Hebreos 13 - Mixteco del suroeste de Tlaxiaco Oaxaca

Na̱ja kueꞌnu‑ó sáni kuva̱ꞌa iniꞌ Ndiosíꞌ kune̱ꞌyá re̱ꞌ yó

¹ Jee kuni̱ꞌin rán kunikɨnꞌ rán kunu̱u̱nꞌ rán ɨɨn inka ñanitáꞌán rán ya̱ jínúꞌ iniꞌ ráa Cristo.

² Jee koto náánꞌ iniꞌ rán ya̱ ku̱ꞌvanúún rán veꞌi rán kino̱o rá ñɨvɨ sáá jíniñúꞌún‑u nu̱u̱nꞌ kino̱o‑o. Chi jie̱ꞌe̱ꞌ vá, jee íyó ñɨvɨ káꞌvi ni ya̱ njia̱ꞌanúún ráa veꞌi ráa nu̱u̱nꞌ rá najiáꞌáꞌ ííꞌ Ndiosíꞌ nkino̱o rává sú ntu jíníꞌ ráa maa.

³ Jee naku̱ꞌun iniꞌ rán chineí rán rá ñɨvɨ yɨ́ꞌɨ́ veka̱a, kuéntáꞌ retánꞌ ne̱ jíꞌín rán yɨ́ꞌɨ́ veka̱a jín ráa. Jee suni chineí rán rá ñanitáꞌán rán ya̱ sáꞌá kini rá ñɨvɨ ráa, kuéntáꞌ kua̱ꞌ retánꞌ maárán ví ya̱ nóꞌo maa.

⁴ Jee koo ya̱ ñáꞌnú nu̱u̱nꞌ ntáká rán tu̱ꞌun tánáꞌá ñɨvɨ, jee kueꞌnu ninuꞌun rán jín ñɨvɨ nta̱na̱ꞌá jín rán. Chi maá Ndiosíꞌ sanáaꞌ kua̱chi rá ñɨvɨ ya̱ kúkuáchi ráa jín nsú ñɨvɨ nta̱na̱ꞌá jín ráa, jín suni rá ñɨvɨ yɨ́ꞌɨ́ tiñu téní.

⁵ Koto jiáꞌnu rán ñujiínꞌ kunu̱u̱nꞌ rán xu̱ꞌún, soo kuva̱ꞌa iniꞌ rán jín ya̱ kúmí rán, chi káchíꞌ Ndiosíꞌ: Ni nsáꞌ xinóo ni̱ꞌ noꞌó. Jee ni nsáꞌ keꞌen ni̱ꞌ xinóo maáníꞌ noꞌó.

⁶ Jee saáva ne̱ yuchí kúkáꞌnú iniꞌ‑ó kachiꞌ‑ó: Maá I̱toꞌoꞌ ni̱ꞌ Ndiosíꞌ kúvi ya̱ chíneí re̱ꞌ nuꞌuꞌ, jee nkúyúꞌví ni̱ꞌ, jie̱ꞌe̱ꞌ ná kúvi ya̱ saꞌá rá ñɨvɨ jín nuꞌuꞌ.

⁷ Jee naku̱ꞌun iniꞌ rán rá te̱e yósóꞌ ráa nu̱u̱nꞌ rán, ya̱ náchuꞌun ráa ichi Ndiosíꞌ ránoꞌó, ya̱ maáráa kúvi ya̱ nxi̱néꞌénꞌ ráa Tu̱ꞌun Ndiosíꞌ ránoꞌó. Jee kani va̱ꞌa iniꞌ rán na̱ja viiꞌ ñaꞌnu ráa, jee suni kuneí iniꞌ rán kuéntáꞌ kua̱ꞌ nku̱neí iniꞌ ráa Ndiosíꞌ.

⁸ Chi Jesús, ya̱ kúvi Cristo, jee sáni ni̱yo re̱ꞌ tiempúꞌ ya̱ta̱ꞌ, ɨɨn ni kúvi ré tiempúꞌ vitan, jín suni nɨ́ɨ́nkání tiempúꞌ ichinúúnꞌ.

⁹ Íyó kéꞌín tu̱ꞌun xínéꞌénꞌ ñɨvɨ ya̱ ntu kúnuún jín Tu̱ꞌun Ndiosíꞌ. Jee koto jiáꞌa rán ya̱ nastúꞌva rá tu̱ꞌun vá ránoꞌó nu̱u̱nꞌ‑u. Chi íyó váꞌa ya̱ nukutú ánímaꞌ‑ó saꞌá Ndiosíꞌ chi íyó mániꞌ iniꞌ re̱ꞌ yó, nsú káꞌ jie̱ꞌe̱ꞌ tu̱ꞌun ya̱ tátúníꞌ jie̱ꞌe̱ꞌ ya̱ yájíꞌ‑ó, chi ni ntu̱náꞌ váꞌa nsa̱ꞌá tu̱ꞌun tátúníꞌ vá nu̱u̱nꞌ rá ñɨvɨ ya̱ nyɨ̱tíñú ráa nsa̱ꞌá ráa maa.

