Efesios 2 - Mixteco del suroeste de Tlaxiaco Oaxaca

Nna̱kani núne Ndiosíꞌ yó sáva nsáꞌ kuviꞌ‑ó nu̱u̱nꞌ re̱ꞌ jie̱ꞌe̱ꞌ ya̱ nsa̱ꞌá Cristo

¹ Jee ránoꞌó, ya̱ níꞌiꞌ rán nu̱u̱nꞌ Ndiosíꞌ nékúvi jie̱ꞌe̱ꞌ njiáꞌa rán nu̱u̱nꞌ ya̱ tátúníꞌ Ndiosíꞌ jín jie̱ꞌe̱ꞌ rá kua̱chi nsa̱ꞌá rán.

² Jee sukuán ñaꞌnu rán tiempúꞌ ya̱ta̱ꞌ nékúvi ne̱ sáá ñaꞌnu rán ichi ñujiínꞌ sáni jiáꞌnu rá ñɨvɨ ñɨ̱vɨ́ yaꞌá ya̱ ntu̱ví yɨ́ꞌɨ́ ráa xi̱ntíín Ndiosíꞌ. Sukuán ñaꞌnu rán sánikua̱ꞌ kuíni kui̱ꞌna̱ꞌ kúñáꞌnú ya̱ kúvi i̱toꞌoꞌ rá ta̱chi̱ꞌ kíni ya̱ jíkanuun ráa nu̱u̱nꞌ ta̱chi̱ꞌ víjin ñɨ̱vɨ́ yaꞌá. Jee kúvi re̱ꞌ ta̱chi̱ꞌ kíni ya̱ sátíñú iniꞌ rá ñɨvɨ kújiááꞌ iniꞌ ráa nu̱u̱nꞌ Ndiosíꞌ.

³ Jee suni sukuán ntáká‑ó nuún ñaꞌnu‑ó jín ráa nteñu ráa tiempúꞌ yukuán, sáni ya̱ níyo iniꞌ‑ó saꞌá‑ó jín yɨkɨkúñu kua̱chi‑ó chi ntu nyɨ́ꞌɨ‑ó xi̱ntíín Ndiosíꞌ, jee nsa̱ꞌá‑ó sáni kuíni iniꞌ yɨkɨkúñu‑ó jín sáni jiáni iniꞌ antúníꞌ‑ó. Jee saáva nkuvi‑ó ñɨvɨ ya̱ íyó níꞌínꞌ‑ó ya̱ kítɨ́ꞌ iniꞌ Ndiosíꞌ néꞌyá re̱ꞌ yó ya̱ kunoꞌo‑ó tu̱nóꞌó xéénꞌ ya̱ taji re̱ꞌ nékúvi, kuéntáꞌ íyó níꞌinꞌ rá inka rá ñɨvɨ.

⁴ Soo Ndiosíꞌ chi, ntántúníꞌ nasɨ́kuitɨꞌ na̱ ka̱ꞌ nku̱náꞌví iniꞌ re̱ꞌ yó, chi ntántúníꞌ nasɨ́kuitɨꞌ ñúnúunꞌ re̱ꞌ yó.

⁵ Jee asúnika̱ꞌ nkuvi‑ó kuéntáꞌ ñɨvɨ níꞌiꞌ nu̱u̱nꞌ re̱ꞌ, jie̱ꞌe̱ꞌ ya̱ njia̱ꞌa‑ó nu̱u̱nꞌ ya̱ tátúníꞌ Ndiosíꞌ, soo nsa̱ꞌá re̱ꞌ ya̱ kutekuꞌ‑ó nɨ́ɨ́nkání jín Cristo. (Chi jie̱ꞌe̱ꞌ ya̱ íyó mániꞌ iniꞌ re̱ꞌ néꞌyá re̱ꞌ yó nna̱tavaꞌ re̱ꞌ yó nu̱u̱nꞌ kua̱chi‑ó nsi̱káku re̱ꞌ yó.)

