Hebreos 6 - Mixteco del suroeste de Tlaxiaco Oaxaca

¹ Jee saáva siáꞌa‑ó ya̱ tukuni naku tuku‑ó ka̱ꞌ jie̱ꞌe̱ꞌ tu̱ꞌun Cristo ya̱ nku̱tu̱ꞌva‑ó ne̱ xíꞌnañúꞌún. Chisaꞌ nakeꞌen‑ó kɨ̱ꞌɨ̱nꞌ‑ó ichinúúnꞌ‑ó, sáva kenta‑ó kuvi‑ó ñɨvɨ jíjia iniꞌ jín tu̱ꞌun re̱ꞌ. Sáva ntu tukuni nánikó yátá‑ó kaꞌanꞌ‑ó jie̱ꞌe̱ꞌ rá tiñu ñáꞌnú ya̱ ya jíníꞌ‑ó ne̱ xíꞌnañúꞌún, sú kuéntáꞌ jie̱ꞌe̱ꞌ ya̱: nakani iniꞌ‑ó xinóo‑ó rá kua̱chi sáꞌá‑ó ya̱ xínáánꞌ‑a yó, jín suni jie̱ꞌe̱ꞌ ya̱ kuneí iniꞌ‑ó Ndiosíꞌ,

² jín suni jie̱ꞌe̱ꞌ tu̱ꞌun xínéꞌénꞌ ránꞌ jie̱ꞌe̱ꞌ ya̱ jiánuté, jín jie̱ꞌe̱ꞌ tiñu ya̱ chisó‑ó naꞌá‑ó xi̱ni̱ꞌ ñɨvɨ, jín jie̱ꞌe̱ꞌ ya̱ natekuꞌ i̱i̱ꞌ rá ni̱yɨ, jín jie̱ꞌe̱ꞌ ya̱ sijíta Ndiosíꞌ ñɨvɨ nɨ́ɨ́nkání jie̱ꞌe̱ꞌ kua̱chi ráa.

³ Jee sukuán nakeꞌen‑ó kɨ̱ꞌɨ̱nꞌ‑ó ichinúúnꞌ‑ó, retú taji Ndiosíꞌ.

⁴ Chi íyó rá ñɨvɨ ya̱ ré nkuvi nstu̱únꞌ Ndiosíꞌ antúníꞌ ráa ya̱ ña̱ku̱ꞌun iniꞌ ráa tu̱ꞌun re̱ꞌ, jín ya̱ ñaꞌnu ráa nu̱u̱nꞌ ta̱ꞌvi̱ꞌ ya̱ jiáꞌa Ndiosíꞌ ya̱ nééꞌ antivɨ́, jín ya̱ ni̱ꞌi̱nꞌ ráa sátíñú Ta̱chi̱ꞌ Ííꞌ Ndiosíꞌ iniꞌ ráa,

⁵ jín ya̱ ñaꞌnu ráa nu̱u̱nꞌ tu̱ꞌun váꞌa Ndiosíꞌ, jín ya̱ ñaꞌnu ráa nu̱u̱nꞌ rá tiñu ñáꞌnú sáꞌá re̱ꞌ jín fesáꞌ ííꞌ re̱ꞌ tiempúꞌ kiji.

⁶ Jee retú kusɨ́ɨ́n ráa xinóo ráa Tu̱ꞌun Ndiosíꞌ, jee ni nsáꞌ kúvi ka̱ꞌ naxiníji tuku‑ó ráa nakani iniꞌ ráa sáva kunikɨnꞌ ráa Ndiosíꞌ. Chi ya̱ sukuán jee kuéntáꞌ maáráa nákaꞌniꞌ tuku ráa Se̱ꞌya Ndiosíꞌ nu̱u̱nꞌ kurúsiꞌ. Jee jiáꞌa ráa tu̱nkánuun re̱ꞌ nu̱chitú.

⁷ Chi [suni rá ñɨvɨ ya̱ tɨ́ɨn ráa Tu̱ꞌun Ndiosíꞌ kúvi ráa kuéntáꞌ] kúvi ñuꞌun ya̱ jíꞌi‑i ntesáví, ya̱ kue̱ꞌe̱ꞌ íchí kúun sa̱vi̱ꞌ nu̱u̱nꞌ‑u. Jee sáꞌá Ndiosíꞌ ya̱ netuꞌ kúvi ñuꞌun vá retú kéne tataꞌ sáꞌá nu̱u̱nꞌ‑u ya̱ íyótiñu nu̱u̱nꞌ rá ñɨvɨ ya̱ sátíñú nu̱u̱nꞌ‑u.

