Efesios 3 - Mixteco del suroeste de Tlaxiaco Oaxaca

Tiñu njiáꞌa Ndiosíꞌ nu̱u̱nꞌ Pablo káchítu̱ꞌún re̱ꞌ tu̱ꞌun váꞌa jie̱ꞌe̱ꞌ Cristo

¹ Jee tu̱ꞌun yukuán kua̱ꞌ ya̱ káchíꞌ kí ni̱ꞌ kúvi jie̱ꞌe̱ꞌ jíkánꞌ táꞌvíꞌ ni̱ꞌ nu̱u̱nꞌ Ndiosíꞌ jie̱ꞌe̱ꞌ ránoꞌó. Nuꞌuꞌ, Pablo, yɨ́ꞌɨ́ ni̱ꞌ veka̱a jie̱ꞌe̱ꞌ sátíñú ni̱ꞌ nu̱u̱nꞌ Cristo Jesús, ya̱ kúvi ya̱ váꞌa nu̱u̱nꞌ ránoꞌó ya̱ ntu kúvi rán ñɨvɨ Israel.

² Chi retú máá naáꞌ nijia ya̱ nteso̱ꞌo rán jie̱ꞌe̱ꞌ tiñu nte̱tíñú Ndiosíꞌ nuꞌuꞌ ya̱ kuniso ni̱ꞌ, jie̱ꞌe̱ꞌ ya̱ íyó mániꞌ iniꞌ re̱ꞌ jín ni̱ꞌ, ya̱ nsi̱kútaꞌviꞌ re̱ꞌ tiñu vá nu̱u̱nꞌ nuꞌuꞌ sáva satíñú ni̱ꞌ jie̱ꞌe̱ꞌ ya̱ váꞌa nu̱u̱nꞌ ránoꞌó.

³ Chi nsa̱ꞌá Ndiosíꞌ ya̱ nku̱káꞌnú iniꞌ ni̱ꞌ tu̱ꞌun íyó yuꞌuꞌ iniꞌ re̱ꞌ, chi nstúvi re̱ꞌ maa nu̱u̱nꞌ ni̱ꞌ, kuéntáꞌ kua̱ꞌ ya̱ ntee ni̱ꞌ yakuꞌ ni tu̱ꞌun nu̱u̱nꞌ rán jie̱ꞌe̱ꞌ yaꞌá.

⁴ Jee sáá kaꞌvi rán maa jee ki̱ku̱ꞌun iniꞌ rán ya̱ jíníꞌ va̱ꞌa ni̱ꞌ tu̱ꞌun ya̱ ni̱yo yuꞌuꞌ jie̱ꞌe̱ꞌ Cristo.

⁵ Jee tiempúꞌ yanaꞌán jee ni ntu nstúvi Ndiosíꞌ maa nu̱u̱nꞌ rá ñɨvɨ, kua̱ꞌ nstúvi kájí Ta̱chi̱ꞌ Ííꞌ re̱ꞌ maa vitan nu̱u̱nꞌ rá te̱e re̱ꞌ ya̱ níso tiñu apóstol jín nu̱u̱nꞌ rá te̱e nákani tu̱ꞌun kéne yuꞌú re̱ꞌ, rá nsa̱ꞌá sɨ́ɨ́n re̱ꞌ sáva kɨtíñú ráa nu̱u̱nꞌ re̱ꞌ.

⁶ Jee tu̱ꞌun ya̱ níyo yuꞌuꞌ iniꞌ re̱ꞌ jee nstúvi re̱ꞌ maa vitan ví yaꞌá: Tu̱ꞌun váꞌa jie̱ꞌe̱ꞌ Cristo sáꞌá ya̱ ñɨvɨ rá inka nación, ya̱ ntu kúvi ñɨvɨ Israel, ɨɨn nuún ni ta̱ꞌvi̱ꞌ ni̱ꞌi̱nꞌ ráa jín rá ñɨvɨ Israel, jee ɨɨn ni nnuvi ráa kuéntáꞌ ɨɨn yɨkɨkúñu, jee ɨɨn nuún ni ni̱ꞌi̱nꞌ ráa ya̱ nchi̱sóyuꞌú re̱ꞌ, jie̱ꞌe̱ꞌ yɨ́ꞌɨ́ ráa nu̱u̱nꞌ Cristo Jesús.

