Hebreos 4 - Mixteco del suroeste de Tlaxiaco Oaxaca

¹ Jee saáva, vitan íyó‑ó ka̱ꞌ jín tu̱ꞌun ya̱ nchi̱sóyuꞌú Ndiosíꞌ ya̱ ni̱ꞌi̱nꞌ‑ó ki̱vɨ‑ó naꞌá re̱ꞌ nu̱u̱nꞌ ni̱ꞌi̱nꞌ‑ó najia̱ví‑ó saꞌá re̱ꞌ. Jee íyó kuꞌun yúꞌví iniꞌ rán kumí rán maárán sáva nkóo ni ɨɨn rán ya̱ sanáaꞌ Ndiosíꞌ jie̱ꞌe̱ꞌ ñɨvɨ vá ya̱ nsáꞌ ni̱ꞌi̱nꞌ‑i ki̱vɨ‑ɨ nu̱u̱nꞌ najia̱ví‑i saꞌá re̱ꞌ.

² Chi suni nu̱u̱nꞌ maáó ranika̱ꞌ nkachitu̱ꞌún jie̱ꞌe̱ꞌ tu̱ꞌun váꞌa kuéntáꞌ kua̱ꞌ nkachiꞌ maa nu̱u̱nꞌ rá ñɨvɨ vá ne̱ yanaꞌán. Soo ntu nníꞌínꞌ ti̱ñú tu̱ꞌun vá nu̱u̱nꞌ ráa súka̱ꞌ nteso̱ꞌo ráa maa, chi maáráa ya̱ nteso̱ꞌo ráa maa, jee ntu̱ví nínúꞌ iniꞌ ráa maa.

³ Soo maáó ya̱ jínúꞌ iniꞌ‑ó tu̱ꞌun re̱ꞌ, jee maáó vá níꞌínꞌ‑ó kívɨ‑ó nu̱u̱nꞌ nájiáví‑ó sáꞌá re̱ꞌ sáni nna̱jia̱ví re̱ꞌ, kuéntáꞌ kua̱ꞌ nkachiꞌ re̱ꞌ: Jee saáva nki̱tɨ̱ꞌ iniꞌ ni̱ꞌ nne̱ꞌyá ni̱ꞌ ráa, jee nsa̱ꞌá na̱a̱ꞌ ni̱ꞌ nu̱u̱nꞌ tu̱ꞌun nchi̱sóyuꞌú ni̱ꞌ ya̱: “Ni nsáꞌ ku̱ꞌva kuitɨꞌ ni̱ꞌ ki̱vɨ ráa nu̱u̱nꞌ ñu̱ꞌún nu̱u̱nꞌ kuneeꞌ ráa najia̱ví ráa saꞌá ni̱ꞌ.” Soo nsi̱jínu re̱ꞌ tiñu nsa̱ꞌá re̱ꞌ ne̱sá nsi̱jínu re̱ꞌ saꞌá re̱ꞌ ya̱ kiko̱o ñɨ̱vɨ́.

⁴ Chi íyó ɨɨn nu̱u̱nꞌ káchíꞌ Tutuꞌ Ííꞌ Ndiosíꞌ jie̱ꞌe̱ꞌ ki̱vɨ̱ꞌ uxáꞌ: Nna̱jia̱ví Ndiosíꞌ sáá nsi̱jínu re̱ꞌ ntáká tiñu nsa̱ꞌá re̱ꞌ sáá nsa̱ꞌá re̱ꞌ ñɨ̱vɨ́ yaꞌá.

⁵ Jee tukuni káchíꞌ nu̱u̱nꞌ Tutuꞌ Ííꞌ Ndiosíꞌ: Ni nsáꞌ ku̱ꞌva kuitɨꞌ ni̱ꞌ ki̱vɨ ráa nu̱u̱nꞌ ñuꞌún nu̱u̱nꞌ kuneeꞌ ráa najia̱ví ráa saꞌá ni̱ꞌ.