⁶ Jee sukuán nxi̱nátekuꞌ nkáá Ndiosíꞌ yó jín Cristo, jee nsi̱kúneeꞌ re̱ꞌ yó jín Cristo Jesús ne̱ antivɨ́ súkún, nu̱u̱nꞌ kúñáꞌnú, jie̱ꞌe̱ꞌ yɨ́ꞌɨ́‑ó nu̱u̱nꞌ‑u.

⁷ Jee nsa̱ꞌá re̱ꞌ sukuán sáva stúvi nu̱u̱nꞌ rá ñɨvɨ tiempúꞌ kiji ichinúúnꞌ ka̱ꞌ ya̱ na̱ ka̱ꞌ ntántúníꞌ ka̱ꞌ íyó mániꞌ iniꞌ re̱ꞌ ya̱ ñúnkúún iniꞌ re̱ꞌ néꞌyá re̱ꞌ yó, jie̱ꞌe̱ꞌ yɨ́ꞌɨ́‑ó nu̱u̱nꞌ Cristo Jesús.

⁸ Chi jie̱ꞌe̱ꞌ ya̱ íyó mániꞌ iniꞌ Ndiosíꞌ néꞌyá re̱ꞌ ránoꞌó jee nna̱tavaꞌ re̱ꞌ ránoꞌó nu̱u̱nꞌ kua̱chi rán nsi̱káku re̱ꞌ ránoꞌó jie̱ꞌe̱ꞌ ya̱ kúneí iniꞌ rán Cristo, sú ntu íyó ni̱ꞌi̱nꞌ rán maa. Soo nsú ránoꞌó sáꞌá maa, chisaꞌ kúvi‑i ta̱ꞌvi̱ꞌ nsi̱kútaꞌviꞌ Ndiosíꞌ nu̱u̱nꞌ rán.

⁹ Jee nsú jie̱ꞌe̱ꞌ tiñu váꞌa sáꞌá‑ó ví ya̱ nsi̱káku re̱ꞌ yó nu̱u̱nꞌ kua̱chi‑ó, jee saáva ni ɨɨn‑ó nkúvi kaꞌanꞌ téyɨ́ɨ́‑ó ya̱ kúvi sikáku‑ó maáó nu̱u̱nꞌ kua̱chi‑ó.

¹⁰ Chi kúvi‑ó ɨɨn tiñu jiáá nsa̱ꞌá Ndiosíꞌ, chi maá Ndiosíꞌ nsa̱ꞌá yó sáá íyó‑ó ntañúꞌún jie̱ꞌe̱ꞌ yɨ́ꞌɨ́‑ó nu̱u̱nꞌ Cristo Jesús. Sáꞌá re̱ꞌ yó sukuán, sáva saꞌá‑ó rá tiñu váꞌa ya̱ ya nsa̱ꞌá túꞌva Ndiosíꞌ sáva kueꞌnu‑ó ichi re̱ꞌ sukuán.

Ɨɨn ni násaꞌá Ndiosíꞌ maáó

¹¹ Saájee íyó naku̱ꞌun iniꞌ rán sáá ñaꞌnu rán ne̱ sáá ntiáꞌan kúneí iniꞌ rán Cristo. Jee ránoꞌó, jee nsú nu̱u̱nꞌ se̱ꞌya tataꞌ Israel nkaku rán. Jee rá ñɨvɨ Israel ya̱ níso ráa seña nu̱u̱nꞌ yɨkɨkúñu rá te̱e ráa, naní circuncisión, ya̱ sáꞌá ráa jín naꞌá, jee maáráa síkúnání ráa ránoꞌó ñɨvɨ ya̱ ntu íyó circuncidado kúvi rán. Jee saáva íyó naku̱ꞌun iniꞌ rán sáá ni̱yo rán tiempúꞌ yukuán,

