Filipenses 1 - Mixteco del suroeste de Tlaxiaco Oaxaca

Ntee Pablo nu̱u̱nꞌ tutuꞌ kua̱ꞌa̱nꞌ nu̱u̱nꞌ rá ñɨvɨ kúneí iniꞌ ráa Jesús ya̱ nééꞌ ráa ñuunꞌ Filipos

¹ Maáníꞌ Pablo jín Timoteo, kúvi ránꞌ musúꞌ Cristo Jesús. Tée ránꞌ tutuꞌ yaꞌá nu̱u̱nꞌ nta̱ká ránoꞌó, ya̱ nsa̱ꞌá sɨ́ɨ́n Ndiosíꞌ ránoꞌó, sáva kɨꞌɨ rán nu̱u̱nꞌ Cristo Jesús, ya̱ nééꞌ rán ñuunꞌ Filipos, jín nu̱u̱nꞌ rá te̱e kúñáꞌnú nu̱u̱nꞌ rán, jín nu̱u̱nꞌ rá ñaniꞌ rán ya̱ chíneí ráa ránoꞌó.

² Na̱ ka̱ꞌ koo ma̱ni̱ꞌ iniꞌ Tátáꞌ‑ó Ndiosíꞌ jín I̱toꞌoꞌ‑ó Jesús ya̱ níso re̱ꞌ tiñu Cristo kune̱ꞌyá ráa ránoꞌó, jín ya̱ kuneeꞌ va̱ꞌa rán saꞌá ráa.

Nkaꞌanꞌ Pablo jín Ndiosíꞌ jie̱ꞌe̱ꞌ rá ñɨvɨ ínúꞌ iniꞌ Jesús

³ Jiáꞌa ni̱ꞌ ya̱ kútaꞌviꞌ nu̱u̱nꞌ Ndiosíꞌ ni̱ꞌ jie̱ꞌe̱ꞌ rán, nta̱ká íchí ya̱ nákúꞌun iniꞌ ni̱ꞌ ránoꞌó.

⁴ Jee nta̱ká íchí káꞌánꞌ ni̱ꞌ jín re̱ꞌ jie̱ꞌe̱ꞌ nta̱ká rán, jee sukuáni sɨ̱ɨ̱ꞌ íyó iniꞌ ánímaꞌ ni̱ꞌ jíkánꞌ táꞌvíꞌ ni̱ꞌ jie̱ꞌe̱ꞌ ránoꞌó.

⁵ Chi chíneí táꞌán rán jín ni̱ꞌ síkúténuun‑ó tu̱ꞌun váꞌa Jesús, ne̱ ki̱vɨ̱ꞌ xíꞌnañúꞌún ya̱ nínuꞌ iniꞌ rán maa jín ne̱ ki̱vɨ̱ꞌ vitan.

⁶ Suni jiáꞌa ni̱ꞌ ya̱ kútaꞌviꞌ jie̱ꞌe̱ꞌ rán, chi ne̱ yuchí kúkáꞌnú nijia iniꞌ ni̱ꞌ ya̱ Ndiosíꞌ ya̱ nka̱jiéꞌé nsa̱ꞌá re̱ꞌ tiñu váꞌa iniꞌ rán, jee chuchítú re̱ꞌ íchí kunikɨnꞌ re̱ꞌ sikúnkuvi re̱ꞌ tiñu váꞌa vá ne̱ ki̱vɨ̱ꞌ niji Cristo Jesús.

⁷ Na̱a̱ꞌ vá jiáni iniꞌ ni̱ꞌ suꞌva jie̱ꞌe̱ꞌ nta̱ká rán, chi ñúꞌún víꞌí iniꞌ ni̱ꞌ néꞌyá ni̱ꞌ ránoꞌó, chi íyó mániꞌ iniꞌ Ndiosíꞌ néꞌyá re̱ꞌ nta̱ká‑órán, ya̱ chíneí chituvi re̱ꞌ yó, sáva chíneí táꞌán nta̱ká rán jín ni̱ꞌ, sáá núꞌníꞌ ni̱ꞌ iniꞌ veka̱a, jín sáá náma ni̱ꞌ tu̱ꞌun va̱ꞌa Jesús, jín sáá sánáaꞌ ni̱ꞌ ya̱ na̱a̱ꞌ ví tu̱ꞌun vá.

