Gálatas 2 - Mixteco del suroeste de Tlaxiaco Oaxaca

Rá inka te̱e níso tiñu Apóstol chúichí Ndiosíꞌ, ntɨɨn kuéntáꞌ ráa tiñu níso Pablo

¹ I̱ña̱jée njia̱ꞌa u̱xi̱ꞌ ku̱mi̱ꞌ (14) kui̱ya̱ꞌ, jee ña̱ꞌa̱nꞌ tuku ni̱ꞌ ñuunꞌ Jerusalén jín Bernabé. Jee nku̱táꞌán Tito jín ránꞌ.

² Jee ña̱ꞌa̱nꞌ ni̱ꞌ yukuán sáni nstúvi Ndiosíꞌ nu̱u̱nꞌ ni̱ꞌ ya̱ íyó kɨ̱ꞌɨ̱nꞌ ni̱ꞌ yukuán. Jee nnu̱tútú sɨ́ɨ́n ni̱ꞌ jín rá te̱e kúñáꞌnú nu̱u̱nꞌ rá ñɨvɨ ya̱ kúneí iniꞌ ráa Jesús. Jee nna̱kani ni̱ꞌ nu̱u̱nꞌ ráa tu̱ꞌun váꞌa Jesús ya̱ stékútu̱ꞌún ni̱ꞌ nu̱u̱nꞌ rá ñɨvɨ rá inka nación. Nsa̱ꞌá ni̱ꞌ yaꞌá sáva tɨɨn kuéntáꞌ ráa ya̱ íyó na̱a̱ꞌ tiñu sáꞌá ni̱ꞌ sáva nku̱íchi iniꞌ ráa tiñu vá, sáva ntu nsáꞌá ka̱ꞌá ni̱ꞌ tiñu nsa̱ꞌá ni̱ꞌ yanaꞌán jín ya̱ sáꞌá ni̱ꞌ ntañúꞌún.

³ Yukuán nneeꞌ Tito jín ránꞌ. Jee sú kúvi re̱ꞌ te̱e ichiyúkúnꞌ se̱ꞌya ñuunꞌ Grecia, ya̱ ntu kúvi re̱ꞌ te̱e ñuunꞌ Israel, soo ntu ntétuvi ráa saꞌá re̱ꞌ costumbre rá ñɨvɨ Israel, na̱ni circuncisión.

⁴ Nku̱tútú sɨ́ɨ́n ránꞌ suꞌva, chi nki̱vɨ te̱e káꞌvi ni ya̱ káchíꞌ ráa nika̱ꞌ ya̱ kúvi ráa ñaniꞌ‑ó. Nki̱vɨ yuꞌuꞌ ráa nteñu‑ó, sáva kune̱ꞌyá yuꞌuꞌ ráa jie̱ꞌe̱ꞌ ya̱ íñɨ́ núne‑ó nu̱u̱nꞌ ñujiínꞌ sáꞌá rá ñɨvɨ Israel, chi yɨ́ꞌɨ́‑ó nu̱u̱nꞌ Cristo Jesús. Sáꞌá ráa suꞌva sáva nanukú ráa ya̱ sikúnkuvi‑ó ñujiínꞌ vá jee nuvi tuku‑ó musúꞌ ya̱ kɨꞌɨ‑ó chi̱ji xi̱ntíín ñujiínꞌ vá.

⁵ Nintíꞌínꞌ ntu njiáꞌa ránꞌ koo suꞌva ya̱ kuíni ráa, sáva kino̱o ya̱ naáꞌ tu̱ꞌun va̱ꞌa Jesús jín rán.

