Hebreos 11 - Mixteco del suroeste de Tlaxiaco Oaxaca

Jie̱ꞌe̱ꞌ tu̱ꞌun ya̱ kúneí iniꞌ‑ó

¹ Soo vitan jee, ya̱ ínúꞌ iniꞌ‑ó kúneí iniꞌ‑ó Ndiosíꞌ, yukuán kúvi ya̱ kúnáaꞌ nijia iniꞌ‑ó ya̱ ni̱ꞌi̱nꞌ‑ó ntáká ya̱ íyó tu̱neí iniꞌ‑ó nétu‑ó ni̱ꞌi̱nꞌ‑ó ya̱ saꞌá Ndiosíꞌ jín‑ó. Jee suni yukuán kúvi ya̱ ne̱ yuchí kúkáꞌnú iniꞌ‑ó ya̱ íyó sú ntiáꞌan kuniꞌ jínúunꞌ‑ó maa vitan.

² Chi jie̱ꞌe̱ꞌ ya̱ nínuꞌ iniꞌ rá jííꞌ‑ó yanaꞌán nku̱neí iniꞌ ráa Ndiosíꞌ jee saáva nna̱kuetúꞌún Ndiosíꞌ jie̱ꞌe̱ꞌ ráa.

³ Jee jie̱ꞌe̱ꞌ ya̱ jínúꞌ iniꞌ‑ó kúneí iniꞌ‑ó, jee saáva jiáku̱ꞌun iniꞌ‑ó ya̱ kua̱íyó ya̱ íyó ñɨ̱vɨ́ nsa̱ꞌá Ndiosíꞌ maa jín tu̱ꞌun káꞌánꞌ re̱ꞌ ni. Jee saáva nsú jín rá nantíñú ya̱ túvi néꞌyá‑ó ya̱ nsa̱ꞌá re̱ꞌ ña̱ko̱o rá nantíñú ya̱ túvi néꞌyá‑ó.

⁴ Chi ni̱nu̱ꞌ iniꞌ Abel nku̱neí iniꞌ re̱ꞌ Ndiosíꞌ, jee saáva nso̱ko̱ꞌ re̱ꞌ ya̱ váꞌa víꞌí ka̱ꞌ nu̱u̱nꞌ Ndiosíꞌ nsú káꞌ Caín. Jee saáva nna̱kuetúꞌún Ndiosíꞌ ya̱ Abel kúvi re̱ꞌ te̱e na̱a̱ꞌ, chi nna̱kuetúꞌún Ndiosíꞌ jie̱ꞌe̱ꞌ ya̱ nsókoꞌ Abel. Jee saáva súka̱ꞌ ya̱ ni̱ꞌi̱ꞌ re̱ꞌ, jee kuéntáꞌ níkɨ́nꞌ i̱i̱ꞌ káꞌánꞌ re̱ꞌ ne̱ vitan chi nkuvi re̱ꞌ te̱e ni̱nu̱ꞌ iniꞌ.

⁵ Jee Enoc ni̱nu̱ꞌ iniꞌ re̱ꞌ nku̱neí iniꞌ re̱ꞌ Ndiosíꞌ, jee saáva nna̱keꞌen tékúꞌ Ndiosíꞌ maa kua̱ꞌa̱nꞌ re̱ꞌ jín‑i antivɨ́ sáva ntu níꞌíꞌ‑i. Jee ntu̱ví nnániꞌinꞌ rá ñɨvɨ maa, chi maá Ndiosíꞌ nna̱keꞌen maa kua̱ꞌa̱nꞌ re̱ꞌ jín‑i. Chi ne̱ sáá ntiáꞌan ka̱ꞌ nakeꞌen re̱ꞌ maa jee nni̱ꞌi̱nꞌ‑i ya̱ nákuetúꞌún Ndiosíꞌ ya̱ nkuva̱ꞌa iniꞌ re̱ꞌ nne̱ꞌyá re̱ꞌ maa.