⁸ Chi jíníꞌ Ndiosíꞌ, ya̱ ñúnúunꞌ ni̱ꞌ nta̱ká ránoꞌó sáni ñúnúunꞌ Cristo Jesús yó.

⁹ Jee jíkánꞌ táꞌvíꞌ ni̱ꞌ nu̱u̱nꞌ Ndiosíꞌ, ya̱ saꞌ víꞌí káꞌ sáá kunu̱u̱nꞌ víꞌí rán ka̱ꞌ ñɨvɨ jín Ndiosíꞌ, jín ya̱ kujia víꞌí iniꞌ rán ka̱ꞌ, sáva kuniꞌ rán ka̱ꞌ tu̱ꞌun nááꞌ Ndiosíꞌ, jín sáva kuníchí xi̱ni̱ꞌ rán ka̱ꞌ jie̱ꞌe̱ꞌ ichi re̱ꞌ.

¹⁰ Sáva kototúníꞌ rán rá ichi íyó sɨ́ɨ́n jee ka̱ji rán ya̱ va̱ꞌa ka̱ꞌ kunikɨnꞌ rán, sáva saɨn koo iniꞌ rán nu̱u̱nꞌ Ndiosíꞌ, jee ni ɨɨn nkúvi chikua̱chi‑i ránoꞌó ki̱vɨ̱ꞌ niji Cristo.

¹¹ Chi jiáꞌnu na̱a̱ꞌ víꞌí rán sáꞌá Jesús ya̱ kúvi re̱ꞌ Cristo, chi kínóo na̱a̱ꞌ rán nu̱u̱nꞌ re̱ꞌ sáꞌá re̱ꞌ, jee suꞌva stúvi re̱ꞌ ya̱ viiꞌ nasɨ́kuitɨꞌ kúñáꞌnú Ndiosíꞌ jee nakuetúꞌún ñɨvɨ maa.

Nu̱u̱nꞌ nuꞌuꞌ, ya̱ tékúꞌ ni̱ꞌ kúvi ya̱ jiátíñú Cristo nuꞌuꞌ

¹² Ránoꞌó ñaniꞌ jín ku̱ꞌva, ya̱ kúneí iniꞌ rán Jesús. Kuíni ni̱ꞌ ya̱ kukáꞌnú iniꞌ rán, ya̱ nnoꞌo ni̱ꞌ, nsi̱kuéꞌnu‑u tu̱ꞌun va̱ꞌa Jesús.

¹³ Saáva nta̱ká rá soldado kúmí palacio vetíñú káꞌnú Roma jín nta̱ká ka̱ꞌ rá ñɨvɨ nku̱káꞌnú iniꞌ, ya̱ yɨ́ꞌɨ́ ni̱ꞌ veka̱a jie̱ꞌe̱ꞌ Cristo.

¹⁴ Jie̱ꞌe̱ꞌ yɨ́ꞌɨ́ ni̱ꞌ veka̱a, jee yatin kúnɨꞌɨ rá ñaniꞌ kúneí ka̱ꞌ iniꞌ ráa sáꞌá I̱toꞌoꞌ‑ó, saáva kukueꞌeꞌ ka̱ꞌ kíji iniꞌ ráa stékútu̱ꞌún ráa Tu̱ꞌun Ndiosíꞌ, jee ntu níkó iniꞌ ráa sáꞌá ráa maa.

¹⁵ Íyó nijia ya̱ sava ráa sáꞌá maá, jie̱ꞌe̱ꞌ ya̱ kúkuíñɨ́ iniꞌ ráa néꞌyá ráa nuꞌuꞌ, jee kuíni ráa kutíxín ráa jín ni̱ꞌ. Soo sava ráa ka̱ꞌ stékútu̱ꞌún ráa tu̱ꞌun Cristo, chi kúváꞌa iniꞌ ráa.