⁶ Rá te̱e kúñáꞌnú nu̱u̱nꞌ rá ñɨvɨ ya̱ kúneí iniꞌ ráa Jesús. (Rá ñɨvɨ káchíꞌ ya̱ kúñáꞌnú rá te̱e vá, soo ntu̱náꞌ ítú iniꞌ ni̱ꞌ jie̱ꞌe̱ꞌ ya̱ kúñáꞌnú ráa áxí ntu̱ví. Ndiosíꞌ ntu sáꞌá kuéntáꞌ jie̱ꞌe̱ꞌ vá, chi ɨɨn ni kúvi ráa nu̱u̱nꞌ re̱ꞌ.) Soo rá te̱e kúñáꞌnú vá ntu nta̱túníꞌ ráa ya̱ sama ni̱ꞌ tu̱ꞌun stékútu̱ꞌún ni̱ꞌ.

⁷ Chisaꞌ nsa̱ꞌá ráa kuéntáꞌ ya̱ nte̱tíñú Ndiosíꞌ nuꞌuꞌ ya̱ stekútu̱ꞌún ni̱ꞌ tu̱ꞌun váꞌa Jesús nu̱u̱nꞌ rá se̱ꞌya inka nación, ya̱ ntu sáꞌá circuncidar ráa, kuéntáꞌ nte̱tíñú re̱ꞌ Pedro ya̱ stekútu̱ꞌún‑u tu̱ꞌun vá nu̱u̱nꞌ rá ñɨvɨ ya̱ kúvi ichiyúkúnꞌ Israel, ya̱ sáꞌá circuncidar ráa.

⁸ Chi maá Ndiosíꞌ chíneí chítuvi re̱ꞌ Pedro sáva kunisotíñú‑u ya̱ kúvi‑i apóstol ya̱ stekútu̱ꞌún‑u tu̱ꞌun váꞌa Jesús nu̱u̱nꞌ rá ñɨvɨ ya̱ kúvi ichiyúkúnꞌ ñuunꞌ Israel. Jee suni sukuán chíneí chítuvi re̱ꞌ nuꞌuꞌ, sáva kuniso ni̱ꞌ tiñu apóstol ya̱ stekútu̱ꞌún ni̱ꞌ nu̱u̱nꞌ rá ñɨvɨ rá inka nación.

⁹ Jee jíníꞌ rá ñɨvɨ ya̱ Jacobo, Pedro, jín Juan ví rá te̱e kúñáꞌnú nu̱u̱nꞌ rá ñɨvɨ ya̱ kúneí iniꞌ ráa Jesús. Jee ni núníꞌ ráa nsa̱ꞌá kuéntáꞌ ya̱ ntaji Ndiosíꞌ tiñu vá nu̱u̱nꞌ ni̱ꞌ jee chíneí chítuvi re̱ꞌ nuꞌuꞌ. Jee ntɨɨn ráa naꞌá ni̱ꞌ jín Bernabé, jie̱ꞌe̱ꞌ nkuva̱ꞌa iniꞌ ráa nne̱ꞌyá ráa ránuꞌuꞌ. Nsa̱ꞌá ráa suꞌva sáva stúvi ráa ya̱ kúnuún iniꞌ nta̱ká ránꞌ ya̱ kɨ̱satíñú ni̱ꞌ jín Bernabé nteñu rá ñɨvɨ inka nación, jee kɨ̱satíñú ráa nteñu rá ñɨvɨ ya̱ kúvi ichiyúkúnꞌ Israel.

¹⁰ Kua̱chi kuitɨꞌ ni̱ka̱nꞌ ráa ya̱ koto va̱ꞌa ránꞌ rá ñɨvɨ láꞌví. Jee tiñu vá níꞌvɨ́ꞌ iniꞌ ni̱ꞌ saꞌá ni̱ꞌ.

Nnu̱xeenꞌ Pablo nu̱u̱nꞌ Pedro

¹¹ Soo sáá nkenta Pedro ñuunꞌ Antioquía, jee nnuni̱ꞌin máá maáníꞌ nu̱u̱nꞌ re̱ꞌ, chi nstívɨ́ re̱ꞌ tiñu nsa̱ꞌá re̱ꞌ.