⁶ Soo retú ntu ínúꞌ iniꞌ‑ó kúneí iniꞌ‑ó Ndiosíꞌ tékúꞌ, jee ni ntu íyó na̱ja kuvi kuva̱ꞌa iniꞌ re̱ꞌ kune̱ꞌyá re̱ꞌ yó. Chi ñɨvɨ nátuꞌva‑a nu̱u̱nꞌ re̱ꞌ jee íyó‑o i̱nu̱ꞌ iniꞌ‑i ya̱ íyó nijia re̱ꞌ, jín suni ya̱ ku̱ꞌva re̱ꞌ ta̱ꞌvi̱ꞌ nu̱u̱nꞌ rá ñɨvɨ ya̱ nánukú ráa re̱ꞌ.

⁷ Jee Noé ni̱nu̱ꞌ iniꞌ re̱ꞌ nku̱neí iniꞌ re̱ꞌ Ndiosíꞌ, sáá nstúꞌva Ndiosíꞌ re̱ꞌ jie̱ꞌe̱ꞌ rá tu̱nóꞌó xéénꞌ koo ya̱ ni ntiáꞌan kuniꞌ maa. Jee ñúyúꞌví iniꞌ re̱ꞌ Ndiosíꞌ jee nsa̱ꞌá re̱ꞌ ɨɨn barkúꞌ maá káꞌnú nasɨ́kuitɨꞌ ya̱ naní arca, sáva ka̱ku re̱ꞌ jín ntáká rá ñɨvɨ táꞌán veꞌi re̱ꞌ. Jee jie̱ꞌe̱ꞌ nku̱neí iniꞌ Noé Ndiosíꞌ, jee nsi̱jíta re̱ꞌ kua̱íyó rá ñɨvɨ ñɨ̱vɨ́ vá nu̱u̱nꞌ kua̱chi ráa. Jee ni̱ꞌi̱nꞌ re̱ꞌ ta̱ꞌvi̱ꞌ ninima̱ni̱ꞌ Ndiosíꞌ ya̱ nsa̱náaꞌ‑a ya̱ kúvi re̱ꞌ te̱e na̱a̱ꞌ jie̱ꞌe̱ꞌ nku̱neí iniꞌ re̱ꞌ Ndiosíꞌ.

⁸ Jee Abraham ni̱nu̱ꞌ iniꞌ re̱ꞌ nku̱neí iniꞌ re̱ꞌ Ndiosíꞌ, sáá nkana Ndiosíꞌ re̱ꞌ, jee nka̱níjiá re̱ꞌ sáva kɨ̱ꞌɨ̱nꞌ re̱ꞌ ɨɨn nu̱u̱nꞌ kúvi nu̱u̱nꞌ ku̱ꞌva Ndiosíꞌ nu̱u̱nꞌ re̱ꞌ kuvi ta̱ꞌvi̱ꞌ re̱ꞌ maa. Jee nkene re̱ꞌ ñuunꞌ re̱ꞌ jee kua̱ꞌa̱nꞌ re̱ꞌ yukuán, súka̱ꞌ ntu̱ví jíníꞌ re̱ꞌ né núꞌ kúvi nu̱u̱nꞌ kɨ̱ꞌɨ̱nꞌ re̱ꞌ.

⁹ Jie̱ꞌe̱ꞌ nku̱neí iniꞌ re̱ꞌ Ndiosíꞌ jee ña̱ꞌa̱nꞌ re̱ꞌ nneeꞌ re̱ꞌ kuéntáꞌ to̱ꞌo̱ꞌ nteñu rá ñɨvɨ nu̱u̱nꞌ ñu̱ꞌún ya̱ nchi̱sóyuꞌú Ndiosíꞌ ya̱ ku̱ꞌva‑a nu̱u̱nꞌ re̱ꞌ. Jee nneeꞌ re̱ꞌ iniꞌ veꞌi saꞌma jín se̱ꞌya yɨ́ɨ́ re̱ꞌ Isaac, jín Jacob, chi suni jíꞌín ráa ni̱ꞌi̱nꞌ ráa jín Abraham ya̱ nchi̱sóyuꞌú Ndiosíꞌ ta̱ꞌvi̱ꞌ vá nu̱u̱nꞌ ráa.