¹⁶ Soo sava rá ñaniꞌ yukuán stékútu̱ꞌún uꞌvi iniꞌ ráa tu̱ꞌun Cristo, chi nsáꞌ ninuꞌun jiáni xi̱ni̱ꞌ ráa, chi jiáni iniꞌ ráa, ya̱ saꞌá ráa maa, sáva kukueꞌeꞌ ka̱ꞌ tu̱nóꞌó kunoꞌo ni̱ꞌ ni yɨ́ꞌɨ́ ni̱ꞌ veka̱a.

¹⁷ Soo rá inka ñaniꞌ yaꞌá sáꞌá maa chi ñúnúunꞌ ráa nuꞌuꞌ, chi jíníꞌ ráa, ya̱ sáá váji ni̱ꞌ sáꞌá Ndiosíꞌ sáva nama ni̱ꞌ tu̱ꞌun váꞌa Cristo.

¹⁸ Saájee, ¿ná kuvi? Sú na̱sa ni nkuvi, sɨ̱ɨ̱ꞌ íyó iniꞌ ni̱ꞌ, ya̱ tékútu̱ꞌún tu̱ꞌun Cristo, vasúꞌ sáꞌá ráa maa nika̱ꞌ kuéntáꞌ jiáni va̱ꞌa iniꞌ ráa, áxí sú na̱a̱ꞌ jiáni iniꞌ rá inka ráa. Jee suni kúsɨ́ɨꞌ iniꞌ ni̱ꞌ,

¹⁹ chi jíníꞌ ni̱ꞌ, ya̱ jie̱ꞌe̱ꞌ nta̱ká tiñu yaꞌá kene va̱ꞌa jín nuꞌuꞌ, jie̱ꞌe̱ꞌ ya̱ káꞌánꞌ rán jín Ndiosíꞌ jie̱ꞌe̱ꞌ ni̱ꞌ, jín jie̱ꞌe̱ꞌ ya̱ chíneí chítuvi Ta̱chi̱ꞌ Ííꞌ Jesús ya̱ kúvi Cristo nuꞌuꞌ.

²⁰ Ñúꞌún numíjiꞌíꞌ iniꞌ ni̱ꞌ jee íyó tu̱ꞌun neí iniꞌ ni̱ꞌ, ya̱ nkúkanuun ni̱ꞌ, jín ya̱ koo neí iniꞌ ni̱ꞌ vitan kuéntáꞌ sukuáni, sáva kuatíñú Ndiosíꞌ nuꞌuꞌ, sáva stúvi re̱ꞌ ya̱ kúñáꞌnú ví Cristo, vasúꞌ tékúꞌ ni̱ꞌ áxí vasúꞌ kuviꞌ ni̱ꞌ.

²¹ Chi nu̱u̱nꞌ nuꞌuꞌ, retú tékúꞌ ni̱ꞌ jee kúvi ya̱ jiátíñú Cristo nuꞌuꞌ, jee retú kuviꞌ ni̱ꞌ jee kúvi ya̱ si̱kɨ̱ꞌ ka̱ꞌ ni̱ꞌi̱nꞌ ni̱ꞌ.

²² Soo retú kutekuꞌ ni̱ꞌ ka̱ꞌ iniꞌ yɨkɨkúñu ni̱ꞌ yaꞌá, jee nu̱u̱nꞌ nuꞌuꞌ, kúvi ya̱ satíñú ni̱ꞌ ka̱ꞌ nu̱u̱nꞌ re̱ꞌ, jee sikúnkuvi ni̱ꞌ ka̱ꞌ. Saájee ntu jíníꞌ ni̱ꞌ né ɨɨn ví ya̱ ka̱ji ni̱ꞌ.

