Gálatas 4 - Mixteco del suroeste de Tlaxiaco Oaxaca

¹ Jee káchíꞌ ni̱ꞌ yaꞌá, ya̱ ɨɨn te̱e lúlí ya̱ ɨɨn ki̱vɨ̱ꞌ ni̱ꞌi̱nꞌ nɨꞌɨ re̱ꞌ ya̱ kúmí tááꞌ re̱ꞌ. Soo ni lúlí re̱ꞌ, jee ntu sɨ́ɨ́n íyó re̱ꞌ jín ɨɨn musúꞌ ya̱ nkeꞌen ñɨvɨ, súnika̱ꞌ i̱toꞌoꞌ nɨꞌɨ nantíñú tááꞌ re̱ꞌ kúvi re̱ꞌ.

² Chi yɨ́ꞌɨ́ re̱ꞌ chi̱ji xi̱ntíín rá ñɨvɨ ya̱ kúmí ráa re̱ꞌ, jee rá nantíñú re̱ꞌ yɨ́ꞌɨ́ chi̱ji xi̱ntíín rá ñɨvɨ ya̱ néen kuéntáꞌ maa, ne̱ kenta ki̱vɨ̱ꞌ ñani tátáꞌ re̱ꞌ.

³ Jee suni sukuán nnoꞌo‑ó ne̱ ntiáꞌan kuniꞌ‑ó Jesús, jee nkuvi‑ó kuéntáꞌ ɨɨn te̱e lúlí, chi nyɨ̱ꞌɨ‑ó chi̱ji xi̱ntíín rá ñujiínꞌ sáꞌá ka̱ꞌá ñɨvɨ ñɨ̱vɨ́, kuéntáꞌ ɨɨn musúꞌ kéꞌen ñɨvɨ nkuvi‑ó.

⁴ Soo sáá nkenta tiempúꞌ ñani Ndiosíꞌ, jee nchu̱ichí re̱ꞌ Se̱ꞌya re̱ꞌ. Jee nkaku‑u chi̱ji ɨɨn ñaꞌan. Jee ne̱ nkaku‑u nyɨ̱ꞌɨ‑ɨ chi̱ji xi̱ntíín tu̱ꞌun ley njia̱ꞌa Ndiosíꞌ nu̱u̱nꞌ Moisés.

⁵ Nsa̱ꞌá Ndiosíꞌ suꞌva sáva nchu̱náán nkáꞌnú Jesús nu̱u̱nꞌ re̱ꞌ jie̱ꞌe̱ꞌ kua̱chi rá ñɨvɨ yɨ́ꞌɨ́ chi̱ji ley vá, sáva sikáku re̱ꞌ ráa sáva nakui̱ñɨ̱ꞌ núne ráa nu̱u̱nꞌ ley vá, sáva ni̱ꞌi̱nꞌ ránꞌ ya̱ nna̱tɨɨn kuéntáꞌ re̱ꞌ ránuꞌuꞌ ya̱ kúvi ránꞌ se̱ꞌya re̱ꞌ.

⁶ Jie̱ꞌe̱ꞌ ya̱ kúvi‑ó se̱ꞌya Ndiosíꞌ vá nchu̱ichí re̱ꞌ Ta̱chi̱ꞌ Ííꞌ Se̱ꞌya re̱ꞌ ki̱vɨ‑ɨ iniꞌ ánímaꞌ‑ó, jee Ta̱chi̱ꞌ Ííꞌ re̱ꞌ sáꞌá ya̱ kúvi káchíꞌ nijia‑ó nu̱u̱nꞌ Ndiosíꞌ: “Tááꞌ ni̱ꞌ, Tátáꞌ ni̱ꞌ.”

⁷ Saáva jie̱ꞌe̱ꞌ ya̱ nsa̱ꞌá Ndiosíꞌ, ntu kúvi‑órán ka̱ꞌ ɨɨn musúꞌ, soo kúvi‑ó se̱ꞌya re̱ꞌ. Jee nu̱u̱nꞌ kúvi‑ó ɨɨn se̱ꞌya re̱ꞌ, jee ni̱ꞌi̱nꞌ‑ó ta̱ꞌvi̱ꞌ táji Ndiosíꞌ jie̱ꞌe̱ꞌ Cristo.