¹⁰ Chi nnetu ñáꞌnú Abraham ya̱ ni̱ꞌi̱nꞌ re̱ꞌ kuneeꞌ re̱ꞌ ñuunꞌ ya̱ nsamaꞌ kutú, ya̱ maá Ndiosíꞌ ví ya̱ ñani iniꞌ re̱ꞌ na̱ja koo jee suni maáréꞌ nsa̱ꞌá maa.

¹¹ Jie̱ꞌe̱ꞌ ya̱ Abraham jín ñasɨ́ꞌɨ́ re̱ꞌ Sara nku̱neí iniꞌ ráa Ndiosíꞌ, ni̱ꞌi̱nꞌ neí iniꞌ ña nna̱nise̱ꞌya ña jee ni̱yo ɨɨn se̱ꞌya yɨ́ɨ́ ña, súnika̱ꞌ kúvi ña ñaꞌan númáꞌ, jee suni ya̱ nku̱ñáꞌnú víꞌí ráa, chi ni̱nu̱ꞌ iniꞌ ña ya̱ síkúnkuvi na̱a̱ꞌ nijia Ndiosíꞌ tu̱ꞌun‑u, chi Ndiosíꞌ ví ya̱ nchi̱sóyuꞌú re̱ꞌ maa.

¹² Jee sukuán jee súnika̱ꞌ ya̱ nku̱ñáꞌnú víꞌí Abraham ya̱ íyó kuéntáꞌ ya̱ ni̱ꞌi̱ꞌ yɨkɨkúñu re̱ꞌ, jee nu̱u̱nꞌ métúꞌún re̱ꞌ nkene ña̱ko̱o kue̱ꞌe̱ꞌ víꞌí tataꞌ ichiyúkúnꞌ re̱ꞌ, kuéntáꞌ kua̱ꞌ kue̱ꞌe̱ꞌ víꞌí rá tiu̱u̱nꞌ íyó súkún, jín kuéntáꞌ kua̱ꞌ kue̱ꞌe̱ꞌ víꞌí ñuítɨ́ káá yuꞌú nteñúꞌún ya̱ ni ntu kúvi kaꞌvi maa.

¹³ Jee ntáká rá ñɨvɨ vá ni̱ꞌi̱ꞌ ráa súka̱ꞌ nku̱neí iniꞌ ráa Ndiosíꞌ. Súnika̱ꞌ ntu nni̱ꞌi̱nꞌ ráa ya̱ nchi̱sóyuꞌú Ndiosíꞌ nu̱u̱nꞌ ráa, soo ne̱ íká niniꞌ váꞌa ráa jie̱ꞌe̱ꞌ ya̱ koo ichinúúnꞌ, jee ne̱ nku̱sɨ̱ɨ̱ꞌ iniꞌ ráa jie̱ꞌe̱ꞌ‑e. Jee njia̱ꞌayuꞌú ráa ya̱ kúvi ráa to̱ꞌo̱ꞌ ya̱ yakuꞌ ni tiempúꞌ néénúún ráa iniꞌ ñɨ̱vɨ́ yaꞌá.

¹⁴ Chi rá káchíꞌ sukuán, jee stúvi kájí ráa ya̱ núkú ráa ɨɨn ñuunꞌ ya̱ kuvi ñuunꞌ maáráa.

¹⁵ Chi retánꞌ nñu̱ꞌun iniꞌ ráa jie̱ꞌe̱ꞌ ñuunꞌ nu̱u̱nꞌ nkene ráa jee ni̱yo kuvi nikó ráa retánꞌ nkuini ráa, nékúvi.

¹⁶ Soo nñu̱ꞌun iniꞌ ráa ɨɨn ñuunꞌ váꞌa ka̱ꞌ ya̱ kúvi ñuunꞌ antivɨ́. Jee saáva Ndiosíꞌ ntu kúkanuun re̱ꞌ kuna̱ní re̱ꞌ Ndiosíꞌ ráa. Nsa̱ꞌá stákoo re̱ꞌ ñuunꞌ ya̱ kuvi ráa.