¹² jee ntu̱ví níyo rán jín Cristo nékúvi. Kúvi rán to̱ꞌo̱ꞌ sɨ́ɨ́n nu̱u̱nꞌ ñuunꞌ Israel, ya̱ nka̱ji Ndiosíꞌ ráa. Jee ntu̱ví yɨ́ꞌɨ́ rán nu̱u̱nꞌ tratúꞌ ya̱ nsa̱ꞌá Ndiosíꞌ jín rá ñɨvɨ re̱ꞌ ya̱ nchi̱sóyuꞌú re̱ꞌ ya̱ váꞌa saꞌá re̱ꞌ nu̱u̱nꞌ ráa. Jee ni ntu̱náꞌ tu̱neí iniꞌ rán íyó ya̱ ni̱ꞌi̱nꞌ rán ya̱ váꞌa ya̱ íyó nu̱u̱nꞌ re̱ꞌ nékúvi, jee ni ntu̱ví íyó Ndiosíꞌ nu̱u̱nꞌ rán ni nééꞌ rán iniꞌ ñɨ̱vɨ́ yaꞌá.

¹³ Soo vitan jee yɨ́ꞌɨ́ rán nu̱u̱nꞌ Cristo Jesús, jee tiempúꞌ yukuán ni̱yo íká rán nu̱u̱nꞌ Ndiosíꞌ, soo vitan nna̱tuꞌva rán nu̱u̱nꞌ re̱ꞌ, jie̱ꞌe̱ꞌ ya̱ ni̱ꞌi̱ꞌ Cristo jie̱ꞌe̱ꞌ rán jee ñatɨ ni̱ñɨ̱ꞌ re̱ꞌ.

¹⁴ Chi Cristo ví ya̱ sáꞌá ya̱ numa̱ni̱ꞌ táꞌán‑órán, chi nsa̱ꞌá re̱ꞌ ya̱ ñɨvɨ Israel jín ñɨvɨ ntu kúvi Israel ɨɨn ni nnuvi‑ó nu̱u̱nꞌ re̱ꞌ, chi nxi̱náánꞌ re̱ꞌ ya̱ jiásɨ́ꞌ ma̱ꞌñú‑ó ya̱ nsa̱ꞌá sɨ́ɨ́n‑ɨ yó jee ntu ka̱ꞌ jíníꞌ u̱ꞌvi̱ꞌ táꞌán‑ó,

¹⁵ chi nso̱ko̱ꞌ re̱ꞌ maáréꞌ ni̱ꞌi̱ꞌ re̱ꞌ. Jee sukuán nsi̱kɨ́kui̱ñɨ̱ꞌ re̱ꞌ ley ya̱ njia̱ꞌa Ndiosíꞌ nu̱u̱nꞌ Moisés yanaꞌán ya̱ tátúníꞌ‑i jín ya̱ nte̱tuvi‑i rá ñɨvɨ Israel. Saáva ñɨvɨ Israel jín ñɨvɨ ntu kúvi Israel, núvi ni núvíꞌ‑ó ɨɨn ñɨvɨ jiáá ya̱ yɨ́ꞌɨ́‑ó nu̱u̱nꞌ re̱ꞌ nsa̱ꞌá re̱ꞌ, jee suꞌva númániꞌ táꞌán‑ó sáꞌá re̱ꞌ.

¹⁶ Jee jie̱ꞌe̱ꞌ ya̱ níꞌiꞌ re̱ꞌ nu̱u̱nꞌ kurúsiꞌ, jee nsa̱ꞌá re̱ꞌ ya̱ nnuma̱ni̱ꞌ ñɨvɨ Israel jín ñɨvɨ ntu kúvi Israel nu̱u̱nꞌ Ndiosíꞌ, chi ni núvíꞌ‑ó yɨ́ꞌɨ́‑ó nu̱u̱nꞌ re̱ꞌ, kuéntáꞌ kúvi‑ó ɨɨn yɨkɨkúñu. Chi sukuán nxi̱náánꞌ Cristo tu̱ꞌun ya̱ jíníꞌ u̱ꞌvi̱ꞌ táꞌán‑ó.

