Gálatas 6 - Mixteco del suroeste de Tlaxiaco Oaxaca

Chineí‑ó ɨɨn inka‑ó

¹ Ránoꞌó ñaniꞌ, ré ɨɨn táꞌán rán nkininkava nu̱u̱nꞌ kua̱chi, suvirán ya̱ sáꞌá sáni kuíni Ta̱chi̱ꞌ Ííꞌ Ndiosíꞌ, jee nachuꞌun tuku rán máá ichi váꞌa. Kaꞌanꞌ másúꞌ iniꞌ rán jín‑i. Jee nito koo rán maárán, sáva nsíkúvi iniꞌ rán nu̱u̱nꞌ kua̱chi vá.

² Chineí táꞌán rán néni ɨɨn ya̱ nóꞌo táꞌán rán. Chi sukuán sikúnkuvi rán tu̱ꞌun ley tátúníꞌ Cristo.

³ Ré ɨɨn ñɨvɨ káꞌvi téyɨ́ɨ́ iniꞌ, súnika̱ꞌ ntu̱náꞌ kúvi‑i, jee xínáꞌví‑i maáa.

⁴ Soo ta ɨɨn ñɨvɨ kototúníꞌ‑i maáa jie̱ꞌe̱ꞌ tiñu sáꞌá‑a. Ña̱re nu̱u̱nꞌ sáꞌá va̱ꞌa rán, kuvi kusɨ̱ɨ̱ꞌ téyɨ́ɨ́ iniꞌ‑i jie̱ꞌe̱ꞌ ya̱ sáꞌá‑a jee nkúvi saꞌá nuún‑u maáa jín inka ñɨvɨ.

⁵ Chi ta ɨɨn‑ó kuneenu̱u̱nꞌ‑ó sikúnkuvi‑ó tiñu sáꞌá‑ó.

⁶ Jee ránoꞌó ya̱ súkuáꞌa rán Tu̱ꞌun Ndiosíꞌ, chineí táꞌán rán rá te̱e xínéꞌénꞌ maa nu̱u̱nꞌ ránoꞌó jín nɨꞌɨ nu̱u̱nꞌ ya̱ váꞌa kúmí rán.

⁷ Koto xínáꞌví rán maárán. Chi ni ɨɨn ñɨvɨ nkúvi saꞌá kátá iniꞌ ráa nu̱u̱nꞌ Ndiosíꞌ. Chi sáni sáꞌá ɨɨn ñɨvɨ, suni sukuán ni̱ꞌi̱nꞌ‑i, kuéntáꞌ ɨɨn te̱e táji tataꞌ, nániꞌinꞌ re̱ꞌ tataꞌ sáni ya̱ ntaji re̱ꞌ.

⁸ Chi retú ki̱vɨ‑ó ichi ya̱ níyo néꞌén iniꞌ‑ó saꞌá‑ó jín yɨkɨkúñu kua̱chi‑ó, jee suꞌva íyó‑ó kuéntáꞌ ɨɨn te̱e táji. Chi va̱ji ne̱ nu̱u̱nꞌ ya̱ níyo néꞌén iniꞌ‑ó ɨɨn tataꞌ sáꞌá‑ó. Ni̱ꞌi̱nꞌ‑ó ya̱ stívɨ́‑ó maáó, ya̱ koo‑ó kuéntáꞌ níꞌiꞌ‑ó nu̱u̱nꞌ Ndiosíꞌ. Jee retú ki̱vɨ‑ó naꞌá Ta̱chi̱ꞌ Ííꞌ Ndiosíꞌ, ni̱ꞌi̱nꞌ‑ó ɨɨn tataꞌ sáꞌá‑a ya̱ sikútekuꞌ Ta̱chi̱ꞌ Ííꞌ yó nɨ́ɨ́nkání jín Ndiosíꞌ.

⁹ Koto núun iniꞌ‑órán saꞌá‑ó ya̱ váꞌa. Chi kenta ki̱vɨ̱ꞌ ñani Ndiosíꞌ ya̱ ni̱ꞌi̱nꞌ‑ó ta̱ꞌvi̱ꞌ taji re̱ꞌ, kuéntáꞌ níꞌínꞌ‑ó tataꞌ sáꞌá‑ó, retú ntu nikó iniꞌ‑ó sáꞌá‑ó ya̱ váꞌa.

¹⁰ Saáva sáá kénta íyó, jee saꞌá‑ó ya̱ váꞌa nu̱u̱nꞌ nɨꞌɨ. Jee ya̱ ñáꞌnú ka̱ꞌ vá íyó saꞌá‑ó ya̱ váꞌa nu̱u̱nꞌ rá ñanitáꞌán‑ó ya̱ kúneí iniꞌ ráa Jesús.