¹⁷ Jee jie̱ꞌe̱ꞌ ya̱ Abraham ni̱nu̱ꞌ iniꞌ‑i nku̱neí iniꞌ‑i Ndiosíꞌ, jee so̱ko̱ꞌ Abraham Isaac, nékúvi, chi nkachiꞌ Ndiosíꞌ ya̱ kaꞌniꞌ Abraham so̱ko̱ꞌ re̱ꞌ Isaac sáva kototúníꞌ Ndiosíꞌ iniꞌ Abraham, sáá ɨɨn ni nñu̱ꞌun iniꞌ‑i so̱ko̱ꞌ‑o se̱ꞌya‑a Isaac ya̱ kúvi se̱ꞌya métúꞌún‑u, asúnika̱ꞌ Ndiosíꞌ nchi̱sóyuꞌú nu̱u̱nꞌ Abraham jie̱ꞌe̱ꞌ se̱ꞌya vá.

¹⁸ Chi nkachiꞌ Ndiosíꞌ nu̱u̱nꞌ re̱ꞌ ya̱: “Nu̱u̱nꞌ Isaac kene rá se̱ꞌya ichiyúkúnꞌ nú.”

¹⁹ Jee nkuna̱a̱ꞌ iniꞌ Abraham ya̱ Ndiosíꞌ níso‑o fesáꞌ níꞌin ííꞌ ne̱ ya̱ nastekúꞌ‑u rá ni̱yɨ. Jee kuéntáꞌ sukuán nkuvi chi kuéntáꞌ níꞌiꞌ Isaac jee nna̱niꞌinꞌ tuku Abraham se̱ꞌya re̱ꞌ chi kuéntáꞌ nna̱tekuꞌ‑u nkene‑e nteñu rá níꞌiꞌ.

²⁰ Jee jie̱ꞌe̱ꞌ ya̱ ni̱nu̱ꞌ iniꞌ Isaac nku̱neí iniꞌ‑i Ndiosíꞌ, jee nkaꞌanꞌ‑a jie̱ꞌe̱ꞌ rá koo ichinúúnꞌ jee nkachiꞌ‑i ya̱ netuꞌ kuvi Jacob jín Esaú saꞌá Ndiosíꞌ.

²¹ Jee jie̱ꞌe̱ꞌ ya̱ ni̱nu̱ꞌ iniꞌ Jacob nku̱neí iniꞌ‑i Ndiosíꞌ, saájee sáá sa̱néꞌ íyó kuviꞌ‑i, jee nkachiꞌ‑i ya̱ saꞌá Ndiosíꞌ ya̱ netuꞌ kuvi ta ɨɨn ɨɨn ni núvíꞌ rá se̱ꞌya José, jee nna̱kɨtuvi‑i karútíꞌ‑i jee nneñu̱ꞌun‑u Ndiosíꞌ.

²² Saájee jie̱ꞌe̱ꞌ ya̱ ni̱nu̱ꞌ iniꞌ José nku̱neí iniꞌ‑i Ndiosíꞌ, sáá yatin kuviꞌ‑i, jee nkaꞌanꞌ‑a jie̱ꞌe̱ꞌ ya̱ rá ñɨvɨ tataꞌ Israel, kukuéé ka̱ꞌ jee kene ráa xi̱ntíín ñuunꞌ Egipto. Jee ya̱ nta̱túníꞌ‑i jie̱ꞌe̱ꞌ na̱ja saꞌá ráa jín ñunéꞌyúꞌ níyɨ‑ɨ.

