Génesis 45 - Mixteco del suroeste de Tlaxiaco Oaxaca

Stúvi José né ɨɨn kúvi maáréꞌ nu̱u̱nꞌ rá ñaniꞌ re̱ꞌ

¹ Jee ntu̱ví nkúvi ka̱ꞌ chuneí José iniꞌ maáréꞌ ichinúúnꞌ nɨꞌɨ rá ñɨvɨ ya̱ íñɨ́ ráa jín re̱ꞌ ya̱ jiátíñú re̱ꞌ, jee nka̱najíín re̱ꞌ: “¡Kene ntáká rán yaꞌá!”, nkachiꞌ re̱ꞌ. Saájee ni ɨɨn ka̱ꞌ ñɨvɨ ntu̱ví íñɨ́ yukuán jín re̱ꞌ sáá nstúvi re̱ꞌ maáréꞌ nu̱u̱nꞌ rá ñaniꞌ re̱ꞌ.

² Saájee nnaꞌyuꞌ ni̱ꞌin nasɨ́kuitɨꞌ re̱ꞌ, jee rá ñɨvɨ Egipto ya̱ íñɨ́ chíkéꞌi nteso̱ꞌo ráa maa, jee nteso̱ꞌo táꞌán veꞌi Faraón tu̱ꞌun jie̱ꞌe̱ꞌ vá.

³ Jee nkachiꞌ José nu̱u̱nꞌ rá ñaniꞌ re̱ꞌ: ―Maáníꞌ kúvi José. ¿Á tékúꞌ i̱i̱ꞌ tátáꞌ ni̱ꞌ? ―nkachiꞌ José. Soo ntu nkúvi naxiníkó rá ñaniꞌ re̱ꞌ nu̱u̱nꞌ re̱ꞌ, chi máá yúꞌví nasɨ́kuitɨꞌ ráa ya̱ íñɨ́ ráa ichinúúnꞌ re̱ꞌ.

⁴ Jee nkachiꞌ José nu̱u̱nꞌ rá ñaniꞌ re̱ꞌ: ―Ntañúꞌún kikuyatin rán nu̱u̱nꞌ ni̱ꞌ ―nkachiꞌ José nu̱u̱nꞌ ráa. Jee ña̱kuyatin ráa nu̱u̱nꞌ re̱ꞌ, jee nkachiꞌ re̱ꞌ nu̱u̱nꞌ ráa: ―Nuꞌuꞌ kúvi José, ñaniꞌ rán, ya̱ nxi̱kó rán nu̱u̱nꞌ ñɨvɨ kuáꞌánꞌ ñuꞌun Egipto.

⁵ Jee ntañúꞌún koto núkuíꞌyáꞌ iniꞌ rán ni koto kítɨ́ꞌ iniꞌ rán jín maárán jie̱ꞌe̱ꞌ ya̱ nxi̱kó rán nuꞌuꞌ nu̱u̱nꞌ rá ñɨvɨ nkiji yaꞌá, chi nta̱jí Ndiosíꞌ xíꞌna ka̱ꞌ nuꞌuꞌ yaꞌá nsú káꞌ ránoꞌó sáva sikáku re̱ꞌ rá ñɨvɨ kutekuꞌ ráa.

⁶ Ya kua̱ꞌa̱nꞌ u̱vi̱ꞌ kui̱ya̱ꞌ ya̱ íyó ta̱ma̱ꞌ nu̱u̱nꞌ ñuꞌun rá ñuunꞌ, jee kúníꞌ i̱i̱ꞌ u̱ꞌu̱nꞌ kui̱ya̱ꞌ ka̱ꞌ ya̱ ni nnátaꞌví ráa ñuꞌun sáva taji ráa nikɨn ni nákeꞌen ráa tátáꞌ saꞌá.

⁷ Soo nchu̱ichí Ndiosíꞌ nuꞌuꞌ xíꞌna ka̱ꞌ nsú káꞌ ránoꞌó sáva saꞌá re̱ꞌ ya̱ kino̱o i̱i̱ꞌ ichiyúkúnꞌ kiji nu̱u̱nꞌ rán nu̱u̱nꞌ ñu̱ꞌún, chi viiꞌ nsa̱ꞌá re̱ꞌ sáva sikáku re̱ꞌ rá ñɨvɨ kue̱ꞌe̱ꞌ nasɨ́kuitɨꞌ.

⁸ ’Saáva nsú ránoꞌó ví ya̱ nta̱jí nuꞌuꞌ yaꞌá, chisaꞌ maá Ndiosíꞌ ví‑i. Jee ñani Ndiosíꞌ nuꞌuꞌ kúvi ni̱ꞌ kuéntáꞌ tááꞌ nu̱u̱nꞌ Faraón ya̱ nákutíñú ni̱ꞌ nu̱u̱nꞌ re̱ꞌ, jín ya̱ kúvi ni̱ꞌ i̱toꞌoꞌ kosoꞌ ni̱ꞌ nu̱u̱nꞌ nɨꞌɨ vetíñú re̱ꞌ, jín ya̱ nísotíñú ni̱ꞌ tátúníꞌ ni̱ꞌ nu̱u̱nꞌ nɨꞌɨ ñuꞌun Egipto.