¹⁷ Jee nkiji Cristo jee nste̱kútu̱ꞌún re̱ꞌ nu̱u̱nꞌ ránoꞌó ya̱ sáꞌá re̱ꞌ ya̱ númániꞌ rán nu̱u̱nꞌ Ndiosíꞌ, ya̱ níyo íká rán nu̱u̱nꞌ Ndiosíꞌ nékúvi. Jee nste̱kútu̱ꞌún re̱ꞌ nu̱u̱nꞌ ñɨvɨ Israel ya̱ níyo yatin ráa nu̱u̱nꞌ Ndiosíꞌ ya̱ sáꞌá re̱ꞌ ya̱ númániꞌ ráa nu̱u̱nꞌ Ndiosíꞌ.

¹⁸ Chi jie̱ꞌe̱ꞌ ya̱ nsa̱ꞌá Cristo jee nni̱ꞌi̱nꞌ‑ó ya̱ kuvi natuꞌva‑ó nu̱u̱nꞌ Tátáꞌ‑ó Ndiosíꞌ, sáꞌá métúꞌún ni Ta̱chi̱ꞌ Ííꞌ re̱ꞌ yɨ́ꞌɨ́ iniꞌ ntáká‑ó, va̱ni ñɨvɨ Israel áxí va̱ni ntu̱ví.

¹⁹ Jee saáva ntu ka̱ꞌ kúvi rán to̱ꞌo̱ꞌ ni ñɨvɨ váji íká, chisaꞌ se̱ꞌya ñuunꞌ Ndiosíꞌ kúvi rán jín rá ñɨvɨ nsa̱ꞌá sɨ́ɨ́n re̱ꞌ sáva kúvi rán ñɨvɨ re̱ꞌ, jee kúvi rán ñɨvɨ táꞌán veꞌi Ndiosíꞌ.

²⁰ Chi nsa̱ꞌá Ndiosíꞌ ya̱ maáórán kúvi‑ó kuéntáꞌ veꞌi ya̱ yósóꞌ nu̱u̱nꞌ koo jie̱ꞌe̱ꞌ ve̱ꞌí. Jee koo jie̱ꞌe̱ꞌ ve̱ꞌí vá kúvi Tu̱ꞌun Ndiosíꞌ ya̱ nste̱kútu̱ꞌún rá te̱e níso tiñu apóstol, ya̱ nchu̱ichí re̱ꞌ sáva stúvi ráa tu̱ꞌun re̱ꞌ, jín rá te̱e nna̱kani ráa tu̱ꞌun nkene yuꞌú re̱ꞌ. Jee máá Cristo Jesús kúvi kuéntáꞌ yu̱u̱ꞌ maá ñáꞌnú ka̱ꞌ ya̱ yɨ́tuvi skináꞌ veꞌi vá.

²¹ Chi jie̱ꞌe̱ꞌ yɨ́ꞌɨ́‑ó nu̱u̱nꞌ Cristo, jee nákuneta̱ꞌán tútú ntáká‑ó kuéntáꞌ veꞌi vá, ya̱ síkuéꞌnu Ndiosíꞌ yó ne̱ kuvi‑ó ɨɨn veñu̱ꞌun i̱i̱ꞌ, ya̱ yɨ́tíñú‑ó nu̱u̱nꞌ I̱toꞌoꞌ‑ó.

²² Jee suni ránoꞌó, jie̱ꞌe̱ꞌ yɨ́ꞌɨ́ rán nu̱u̱nꞌ Cristo, jee síkuéꞌnu nkáá Ndiosíꞌ ránoꞌó ne̱ kuvi rán veꞌi nu̱u̱nꞌ íyó Ndiosíꞌ, chi yɨ́ꞌɨ́ Ta̱chi̱ꞌ Ííꞌ re̱ꞌ iniꞌ ánímaꞌ rán.