¹² Jee yukuán nkenta te̱e káꞌvi ni ya̱ nta̱jí Jacobo. Jee ne̱ ntiáꞌan kenta ráa, nyajiꞌ Pedro jín rá ñaniꞌ rá inka nación ya̱ ntu kúvi ráa ñɨvɨ Israel. Soo sáá nkenta rá te̱e vá, jee nxi̱nóo re̱ꞌ rá ñɨvɨ inka nación jee nku̱sɨ́ɨ́n re̱ꞌ, chi yúꞌví re̱ꞌ rá te̱e ya̱ káchíꞌ ya̱ íyó sikúnkuvi‑ó rá costumbre rá ñɨvɨ Israel ya̱ sáꞌá circuncidar ya̱ níso seña nu̱u̱nꞌ yɨkɨkúñu rá te̱e ya̱ stúvi‑i ya̱ kúvi ráa ñɨvɨ Ndiosíꞌ.

¹³ Jee rá inka ñɨvɨ Israel ya̱ yɨ́ꞌɨ́ grupo yukuán, jee suni sansuꞌva nsa̱ꞌá ráa jín re̱ꞌ, sáni nku̱sɨ́ɨ́n re̱ꞌ. Jee ne̱ Bernabé nsi̱kúvi iniꞌ re̱ꞌ ya̱ kutáꞌán re̱ꞌ saꞌá re̱ꞌ sansuꞌva jín ráa.

¹⁴ Soo sáá niniꞌ ni̱ꞌ ya̱ ntu jiáꞌnu na̱a̱ꞌ ráa sáni káchíꞌ ya̱ naáꞌ tu̱ꞌun váꞌa Jesús, jee nkachiꞌ ni̱ꞌ nu̱u̱nꞌ Pedro ichinúúnꞌ nɨꞌɨ ráa: “Noꞌó ví te̱e Israel, jee nu̱u̱nꞌ jiáꞌnu nú kuéntáꞌ te̱e rá inka nación, jee nu̱u̱nꞌ nsáꞌ jiáꞌnu nú kuéntáꞌ te̱e Israel, ¿na̱ja kúvi tetuvi nú rá ñɨvɨ rá inka nación sikúnkuvi ráa rá ñujiínꞌ rá ñɨvɨ ichiyúkúnꞌ Israel?”

Rá ñɨvɨ ichiyúkúnꞌ Israel jín rá inka ñɨvɨ, jee ɨɨn nuún ni nanitáꞌvíꞌ ráa retú kúneí iniꞌ ráa Jesús

¹⁵ Ránuꞌuꞌ ví ichiyúkúnꞌ Israel ne̱ nkaku ráníꞌ, jee nsú ñɨvɨ inka nación kúvi ránꞌ ya̱ káchíꞌ ránꞌ ya̱ ñɨvɨ kua̱chi kúvi ráa.

¹⁶ Jee jíníꞌ‑ó ya̱ ntu kénta kino̱o na̱a̱ꞌ ɨɨn ñɨvɨ nu̱u̱nꞌ Ndiosíꞌ jie̱ꞌe̱ꞌ ya̱ núkú‑u ya̱ saꞌá‑a ya̱ káchíꞌ tu̱ꞌun ley nta̱túníꞌ Ndiosíꞌ, ya̱ njiáꞌa re̱ꞌ nu̱u̱nꞌ Moisés yanaꞌán. Chisaꞌ sííyo re̱ꞌ kua̱chi si̱kɨ̱ꞌ ñɨvɨ sáva ku̱ꞌvayuꞌú re̱ꞌ ya̱ kino̱o na̱a̱ꞌ‑a nu̱u̱nꞌ re̱ꞌ chi kúneí iniꞌ ñɨvɨ vá Jesús ya̱ kúvi Cristo. I̱ña̱jée nku̱neí iniꞌ‑ó Jesucristo, sáva siíyo Ndiosíꞌ kua̱chi‑ó, chi kúneí iniꞌ‑ó Cristo, jee nsú jie̱ꞌe̱ꞌ ya̱ núkú‑ó saꞌá‑ó ya̱ káchíꞌ ley vá. Chi ni ɨɨn ñɨvɨ ntu kínóo na̱a̱ꞌ nu̱u̱nꞌ Ndiosíꞌ jie̱ꞌe̱ꞌ ya̱ núkú‑u saꞌá‑a ya̱ káchíꞌ ley vá.

