Gálatas 1 - Mixteco del suroeste de Tlaxiaco Oaxaca

Saludo

¹ Maáníꞌ, Pablo tée ni̱ꞌ nu̱u̱nꞌ tutuꞌ yaꞌá. Níso ni̱ꞌ tiñu apóstol, ya̱ chúichí Ndiosíꞌ stekútu̱ꞌún ni̱ꞌ tu̱ꞌun re̱ꞌ. Nsú rá ñɨvɨ ví ya̱ nchu̱ichí nuꞌuꞌ ni ya̱ nsáꞌ ñani ñɨvɨ nuꞌuꞌ kunisotíñú ni̱ꞌ. Chi maá Jesús ya̱ kúvi Cristo jín Tátáꞌ‑ó ya̱ kúvi Ndiosíꞌ ñani ráa nuꞌuꞌ. Jee Ndiosíꞌ ví ya̱ nxi̱nátekuꞌ i̱i̱ꞌ re̱ꞌ Jesús nteñu rá níꞌiꞌ jee nxi̱nákóo re̱ꞌ yɨkɨkúñu‑u jee tékúꞌ‑u.

² Maáníꞌ jín nɨꞌɨ rá ñaniꞌ kúneí iniꞌ ráa Jesús ya̱ kútáꞌán jín ni̱ꞌ, tájí ránꞌ tutuꞌ yaꞌá nu̱u̱nꞌ ránoꞌó ñɨvɨ, ya̱ kúneí iniꞌ rán Jesús, ya̱ nééꞌ nu̱u̱nꞌ rá ñuunꞌ Galacia, ya̱ kútútú rán nu̱u̱nꞌ rá ñuunꞌ yukuán.

³ Ndiosíꞌ ví Tátáꞌ‑ó jee I̱toꞌoꞌ‑ó Jesús ví Cristo, [ya̱ kuíni kachiꞌ ya̱ ñani Ndiosíꞌ re̱ꞌ sáva tatúníꞌ re̱ꞌ nu̱u̱nꞌ rá ñɨvɨ íyó ñɨ̱vɨ́]. Ná ka̱ꞌ koo ma̱ni̱ꞌ iniꞌ ráa ka̱ꞌ kune̱ꞌyá ráa ránoꞌó jín ya̱ va̱ne̱ꞌ va̱ꞌa kuvi iniꞌ rán saꞌá ráa.

⁴ Nso̱ko̱ꞌ Jesús maáréꞌ ya̱ níꞌiꞌ re̱ꞌ jie̱ꞌe̱ꞌ kua̱chi‑ó, sáva sikáku re̱ꞌ yó, sáva ntu íyó kaka‑ó ichi tu̱ꞌun kánéꞌén, sáni sáꞌá rá ñɨvɨ nééꞌ ñɨ̱vɨ́ vitan ya̱ ntu yɨ́ꞌɨ́ ráa nu̱u̱nꞌ re̱ꞌ. Nsa̱ꞌá re̱ꞌ suꞌva sáni kuíni Tátáꞌ‑ó Ndiosíꞌ.

⁵ Nakuetúꞌún nta̱ká ñɨvɨ ya̱ viiꞌ kúñáꞌnú Ndiosíꞌ nɨ́ɨ́nkání. Suꞌva koo. Amén.

Ntu íyó inka tu̱ꞌun ya̱ síkáku ñɨvɨ

⁶ Tívɨ́ xíniꞌ ni̱ꞌ ya̱ xínóo ñamaꞌ víꞌí rán Ndiosíꞌ, ya̱ nkana re̱ꞌ ránoꞌó kɨꞌɨ rán chi̱ji naꞌá re̱ꞌ, jie̱ꞌe̱ꞌ íyó mániꞌ iniꞌ Cristo néꞌyá re̱ꞌ ránoꞌó, sú ntu íyó ni̱ꞌi̱nꞌ rán maa. Jee ntɨɨn rán inka tu̱ꞌun káꞌánꞌ sɨ́ɨ́n, ya̱ káchíꞌ ráa ya̱ kúvi tu̱ꞌun váꞌa, naní evangelio.