⁸ Soo retú kéne yu̱ku̱ꞌ ne̱ꞌén jín yu̱ku̱ꞌ iñu nu̱u̱nꞌ ñu̱ꞌún vá, yukuán jee ntu̱náꞌ tiñu kuitɨꞌ‑ɨ, jee va̱kuyatin chisónínu Ndiosíꞌ maa jee kiji ya̱ kenta ka̱yu̱ꞌ‑u.

Ya̱ íyó tu̱neí iniꞌ‑ó sáꞌá‑a ya̱ kuiñɨ ni̱ꞌin‑ó

⁹ Soo ránoꞌó ñanitáꞌán, ya̱ ñúnúunꞌ ni̱ꞌ, jee súka̱ꞌ sukuán káꞌánꞌ ráníꞌ jín rán, soo ne̱ yuchí kúkáꞌnú iniꞌ ráníꞌ ya̱ koo va̱ꞌa ka̱ꞌ jín ránoꞌó kútáꞌán‑a jín ya̱ nátavaꞌ Ndiosíꞌ ránoꞌó nu̱u̱nꞌ kua̱chi rán sikáku re̱ꞌ ránoꞌó.

¹⁰ Chi na̱a̱ꞌ kúvi Ndiosíꞌ, jee ntu náánꞌ iniꞌ re̱ꞌ rá tiñu sáꞌá rán nu̱u̱nꞌ re̱ꞌ, jín ya̱ ñúnúunꞌ rán re̱ꞌ. Jee sukuán nstúvi rán ya̱ ñúnúunꞌ rán re̱ꞌ jie̱ꞌe̱ꞌ nchi̱neí rán rá ñɨvɨ re̱ꞌ, ya̱ nsásɨ́ɨ́n re̱ꞌ sáva kɨꞌɨ ráa nu̱u̱nꞌ re̱ꞌ. Jee sukuán sáꞌá i̱i̱ꞌ rán ne̱ ntañúꞌún.

¹¹ Soo ñúkúvi iniꞌ ráníꞌ ya̱ suni sukuán kuꞌun káñá iniꞌ ta ɨɨn ɨɨn rán, ne̱ kenta ji̱nu tékúꞌ rán, sáva nɨꞌɨ noo kino̱o kutú iniꞌ rán ya̱ íyó tu̱neí iniꞌ‑órán ya̱ taji Ndiosíꞌ nu̱u̱nꞌ‑ó ya̱ nchi̱sóyuꞌú re̱ꞌ.

¹² Jee sáva ntu kenta kukakan iniꞌ rán, chisaꞌ nuún saꞌá rán mákua sáꞌá rá ñɨvɨ ya̱ níꞌínꞌ ráa ta̱ꞌvi̱ꞌ ya̱ nchi̱sóyuꞌú Ndiosíꞌ jie̱ꞌe̱ꞌ kúneí iniꞌ ráa Jesús jín suni káꞌnú íyó iniꞌ ráa.

¹³ Chi sáá nchi̱sóyuꞌú Ndiosíꞌ nu̱u̱nꞌ Abraham, jee nsa̱náaꞌ re̱ꞌ nu̱u̱nꞌ tu̱ꞌun káchíꞌ re̱ꞌ nu̱u̱nꞌ súví maáréꞌ ya̱ naáꞌ kúvi‑i, chi ntu̱ví íyó inka ka̱ꞌ máá kúñáꞌnú ka̱ꞌ nsú káꞌ maáréꞌ.

¹⁴ Jee nkachiꞌ re̱ꞌ: “Máá nááꞌ nijia ya̱ saꞌá ni̱ꞌ ya̱ netuꞌ nasɨ́kuitɨꞌ kuvi noꞌó jee saꞌá ni̱ꞌ ya̱ nukueꞌeꞌ nasɨ́kuitɨꞌ rá ichiyúkúnꞌ kene ráa ne̱ nu̱u̱nꞌ nú.”