²³ Jee jie̱ꞌe̱ꞌ ni̱nu̱ꞌ iniꞌ rá sɨꞌɨ́ Moisés nku̱neí iniꞌ ráa Ndiosíꞌ, jee sáá nkaku‑u jee nsi̱kuéꞌnu yuꞌuꞌ ráa maa u̱ni̱ꞌ yo̱o̱ꞌ, chi niniꞌ ráa ya̱ kúvi ɨɨn te̱e lúlí máá ñúnkúún, jee ni ntu nyúꞌví ráa jie̱ꞌe̱ꞌ ya̱ nta̱túníꞌ te̱e nísotíñú ya̱ tátúníꞌ nu̱u̱nꞌ ñuunꞌ Egipto [ya̱ íyó kaꞌniꞌ rá ñɨvɨ ntáká rá su̱chí lúlí yɨ́ɨ́ ñɨvɨ Israel].

²⁴ Jee jie̱ꞌe̱ꞌ ni̱nu̱ꞌ iniꞌ Moisés nku̱neí iniꞌ re̱ꞌ Ndiosíꞌ, sáá ya̱ nyɨɨ re̱ꞌ jee nku̱ichi iniꞌ re̱ꞌ ya̱ kuvi re̱ꞌ se̱ꞌya ñaꞌan kúvi se̱ꞌya sɨ́ꞌɨ́ te̱e tátúníꞌ Egipto.

²⁵ Chisaꞌ nka̱ji re̱ꞌ ya̱ kuiñɨ re̱ꞌ jín rá ñɨvɨ re̱ꞌ Israel, ya̱ kúvi ñɨvɨ Ndiosíꞌ, jee kunoꞌo re̱ꞌ jín ráa ya̱ nito u̱ꞌvi̱ꞌ ñɨvɨ Egipto ráa, nsú káꞌ kusɨ̱ɨ̱ꞌ iniꞌ re̱ꞌ saꞌá re̱ꞌ kua̱chi yakuꞌ tiempúꞌ.

²⁶ Chi nñu̱ꞌun iniꞌ re̱ꞌ ya̱ yɨ́yáꞌvi víꞌí ka̱ꞌ ví ya̱ ku̱ꞌva rá ñɨvɨ tu̱nkánuun re̱ꞌ kuéntáꞌ kua̱ꞌ nito u̱ꞌvi̱ꞌ ráa Cristo, nsú káꞌ kukúká re̱ꞌ jín rá nantíñú yɨ́yáꞌvi íyó ñuunꞌ Egipto. Chi nneenu̱u̱nꞌ re̱ꞌ ya̱ ni̱ꞌi̱nꞌ re̱ꞌ ta̱ꞌvi̱ꞌ ya̱ ku̱ꞌva Ndiosíꞌ nu̱u̱nꞌ re̱ꞌ.

²⁷ Jee jie̱ꞌe̱ꞌ ya̱ ni̱nu̱ꞌ iniꞌ re̱ꞌ nku̱neí iniꞌ re̱ꞌ Ndiosíꞌ, jee nkene re̱ꞌ nu̱u̱nꞌ ñuunꞌ Egipto, jee ntu nyúꞌví re̱ꞌ ya̱ ki̱tɨ̱ꞌ iniꞌ te̱e tátúníꞌ Egipto, chi ni̱ñɨ ni̱ꞌin re̱ꞌ nsi̱kúnkuvi re̱ꞌ ya̱ nkachiꞌ Ndiosíꞌ kuéntáꞌ retánꞌ néꞌyá jínúunꞌ re̱ꞌ Ndiosíꞌ ya̱ ntu túvi kune̱ꞌyá‑ó.

²⁸ Jee jie̱ꞌe̱ꞌ ya̱ ni̱nu̱ꞌ iniꞌ re̱ꞌ nku̱neí iniꞌ re̱ꞌ Ndiosíꞌ, jee nka̱jiéꞌé re̱ꞌ nsi̱kɨ́koo re̱ꞌ viko naní Pascua, chi nkachiꞌ re̱ꞌ ya̱ rá ñɨvɨ Israel xináváꞌ yává ráa ni̱ñɨ̱ꞌ lanchi yɨkɨ́n nu̱u̱nꞌ yutun tɨ́ɨn yuvéꞌí maá yakuááꞌ ya̱ xínáánꞌ najiáꞌáꞌ ííꞌ Ndiosíꞌ rá se̱ꞌya yɨ́ɨ́ xíꞌnañúꞌún rá ñɨvɨ ñuunꞌ Egipto sáva ntu kaꞌniꞌ najiáꞌáꞌ ííꞌ vá rá se̱ꞌya yɨ́ɨ́ xíꞌnañúꞌún rá ñɨvɨ Israel.