⁷ Soo ntu̱ví inka tu̱ꞌun váꞌa ya̱ síkáku‑u yó, naní evangelio. Chisaꞌ kua̱chi íyó ya̱ sava ñɨvɨ stáña̱ꞌán ránoꞌó, jee kuíni ráa sama ráa tu̱ꞌun váꞌa jie̱ꞌe̱ꞌ Cristo.

⁸ Retú maáránꞌ áxí retú ɨɨn najiáꞌáꞌ ííꞌ Ndiosíꞌ, va̱ji súkún stekútu̱ꞌún nu̱u̱nꞌ rán ɨɨn tu̱ꞌun ya̱ káꞌánꞌ sɨ́ɨ́n nu̱u̱nꞌ tu̱ꞌun váꞌa ya̱ ya nste̱kútu̱ꞌún ránꞌ nu̱u̱nꞌ rán, na̱ ka̱ꞌ xinóꞌo ka̱ꞌ Ndiosíꞌ maa nu̱u̱nꞌ ñúꞌúnꞌ xéénꞌ.

⁹ Ya̱ nkachiꞌ ni̱ꞌ maa xíꞌna, jee ntañúꞌún níkó tukuni káchíꞌ ni̱ꞌ maa. Retú néni ɨɨn stékútu̱ꞌún nu̱u̱nꞌ rán ɨɨn tu̱ꞌun ya̱ káꞌánꞌ sɨ́ɨ́n nu̱u̱nꞌ tu̱ꞌun váꞌa ya̱ ya ntɨɨn rán, na̱ ka̱ꞌ xinóꞌo ka̱ꞌ Ndiosíꞌ maa nu̱u̱nꞌ ñúꞌúnꞌ xéénꞌ.

¹⁰ Saájee, jín tu̱ꞌun káꞌánꞌ ni̱ꞌ yaꞌá, ¿á nánukú ni̱ꞌ ya̱ kino̱o va̱ꞌa ni̱ꞌ nu̱u̱nꞌ rá ñɨvɨ áxí nu̱u̱nꞌ Ndiosíꞌ? ¿Á nánukú ni̱ꞌ ya̱ kuva̱ꞌa iniꞌ rá ñɨvɨ kune̱ꞌyá ráa nuꞌuꞌ? ¡Ntu̱ví! Chi ré nánukú ni̱ꞌ ya̱ kuva̱ꞌa iniꞌ rá ñɨvɨ kune̱ꞌyá ráa nuꞌuꞌ, jee nsú musúꞌ jiátíñú Cristo kúvi ni̱ꞌ, nékúvi.

Na̱ja nkenta Pablo kúvi ɨɨn te̱e chúichí Ndiosíꞌ naní apóstol

¹¹ Ránoꞌó ñaniꞌ jín ku̱ꞌva, sáꞌá ni̱ꞌ ya̱ kúkáꞌnú iniꞌ rán, ya̱ tu̱ꞌun váꞌa ya̱ stékútu̱ꞌún ni̱ꞌ, nsú tu̱ꞌun ntaji ñɨvɨ ví‑i.

¹² Chi ntu nni̱ꞌi̱nꞌ ni̱ꞌ tu̱ꞌun vá nu̱u̱nꞌ ñɨvɨ. Ni ntu nxi̱néꞌénꞌ ráa maa nuꞌuꞌ. Soo nni̱ꞌi̱nꞌ ni̱ꞌ tu̱ꞌun vá chi Jesucristo nstúvi re̱ꞌ maa nu̱u̱nꞌ ni̱ꞌ.

¹³ Nteso̱ꞌo rán sáá na̱ja nsa̱ꞌá ni̱ꞌ sáá néñu̱ꞌun ni̱ꞌ Ndiosíꞌ sáni xínéꞌénꞌ rá ñɨvɨ Israel, ya̱ naní ñujiínꞌ Judaísmo. Jee nsa̱ꞌá kini nasɨ́kuitɨꞌ ni̱ꞌ rá ñɨvɨ kúneí iniꞌ ráa Jesús, jee xínáánꞌ ni̱ꞌ ráa.

