñɨvɨ nu̱u̱nꞌ ráa, asúnika̱ꞌ suni jíꞌíꞌ ráa ranika̱ꞌ. Soo káchíꞌ nu̱u̱nꞌ Tutuꞌ Ííꞌ jie̱ꞌe̱ꞌ inka su̱tu̱ꞌ ya̱ tékúꞌ‑u.

⁹ Jee kuvi kachiꞌ‑ó ya̱ suni njia̱ꞌa Leví ni u̱ji̱ꞌ ni u̱ji̱ꞌ ta sientúꞌ ntáká nu̱u̱nꞌ rá nantíñú nu̱u̱nꞌ Melquisedec ne̱ sáá njia̱ꞌa Abraham maa nu̱u̱nꞌ Melquisedec, sú Leví vá ví ya̱ ntɨɨn ni u̱ji̱ꞌ ni u̱ji̱ꞌ ta sientúꞌ ntáká nu̱u̱nꞌ rá nantíñú ya̱ njiáꞌa rá ñɨvɨ nu̱u̱nꞌ‑u.

¹⁰ Chi Leví kúvi se̱ꞌya ichiyúkúnꞌ ya̱ nkene re̱ꞌ ne̱ nu̱u̱nꞌ Abraham, súka̱ꞌ ne̱ ntiáꞌan ka̱ꞌ kaku re̱ꞌ jee kuéntáꞌ nyɨ́ꞌɨ re̱ꞌ yɨkɨkúñu Abraham ne̱ sáá tiempúꞌ ñátaꞌanꞌ Melquisedec Abraham.

¹¹ Chi nu̱u̱nꞌ tataꞌ váji ichinúúnꞌ Leví nkiji rá te̱e ya̱ nniso re̱ꞌ tiñu su̱tu̱ꞌ. Jee néen kuéntáꞌ rá su̱tu̱ꞌ vá tu̱ꞌun ley Ndiosíꞌ ya̱ nni̱ꞌi̱nꞌ rá ñɨvɨ nación Israel. Jee ntu nkúvi saꞌá rá su̱tu̱ꞌ Leví kino̱o na̱a̱ꞌ rá ñɨvɨ ya̱ níkɨ́nꞌ ley vá. Chi retánꞌ nkuvi saꞌá‑a vá jee, ¿na̱kui chi íyó nakui̱ñɨ̱ꞌ inka ka̱ꞌ su̱tu̱ꞌ kua̱ꞌ nkuvi su̱tu̱ꞌ Melquisedec, nsú káꞌ kua̱ꞌ kúvi su̱tu̱ꞌ tataꞌ Aarón?

¹² Chi ya̱ nsama né ɨɨn vá kuvi su̱tu̱ꞌ jee suni níní íyó sama ley.

¹³ Chi jie̱ꞌe̱ꞌ I̱toꞌoꞌ‑ó Jesús ví ya̱ káchíꞌ nu̱u̱nꞌ Tutuꞌ Ííꞌ sukuán, chi nkene Jesús inka ka̱ꞌ ichiyúkúnꞌ tataꞌ sɨ́ɨ́n nu̱u̱nꞌ kéne rá su̱tu̱ꞌ nu̱u̱nꞌ rá ñɨvɨ Israel. Jee ni ɨɨn su̱tu̱ꞌ ntiáꞌan kene nu̱u̱nꞌ ichiyúkúnꞌ tataꞌ nkene Jesús.

¹⁴ Chi jíníꞌ va̱ꞌa‑ó ya̱ nu̱u̱nꞌ tataꞌ Judá, nkaku I̱toꞌoꞌ‑ó Jesús. Jee Moisés nkaꞌanꞌ re̱ꞌ jie̱ꞌe̱ꞌ rá su̱tu̱ꞌ vá soo ni ntu̱náꞌ nkáꞌánꞌ Moisés jie̱ꞌe̱ꞌ ya̱ kene ɨɨn su̱tu̱ꞌ nu̱u̱nꞌ tataꞌ ichiyúkúnꞌ nkene nu̱u̱nꞌ Judá.