¹⁷ Soo nu̱u̱nꞌ nánukú‑ó ya̱ sííyo Ndiosíꞌ kua̱chi‑ó jie̱ꞌe̱ꞌ yɨ́ꞌɨ́‑ó nu̱u̱nꞌ Cristo, jee ré níní nákuniꞌ‑ó ya̱ suni kúvi‑ó ñɨvɨ kua̱chi nu̱u̱nꞌ Ndiosíꞌ, sáni xínéꞌénꞌ ley Moisés nu̱u̱nꞌ‑ó, ¿á sáꞌá Cristo ya̱ kívɨ‑ó nu̱u̱nꞌ kua̱chi? Ntu̱né kúvi suꞌva.

¹⁸ Chi ré nakɨ̱ꞌɨ tuku ni̱ꞌ nu̱u̱nꞌ ley vá, ya̱ ya nxi̱nóo ni̱ꞌ maa, jee tee ni̱ꞌ kua̱chi si̱kɨ̱ꞌ ni̱ꞌ ya̱ njiáꞌa ni̱ꞌ nu̱u̱nꞌ ley vá.

¹⁹ Chi jie̱ꞌe̱ꞌ maá ley vá káchíꞌ ya̱ íyó kuviꞌ ni̱ꞌ jie̱ꞌe̱ꞌ ya̱ njiáꞌa ni̱ꞌ nu̱u̱nꞌ ley vá, jee suꞌva nsa̱ꞌá‑a ya̱ níꞌiꞌ ni̱ꞌ nu̱u̱nꞌ ley vá, sáva kutekuꞌ ni̱ꞌ jín Ndiosíꞌ jee kueꞌnu ni̱ꞌ ichi re̱ꞌ.

²⁰ Taꞌanꞌ ni̱ꞌ níꞌiꞌ ni̱ꞌ nu̱u̱nꞌ kurúsiꞌ jín Cristo. Saáva nsú káꞌ nuꞌuꞌ ví ya̱ tékúꞌ, chi maá Cristo ví ya̱ tékúꞌ iniꞌ ni̱ꞌ. Jee ni tékúꞌ ni̱ꞌ iniꞌ yɨkɨkúñu ni̱ꞌ yaꞌá, jee jiáꞌnu ni̱ꞌ ichi jie̱ꞌe̱ꞌ kúneí iniꞌ ni̱ꞌ Se̱ꞌya Ndiosíꞌ. Chi Cristo ví ya̱ ñúnúunꞌ re̱ꞌ nuꞌuꞌ jee nna̱sokoꞌ re̱ꞌ maáréꞌ ya̱ níꞌiꞌ re̱ꞌ jie̱ꞌe̱ꞌ ya̱ váꞌa kuvi ni̱ꞌ.

²¹ Ntu kújiááꞌ iniꞌ ni̱ꞌ ya̱ váꞌa ntaji Ndiosíꞌ nu̱u̱nꞌ‑ó ya̱ íyó mániꞌ iniꞌ re̱ꞌ néꞌyá re̱ꞌ yó ya̱ ntu íyó ni̱ꞌi̱nꞌ‑ó. Chi retú kino̱o na̱a̱ꞌ‑ó nu̱u̱nꞌ Ndiosíꞌ jee sííyo re̱ꞌ kua̱chi‑ó jie̱ꞌe̱ꞌ ya̱ núkú‑ó ya̱ saꞌá‑ó ya̱ káchíꞌ ley vá, sú ntu kúvi sukuán, soo retánꞌ sukuán, yukuán jee kuéntáꞌ ntu níyotiñu ya̱ ni̱ꞌi̱ꞌ Cristo jie̱ꞌe̱ꞌ‑ó, nékúvi.