⁹ Ñamaꞌ rán kuáꞌán rán nu̱u̱nꞌ tátáꞌ ni̱ꞌ, jee kachiꞌ rán nu̱u̱nꞌ re̱ꞌ: “Suꞌva kachiꞌ se̱ꞌya yɨ́ɨ́ nú José: ñani Ndiosíꞌ nuꞌuꞌ kúvi ni̱ꞌ I̱toꞌoꞌ nu̱u̱nꞌ nɨꞌɨ ñuunꞌ Egipto. Neꞌenꞌ nu̱u̱nꞌ nuꞌuꞌ. Koto kúkáɨɨn iniꞌ nú.

¹⁰ Jee kuneeꞌ nú nu̱u̱nꞌ ñuꞌun ñuunꞌ sánitɨ́ɨn Gosén. Jee suꞌva koo yatin nú jín nuꞌuꞌ. Kuneeꞌ nú yukuán jín rá se̱ꞌya nú jín rá tiání nú jín nɨꞌɨ rá sa̱na̱ꞌ líꞌí nú jín rá xi̱ni̱kɨ̱ꞌ nú, jín nɨꞌɨ rá nantíñú kúmí nú.

¹¹ Jee yukuán taji ni̱ꞌ nu̱u̱nꞌ nú ya̱ kajiꞌ rán sáva ntu nuláꞌví nú, jín rá táꞌán veꞌi nú, jín nɨꞌɨ ya̱ kúmí nú, chi sukuán koo i̱i̱ꞌ ka̱ꞌ ta̱ma̱ꞌ u̱ꞌu̱nꞌ kui̱ya̱ꞌ ka̱ꞌ”, kachiꞌ rán nu̱u̱nꞌ tátáꞌ ni̱ꞌ.

¹² ’Ránoꞌó néꞌyá jínúunꞌ rán jín ñaniꞌ ni̱ꞌ, Benjamín, néꞌyá jínúunꞌ re̱ꞌ ya̱ maáníꞌ ví ya̱ nkachiꞌ rá tu̱ꞌun yaꞌá nu̱u̱nꞌ rán.

¹³ Jee kuáꞌán rán jee nakani rán nu̱u̱nꞌ tátáꞌ ni̱ꞌ jie̱ꞌe̱ꞌ nɨꞌɨ tiñu níso ni̱ꞌ kúñáꞌnú ni̱ꞌ nu̱u̱nꞌ ñuꞌun Egipto, jín nɨꞌɨ ya̱ niniꞌ rán yaꞌá. Ya̱chi̱ꞌ rán kua̱keꞌen rán tátáꞌ ni̱ꞌ jee kiji rán jín re̱ꞌ yaꞌá ―nkachiꞌ José.

¹⁴ Jee ñɨ̱numi re̱ꞌ súkún ñaniꞌ re̱ꞌ, Benjamín, jee nnaꞌyuꞌ re̱ꞌ. Jee nnaꞌyuꞌ Benjamín jee ñɨ̱numi‑i su̱ku̱nꞌ re̱ꞌ.

¹⁵ Jee nte̱yuꞌú José ntáká rá ñaniꞌ re̱ꞌ, jee nnaꞌyuꞌ re̱ꞌ jín ráa. Jee sáá nkuvi yaꞌá, jee nkaꞌanꞌ rá ñaniꞌ re̱ꞌ jín re̱ꞌ.

¹⁶ Jee ne̱ vetíñú Faraón nkenta tu̱ꞌun ya̱ káchíꞌ ya̱ nkenta rá ñaniꞌ José, jee jie̱ꞌe̱ꞌ yukuán nkáá nkuva̱ꞌa iniꞌ Faraón jín rá te̱e nísotíñú ya̱ jiátíñú re̱ꞌ.

¹⁷ Jee nkachiꞌ Faraón nu̱u̱nꞌ José: ―Kachiꞌ nu̱u̱nꞌ rá ñaniꞌ nú ya̱: “Tee rán carga ya̱ta̱ꞌ rá burrúꞌ rán jee nikó rán kɨ̱noꞌonꞌ rán nu̱u̱nꞌ ñuꞌun ñuunꞌ Canaán.