¹⁵ Jee jín yaꞌá, jee saꞌ víꞌí káꞌ túvi kájí jíníꞌ‑ó ya̱ Jesús nnakui̱ñɨ̱ꞌ re̱ꞌ kúvi re̱ꞌ inka nu̱u̱nꞌ su̱tu̱ꞌ, kuéntáꞌ kua̱ꞌ nkuvi su̱tu̱ꞌ Melquisedec.

¹⁶ Jee nsáꞌ nkenta Jesús kúvi re̱ꞌ su̱tu̱ꞌ jie̱ꞌe̱ꞌ ley ya̱ tátúníꞌ‑i ya̱ íyó kene ɨɨn su̱tu̱ꞌ nu̱u̱nꞌ métúꞌún ichiyúkúnꞌ Leví. Chisaꞌ kúvi re̱ꞌ su̱tu̱ꞌ jie̱ꞌe̱ꞌ níso re̱ꞌ fuersáꞌ ííꞌ níꞌin ya̱ kutekuꞌ re̱ꞌ nɨ́ɨ́nkání jee ni nsáꞌ kuviꞌ re̱ꞌ.

¹⁷ Chi káchíꞌ Ndiosíꞌ nu̱u̱nꞌ Tutuꞌ Ííꞌ jie̱ꞌe̱ꞌ Jesús: Noꞌó, nɨ́ɨ́nkání kúvi nú su̱tu̱ꞌ, kuéntáꞌ kua̱ꞌ nkuvi su̱tu̱ꞌ Melquisedec.

¹⁸ Saáva nsi̱jíta tu̱ꞌun ya̱ nta̱túníꞌ ley yanaꞌán chi táyáꞌ‑a jee ntu íyótiñu‑u.

¹⁹ Chi ntu̱náꞌ nsáꞌá ley Moisés ya̱ kino̱o na̱a̱ꞌ ñɨvɨ nu̱u̱nꞌ Ndiosíꞌ. Soo vitan nkenta nni̱ꞌi̱nꞌ‑ó ya̱ koo tu̱neí iniꞌ‑ó ya̱ váꞌa ka̱ꞌ ya̱ kino̱o na̱a̱ꞌ‑ó nu̱u̱nꞌ re̱ꞌ, chi jie̱ꞌe̱ꞌ vá natuꞌva‑ó nu̱u̱nꞌ Ndiosíꞌ.

²⁰ Chi nsa̱náaꞌ Ndiosíꞌ nu̱u̱nꞌ tu̱ꞌun nkachiꞌ re̱ꞌ ya̱ Jesús kúvi‑i su̱tu̱ꞌ nu̱u̱nꞌ‑ó. Jee ntu̱ví nsánáaꞌ Ndiosíꞌ nu̱u̱nꞌ tu̱ꞌun nkachiꞌ re̱ꞌ sáá ñani re̱ꞌ rá inka te̱e kuvi ráa su̱tu̱ꞌ.

²¹ Soo nsa̱náaꞌ Ndiosíꞌ nu̱u̱nꞌ tu̱ꞌun nkachiꞌ re̱ꞌ sáá ñani re̱ꞌ Jesús kuvi re̱ꞌ su̱tu̱ꞌ, chi sukuán nkachiꞌ re̱ꞌ nu̱u̱nꞌ Tutuꞌ Ííꞌ: Nsa̱náaꞌ I̱toꞌoꞌ‑ó nu̱u̱nꞌ tu̱ꞌun nkachiꞌ re̱ꞌ jee ni ntu níkó iniꞌ re̱ꞌ jie̱ꞌe̱ꞌ‑e: “Noꞌó, nɨ́ɨ́nkání kúvi nú su̱tu̱ꞌ, [kuéntáꞌ kua̱ꞌ nkuvi su̱tu̱ꞌ Melquisedec].”

²² Jee jie̱ꞌe̱ꞌ vá, jee nkenta kúvi Jesús ya̱ sáꞌá re̱ꞌ ya̱ kúkutú ɨɨn tratúꞌ váꞌa ka̱ꞌ nsú káꞌ tratúꞌ ley yanaꞌán.