²⁹ Jee suni jie̱ꞌe̱ꞌ ya̱ ni̱nu̱ꞌ iniꞌ rá ñɨvɨ Israel nku̱neí iniꞌ ráa Ndiosíꞌ, jee njia̱ꞌa ráa ma̱ꞌñú nteñúꞌún naní Nteñúꞌún Kuéꞌé, chi nine Ndiosíꞌ nute vá jee natu̱vi ñuꞌun íchí jee njia̱ꞌa ráa íyo ka̱ꞌ ichi. Jee sáá nnu̱nasɨ́ rá te̱e ñuunꞌ Egipto jia̱ꞌa ráa nékúvi, soo nna̱jisoꞌ nteñúꞌún vá ya̱ta̱ꞌ ráa, jee nkaꞌaꞌ ráa jee ni̱ꞌi̱ꞌ ráa.

³⁰ Jee suni jie̱ꞌe̱ꞌ ya̱ ni̱nu̱ꞌ iniꞌ rá ñɨvɨ Israel nku̱neí iniꞌ ráa Ndiosíꞌ, jee nna̱niso rá kuráꞌ yu̱u̱ꞌ násɨ́ꞌ ti̱yu̱ꞌ kua̱íyó yuꞌú ñuunꞌ Jericó, sáá nkuvi ki̱vɨ̱ꞌ uxáꞌ ya̱ jíkótíyu ráa ya̱ta̱ꞌ‑a.

³¹ Jee jie̱ꞌe̱ꞌ ni̱nu̱ꞌ iniꞌ Rahab nku̱neí iniꞌ ña Ndiosíꞌ, súnika̱ꞌ ñaꞌan sɨ̱ɨ̱ꞌ iniꞌ ya̱ xíkó ña maáña nkuvi ña, jee ntu níꞌíꞌ nkáá ña jín rá ñɨvɨ ya̱ ntu nka̱níjiá ráa Ndiosíꞌ, chi nkuva̱ꞌa iniꞌ ña njia̱ꞌa ña veꞌi ña ya̱ nkino̱o rá te̱e ya̱ ña̱ꞌa̱nꞌ nne̱ꞌyá yuꞌuꞌ rává ñuunꞌ Jericó.

³² ¿Ná kachiꞌ ni̱ꞌ ka̱ꞌ rúja? Ntu néen ka̱ꞌ nakani ni̱ꞌ jie̱ꞌe̱ꞌ Gedeón, Barac, Sansón, Jefté, David, Samuel, jín rá ñɨvɨ nna̱kani ráa tu̱ꞌun nkene yuꞌú Ndiosíꞌ.

³³ Jee jie̱ꞌe̱ꞌ ya̱ ni̱nu̱ꞌ iniꞌ ráa nku̱neí iniꞌ ráa Ndiosíꞌ, jee sava ráa nka̱ntáꞌán ráa, jee nku̱neí ráa nna̱tɨɨn ráa rá ñuunꞌ náꞌnú nna̱kɨ̱ꞌɨ xi̱ntíín ráa, jee na̱a̱ꞌ nta̱túníꞌ sava ráa nu̱u̱nꞌ rá ñuunꞌ ráa, jee nni̱ꞌi̱nꞌ ráa tu̱ꞌun nchi̱sóyuꞌú Ndiosíꞌ kunima̱ni̱ꞌ‑i nu̱u̱nꞌ ráa, jee ñasɨꞌ Ndiosíꞌ yuꞌú rá nikaꞌa sáva nka̱jíꞌ rátíꞌ ráa,