Nna̱kutíñú Pablo jín tu̱ꞌun nu̱u̱nꞌ nɨꞌɨ ya̱ nkachiꞌ re̱ꞌ

¹¹ Kune̱ꞌyá rán máá rá letra káꞌnú ka̱ꞌ ví ya̱ nééꞌ nu̱u̱nꞌ tutuꞌ yaꞌá chi ntee ni̱ꞌ maa nu̱u̱nꞌ rán jín naꞌá maáníꞌ.

¹² Rá te̱e ya̱ kuíni kino̱o va̱ꞌa ráa nu̱u̱nꞌ rá inka ñɨvɨ jie̱ꞌe̱ꞌ ya̱ sáꞌá ráa, suviráa ví ya̱ tétuvi ráa ya̱ sikúnkuvi rán costumbre ñuunꞌ Israel ya̱ sáꞌá circuncidar rán maárán. Sáꞌá ráa suꞌva sáva nkóto u̱ꞌvi̱ꞌ rá ñɨvɨ ráa jie̱ꞌe̱ꞌ tu̱ꞌun ya̱ níꞌiꞌ Cristo nu̱u̱nꞌ kurúsiꞌ jie̱ꞌe̱ꞌ‑ó.

¹³ Chi ni maáráa, ya̱ sáꞌá circuncidar ráa, ntu síkúnkuvi ráa tu̱ꞌun tátúníꞌ ley Moisés. Soo kuíni ráa ya̱ saꞌá circuncidar rán maárán, sáva kaꞌanꞌ téyɨ́ɨ́ ráa jie̱ꞌe̱ꞌ ya̱ nsi̱kúnkuvi ráa costumbre vá jín ntíꞌ yɨkɨkúñu rán.

¹⁴ Soo maáníꞌ ntu̱náꞌ káꞌánꞌ téyɨ́ɨ́ ni̱ꞌ. Kua̱chi káꞌánꞌ téyɨ́ɨ́ ni̱ꞌ jie̱ꞌe̱ꞌ ya̱ níꞌiꞌ I̱toꞌoꞌ‑ó Jesucristo nu̱u̱nꞌ kurúsiꞌ jie̱ꞌe̱ꞌ‑ó. Chi jie̱ꞌe̱ꞌ yukuán jee kúvi kuéntáꞌ níꞌiꞌ rá ñujiínꞌ jiáꞌnu ñɨvɨ ñɨ̱vɨ́ nu̱u̱nꞌ kurúsiꞌ nu̱u̱nꞌ ni̱ꞌ. Chi suni kúvi kuéntáꞌ níꞌiꞌ ni̱ꞌ nu̱u̱nꞌ rá ñujiínꞌ vá, chi ntu yɨ́ꞌɨ́ ni̱ꞌ ka̱ꞌ chi̱ji naꞌá rává.

¹⁵ Chi nu̱u̱nꞌ yɨ́ꞌɨ́‑ó nu̱u̱nꞌ Cristo Jesús, ntu̱náꞌ íyótiñu ré saꞌá circuncidar‑ó áxí nsáꞌ saꞌá circuncidar‑ó. Soo ya̱ yɨ́yáꞌvi ka̱ꞌ ví ya̱ sáꞌá Ndiosíꞌ ya̱ nújiáá‑ó.

¹⁶ Nta̱ká rá ñɨvɨ ya̱ jíka ráa sáni káchíꞌ tu̱ꞌun yaꞌá ya̱ káchíꞌ ni̱ꞌ, jee na̱ ka̱ꞌ kuneeꞌ va̱ꞌa ráa ka̱ꞌ, jín ya̱ kunáꞌví iniꞌ Ndiosíꞌ ráa, ne̱ rá ñɨvɨ íñɨ́ jín Ndiosíꞌ ya̱ kúneí iniꞌ ráa Jesús ya̱ kúvi ráa ichiyúkúnꞌ Israel.

¹⁷ Ne̱ vitan ré, koto stáña̱ꞌán ni ɨɨn ka̱ꞌ ñɨvɨ nuꞌuꞌ. Chi nééꞌ rá ya̱nta nu̱u̱nꞌ yɨkɨkúñu ni̱ꞌ nu̱u̱nꞌ nito u̱ꞌvi̱ꞌ ñɨvɨ nuꞌuꞌ jie̱ꞌe̱ꞌ Jesús. Kúvi vá kuéntáꞌ jerúꞌ ya̱ stúvi ya̱ musúꞌ Jesús ví ni̱ꞌ.

¹⁸ Ránoꞌó ñaniꞌ, na̱ ka̱ꞌ koo ma̱ni̱ꞌ iniꞌ I̱toꞌoꞌ‑ó Jesús ka̱ꞌ jín rán, ya̱ kúvi re̱ꞌ Cristo. Sukuán koo. Amén.