²³ Chi rá inka ka̱ꞌ rá su̱tu̱ꞌ kue̱ꞌe̱ꞌ víꞌí ráa ni̱yo, chi jie̱ꞌe̱ꞌ ni ka̱ꞌ jíꞌíꞌ ráa jee ñasɨꞌ‑ɨ ya̱ kuiñɨ ráa ya̱ kuvi ráa su̱tu̱ꞌ nɨ́ɨ́nkání.

²⁴ Soo tékúꞌ Jesús nɨ́ɨ́nkání, saáva kúvi re̱ꞌ su̱tu̱ꞌ nɨ́ɨ́nkání ya̱ ni ntu sáma re̱ꞌ.

²⁵ Jee rá ñɨvɨ ya̱ jiánatuꞌva ráa nu̱u̱nꞌ Ndiosíꞌ jie̱ꞌe̱ꞌ Cristo, jee saáva kávii kuitɨꞌ kuvi natavaꞌ Jesús ráa nu̱u̱nꞌ kua̱chi ráa, jee sikáku re̱ꞌ xinánitáꞌvíꞌ re̱ꞌ nɨ́ɨ́nkání ráa, chi tékúꞌ re̱ꞌ nɨ́ɨ́nkání, sáva yɨ́tuvi re̱ꞌ náma re̱ꞌ ráa nu̱u̱nꞌ Ndiosíꞌ.

²⁶ Jee saáva, Jesús kúvi nijia re̱ꞌ su̱tu̱ꞌ maá kúñáꞌnú nasɨ́kuitɨꞌ ka̱ꞌ sáni jíniñúꞌún‑ó. Chi i̱i̱ꞌ víꞌí re̱ꞌ, chi ni ntu̱ví kua̱chi re̱ꞌ, jee íyó noo re̱ꞌ, jee íyó sɨ́ɨ́n re̱ꞌ nu̱u̱nꞌ rá ñɨvɨ íyó kua̱chi, jee nkenta kúñáꞌnú nasɨ́kuitɨꞌ re̱ꞌ ne̱ nu̱u̱nꞌ súkún nasɨ́kuitɨꞌ ka̱ꞌ antivɨ́.

²⁷ Jee ntu jíniñúꞌún re̱ꞌ saꞌá re̱ꞌ ta ki̱vɨ̱ꞌ kua̱ꞌ nsa̱ꞌá rá inka ka̱ꞌ rá su̱tu̱ꞌ kúñáꞌnú yanaꞌán, ya̱ xíꞌnañúꞌún ka̱ꞌ jiáꞌníꞌ ráa sa̱na̱ꞌ sókóꞌ ráa jie̱ꞌe̱ꞌ kua̱chi maáráa, jee kuíre sókóꞌ ráa jie̱ꞌe̱ꞌ kua̱chi rá ñɨvɨ ranika̱ꞌ ta ki̱vɨ̱ꞌ. Chisaꞌ métúꞌún ɨɨn íchíni nso̱ko̱ꞌ re̱ꞌ maáréꞌ nu̱u̱nꞌ ntáká tiempúꞌ jie̱ꞌe̱ꞌ kua̱chi‑ó sáá ni̱ꞌi̱ꞌ re̱ꞌ.

²⁸ Chi jiáni ley Moisés rá te̱e táyáꞌ kuvi ráa su̱tu̱ꞌ kúñáꞌnú. Soo ichinúúnꞌ ka̱ꞌ, jee nsa̱náaꞌ Ndiosíꞌ nu̱u̱nꞌ tu̱ꞌun káꞌánꞌ re̱ꞌ, ya̱ ñani re̱ꞌ Se̱ꞌya re̱ꞌ kuvi‑i su̱tu̱ꞌ kúñáꞌnú, ya̱ íyó tu̱ꞌva nɨ́ɨ́nkání nsa̱ꞌá Ndiosíꞌ sáva kuvi‑i su̱tu̱ꞌ kúñáꞌnú.