¹⁸ Jee nakeꞌen rán tátáꞌ rán kiji rán jín re̱ꞌ jín rá táꞌán veꞌi rán nu̱u̱nꞌ ni̱ꞌ. Jee taji ni̱ꞌ nu̱u̱nꞌ rán ñuꞌun va̱ꞌa ka̱ꞌ ya̱ íyó nu̱u̱nꞌ ñuꞌun ñuunꞌ Egipto, jee kajiꞌ rán ya̱ kene nu̱u̱nꞌ tataꞌ sáꞌá ya̱ íyó nu̱u̱nꞌ ñuꞌun yaꞌá.”

¹⁹ Jee noꞌó suni tatúníꞌ nú nu̱u̱nꞌ ráa yaꞌá ya̱: “Nakeꞌen rán rá karretáꞌ nu̱u̱nꞌ ñuunꞌ Egipto, kɨ̱ꞌɨ̱nꞌ rán jín ráa sáva kuꞌun rá kua̱chi lúlí rán, jín rá ñaꞌan rán, jín tátáꞌ rán, jee kiji rán.

²⁰ Jee koto nániꞌvɨꞌ iniꞌ rán jie̱ꞌe̱ꞌ rá nantíñú kúmí rán chi ya̱ váꞌa ka̱ꞌ ya̱ íyó nu̱u̱nꞌ nɨꞌɨ ñuꞌun Egipto vá kuvi rán”, ―nkachiꞌ Faraón nu̱u̱nꞌ José ya̱ kachiꞌ re̱ꞌ maa nu̱u̱nꞌ rá ñaniꞌ re̱ꞌ.

²¹ Jee suꞌva nsa̱ꞌá rá se̱ꞌya Israel (Jacob). Jee njia̱ꞌa José nu̱u̱nꞌ ráa rá karretáꞌ ya̱ sánikua̱ꞌ nta̱túníꞌ Faraón, jín ya̱ kajiꞌ ráa ichi.

²² Jee njia̱ꞌa re̱ꞌ saꞌma jiáá sáva sama ráa saꞌma ñúꞌún ráa, soo nu̱u̱nꞌ Benjamín njia̱ꞌa José u̱ni̱ꞌ sientúꞌ (300) xu̱ꞌún ka̱a plata jín u̱ꞌu̱nꞌ moda saꞌma.

²³ Jee nu̱u̱nꞌ tátáꞌ re̱ꞌ nta̱jí re̱ꞌ rá yaꞌá: u̱ji̱ꞌ burrúꞌ ya̱ níso rá nantíñú va̱ꞌa ka̱ꞌ ya̱ íyó nu̱u̱nꞌ ñuꞌun Egipto, jín u̱ji̱ꞌ ka̱ꞌ burráꞌ ya̱ níso nikɨn, jín i̱xta̱tíláꞌ, jín neyu sáva kajiꞌ tátáꞌ re̱ꞌ maa ichi.

²⁴ Jee nna̱chuichí re̱ꞌ rá ñaniꞌ re̱ꞌ, jee kua̱noꞌonꞌ ráa, jee nkachiꞌ re̱ꞌ nu̱u̱nꞌ ráa: ―Koto kántáꞌán túꞌun rán ichi nu̱u̱nꞌ kua̱noꞌonꞌ rán.

²⁵ Jee nkene ráa nu̱u̱nꞌ ñuunꞌ Egipto kua̱ꞌa̱nꞌ ráa jee nkenta ráa nu̱u̱nꞌ ñuꞌun Canaán, nu̱u̱nꞌ nééꞌ tátáꞌ ráa Jacob.

²⁶ Jee nna̱kani ráa nu̱u̱nꞌ re̱ꞌ ya̱ tékúꞌ i̱i̱ꞌ José jín ya̱ suvire̱ꞌ vá kúvi te̱e nísotíñú tátúníꞌ‑i nu̱u̱nꞌ nɨꞌɨ ñuꞌun ñuunꞌ Egipto. Soo nsa̱ꞌvi iniꞌ Jacob jee ntu jínúꞌ iniꞌ re̱ꞌ tu̱ꞌun káchíꞌ ráa nu̱u̱nꞌ re̱ꞌ.

²⁷ Soo sáá nna̱kani ráa nu̱u̱nꞌ re̱ꞌ nɨꞌɨ ya̱ nkachiꞌ José nu̱u̱nꞌ ráa, jee sáá niniꞌ re̱ꞌ rá karretáꞌ ya̱ nta̱jí José sáva kɨ̱ꞌɨ̱nꞌ ráa jín re̱ꞌ, jee nnu̱neí iniꞌ re̱ꞌ.

²⁸ Saájee nkachiꞌ Israel (Jacob): ―Ya nkuvi suꞌva, tékúꞌ i̱i̱ꞌ se̱ꞌya yɨ́ɨ́ ni̱ꞌ José. ¡Kɨ̱ꞌɨ̱nꞌ ni̱ꞌ kɨ̱ne̱ꞌyá ni̱ꞌ re̱ꞌ ne̱ ntiáꞌan ka̱ꞌ kuviꞌ ni̱ꞌ!