Nániꞌvɨꞌ iniꞌ Pablo jie̱ꞌe̱ꞌ rá ñɨvɨ ya̱ kúneí iniꞌ ráa Jesús ya̱ nééꞌ ráa ñuunꞌ Galacia

⁸ Soo ne̱ ntiáꞌan kuni rán iniꞌ Ndiosíꞌ, nneñu̱ꞌun rán na̱ni kúvi ya̱ ntu kúvi ndiosíꞌ nijia. Jee sátíñú ka̱ꞌá rán nu̱u̱nꞌ ráa kuéntáꞌ ɨɨn musúꞌ kéꞌen ñɨvɨ.

⁹ Soo vitan re ya̱ ma̱ni̱ꞌ rán jín Ndiosíꞌ. Soo va̱ꞌa ka̱ꞌ kachiꞌ‑ó ya̱ ma̱ni̱ꞌ Ndiosíꞌ jín ránoꞌó. ¿Na̱ja kúvi ya̱ nikó rán rá ñujiínꞌ saɨn sáꞌá ñɨvɨ ñɨ̱vɨ́, ya̱ ntu íyótiñu rúja? Jee, ¿na̱ja kúvi ya̱ kuíni rán ki̱vɨ tuku rán chi̱ji xi̱ntíín ráa, sáva kuvi tuku rán ɨɨn musúꞌ ya̱ sátíñú ka̱ꞌá rán nu̱u̱nꞌ ráa rúja?

¹⁰ Néñu̱ꞌun rán rá viko sáꞌá rá ñɨvɨ Israel. Néñu̱ꞌun rán rá ki̱vɨ̱ꞌ ñáꞌnú kuéntáꞌ yɨ́táꞌán sáꞌá ráa, néñu̱ꞌun rán viko sáꞌá ráa sáá nákuneeꞌ yo̱o̱ꞌ, jín rá viko nánu kui̱ya̱ꞌ sáꞌá ráa ta kui̱ya̱ꞌ, jín rá kui̱ya̱ꞌ ya̱ néñu̱ꞌun ráa.

¹¹ Yúꞌví ni̱ꞌ ya̱ sa̱naanꞌ re̱ꞌ nsa̱tíñú ka̱ꞌá ni̱ꞌ ya̱ nxi̱néꞌénꞌ ni̱ꞌ tu̱ꞌun Jesús nu̱u̱nꞌ rán.

¹² Jíkánꞌ táꞌvíꞌ ni̱ꞌ nu̱u̱nꞌ ránoꞌó ñaniꞌ, ya̱ koo rán kuéntáꞌ maáníꞌ ya̱ nxi̱nóo ni̱ꞌ rá costumbre ley Moisés. Chi maáníꞌ nkenta kúvi ni̱ꞌ kuéntáꞌ ránoꞌó ya̱ ntu yɨ́ꞌɨ́ rán chi̱ji ley. Ntu̱náꞌ nsáꞌá kini rán nuꞌuꞌ.

¹³ Jee jíníꞌ va̱ꞌa rán, ya̱ jie̱ꞌe̱ꞌ ya̱ nkuꞌviꞌ ni̱ꞌ vá nkino̱o ni̱ꞌ ñuunꞌ rán nste̱kútu̱ꞌún ni̱ꞌ tu̱ꞌun va̱ꞌa Jesús nu̱u̱nꞌ rán ya̱ xíꞌnañúꞌún ka̱ꞌ.

¹⁴ Jee súnika̱ꞌ nnoꞌo rán jie̱ꞌe̱ꞌ ya̱ nkuꞌviꞌ ni̱ꞌ, ntu nkúníichiꞌ iniꞌ rán nne̱ꞌyá rán nuꞌuꞌ, jee ni ntu nkúíchi iniꞌ rán nuꞌuꞌ. Chi nna̱kuatáꞌví rán nuꞌuꞌ, kuéntáꞌ kúvi ni̱ꞌ ɨɨn najiáꞌáꞌ Ndiosíꞌ va̱ji ne̱ súkún, áxí kuéntáꞌ kúvi ni̱ꞌ Cristo Jesús.

¹⁵ ¿Né nu̱u̱nꞌ kua̱ꞌa̱nꞌ ya̱ kúsɨ́ɨꞌ iniꞌ rán nékúvi? Náꞌán va̱ꞌa ni̱ꞌ jee káchíꞌ na̱a̱ꞌ ni̱ꞌ maa, ya̱ nna̱niꞌvɨꞌ iniꞌ rán jie̱ꞌe̱ꞌ ni̱ꞌ ya̱ ne̱ tavaꞌ rán nchinúún rán jee taji rán maa nu̱u̱nꞌ ni̱ꞌ nékúvi, sa̱naanꞌ re̱ꞌ chineí‑i nuꞌuꞌ.

