Hebreos 12 - Mixteco del suroeste de Tlaxiaco Oaxaca

Kunenu̱u̱nꞌ‑ó Jesús

¹ Saáva, suni maáó ranika̱ꞌ, jee kuéntáꞌ nñuti̱yu̱ꞌ kue̱ꞌe̱ꞌ víꞌí nasɨ́kuitɨꞌ rá ñɨvɨ vá yó, ya̱ nstúvi ráa ya̱ naáꞌ jie̱ꞌe̱ꞌ yɨ́yáꞌvi ka̱ꞌ ya̱ kúneí iniꞌ ñɨvɨ Ndiosíꞌ. Jee saáva, xinóo‑ó ntáká tiñu sávéi yó jín rá kua̱chi ya̱ tɨ́ɨn ñamaꞌ‑a yó. Jee kuniꞌvɨꞌ iniꞌ‑ó kuni̱ꞌin‑ó kɨ̱ꞌɨ̱nꞌ‑ó ichinúúnꞌ‑ó nu̱u̱nꞌ ichi ñakɨnꞌ Ndiosíꞌ nu̱u̱nꞌ‑ó ñɨ̱vɨ́ yaꞌá, kuéntáꞌ jínu‑ó carrera.

² Kunenu̱u̱nꞌ‑ó Jesús ya̱ nu̱u̱nꞌ maáréꞌ va̱ji ya̱ kuneí iniꞌ‑ó re̱ꞌ, jee síkújia re̱ꞌ iniꞌ‑ó ya̱ kuneí va̱ꞌa iniꞌ‑ó re̱ꞌ ne̱ nu̱u̱nꞌ nɨꞌɨ. Chi ñeꞌneꞌ iniꞌ re̱ꞌ nnoꞌo re̱ꞌ nu̱u̱nꞌ kurúsiꞌ, jee ntu ntɨ́ɨn kuéntáꞌ re̱ꞌ ya̱ ku̱ꞌva rá ñɨvɨ tu̱nkánuun nu̱u̱nꞌ re̱ꞌ ya̱ kuviꞌ re̱ꞌ sukuán, chi njia̱ꞌa Ndiosíꞌ re̱ꞌ ya̱ kusɨ̱ɨ̱ꞌ víꞌí iniꞌ re̱ꞌ ichinúúnꞌ jee suni nna̱kuneeꞌ re̱ꞌ ichi kuáꞌá teyuꞌ nu̱u̱nꞌ nééꞌ Ndiosíꞌ tátúníꞌ‑i.

³ Jee saáva kani iniꞌ rán jie̱ꞌe̱ꞌ Jesús ya̱ ñeꞌneꞌ iniꞌ re̱ꞌ ya̱ rá ñɨvɨ íyó kua̱chi nnuni̱ꞌin víꞌí ráa si̱kɨ̱ꞌ re̱ꞌ, sáva ntu táyáꞌ iniꞌ ánímaꞌ rán jín ntu núun iniꞌ rán.

⁴ Chi ránoꞌó, ntiáꞌan kua̱kenta kuviꞌ rán, ni núnasɨ́ rán sukúta̱ꞌán rán jín kua̱chi rán sáva xináánꞌ rán maa.

⁵ ¿Á íchí ya̱ nnaanꞌ iniꞌ rán tu̱ꞌun ya̱ nééꞌ nu̱u̱nꞌ Tutuꞌ Ííꞌ ya̱ nna̱kutíñú Ndiosíꞌ nu̱u̱nꞌ rán? Jee káꞌánꞌ re̱ꞌ jín rán ya̱ kúvi rán se̱ꞌya re̱ꞌ: Se̱ꞌya maáníꞌ, koto kúíchi iniꞌ nú ya̱ náchuꞌun na̱a̱ꞌ re̱ꞌ ichi noꞌó, ni koto núun iniꞌ rán sáá núxeenꞌ re̱ꞌ nu̱u̱nꞌ rán.

⁶ Chi Ndiosíꞌ jee náchuꞌun na̱a̱ꞌ re̱ꞌ ichi rá ñɨvɨ ya̱ ñúnúunꞌ re̱ꞌ. Jee xínóꞌo re̱ꞌ ntáká ñɨvɨ ya̱ nákuayuꞌú re̱ꞌ ya̱ kúvi‑i se̱ꞌya re̱ꞌ.

⁷ Jee íyó keꞌneꞌ iniꞌ rán ya̱ náchuꞌun na̱a̱ꞌ Ndiosíꞌ ichi ránoꞌó, chi Ndiosíꞌ jee sáꞌá re̱ꞌ jín rán kuéntáꞌ jín ɨɨn se̱ꞌya. Chi, ¿né ɨɨn se̱ꞌya vá ntu náchuꞌun na̱a̱ꞌ tátáꞌ‑a ichi maa rúja?