³⁴ jee nxi̱náꞌváꞌ sava ráa ñuꞌunꞌ xéénꞌ, jee sava ráa nka̱ku ráa ya̱ ntu ñáꞌníꞌ ñɨvɨ ráa jín yuchiꞌ espada, jee sava ráa táyáꞌ iniꞌ ráa jee nnu̱nakuiꞌ ráa nsa̱ꞌá Ndiosíꞌ, jee nnu̱nakuiꞌ téyɨ́ɨ́ sava ráa nu̱u̱nꞌ nka̱ntáꞌán ráa, jee nku̱neí ráa nta̱níkɨ́nꞌ ráa ejército ya̱ kúvi to̱ꞌo̱ꞌ,

³⁵ jee sava rá ñaꞌan ya̱ níꞌiꞌ rá táꞌán ráña jee nna̱tekuꞌ‑u jee nna̱keꞌen ráña maa. Soo inka ráa nsa̱ꞌá kini níviniꞌ ñɨvɨ ráa nekuaꞌ ni̱ꞌi̱ꞌ ráa, chi ntu njiáꞌayuꞌú ráa xinóo ráa Tu̱ꞌun Ndiosíꞌ jee saáva ntu nkáku ráa nu̱u̱nꞌ tu̱nóꞌó vá. Nsa̱ꞌá ráa sukuán sáva ni̱ꞌi̱nꞌ ráa ya̱ váꞌa ka̱ꞌ ya̱ natekuꞌ tuku ráa kuneeꞌ ráa jín Ndiosíꞌ.

³⁶ Jee inka ráa nnoꞌo ráa tu̱ꞌun ntenu̱u̱nꞌ ñɨvɨ ráa jee njia̱ꞌa ñɨvɨ ráa, jee suni ne̱ nnuꞌniꞌ ráa jín cadena nyɨ̱ꞌɨ ráa veka̱a.

³⁷ Jee inka ráa ni̱ꞌi̱ꞌ ráa jín máá yu̱u̱ꞌ nkuun ñɨvɨ ráa, jee suni nkuachi ñɨvɨ savana̱a̱ꞌ ñunéꞌyúꞌ ráa jín sierra naꞌá, jee ni̱totúníꞌ tu̱nóꞌó ráa, jee suni ñaꞌniꞌ ñɨvɨ ráa jín yuchiꞌ kání xe̱e̱nꞌ, jee suni sukuán ni̱kónúun ráa yaꞌá yukuán, jee nñu̱ꞌun ráa saꞌma ñɨɨn lanchi jín nixíꞌyú, nóꞌo láꞌví ráa, nóꞌo níviniꞌ ráa, nsa̱ꞌá kini ñɨvɨ ráa.

³⁸ Jee ntu̱né íyó ni̱ꞌi̱nꞌ rá ñɨvɨ ñɨ̱vɨ́ ya̱ koo ráa nteñu rává. Jee ni̱kónúun ráa nu̱u̱nꞌ ñu̱ꞌún saɨn, jín rá chi̱yuku, jín yaviꞌ kava, jín yaviꞌ ñuꞌun.

³⁹ Jee súnika̱ꞌ ntáká ráa nni̱ꞌi̱nꞌ ráa ya̱ nna̱kuatúꞌún Ndiosíꞌ ráa jie̱ꞌe̱ꞌ ya̱ ni̱nu̱ꞌ iniꞌ ráa nku̱neí iniꞌ ráa re̱ꞌ, soo ntu nníꞌínꞌ ráa ya̱ nchi̱sóyuꞌú re̱ꞌ ku̱ꞌva re̱ꞌ nu̱u̱nꞌ ráa.

⁴⁰ Chi nsa̱ꞌá túꞌva Ndiosíꞌ ɨɨn ta̱ꞌvi̱ꞌ ya̱ kúvi ya̱ váꞌa víꞌí ka̱ꞌ nu̱u̱nꞌ‑ó, sáva kua̱chi jín maáó nuún nkáá kino̱o na̱a̱ꞌ ráa jín maáó saꞌá re̱ꞌ.