¹⁶ ¿Á kénta ni̱ꞌ si̱kɨ̱ꞌ rán ya̱ káchíꞌ ni̱ꞌ ya̱ naáꞌ nu̱u̱nꞌ rán rúja? Soo ntu̱ví.

¹⁷ Rá te̱e káꞌánꞌ sɨ́ɨ́n, ñúꞌún kuíñɨ́ iniꞌ ráa koo ma̱ni̱ꞌ ráa jín rán. Soo nsáꞌ jiáni va̱ꞌa iniꞌ ráa saꞌá ráa jín rán. Chi kuíni ráa saꞌá sɨ́ɨ́n ráa ránoꞌó nu̱u̱nꞌ ránꞌ, sáva kuꞌun kuíñɨ́ iniꞌ rán koo ma̱ni̱ꞌ rán jín ráa.

¹⁸ Soo sukuáni íyó va̱ꞌa kukuíñɨ́ iniꞌ‑i jie̱ꞌe̱ꞌ tiñu váꞌa. Nsú kua̱chi sáá íñɨ́ ni̱ꞌ nteñu rán.

¹⁹ Ránoꞌó se̱ꞌya maáníꞌ. Nóꞌo ni̱ꞌ kuéntáꞌ téꞌnéꞌ iniꞌ ɨɨn ñaꞌan káku se̱ꞌya, chi nóꞌo ni̱ꞌ suꞌva ne̱kua̱ꞌ sama iniꞌ rán ne̱ nuún koo iniꞌ ánímaꞌ rán jín Cristo.

²⁰ Kuíni ni̱ꞌ kuneeꞌ ni̱ꞌ jín rán ntañúꞌún, sáva sama ni̱ꞌ sáá káꞌánꞌ ni̱ꞌ jín rán. Chi kúnaan ni̱ꞌ na̱ja kani iniꞌ ni̱ꞌ jie̱ꞌe̱ꞌ rán.

Tu̱ꞌun jie̱ꞌe̱ꞌ Agar jín Sara

²¹ Suvirán ya̱ kuíni rán kɨꞌɨ rán xi̱ntíín tu̱ꞌun nta̱túníꞌ Ndiosíꞌ nu̱u̱nꞌ Moisés, jee kachiꞌ rán nu̱u̱nꞌ ni̱ꞌ: ¿Á ntu ntɨɨn kuéntáꞌ rán ya̱ káchíꞌ tu̱ꞌun vá nta̱túníꞌ Ndiosíꞌ, rúsa?

²² Káchíꞌ tu̱ꞌun vá ya̱ nééꞌ nu̱u̱nꞌ Tutuꞌ, ya̱ ni̱yo u̱vi̱ꞌ se̱ꞌya yɨ́ɨ́ Abraham. Ɨɨn ráa kúvi se̱ꞌya re̱ꞌ jín ñaꞌan kúvi musúꞌ re̱ꞌ ya̱ nkeꞌen re̱ꞌ. Jee inka kúvi se̱ꞌya re̱ꞌ jín ñasɨ́ꞌɨ́ maáréꞌ, ya̱ ntu kúvi ña musúꞌ.

²³ Se̱ꞌya ñaꞌan kúvi musúꞌ nkaku re̱ꞌ kuéntáꞌ káku néni ɨɨn rá su̱chí kuáchí. Soo se̱ꞌya ñaꞌan ntu kúvi musúꞌ nkaku re̱ꞌ chi nsi̱kúnkuvi Ndiosíꞌ ya̱ nchi̱sóyuꞌú re̱ꞌ.

²⁴ Nakani ni̱ꞌ ɨɨn tu̱ꞌun ya̱ kúnkunuún káꞌánꞌ ni̱ꞌ jie̱ꞌe̱ꞌ rá u̱vi̱ꞌ ñaꞌan yaꞌá. Núvíꞌ rá ñaꞌan kúvi ráa kuéntáꞌ u̱vi̱ꞌ tratúꞌ nsa̱ꞌá Ndiosíꞌ. Ɨɨn ñaꞌan naní Agar kúvi ña musúꞌ nkeꞌen ñɨvɨ ya̱ nyɨ̱ꞌɨ ña xi̱ntíín Abraham, jee kúvi ña kuéntáꞌ tratúꞌ ya̱ kúvi tu̱ꞌun ley nta̱túníꞌ Ndiosíꞌ ya̱ njia̱ꞌa re̱ꞌ nu̱u̱nꞌ Moisés nu̱u̱nꞌ yuku Sinaí. Rá ñɨvɨ yɨ́ꞌɨ́ xi̱ntíín tratúꞌ vá kúvi ráa musúꞌ sátíñú saɨn ya̱ yɨ́ꞌɨ́ ráa xi̱ntíín tu̱ꞌun ley vá kuéntáꞌ se̱ꞌya ña nkuvi musúꞌ nkeꞌen ñɨvɨ.

