Filemón 1 - Mixteco del suroeste de Tlaxiaco Oaxaca

Tée Pablo tu̱ꞌun káva̱ꞌa nu̱u̱nꞌ Filemón

¹ Maáníꞌ, Pablo, ya̱ yɨ́ꞌɨ́ ni̱ꞌ veka̱a jie̱ꞌe̱ꞌ yɨ́tíñú ni̱ꞌ nu̱u̱nꞌ Jesús ya̱ nísotíñú re̱ꞌ ya̱ kúvi máá Cristo, ya̱ ñani Ndiosíꞌ sáva tatúníꞌ nu̱u̱nꞌ nɨꞌɨ, jee nuꞌuꞌ jín ñaniꞌ‑ó Timoteo tájí ránꞌ tutuꞌ yaꞌá nu̱u̱nꞌ noꞌó, Filemón, ya̱ ñúnúunꞌ ránꞌ xá, jín ya̱ táꞌán sátíñú nú jín ránuꞌuꞌ nu̱u̱nꞌ tiñu Cristo.

² Jee tájí ránꞌ tu̱ꞌun káva̱ꞌa nu̱u̱nꞌ noꞌó jín nu̱u̱nꞌ ku̱ꞌva‑ó Apia jín nu̱u̱nꞌ Arquipo, ya̱ táꞌán sátíñú yɨ́ɨ́ re̱ꞌ jín ránuꞌuꞌ nu̱u̱nꞌ tiñu Jesús kuéntáꞌ táꞌán ɨɨn soldado kántáꞌán, jee tájí rán tu̱ꞌun káva̱ꞌa nu̱u̱nꞌ rá ñɨvɨ ya̱ kúneí iniꞌ ráa Cristo ya̱ nútútú iniꞌ veꞌi nú.

³ Na̱ ka̱ꞌ koo ma̱ni̱ꞌ iniꞌ Tátáꞌ‑ó Ndiosíꞌ jín I̱toꞌoꞌ‑ó Jesús, ya̱ nísotíñú re̱ꞌ kúvi re̱ꞌ Cristo, kune̱ꞌyá ráa ránoꞌó jín ya̱ kuneeꞌ ñunkúún rán saꞌá ráa.

Ñúnúunꞌ Filemón ñɨvɨ jee kúneí iniꞌ re̱ꞌ Cristo

⁴ Sáá káꞌánꞌ ni̱ꞌ jín Ndiosíꞌ jee káꞌánꞌ ni̱ꞌ jie̱ꞌe̱ꞌ noꞌó jee sukuáni jiáꞌa ni̱ꞌ ya̱ kútaꞌviꞌ ni̱ꞌ nu̱u̱nꞌ Ndiosíꞌ ni̱ꞌ,

⁵ chi nteso̱ꞌo ni̱ꞌ tu̱ꞌun jie̱ꞌe̱ꞌ na̱ja kúneí iniꞌ nú I̱toꞌoꞌ‑ó Jesús jín ya̱ ñúnúunꞌ nú ntáká rá ñɨvɨ ya̱ nsásɨ́ɨ́n Ndiosíꞌ sáva kɨꞌɨ ráa nu̱u̱nꞌ re̱ꞌ.

⁶ Jee nééꞌ ñunkúún nú jín ñɨvɨ ya̱ suni táꞌán kúneí iniꞌ nkaa ráa Jesús, jee jie̱ꞌe̱ꞌ íyó nú suꞌva jíkánꞌ ni̱ꞌ nu̱u̱nꞌ Ndiosíꞌ ya̱ kene ya̱ kukáꞌnú iniꞌ rá ñɨvɨ Ndiosíꞌ ntáká ya̱ váꞌa ni̱ꞌi̱nꞌ‑ó jie̱ꞌe̱ꞌ ya̱ yɨ́ꞌɨ́‑ó nu̱u̱nꞌ Cristo.

⁷ Chi kúsɨ́ɨꞌ nasɨ́kuitɨꞌ iniꞌ ánímaꞌ ni̱ꞌ, ñaniꞌ, jee núneí iniꞌ ni̱ꞌ jie̱ꞌe̱ꞌ ñúnúunꞌ nú rá ñanitáꞌán‑ó, chi nxi̱núváꞌa nú iniꞌ ánímaꞌ rá ñɨvɨ ya̱ nku̱sɨ́ɨ́n ráa yɨ́ꞌɨ́ ráa nu̱u̱nꞌ Cristo.