²³ Chi várésukuán jee tasáva ví ni̱ꞌ jee saꞌá ni̱ꞌ ni nuvi tiñu. Chi nóꞌónꞌ iniꞌ ni̱ꞌ ya̱ kuviꞌ ni̱ꞌ, jee kuneeꞌ ni̱ꞌ jín Cristo, nu̱u̱nꞌ ñuunꞌ íyó súkún, chi va̱ꞌa víꞌí ka̱ꞌ ví yaꞌá nu̱u̱nꞌ ni̱ꞌ.

²⁴ Soo va̱ꞌa ka̱ꞌ ví nu̱u̱nꞌ rán, ya̱ kino̱o ni̱ꞌ kutekuꞌ ni̱ꞌ ka̱ꞌ jín yɨkɨkúñu ni̱ꞌ.

²⁵ Jee jíníꞌ na̱a̱ꞌ nijia ni̱ꞌ yaꞌá. Saáva jíníꞌ ni̱ꞌ, ya̱ kino̱o ni̱ꞌ kutekuꞌ ni̱ꞌ ka̱ꞌ jín nta̱ká rán, sáva sikuéꞌnu ni̱ꞌ ka̱ꞌ ránoꞌó sáva kuneí iniꞌ rán Jesús, jín sáva koo sɨ̱ɨ̱ꞌ ka̱ꞌ iniꞌ ánímaꞌ rán jie̱ꞌe̱ꞌ kúneí iniꞌ rán re̱ꞌ.

²⁶ Suꞌva koo, sáva kutéyɨ́ɨ́ víꞌí rán ka̱ꞌ jie̱ꞌe̱ꞌ Cristo Jesús jie̱ꞌe̱ꞌ ya̱ nnoꞌo nuꞌuꞌ, sáá kantaꞌ ni̱ꞌ kuneeꞌ tuku ni̱ꞌ nteñu rán.

²⁷ Ñáꞌnú ka̱ꞌ ví ya̱ kueꞌnu na̱a̱ꞌ rán nu̱u̱nꞌ Ndiosíꞌ na̱kua̱ꞌ íyó kueꞌnu rá ñɨvɨ ya̱ tɨɨn tu̱ꞌun va̱ꞌa Cristo. Jee suꞌva, vasúꞌ kua̱jiaaꞌ kune̱ꞌyá ni̱ꞌ ránoꞌó, áxí vasúꞌ koo íká ni̱ꞌ nu̱u̱nꞌ rán, jee teso̱ꞌo ni̱ꞌ, ya̱ nuún íñɨ́ ni̱ꞌin rán jín tu̱ꞌun va̱ꞌa vá, jín ya̱ nuún ñúꞌún iniꞌ rán, jín ya̱ nuún nunasɨ́ tútú ni̱ꞌin rán sátíñú rán nu̱u̱nꞌ tu̱ꞌun va̱ꞌa Jesús ya̱ kúneí iniꞌ rán.

²⁸ Jee suni ya̱ ntu yúꞌví rán rá ñɨvɨ nuni̱ꞌin nu̱u̱nꞌ ránoꞌó. Yaꞌá kúvi ɨɨn seña, ya̱ stúvi ya̱ sukuíta ráa maáráa, jee suꞌva stúvi‑i ya̱ sikáku Ndiosíꞌ ránoꞌó nanitáꞌvíꞌ rán ya̱ va̱ji‑i ne̱ nu̱u̱nꞌ Ndiosíꞌ.

²⁹ Chi jie̱ꞌe̱ꞌ Cristo, ntaji Ndiosíꞌ u̱vi̱ꞌ tiñu váꞌa nu̱u̱nꞌ rán: nsáꞌ kua̱chi ntaji re̱ꞌ ya̱ ínúꞌ iniꞌ rán Cristo, chi suni ntaji re̱ꞌ ya̱ kunoꞌo rán jie̱ꞌe̱ꞌ Cristo.

³⁰ Chi ránoꞌó, ɨɨn nuún ni núnasɨ́ rán náma rán tu̱ꞌun va̱ꞌa Cristo, kua̱ꞌ niniꞌ rán ya̱ nnu̱nasɨ́ ni̱ꞌ, jee kua̱ꞌ tésóꞌo rán vitan, na̱sa sáꞌá ni̱ꞌ.