⁶ Soo íyó i̱i̱ꞌ ka̱ꞌ ki̱vɨ sava rá ñɨvɨ nu̱u̱nꞌ najia̱ví ráa saꞌá re̱ꞌ. Jee rá ñɨvɨ vá tiempúꞌ yanaꞌán nte̱ku̱tu̱ꞌún jie̱ꞌe̱ꞌ tu̱ꞌun váꞌa re̱ꞌ jee ntu nni̱ꞌi̱nꞌ ráa ki̱vɨ ráa nu̱u̱nꞌ‑u, chi ntu̱ví nkáníjiá ráa.

⁷ Jee saáva tukuni nánikó Ndiosíꞌ jiáni re̱ꞌ inka ka̱ꞌ ki̱vɨ̱ꞌ ya̱ kuvi ki̱vɨ ñɨvɨ nu̱u̱nꞌ najia̱ví ráa saꞌá re̱ꞌ, tiempúꞌ vitan. Chi sáá ya̱ njia̱ꞌa víꞌí tiempúꞌ, jee njia̱ꞌa Ndiosíꞌ tu̱ꞌun nu̱u̱nꞌ David sákachiꞌ‑i nu̱u̱nꞌ Tutuꞌ Ííꞌ, jee nkachiꞌ Ndiosíꞌ: Retú vitan tésóꞌo rán tu̱ꞌun káꞌánꞌ Ndiosíꞌ, jee koto kúníꞌin iniꞌ ánímaꞌ rán.

⁸ Chi retánꞌ Josué nsi̱kívɨ re̱ꞌ rá ñɨvɨ Israel vá nu̱u̱nꞌ najia̱ví ráa sáni nna̱jia̱ví Ndiosíꞌ, nékúvi, jee ntu̱ví íyó nanikó tuku Ndiosíꞌ kaꞌanꞌ re̱ꞌ jie̱ꞌe̱ꞌ inka ka̱ꞌ ki̱vɨ̱ꞌ ya̱ kuvi ki̱vɨ rá ñɨvɨ najia̱ví ráa saꞌá Ndiosíꞌ.

⁹ Jee saáva íyó túꞌva i̱i̱ꞌ ka̱ꞌ ya̱ najia̱ví rá ñɨvɨ Ndiosíꞌ kuéntáꞌ kua̱ꞌ nna̱jia̱ví re̱ꞌ ki̱vɨ̱ꞌ uxáꞌ.

¹⁰ Chi ñɨvɨ ya̱ nkívɨ nu̱u̱nꞌ nájiáví‑i sáni nna̱jia̱ví Ndiosíꞌ, jee suni nájiáví‑i nu̱u̱nꞌ tiñu sáꞌá‑a, kuéntáꞌ kua̱ꞌ nna̱jia̱ví Ndiosíꞌ nu̱u̱nꞌ tiñu re̱ꞌ sáá nsa̱ꞌá re̱ꞌ ñɨ̱vɨ́.

¹¹ Saáva íyó nunasɨ́‑ó ki̱vɨ‑ó nu̱u̱nꞌ najia̱ví‑ó sáni nna̱jia̱ví re̱ꞌ, sáva ni ɨɨn‑ó ntu kininkava‑a saꞌá‑a kua̱ꞌ nsa̱ꞌá rá ñɨvɨ vá ya̱ ntu nka̱níjiá ráa.