Jíkánꞌ táꞌvíꞌ Pablo Onésimo

⁸ Saáva táji Cristo ya̱ kuvi kaꞌanꞌ neí iniꞌ ni̱ꞌ tatúníꞌ ni̱ꞌ noꞌó ya̱ íyó saꞌá nú.

⁹ Soo jie̱ꞌe̱ꞌ ñúnúunꞌ táꞌán‑ó, jee káꞌvi iniꞌ ni̱ꞌ va̱ꞌa ka̱ꞌ jíkánꞌ táꞌvíꞌ ni̱ꞌ ɨɨn tu̱ꞌun kákua̱chi nu̱u̱nꞌ nú. Jee nuꞌuꞌ, Pablo, ya̱ kúvi ni̱ꞌ ɨɨn jííꞌ jee suni vitan yɨ́ꞌɨ́ ni̱ꞌ veka̱a jie̱ꞌe̱ꞌ tiñu Jesús ya̱ kúvi Cristo,

¹⁰ jíkánꞌ táꞌvíꞌ ni̱ꞌ nu̱u̱nꞌ nú jie̱ꞌe̱ꞌ Onésimo, ya̱ suvivá nkenta kúvi kuéntáꞌ ɨɨn se̱ꞌya ni̱ꞌ chi nka̱níjiá re̱ꞌ ntɨɨn re̱ꞌ tu̱ꞌun váꞌa Jesús ya̱ káchíꞌ ni̱ꞌ jee kuéntáꞌ nkaku re̱ꞌ jee nkenta ni̱ꞌ kúvi ni̱ꞌ tátáꞌ re̱ꞌ ni nééꞌ ni̱ꞌ iniꞌ veka̱a.

¹¹ Sáá tiempúꞌ ya̱ta̱ꞌ, jee maáréꞌ nkuvi re̱ꞌ ɨɨn musúꞌ sátíñú saɨn ya̱ ntu níyotiñu re̱ꞌ nu̱u̱nꞌ noꞌó, soo vitan jee íyótiñu re̱ꞌ nu̱u̱nꞌ nuꞌuꞌ jín nu̱u̱nꞌ noꞌó.

¹² Jee náchuichí tuku ni̱ꞌ maa nu̱u̱nꞌ noꞌó. Jee natɨɨn maa ya̱ ñúnúunꞌ ni̱ꞌ maa ne̱ ánímaꞌ ni̱ꞌ.

¹³ Jee nkuini ni̱ꞌ ya̱ kino̱o re̱ꞌ jín nuꞌuꞌ yaꞌá, sáva nu̱u̱nꞌ nú chíneí re̱ꞌ nuꞌuꞌ ya̱ jíniñúꞌún ni̱ꞌ ni yɨ́ꞌɨ́ ni̱ꞌ veka̱a jie̱ꞌe̱ꞌ káchítu̱ꞌún ni̱ꞌ tu̱ꞌun váꞌa jie̱ꞌe̱ꞌ Cristo.

¹⁴ Soo ntu̱ví kuíni ni̱ꞌ saꞌá ni̱ꞌ ni ɨɨn tiñu, retú ntu̱ví tájiyuꞌú nú nu̱u̱nꞌ ni̱ꞌ ya̱ saꞌá ni̱ꞌ maa, sáva ntu sáꞌá nú maa jie̱ꞌe̱ꞌ tétuvi ni̱ꞌ noꞌó saꞌá nú maa, chisaꞌ sáꞌá nú maa jie̱ꞌe̱ꞌ kuíni maánú saꞌá nú maa.

¹⁵ Sa̱naanꞌ nku̱sɨ́ɨ́n Onésimo nu̱u̱nꞌ nú yakuꞌ ni tiempúꞌ sáva kuneeꞌ re̱ꞌ nɨ́ɨ́nkání jín noꞌó.

¹⁶ Jee kuneeꞌ re̱ꞌ jín noꞌó, soo nsú kua̱chi kuéntáꞌ ɨɨn musúꞌ kéꞌen ñɨvɨ, chisaꞌ si̱kɨ̱ꞌ ka̱ꞌ kúvi re̱ꞌ ka̱ꞌ nsú káꞌ ɨɨn musúꞌ kéꞌen ñɨvɨ, chi kúvi re̱ꞌ ñaniꞌ‑ó ya̱ ñúnúunꞌ‑ó, jee ñúnúunꞌ víꞌí ni̱ꞌ maa, soo saꞌ víꞌí káꞌ kunu̱u̱nꞌ nú maa, jie̱ꞌe̱ꞌ kúvi re̱ꞌ ɨɨn ñɨvɨ jín jie̱ꞌe̱ꞌ yɨ́ꞌɨ́ re̱ꞌ nu̱u̱nꞌ I̱toꞌoꞌ‑ó.