¹⁴ Jee nkaa ni̱ꞌ ka̱ꞌ kúñáꞌnú ni̱ꞌ nu̱u̱nꞌ ñujiínꞌ Judaísmo, nsú káꞌ rá inka táꞌán ni̱ꞌ jiáꞌnu nkáá jín ni̱ꞌ. Nku̱káñá iniꞌ ni̱ꞌ nsi̱kúnkuvi ni̱ꞌ rá costumbre ya̱ nxi̱nóo rá jííꞌ yanaꞌán ni̱ꞌ nu̱u̱nꞌ ránꞌ.

¹⁵ Soo ne̱ sáá ñúꞌún chi̱ji nánáꞌ ni̱ꞌ nuꞌuꞌ jee nsa̱ꞌá sɨ́ɨ́n Ndiosíꞌ nuꞌuꞌ sáva kuniso ni̱ꞌ tiñu táji re̱ꞌ. Jee nkana re̱ꞌ nuꞌuꞌ, chi ni̱yo ma̱ni̱ꞌ iniꞌ re̱ꞌ nne̱ꞌyá re̱ꞌ nuꞌuꞌ, ya̱ ntu íyó ni̱ꞌi̱nꞌ ni̱ꞌ. Jee tiempúꞌ nkuini re̱ꞌ jee

¹⁶ stúvi re̱ꞌ Se̱ꞌya re̱ꞌ nu̱u̱nꞌ ni̱ꞌ, sáva stekútu̱ꞌún ni̱ꞌ jie̱ꞌe̱ꞌ vá nu̱u̱nꞌ rá ñɨvɨ ntu kúvi Israel. Sáá nsa̱ꞌá re̱ꞌ suꞌva, jee ntu kuísá níkátu̱ꞌún ni̱ꞌ inka ñɨvɨ jie̱ꞌe̱ꞌ tu̱ꞌun vá.

¹⁷ Ni ntu ñáꞌánꞌ nne̱ꞌyá ni̱ꞌ rá te̱e ñuunꞌ Jerusalén ya̱ níso ráa tiñu apóstol ne̱ ntiáꞌan kuniso ni̱ꞌ tiñu vá. Soo ña̱ꞌa̱nꞌ ni̱ꞌ Arabia. Jee nni̱kó tuku ni̱ꞌ ñuunꞌ Damasco.

¹⁸ Saájee njia̱ꞌa u̱ni̱ꞌ kui̱ya̱ꞌ, jee ña̱ꞌa̱nꞌ ni̱ꞌ ñuunꞌ Jerusalén nne̱ꞌyá ni̱ꞌ Pedro. Saájee nkino̱o ni̱ꞌ xa̱ꞌu̱nꞌ (15) ki̱vɨ̱ꞌ yukuán jín re̱ꞌ.

¹⁹ Soo ntu níníꞌ ni̱ꞌ ni ɨɨn rá inka te̱e níso ráa tiñu apóstol. Kua̱chi Jacobo niniꞌ ni̱ꞌ ya̱ kúvi re̱ꞌ ñaniꞌ I̱toꞌoꞌ‑ó Jesús.

²⁰ Tɨɨn kuéntáꞌ rán, ya̱ jíníꞌ Ndiosíꞌ ya̱ ntu kátúꞌún ni̱ꞌ jín tu̱ꞌun tée ni̱ꞌ nu̱u̱nꞌ rán.

²¹ Jee kuíre ña̱ꞌa̱nꞌ ni̱ꞌ rá ñuunꞌ Siria jín Cilicia.

²² Jee rá ñɨvɨ ya̱ kúneí iniꞌ ráa Cristo, ya̱ nééꞌ ráa rá ñuunꞌ Judea, ntiáꞌan kuniꞌ ráa nuꞌuꞌ.

²³ Kua̱chi nteso̱ꞌo ráa ya̱: “Te̱e ya̱ nito u̱ꞌvi̱ꞌ yó xíꞌna, jee ntañúꞌún stékútu̱ꞌún re̱ꞌ tu̱ꞌun Jesús ya̱ kúneí iniꞌ‑ó. Jee nnu̱kú re̱ꞌ xináánꞌ re̱ꞌ tu̱ꞌun vá nékúvi.”

²⁴ Jee nákuetúꞌún ráa Ndiosíꞌ jie̱ꞌe̱ꞌ ya̱ nsa̱ꞌá‑a jín ni̱ꞌ.