⁸ Chi retú ntu náchuꞌun na̱a̱ꞌ Ndiosíꞌ ichi ránoꞌó kuéntáꞌ kua̱ꞌ sáꞌá re̱ꞌ jín ntáká‑ó, saájee kúvi rán kuéntáꞌ se̱ꞌya náꞌví, jee nsú se̱ꞌya nijia máá maáréꞌ.

⁹ Jee suni sukuán rá tátáꞌ‑ó nu̱u̱nꞌ kéne ñunéꞌyúꞌ‑ó jee náchuꞌun na̱a̱ꞌ ráa ichi yó, jee ni̱yo ya̱ ñáꞌnú nu̱u̱nꞌ‑ó néꞌyá‑ó ráa. Jee, ¿á nsáꞌ saꞌ víꞌí káꞌ vá íyó‑ó chiꞌi‑ó maáó naꞌá Ndiosíꞌ ya̱ kúvi Tátáꞌ‑ó táji ta̱chi̱ꞌ káꞌánꞌ‑ó jee kutekuꞌ‑ó nɨ́ɨ́nkání jín re̱ꞌ rúja?

¹⁰ Ya̱ nááꞌ kúvi nijia ya̱ rá tátáꞌ maáó sáá nna̱chuꞌun na̱a̱ꞌ ráa ichi yó yakuꞌ ni tiempúꞌ sánikua̱ꞌ nkaꞌvi iniꞌ maáráa ya̱ íyó váꞌa. Soo Ndiosíꞌ náchuꞌun na̱a̱ꞌ re̱ꞌ ichi yó ya̱ kuvi ya̱ váꞌa nu̱u̱nꞌ‑ó, sáva ni̱ꞌi̱nꞌ‑ó ya̱ nusɨ́ɨ́n‑ó nu̱u̱nꞌ kua̱chi sánikua̱ꞌ maáréꞌ.

¹¹ Máá nááꞌ nijia ya̱ vitan ntáká nu̱u̱nꞌ tu̱nóꞌó ya̱ nóꞌo‑ó jie̱ꞌe̱ꞌ náchuꞌun na̱a̱ꞌ ráa áxí maáréꞌ ichi yó jee ntu kúsɨ́ɨꞌ nijia iniꞌ‑ó sáꞌá‑a, chisaꞌ núkuíꞌyá iniꞌ‑ó. Soo náchuꞌun na̱a̱ꞌ Ndiosíꞌ ichi yó sáva síkuéꞌnu Ndiosíꞌ yó jee kuíre kene ya̱ kuneeꞌ va̱ꞌa‑ó jín ya̱ kuvi‑ó ñɨvɨ jiáꞌnu na̱a̱ꞌ.

I̱yo xe̱e̱nꞌ kúvi ya̱ kuniichiꞌ iniꞌ ñɨvɨ tu̱ꞌun káꞌánꞌ Ndiosíꞌ

¹² Saáva, nakei iniꞌ rán kuéntáꞌ náskaáꞌ rán naꞌá rán ya̱ kuítá jín rá va̱u xi̱nitɨ́ꞌ rán ya̱ jíjin.

¹³ Jee kɨ̱ꞌɨ̱nꞌ rán nukú rán nakunikɨnꞌ rán ichi na̱a̱ꞌ váꞌa sáva ntu kúvi rán kuéntáꞌ te̱e lénkó ya̱ yaꞌá yukuán chúꞌun‑u jie̱ꞌe̱ꞌ‑e jee nataꞌnu jie̱ꞌe̱ꞌ‑e. Chisaꞌ nuvi rán sáva nakaka na̱a̱ꞌ rán.

¹⁴ Naniꞌvɨꞌ iniꞌ rán nukú rán kuneeꞌ ñunkúún rán jín ntáká ñɨvɨ jín ya̱ kusɨ́ɨ́n rán nu̱u̱nꞌ kua̱chi jee kɨtíñú rán nu̱u̱nꞌ Ndiosíꞌ. Chi retú ntu yɨ́tíñú ɨɨn ñɨvɨ nu̱u̱nꞌ Ndiosíꞌ, ni nsáꞌ kuniꞌ‑i nu̱u̱nꞌ I̱toꞌoꞌ‑ó.

¹⁵ Kumí rán maárán sáva ni ɨɨn rán koto xínóo‑o ya̱ váꞌa táji Ndiosíꞌ nu̱u̱nꞌ‑ó jie̱ꞌe̱ꞌ íyó mániꞌ iniꞌ re̱ꞌ yó, sáva ni ɨɨn rán nkújia tu̱ꞌun ñúꞌún táꞌvi iniꞌ ñɨvɨ nteñu rán, ya̱ saꞌá níní‑i iniꞌ rá ñanitáꞌán‑ó jee stívɨ́‑ɨ kue̱ꞌe̱ꞌ ráa kuéntáꞌ yu̱ku̱ꞌ u̱va̱ꞌ.