¹⁷ Saáva ya̱ íyó maniꞌ nú ya̱ kúvi‑ó táꞌán yɨ́ꞌɨ́‑ó nu̱u̱nꞌ Cristo, jee nakuatáꞌví nú re̱ꞌ kuéntáꞌ nákuatáꞌví nú nuꞌuꞌ.

¹⁸ Jee retú íyó ne̱ ni ɨɨn ya̱ niváꞌa ya̱ nsa̱ꞌá re̱ꞌ jín noꞌó, áxí retú ná kúvi ya̱ táyáꞌvi re̱ꞌ nu̱u̱nꞌ nú, nakeꞌen maa nu̱u̱nꞌ maáníꞌ.

¹⁹ Nuꞌuꞌ, Pablo, tée ni̱ꞌ rá tu̱ꞌun yaꞌá jín naꞌá maáníꞌ sáva stúvi ya̱ nááꞌ ya̱ maáníꞌ chunáán maa. Jee ntu jíniñúꞌún ni̱ꞌ naxinákúꞌun ni̱ꞌ iniꞌ nú ya̱ noꞌó táyáꞌvi maánú nu̱u̱nꞌ ni̱ꞌ [chi ntaji ni̱ꞌ tu̱ꞌun váꞌa Jesús nu̱u̱nꞌ nú jee nni̱ꞌi̱nꞌ nú ya̱ natavaꞌ re̱ꞌ noꞌó nu̱u̱nꞌ kua̱chi nú nsi̱káku re̱ꞌ noꞌó].

²⁰ Saáva noꞌó ñaniꞌ, maá nááꞌ nijia ya̱ táváꞌ ni̱ꞌ ya̱ váꞌa nu̱u̱nꞌ noꞌó jie̱ꞌe̱ꞌ yɨ́ꞌɨ́‑ó nu̱u̱nꞌ I̱toꞌoꞌ‑ó. Jee náxinúváꞌa nú iniꞌ ánímaꞌ ni̱ꞌ jie̱ꞌe̱ꞌ yɨ́ꞌɨ́‑ó xi̱ntíín Cristo.

²¹ Tée ni̱ꞌ tu̱ꞌun yaꞌá chi ne̱ yuchí kúkáꞌnú iniꞌ ni̱ꞌ noꞌó ya̱ kaníjiá nú, chi jíníꞌ ni̱ꞌ ya̱ ne̱ saꞌá nú ka̱ꞌ nsú káꞌ kua̱ꞌ jíkánꞌ ni̱ꞌ nu̱u̱nꞌ nú.

²² Jee suni métú tiempúꞌ saꞌá túꞌva nú nu̱u̱nꞌ kuneeꞌ ni̱ꞌ, chi íyó tu̱neí iniꞌ ni̱ꞌ jee nétu ni̱ꞌ ya̱ naxiníkó Ndiosíꞌ tu̱ꞌun jíkánꞌ táꞌvíꞌ rán jee saꞌá re̱ꞌ ya̱ kua̱jiane̱ꞌyá ni̱ꞌ ránoꞌó.

Tu̱káva̱ꞌa

²³ Táji Epafras tu̱káva̱ꞌa nu̱u̱nꞌ nú, jee maáréꞌ táꞌán yɨ́ꞌɨ́ re̱ꞌ jín ni̱ꞌ iniꞌ veka̱a jie̱ꞌe̱ꞌ yɨ́tíñú re̱ꞌ nu̱u̱nꞌ Cristo Jesús,

²⁴ jee suni táji tu̱káva̱ꞌa Marcos, Aristarco, Demas jín Lucas, ya̱ táꞌán sátíñú nkáá ráa jín nuꞌuꞌ nu̱u̱nꞌ Cristo.

²⁵ Na̱ ka̱ꞌ koo ma̱ni̱ꞌ iniꞌ I̱toꞌoꞌ‑o Jesús, ya̱ kúvi re̱ꞌ Cristo, kune̱ꞌyá re̱ꞌ ránoꞌó. Amén. Suꞌva koo.