⁷ Jee nuꞌuꞌ Pablo nkenta kúvi ni̱ꞌ ɨɨn ya̱ jiátíñú Ndiosíꞌ nuꞌuꞌ stékútu̱ꞌún ni̱ꞌ tu̱ꞌun váꞌa vá. Jee jie̱ꞌe̱ꞌ ya̱ ma̱ni̱ꞌ iniꞌ re̱ꞌ, nsi̱kútaꞌviꞌ re̱ꞌ tiñu vá nu̱u̱nꞌ ni̱ꞌ, jee jín fesáꞌ ííꞌ níso re̱ꞌ nsa̱ꞌá re̱ꞌ suꞌva jín ni̱ꞌ.

⁸ Sú núun ka̱ꞌ kúñáꞌnú ni̱ꞌ nu̱u̱nꞌ nɨꞌɨ rá ñɨvɨ núun ka̱ꞌ kúñáꞌnú ráa ya̱ nsa̱ꞌá sɨ́ɨ́n Ndiosíꞌ ráa sáva kuvi ráa ñɨvɨ re̱ꞌ. Soo nsi̱kútaꞌviꞌ re̱ꞌ tiñu vá nu̱u̱nꞌ ni̱ꞌ ya̱ kachitu̱ꞌún ni̱ꞌ tu̱ꞌun váꞌa re̱ꞌ nu̱u̱nꞌ rá ñɨvɨ ya̱ ntu kúvi ñɨvɨ Israel. Tu̱ꞌun vá ví ya̱ ntántúníꞌ yɨ́yáꞌvi nasɨ́kuitɨꞌ ka̱ꞌ ví Cristo jín rá táji re̱ꞌ nu̱u̱nꞌ‑ó. Jee ni nsáꞌ kenta ki̱ku̱ꞌun iniꞌ‑ó nɨꞌɨ tu̱ꞌun vá.

⁹ Jee ñani re̱ꞌ nuꞌuꞌ sáva stúvi nijinꞌ ni̱ꞌ nu̱u̱nꞌ ntáká ñɨvɨ jie̱ꞌe̱ꞌ tiñu yuꞌuꞌ ya̱ ñúꞌún iniꞌ Ndiosíꞌ saꞌá re̱ꞌ ya̱ ñúꞌún yuꞌuꞌ iniꞌ re̱ꞌ ne̱ nɨ́ɨ́nkání yanaꞌán nékúvi. Jee maáréꞌ ví ya̱ nsa̱ꞌá nɨꞌɨ ya̱ íyó.

¹⁰ Sukuán nsa̱ꞌá re̱ꞌ sáva rá najiáꞌáꞌ ííꞌ re̱ꞌ rá kúñáꞌnú jín rá nísotíñú ya̱ nééꞌ ráa antivɨ́ súkún, jee sáá kune̱ꞌyá ráa nu̱u̱nꞌ tiñu sáꞌá re̱ꞌ iniꞌ rá ñɨvɨ ya̱ kúneí iniꞌ ráa Jesús, jee kuniꞌ ráa ya̱ ntáká nu̱u̱nꞌ ntántúníꞌ níchí nasɨ́kuitɨꞌ ka̱ꞌ Ndiosíꞌ.

¹¹ Jee nsa̱ꞌá re̱ꞌ sukuán sáni nkuna̱a̱ꞌ iniꞌ re̱ꞌ nɨ́ɨ́nkání, ya̱ nsi̱kúnkuvi I̱toꞌoꞌ‑ó Cristo Jesús tiñu vá.

¹² Jee jie̱ꞌe̱ꞌ yɨ́ꞌɨ́‑ó nu̱u̱nꞌ Cristo jee íyó neí iniꞌ‑ó ne̱ yuchí kúkáꞌnú iniꞌ‑ó natuꞌva‑ó nu̱u̱nꞌ Ndiosíꞌ chi kúneí iniꞌ‑ó Cristo.

¹³ Jee saáva jíkánꞌ táꞌvíꞌ ni̱ꞌ nu̱u̱nꞌ ránoꞌó, ya̱ koto núun iniꞌ rán jie̱ꞌe̱ꞌ tu̱nóꞌó nóꞌo ni̱ꞌ jie̱ꞌe̱ꞌ ya̱ kúvi ya̱ váꞌa nu̱u̱nꞌ ránoꞌó, chi sukuán sáꞌá Ndiosíꞌ ya̱ netuꞌ kuvi ránoꞌó.