¹⁰ Jee íyó‑órán jín Jesús ya̱ nso̱ko̱ꞌ re̱ꞌ maáréꞌ ni̱ꞌi̱ꞌ re̱ꞌ jie̱ꞌe̱ꞌ‑ó. Soo rá su̱tu̱ꞌ, ya̱ sókóꞌ ráa sa̱na̱ꞌ veꞌi ííꞌ saꞌma sáni káchíꞌ ley yanaꞌán, ntu̱náꞌ ni̱ꞌi̱nꞌ ráa nu̱u̱nꞌ re̱ꞌ ya̱ nso̱ko̱ꞌ re̱ꞌ maáréꞌ jie̱ꞌe̱ꞌ‑ó.

¹¹ Chi su̱tu̱ꞌ kúñáꞌnú vá, jee kívɨ re̱ꞌ jín ni̱ñɨ̱ꞌ rá sa̱na̱ꞌ Nu̱u̱nꞌ Ííꞌ Nasɨ́kuitɨꞌ sókóꞌ re̱ꞌ maa jie̱ꞌe̱ꞌ rá kua̱chi, soo rá ñunéꞌyúꞌ rátíꞌ téñuꞌunꞌ iyo ráa maa ne̱ yuñúúnꞌ nu̱u̱nꞌ nééꞌ rá ñɨvɨ.

¹² Jee suni sukuán nnoꞌo Jesús ne̱ yuñúúnꞌ jee ni̱ꞌi̱ꞌ re̱ꞌ ñatɨ ni̱ñɨ̱ꞌ re̱ꞌ, sáva jín ni̱ñɨ̱ꞌ maáréꞌ sasɨ́ɨ́n re̱ꞌ ñɨvɨ nu̱u̱nꞌ kua̱chi ráa sáva kuvi ráa ñɨvɨ Ndiosíꞌ.

¹³ Jee saáva íyó kene rán nu̱u̱nꞌ ñujiínꞌ jiáꞌnu rá ñɨvɨ ya̱ ntu ínúꞌ iniꞌ ráa Jesús jee íyó kuiñɨ ni̱ꞌin rán jín re̱ꞌ, kuéntáꞌ kene‑ó yuñúúnꞌ kɨ̱ꞌɨ̱nꞌ‑ó nu̱u̱nꞌ re̱ꞌ. Jee íyó keꞌneꞌ iniꞌ rán ya̱ jiáꞌa ñɨvɨ tu̱nkánuun nu̱u̱nꞌ rán jie̱ꞌe̱ꞌ kúneí iniꞌ rán Jesús.

¹⁴ Chi ñɨ̱vɨ́ yaꞌá nsáꞌ kúvi ñuunꞌ‑ó ya̱ kino̱o kava nɨ́ɨ́nkání, chisaꞌ núkú‑ó ñuunꞌ ya̱ kiji ichinúúnꞌ.

¹⁵ Jee saáva jie̱ꞌe̱ꞌ ya̱ sáꞌá Cristo jie̱ꞌe̱ꞌ yó, jee yɨ́táꞌán íyó nakuetúꞌún‑ó Ndiosíꞌ, jee yukuán kúvi ya̱ násokoꞌ‑ó nu̱u̱nꞌ re̱ꞌ jín yuꞌú‑ó. Jee ku̱ꞌvayuꞌú‑ó ya̱ I̱toꞌoꞌ‑ó ví Jesús.

¹⁶ Jee koto náánꞌ iniꞌ rán saꞌá rán ya̱ váꞌa nu̱u̱nꞌ rá ñɨvɨ jín ya̱ chineí táꞌán rán jín ráa ya̱ kúmí rán retú jíniñúꞌún ráa maa. Chi sukuán násokoꞌ rán nu̱u̱nꞌ Ndiosíꞌ tékúꞌ jee kúváꞌa iniꞌ re̱ꞌ jie̱ꞌe̱ꞌ‑e.

¹⁷ Jee kaníjiá rán rá te̱e yósóꞌ ichinúúnꞌ rán jee chiꞌi rán maárán xi̱ntíín ráa, chi maáráa ví ya̱ néen kuéntáꞌ ráa ránoꞌó sáva kúvi‑i ya̱ váꞌa nu̱u̱nꞌ rán. Chi naku̱ꞌva ráa kuéntáꞌ jie̱ꞌe̱ꞌ‑e nu̱u̱nꞌ Ndiosíꞌ. Kaníjiá rán ráa sáva kusɨ̱ɨ̱ꞌ iniꞌ ráa sikúnkuvi ráa tiñu sáꞌá ráa, jee sáva nkéꞌen ráa kue̱ka̱ꞌ saꞌá ráa maa chi retú sukuán jee nsáꞌ váꞌa kúvi nu̱u̱nꞌ rán.