¹² Chi Tu̱ꞌun Ndiosíꞌ suni tékúꞌ‑u chi ni̱ꞌin yɨ́ɨ́‑ɨ xá jee sátíñú‑u iniꞌ‑ó. Chi Tu̱ꞌun Ndiosíꞌ kúvi kuéntáꞌ ɨɨn yuchiꞌ espada xe̱e̱nꞌ, soo xe̱e̱nꞌ nasɨ́kuitɨꞌ ka̱ꞌ kúvi tu̱ꞌun re̱ꞌ nsú káꞌ kua̱ꞌ xe̱e̱nꞌ ntáká rá yuchiꞌ espada ya̱ xe̱e̱nꞌ ni núvíꞌ íyó ichi yuꞌú, chi suni kívɨ tu̱ꞌun re̱ꞌ ne̱ nu̱u̱nꞌ kúnú iniꞌ‑ó sáva stúvi kájí‑i na̱sa íyó antúníꞌ‑ó jín ánímaꞌ‑ó, kuéntáꞌ kívɨ yuchiꞌ espada ne̱ nu̱u̱nꞌ kúnú sáva sasɨ́ɨ́n‑ɨ ne̱ nu̱u̱nꞌ ñútáꞌán rá yɨkɨ‑ó jín rá miki yɨkɨ‑ó. Jee jiéꞌnéꞌ na̱a̱ꞌ tu̱ꞌun re̱ꞌ antúníꞌ‑ó jín rá kuíni ánímaꞌ‑ó saꞌá‑ó.

¹³ Jee ni ntu̱né íyó ni ɨɨn ya̱ nsa̱ꞌá Ndiosíꞌ ya̱ ntu túvi nijinꞌ nu̱u̱nꞌ re̱ꞌ, chisaꞌ nɨꞌɨ kuitɨꞌ núne ráa nu̱u̱nꞌ re̱ꞌ chi túvi nijinꞌ‑i néꞌyá maáréꞌ, ya̱ nu̱u̱nꞌ re̱ꞌ naku̱ꞌva‑ó kuéntáꞌ nɨꞌɨ ya̱ sáꞌá‑ó.

Jesús kúvi maá su̱tu̱ꞌ ñáꞌnú ka̱ꞌ

¹⁴ Íyó jín‑ó ɨɨn su̱tu̱ꞌ kúñáꞌnú ka̱ꞌ ya̱ nnaa re̱ꞌ súkún nu̱u̱nꞌ nééꞌ Ndiosíꞌ. Jesús ví su̱tu̱ꞌ vá, ya̱ kúvi re̱ꞌ Se̱ꞌya Ndiosíꞌ. Saáva íyó kuiñɨ ni̱ꞌin‑ó jín tu̱ꞌun njia̱ꞌayuꞌú‑ó ya̱ jínúꞌ iniꞌ‑ó.

¹⁵ Chi maá su̱tu̱ꞌ kúñáꞌnú ya̱ íyó jín‑ó, jee ntu kúvi re̱ꞌ ɨɨn su̱tu̱ꞌ ya̱ ntu kúvi kunáꞌví iniꞌ re̱ꞌ kune̱ꞌyá re̱ꞌ yó jie̱ꞌe̱ꞌ ya̱ táyáꞌ iniꞌ‑ó, chi suni ne̱ maáréꞌ ni̱yo tu̱ꞌun xíníyo iniꞌ jín re̱ꞌ ntáká nu̱u̱nꞌ kuéntáꞌ kua̱ꞌ maáó ranika̱ꞌ. Soo ni ɨɨn kua̱chi ntu nsa̱ꞌá re̱ꞌ.

¹⁶ Saáva ne̱ yuchí kukáꞌnú iniꞌ‑ó natuꞌva‑ó nu̱u̱nꞌ teyuꞌ Ndiosíꞌ nu̱u̱nꞌ tátúníꞌ re̱ꞌ jee kaꞌanꞌ‑ó jín re̱ꞌ ya̱ íyó mániꞌ iniꞌ re̱ꞌ néꞌyá re̱ꞌ yó, sáva ni̱ꞌi̱nꞌ‑ó ya̱ kunáꞌví iniꞌ re̱ꞌ yó jín ya̱ íyó mániꞌ iniꞌ re̱ꞌ chineí re̱ꞌ yó sáá jíniñúꞌún‑ó maa.