Káꞌánꞌ Pablo nu̱u̱nꞌ Ndiosíꞌ jee nákuetúꞌún re̱ꞌ maa

¹⁴ Jee jie̱ꞌe̱ꞌ vá, jee nákuíñɨꞌ ítɨ́ ni̱ꞌ jíkánꞌ táꞌvíꞌ ni̱ꞌ nu̱u̱nꞌ Ndiosíꞌ ya̱ kúvi re̱ꞌ Tátáꞌ [I̱toꞌoꞌ‑ó Jesús ya̱ kúvi Cristo].

¹⁵ Jee nu̱u̱nꞌ re̱ꞌ va̱ji ntáká tataꞌ yó ñɨvɨ ya̱ ya nééꞌ antivɨ́ súkún jín iniꞌ ñɨ̱vɨ́ yaꞌá.

¹⁶ Jee jíkánꞌ táꞌvíꞌ ni̱ꞌ nu̱u̱nꞌ Ndiosíꞌ, ya̱ nachituvi Ta̱chi̱ꞌ Ííꞌ re̱ꞌ iniꞌ ránoꞌó, jín fuersáꞌ ííꞌ Ndiosíꞌ sáni ntántúníꞌ kúñáꞌnú re̱ꞌ.

¹⁷ Sáva kɨꞌɨ Cristo iniꞌ ánímaꞌ rán jie̱ꞌe̱ꞌ ya̱ kúneí iniꞌ rán re̱ꞌ, sáva kuiñɨ ni̱ꞌin rán kuꞌun tu̱ꞌun ñúnúunꞌ re̱ꞌ iniꞌ ránoꞌó, kuéntáꞌ kúkutú yoꞌo yutun jín kuéntáꞌ veꞌi yósóꞌ kutú nu̱u̱nꞌ koo sámáꞌ,

¹⁸ sáva ránoꞌó jín ntáká rá inka ñɨvɨ ya̱ nsa̱ꞌá sɨ́ɨ́n Ndiosíꞌ ráa kuvi ráa ñɨvɨ re̱ꞌ, jee kuvi ki̱ku̱ꞌun va̱ꞌa iniꞌ rán ya̱ ntántúníꞌ ñúnúunꞌ Cristo yó, níkáꞌ‑a, kání‑i, súkún‑u, kúnú‑u, sukuán ñúnúunꞌ re̱ꞌ yó.

¹⁹ Jee suni sukuán jíkánꞌ táꞌvíꞌ ni̱ꞌ ya̱ kuniꞌ va̱ꞌa rán jie̱ꞌe̱ꞌ tu̱ꞌun ñúnúunꞌ Cristo yó, ya̱ ntántúníꞌ nasɨ́kuitɨꞌ ka̱ꞌ jiáꞌa‑a nu̱u̱nꞌ nɨꞌɨ, ya̱ nsú kua̱ꞌ kenta‑ó ki̱ku̱ꞌun iniꞌ‑ó nɨꞌɨ‑ɨ. Sukuán jíkánꞌ táꞌvíꞌ ni̱ꞌ sáva kua̱íyó ya̱ íyó Ndiosíꞌ kukánáa ánímaꞌ rán ne̱ natɨɨn rán iniꞌ maáréꞌ.

²⁰ Jee vitan jee na̱ ka̱ꞌ viiꞌ nasɨ́kuitɨꞌ kúñáꞌnú Ndiosíꞌ ka̱ꞌ ya̱ níso re̱ꞌ fuersáꞌ ííꞌ ya̱ kúvi saꞌá re̱ꞌ ntáká tiñu ya̱ ntántúníꞌ nasɨ́kuitɨꞌ ka̱ꞌ nsú káꞌ nɨꞌɨ rá jíkánꞌ‑ó áxí rá jiáni iniꞌ‑ó. Jee sáꞌá re̱ꞌ sukuán sáni íyó fuersáꞌ ííꞌ re̱ꞌ ya̱ sátíñú‑u iniꞌ‑ó.

²¹ Na̱ ka̱ꞌ viiꞌ nasɨ́kuitɨꞌ kúñáꞌnú re̱ꞌ ka̱ꞌ jín tiñu nsa̱ꞌá re̱ꞌ jie̱ꞌe̱ꞌ rá ñɨvɨ ya̱ kúneí iniꞌ ráa re̱ꞌ, jín jie̱ꞌe̱ꞌ ya̱ nsa̱ꞌá Cristo Jesús, jee nakuetúꞌún‑ó re̱ꞌ ntáká tiempúꞌ jín nɨ́ɨ́nkání. ¡Sukuán koo! ¡Amén!