¹⁸ Ka̱ka̱nꞌ táꞌvíꞌ rán nu̱u̱nꞌ Ndiosíꞌ jie̱ꞌe̱ꞌ ránuꞌuꞌ. Chi jíníꞌ va̱ꞌa ráníꞌ ya̱ ntu̱náꞌ ñúꞌún kua̱chi iniꞌ ránꞌ jín ya̱ kuíni ránꞌ ya̱ saꞌá na̱a̱ꞌ va̱ꞌa ránꞌ ntáká nu̱u̱nꞌ ntáká tiñu.

¹⁹ Jee suni jíkánꞌ táꞌvíꞌ víꞌí ni̱ꞌ ka̱ꞌ nu̱u̱nꞌ rán ya̱ ka̱ka̱nꞌ táꞌvíꞌ víꞌí rán jie̱ꞌe̱ꞌ ni̱ꞌ nu̱u̱nꞌ Ndiosíꞌ sáva ñamaꞌ ka̱ꞌ kua̱jiaaꞌ tukuni nu̱u̱nꞌ nééꞌ rán.

Jíkánꞌ táꞌvíꞌ‑i ya̱ netuꞌ kuvi‑ó saꞌá Ndiosíꞌ

²⁰ Jee maá Ndiosíꞌ ya̱ sáꞌá re̱ꞌ ya̱ nééꞌ va̱ꞌa ñunkúún‑ó, jee maáréꞌ nxi̱nákóo re̱ꞌ nna̱xtekúꞌ re̱ꞌ I̱toꞌoꞌ‑ó Jesús ya̱ kúvi Cristo nene‑e nteñu rá ni̱yɨ, ɨɨn pasto kúñáꞌnú nu̱u̱nꞌ‑ó ya̱ náka‑a yó kuéntáꞌ lanchi. Chi jín ni̱ñɨ̱ꞌ maáa ya̱ ñatɨ sáá ni̱ꞌi̱ꞌ‑i yukuán kúvi ya̱ ñakɨnꞌ kutú‑u tratúꞌ‑u ya̱ koo nɨ́ɨ́nkání.

²¹ Jee na̱ ka̱ꞌ sikújia Ndiosíꞌ iniꞌ rán saꞌá tu̱ꞌva re̱ꞌ ránoꞌó ntáká tiñu váꞌa sáva saꞌá rán sáni kuíni re̱ꞌ, chi sáꞌá re̱ꞌ iniꞌ‑ó tiñu kúváꞌa iniꞌ re̱ꞌ néꞌyá re̱ꞌ maa, jie̱ꞌe̱ꞌ ya̱ sáꞌá Jesucristo jín‑ó. Jee maáa vá nakuetúꞌún‑ó nɨ́ɨ́nkání ya̱ kúñáꞌnú víꞌí‑i ntáká tiempúꞌ. Sukuán koo, amén.

²² Ránoꞌó ñanitáꞌán, jíkánꞌ táꞌvíꞌ ni̱ꞌ nu̱u̱nꞌ rán ya̱ keꞌneꞌ iniꞌ rán nu̱u̱nꞌ tu̱ꞌun ya̱ nna̱xiníꞌvɨ́ꞌ ni̱ꞌ iniꞌ rán. Chi yakuꞌ ni tu̱ꞌun ntee ni̱ꞌ nu̱u̱nꞌ rán.

²³ Káchíꞌ ni̱ꞌ nu̱u̱nꞌ rán jee kuniꞌ rán ya̱ ñaniꞌ‑ó Timoteo, ya̱ nkene re̱ꞌ veka̱a. Jee retú ñamani nenta re̱ꞌ nu̱u̱nꞌ nééꞌ ni̱ꞌ yaꞌá, jee kua̱jiaaꞌ ni̱ꞌ jín re̱ꞌ kua̱jiane̱ꞌyá ránꞌ ránoꞌó.

²⁴ Ku̱ꞌva rán tu̱ꞌun káva̱ꞌa nu̱u̱nꞌ ntáká rá te̱e yósóꞌ nu̱u̱nꞌ rán, jín nu̱u̱nꞌ ntáká rá ñɨvɨ yɨ́ꞌɨ́ nu̱u̱nꞌ Ndiosíꞌ. Jee rá ñanitáꞌán Italia suni chúichí ráa tu̱ꞌun káva̱ꞌa nu̱u̱nꞌ ránoꞌó.

²⁵ Jee na̱ ka̱ꞌ koo ka̱ꞌ ya̱ ma̱ni̱ꞌ iniꞌ Ndiosíꞌ jín ránoꞌó. Sukuán koo, amén.