¹⁵ Jee saájee káꞌnú ni̱yo iniꞌ Abraham jee nni̱ꞌi̱nꞌ re̱ꞌ ya̱ nchi̱sóyuꞌú Ndiosíꞌ nu̱u̱nꞌ re̱ꞌ.

¹⁶ Chi sáá sánáaꞌ rá ñɨvɨ nu̱u̱nꞌ tu̱ꞌun káꞌánꞌ ráa, jee sánáaꞌ ráa nu̱u̱nꞌ súví ɨɨn ya̱ ñáꞌnú ka̱ꞌ nsú káꞌ maáráa. Jee sukuán sánáaꞌ ráa nu̱u̱nꞌ tu̱ꞌun nátúꞌún ráa, jee sukuán kúnáaꞌ iniꞌ ráa jie̱ꞌe̱ꞌ tu̱nkáꞌánꞌ ráa, jee suꞌva síjínu ráa nu̱u̱nꞌ kántáꞌán túꞌun ráa.

¹⁷ Jee saáva rá ñɨvɨ ya̱ ni̱ꞌi̱nꞌ ta̱ꞌvi̱ꞌ nchi̱sóyuꞌú re̱ꞌ, ntántúníꞌ nkuini víꞌí Ndiosíꞌ nstúvi re̱ꞌ nu̱u̱nꞌ ráa ya̱ nsáꞌ sama re̱ꞌ ya̱ ñúꞌún iniꞌ re̱ꞌ ku̱ꞌva re̱ꞌ ta̱ꞌvi̱ꞌ vá nu̱u̱nꞌ ráa, jee saáva nsa̱náaꞌ re̱ꞌ nu̱u̱nꞌ tu̱ꞌun káchíꞌ re̱ꞌ sáva naánꞌ nijia ya̱ ni̱ꞌi̱nꞌ ráa maa.

¹⁸ Jee saájee íyó u̱vi̱ꞌ tu̱ꞌun nkachiꞌ re̱ꞌ vá ya̱ ni ntu̱né kúvi sama‑a, chi ntu kuvi katúꞌún Ndiosíꞌ. Saáva nsa̱náaꞌ re̱ꞌ sukuán sáva nuneí téyɨ́ɨ́ iniꞌ maáórán ya̱ numíjiꞌíꞌ nna̱tuꞌva‑ó nu̱u̱nꞌ re̱ꞌ nama re̱ꞌ yó, sáva ni̱ꞌi̱nꞌ‑ó tu̱neí iniꞌ‑ó ya̱ ni̱ꞌi̱nꞌ‑ó ta̱ꞌvi̱ꞌ taji re̱ꞌ nu̱u̱nꞌ‑ó.

¹⁹ Jee jie̱ꞌe̱ꞌ ya̱ íyó tu̱neí iniꞌ‑ó ya̱ sikúnkuvi re̱ꞌ vá, sáꞌá‑a ya̱ íyó kutú ánímaꞌ‑ó xi̱ntíín re̱ꞌ, kuéntáꞌ kua̱ꞌ kínóo kutú barkúꞌ sáꞌá ganchúꞌ véi, ya̱ naní ancla, ya̱ chíꞌi chi̱ji nute. Chi íyó tu̱neí iniꞌ‑ó ki̱vɨ‑ó nu̱u̱nꞌ nééꞌ Ndiosíꞌ, kuéntáꞌ nki̱vɨ su̱tu̱ꞌ kúñáꞌnú ya̱ta̱ꞌ saꞌma ya̱ nni̱ntakaa iniꞌ veñu̱ꞌun káꞌnú ííꞌ nu̱u̱nꞌ ni̱yo xika Ndiosíꞌ.

²⁰ Chi xíꞌna nki̱vɨ Jesús antivɨ́ nu̱u̱nꞌ íyó xika Ndiosíꞌ jie̱ꞌe̱ꞌ‑ó, jee nine re̱ꞌ ɨɨn ichi nu̱u̱nꞌ ki̱vɨ‑ó. Jee suꞌva kuéntáꞌ nki̱vɨ re̱ꞌ ya̱ta̱ꞌ saꞌma, chi nkenta Jesús kúvi re̱ꞌ ɨɨn su̱tu̱ꞌ máá kúñáꞌnú ka̱ꞌ nɨ́ɨ́nkání, kuéntáꞌ mákua nkuvi su̱tu̱ꞌ Melquisedec.