²⁵ Chi Agar kúvi kuéntáꞌ yuku Sinaí ya̱ íñɨ́ nu̱u̱nꞌ ñuꞌun Arabia. Jee suni kúvi ña kuéntáꞌ ñuunꞌ Jerusalén ya̱ íyó‑o vitan. Chi rá se̱ꞌya ñuunꞌ vá kúvi ráa musúꞌ sátíñú saɨn ya̱ yɨ́ꞌɨ́ ráa chi̱ji xi̱ntíín tu̱ꞌun ley vá ya̱ nta̱túníꞌ Ndiosíꞌ.

²⁶ Soo ñuunꞌ Jerusalén íyó súkún, ñuunꞌ íñɨ́ núne ví‑i kuéntáꞌ ñasɨ́ꞌɨ́ Abraham ya̱ ntu kúvi ña musúꞌ ya̱ ntu kéꞌen ñɨvɨ. Jee kúvi‑ó se̱ꞌya ñuunꞌ vá, kuéntáꞌ náánꞌ‑ó kúvi‑i.

²⁷ Chi káchíꞌ Tu̱ꞌun Ndiosíꞌ nééꞌ nu̱u̱nꞌ Tutuꞌ: Kusɨ̱ɨ̱ꞌ iniꞌ nú, ñaꞌan númáꞌ ya̱ ntu íyó se̱ꞌya nú. Kanajíín ya̱ kúsɨ́ɨꞌ iniꞌ nú, suvinú ya̱ ntu jíníꞌ nú ya̱ téꞌnéꞌ iniꞌ. Chi koo kue̱ꞌe̱ꞌ ka̱ꞌ se̱ꞌya ñaꞌan nkino̱o nsa̱ꞌá yɨɨ́ ña, nsú káꞌ ñaꞌan íyó yɨɨ́. Nkachiꞌ Tu̱ꞌun Ndiosíꞌ jie̱ꞌe̱ꞌ Jerusalén.

²⁸ Ránoꞌó ñaniꞌ, kúvi‑ó se̱ꞌya Ndiosíꞌ sáni nchi̱sóyuꞌú re̱ꞌ nu̱u̱nꞌ‑ó, kuéntáꞌ nchi̱sóyuꞌú re̱ꞌ ya̱ kaku Isaac.

²⁹ Soo se̱ꞌya Abraham, naní Ismael, ya̱ nkaku re̱ꞌ kuéntáꞌ káku néni ɨɨn rá su̱chí kuáchí, jee nito u̱ꞌvi̱ꞌ Ismael inka se̱ꞌya Abraham, ya̱ naní Isaac, ya̱ nkaku nsa̱ꞌá Ta̱chi̱ꞌ Ííꞌ Ndiosíꞌ. Jee suni sukuán íyó ne̱ vitan, [chi íyó i̱i̱ꞌ ñɨvɨ jíto u̱ꞌvi̱ꞌ ráa yó ya̱ kúvi‑ó se̱ꞌya Ndiosíꞌ].

³⁰ Soo ¿ná káchíꞌ nu̱u̱nꞌ Tutuꞌ Ííꞌ níso Tu̱ꞌun Ndiosíꞌ? Káchíꞌ‑i: “¡Tavaꞌ musúꞌ nkeꞌen kɨ̱ꞌɨ̱nꞌ ña jín se̱ꞌya ña!, chi ntu̱ví ná íyó ni̱ꞌi̱nꞌ se̱ꞌya musúꞌ nkeꞌen vá ta̱ꞌvi̱ꞌ ya̱ ni̱ꞌi̱nꞌ se̱ꞌya ñasɨ́ꞌɨ́ Abraham, ya̱ ntu kúvi ña musúꞌ”, nkachiꞌ Tu̱ꞌun Ndiosíꞌ.

³¹ Saáva ránoꞌó ñaniꞌ, ntu kúvi‑ó kuéntáꞌ se̱ꞌya musúꞌ, chi kúvi‑ó kuéntáꞌ se̱ꞌya ñasɨ́ꞌɨ́ Abraham, ya̱ ntu kúvi ña musúꞌ.