¹⁶ Jín suni sáva ni nkóo ni ɨɨn ñɨvɨ nteñu rán ya̱ kúsíkɨ́‑ɨ maáa, ni ñɨvɨ ya̱ kuniichiꞌ‑i ya̱ váꞌa jiáꞌa Ndiosíꞌ, kuéntáꞌ nsa̱ꞌá Esaú. Chi nu̱u̱nꞌ kua̱chi ɨɨn ko̱ꞌo̱ꞌ neyu, nsama re̱ꞌ ta̱ꞌvi̱ꞌ re̱ꞌ ya̱ íyó ni̱ꞌi̱nꞌ re̱ꞌ jie̱ꞌe̱ꞌ nkaku re̱ꞌ xíꞌnañúꞌún jee suꞌva nxi̱kó re̱ꞌ maa.

¹⁷ Chi ya̱ jíníꞌ rán ya̱, sáá ya̱ njia̱ꞌa tiempúꞌ, sáá nkuini re̱ꞌ ya̱ kachiꞌ tátáꞌ re̱ꞌ ya̱ ni̱ꞌi̱nꞌ re̱ꞌ ta̱ꞌvi̱ꞌ ya̱ netuꞌ kuvi re̱ꞌ saꞌá Ndiosíꞌ, jee ntu nkúvi ka̱ꞌ, chi nku̱ichi iniꞌ Ndiosíꞌ re̱ꞌ. Jee ntu níꞌínꞌ re̱ꞌ ya̱ nakani iniꞌ tátáꞌ re̱ꞌ, sú nnu̱kú re̱ꞌ maa ne̱ nnaꞌyuꞌ ntenúúnꞌ re̱ꞌ.

¹⁸ Chi ránoꞌó, ntu ñákuyatin rán nu̱u̱nꞌ ɨɨn yuku ya̱ kuvi tɨɨn rán kuéntáꞌ yuku nu̱u̱nꞌ njiáꞌa Ndiosíꞌ ley re̱ꞌ nu̱u̱nꞌ rá ñɨvɨ Israel, nu̱u̱nꞌ ntɨɨn núꞌvéꞌ ñuꞌunꞌ, jín nu̱u̱nꞌ neenꞌ, jín ñu̱neenꞌ túún, jín nu̱u̱nꞌ nyɨ̱ꞌɨ ta̱chi̱ꞌ xéénꞌ,

¹⁹ jín nu̱u̱nꞌ nteso̱ꞌo ráa nusuꞌ trompeta, jín nusuꞌ ta̱chi̱yuꞌú Ndiosíꞌ tu̱ꞌun káchíꞌ‑i nu̱u̱nꞌ ráa. Jee sáá nteso̱ꞌo ráa maa, jee ne̱ nkakua̱chi ráa ya̱ ni nka̱ꞌánꞌ‑a ka̱ꞌ.

²⁰ Chi ni ntu nkúneí ka̱ꞌ iniꞌ ráa rá tu̱ꞌun nta̱túníꞌ re̱ꞌ: “Kaꞌniꞌ rán jín yu̱u̱ꞌ nɨꞌɨ ya̱ íkɨ́nꞌ‑ɨ yuku vá ne̱ jín sú ɨɨn kitɨ kúvi‑i.”

²¹ Jee máá nasɨ́ xe̱e̱nꞌ nkuvi ya̱ ntu̱vi nu̱u̱nꞌ ráa ya̱ Moisés nkachiꞌ re̱ꞌ: “Máá yúꞌví ni̱ꞌ jee kísɨ nuꞌuꞌ.”

²² Chisaꞌ nkikuyatin rán máá maá yuku Sión nu̱u̱nꞌ íyó ñuunꞌ nu̱u̱nꞌ nééꞌ Ndiosíꞌ tékúꞌ, ya̱ kúvi Jerusalén íyó antivɨ́, nu̱u̱nꞌ íyó ntántúníꞌ víꞌí rá najiáꞌáꞌ ííꞌ re̱ꞌ ya̱ íyó tútú ráa kúsɨ́ɨꞌ iniꞌ ráa chíñúꞌún ráa re̱ꞌ.

²³ Jee nkikuyatin rán nu̱u̱nꞌ nútútú rá se̱ꞌya re̱ꞌ, ya̱ káchíꞌ‑ó kúvi ráa rá se̱ꞌya xíꞌnañúꞌún re̱ꞌ, chi káá rá súví ráa antivɨ́ nu̱u̱nꞌ Ndiosíꞌ. Jee ña̱tuꞌva rán nu̱u̱nꞌ Ndiosíꞌ ya̱ sánáaꞌ re̱ꞌ rá kua̱chi nta̱ká ñɨvɨ, jín nu̱u̱nꞌ íyó ánímaꞌ rá ñɨvɨ ya̱ kínóo na̱a̱ꞌ ráa ichinúúnꞌ Ndiosíꞌ nsa̱ꞌá re̱ꞌ.

²⁴ Jee nkikuyatin rán nu̱u̱nꞌ Jesús ya̱ níso re̱ꞌ tiñu ñujiínꞌ jie̱ꞌe̱ꞌ tratúꞌ jiáá ñakɨnꞌ re̱ꞌ, ya̱ yɨ́tuvi re̱ꞌ jie̱ꞌe̱ꞌ‑ó nu̱u̱nꞌ Ndiosíꞌ, jín nu̱u̱nꞌ ni̱ñɨ̱ꞌ re̱ꞌ ya̱ ñatɨ‑ɨ ya̱ násaꞌá noo‑o yó nu̱u̱nꞌ kua̱chi‑ó. Jee nkakua̱chi ni̱ñɨ̱ꞌ re̱ꞌ nu̱u̱nꞌ Ndiosíꞌ tu̱ꞌun máá ñáꞌnú va̱ꞌa ka̱ꞌ nsú káꞌ ni̱ñɨ̱ꞌ Abel ya̱ ñatɨ sáá ni̱ꞌi̱ꞌ‑i.

²⁵ Jee saáva nito koo rán sáva ntu kúíchi iniꞌ rán Ndiosíꞌ ya̱ káꞌánꞌ jín rán. Chi nu̱u̱nꞌ ntu nkáku rá ñɨvɨ ya̱ nku̱ichi iniꞌ ráa maáréꞌ ya̱ nneeꞌ re̱ꞌ iniꞌ ñɨ̱vɨ́ yaꞌá jee nstúꞌva ya̱chi̱ꞌ re̱ꞌ nu̱u̱nꞌ ráa, jee saꞌ víꞌí káꞌ nkáku‑órán tu̱nóꞌó kunoꞌo‑ó retú nanikóyátá‑ó nu̱u̱nꞌ maáréꞌ ya̱ nééꞌ antivɨ́ jee stúꞌva ya̱chi̱ꞌ re̱ꞌ nu̱u̱nꞌ yó.

²⁶ Jee ne̱ tiempúꞌ yukuán, jee ta̱chi̱yuꞌú Ndiosíꞌ nsa̱ꞌá ya̱ nta̱an nu̱u̱nꞌ ñuꞌún. Soo vitan jee nchi̱sóyuꞌú re̱ꞌ jee káchíꞌ re̱ꞌ: “Jee ɨɨn íchí ka̱ꞌ saꞌá ni̱ꞌ ya̱ ta̱an, soo nsú kua̱chi nu̱u̱nꞌ ñuꞌún ni, chisaꞌ suni ne̱ jín súkún ranika̱ꞌ.”

²⁷ Jee tu̱ꞌun yaꞌá ya̱ káchíꞌ ya̱ “ɨɨn íchí ka̱ꞌ”, stúvi‑i nu̱u̱nꞌ‑ó ya̱ siíyo Ndiosíꞌ ntáká rá nantíñú ya̱ kúvi kajiaꞌ, ya̱ kúvi rá nantíñú nsa̱ꞌá re̱ꞌ, sáva saꞌá re̱ꞌ ya̱ kino̱o kutú nɨ́ɨ́nkání ya̱ ntu kúvi kajiaꞌ.

²⁸ Jee nu̱u̱nꞌ ni̱ꞌi̱nꞌ‑ó ɨɨn ñuunꞌ táji Ndiosíꞌ nu̱u̱nꞌ‑ó nu̱u̱nꞌ tátúníꞌ re̱ꞌ nu̱u̱nꞌ‑ó ya̱ ntu kúvi kajiaꞌ‑a chi ya̱ íyó kutú‑u, jee saáva íyó nakuatáꞌví‑ó re̱ꞌ, jee jie̱ꞌe̱ꞌ vá kɨtíñú‑ó nu̱u̱nꞌ re̱ꞌ kɨñúꞌún‑ó nu̱u̱nꞌ re̱ꞌ jín ya̱ kuꞌun yúꞌví iniꞌ‑ó re̱ꞌ sáni kúváꞌa iniꞌ re̱ꞌ néꞌyá re̱ꞌ maa.

²⁹ Chi Ndiosíꞌ kúvi re̱ꞌ kuéntáꞌ ɨɨn ñuꞌunꞌ káyúꞌ ya̱ xináánꞌ nta̱ká ya̱ niváꞌa.