Colosenses 4 - Mixteco del suroeste de Tlaxiaco Oaxaca

¹ Jee ránoꞌó rá i̱toꞌoꞌ xí tiñu ya̱ náka rán musúꞌ, saꞌá na̱a̱ꞌ rán jín rá musúꞌ rán, jee saꞌá va̱ꞌa rán jín ráa sánikua̱ꞌ íyó ni̱ꞌi̱nꞌ ráa, chi jíníꞌ rán ya̱ suni íyó I̱toꞌoꞌ rán ya̱ nééꞌ ñuunꞌ íyó súkún.

² Jee kɨtíñú rán kunikɨnꞌ rán kaꞌanꞌ rán jín Ndiosíꞌ, jee nito koo rán jie̱ꞌe̱ꞌ vá, jee ku̱ꞌva rán ya̱ kútaꞌviꞌ rán nu̱u̱nꞌ re̱ꞌ.

³ Jee suni ka̱ka̱nꞌ táꞌvíꞌ rán nu̱u̱nꞌ Ndiosíꞌ jie̱ꞌe̱ꞌ ránuꞌuꞌ, sáva kune re̱ꞌ ichi sáva stekútu̱ꞌún ránꞌ tu̱ꞌun váꞌa jie̱ꞌe̱ꞌ Cristo, ya̱ nyɨse̱ꞌí‑i tiempúꞌ ya̱ta̱ꞌ. Jee jie̱ꞌe̱ꞌ nste̱kútu̱ꞌún ni̱ꞌ maa yɨ́ꞌɨ́ ni̱ꞌ veka̱a.

⁴ Jee ka̱ka̱nꞌ táꞌvíꞌ rán nu̱u̱nꞌ Ndiosíꞌ ya̱ stúvi kájí ni̱ꞌ tu̱ꞌun váꞌa vá, sáni íyó kachiꞌ ni̱ꞌ maa.

⁵ Kuꞌun kájí xíniꞌ rán kueꞌnu ñunkúún rán sáni kuíni Ndiosíꞌ nteñu rá ñɨvɨ ya̱ ntu kúneí iniꞌ ráa Cristo, jee suꞌva ntu súkuíta rán tiempúꞌ ya̱ káꞌánꞌ rán jín ráa.

⁶ Jee sukuáni kuva̱ꞌa iniꞌ rán kaꞌanꞌ rán jín ráa, ya̱ táxínꞌ tu̱ꞌun káꞌánꞌ nú kuéntáꞌ nu̱ꞌú neyu sáꞌá ñɨ̱ɨ̱nꞌ, sáva kuniꞌ rán na̱sa íyó naxiníkó rán nu̱u̱nꞌ ta ɨɨn ɨɨn ráa.

Tu̱ꞌun nu̱u̱nꞌ nɨꞌɨ nkaꞌanꞌ Pablo jín ráa

⁷ Jee nakani Tíquico nɨꞌɨ tu̱ꞌun na̱sa íyó jie̱ꞌe̱ꞌ nuꞌuꞌ. Suvire̱ꞌ kúvi ñaniꞌ‑ó ya̱ ñúnúunꞌ‑órán. Jee yɨ́tíñú re̱ꞌ síkúnkuvi na̱a̱ꞌ nijia re̱ꞌ nu̱u̱nꞌ tiñu maá I̱toꞌoꞌ‑ó. Jee kúvi re̱ꞌ ɨɨn musúꞌ ya̱ jiátíñú I̱toꞌoꞌ‑ó ya̱ táꞌán sátíñú nkáá re̱ꞌ jín ránuꞌuꞌ nu̱u̱nꞌ I̱toꞌoꞌ‑ó.

⁸ Jee jie̱ꞌe̱ꞌ yaꞌá kúvi ya̱ tájí ni̱ꞌ re̱ꞌ kua̱jiaaꞌ re̱ꞌ nu̱u̱nꞌ ránoꞌó, sáva kukáꞌnú iniꞌ rán jie̱ꞌe̱ꞌ ya̱ nóꞌo ránuꞌuꞌ. Jee suni sáva nasaꞌá sɨ́ɨꞌ re̱ꞌ iniꞌ ánímaꞌ rán.

⁹ Jee kua̱jiaaꞌ re̱ꞌ jín Onésimo. Onésimo kúvi ñaniꞌ‑ó ya̱ ñúnúunꞌ ránꞌ, jín ya̱ jiáꞌnu na̱a̱ꞌ va̱ꞌa re̱ꞌ ya̱ kúneí iniꞌ ránꞌ re̱ꞌ. Jee ɨɨn táꞌán ñuunꞌ rán kúvi re̱ꞌ. Jee ni núvíꞌ ráa nakani nɨꞌɨ ya̱ nkuvi yaꞌá, sáva kukáꞌnú iniꞌ rán.

¹⁰ Aristarco, ya̱ táꞌán yɨ́ꞌɨ́ jín ni̱ꞌ veka̱a ví re̱ꞌ, jee tájí re̱ꞌ tu̱ꞌun jíkátu̱ꞌún re̱ꞌ jie̱ꞌe̱ꞌ ránoꞌó. Jee suni Marcos ranika̱ꞌ, ya̱ kúvi re̱ꞌ primo Bernabé. Jee ya nni̱ꞌi̱nꞌ rán tu̱ꞌun jie̱ꞌe̱ꞌ Marcos, ya̱ nta̱túníꞌ ni̱ꞌ nu̱u̱nꞌ rán, ya̱ nakuatáꞌví rán re̱ꞌ retú kua̱jiaaꞌ re̱ꞌ nu̱u̱nꞌ nééꞌ rán.

¹¹ Jee suni Jesús, ya̱ suni naní re̱ꞌ Justo, suni sukuán tájí re̱ꞌ tu̱ꞌun jíkátu̱ꞌún re̱ꞌ jie̱ꞌe̱ꞌ rán. Jee kua̱chi ni núvíꞌ te̱e yaꞌá kúvi ráa te̱e Israel, ya̱ táꞌán sátíñú ráa jín nuꞌuꞌ, sáva sikuéꞌnu ránꞌ tu̱ꞌun jie̱ꞌe̱ꞌ ki̱vɨ ñɨvɨ naꞌá Ndiosíꞌ nu̱u̱nꞌ tátúníꞌ re̱ꞌ nu̱u̱nꞌ ráa. Jee maáráa nna̱saꞌá neí víꞌí ráa iniꞌ ni̱ꞌ.

¹² Tájí Epafras tu̱ꞌun jíkátu̱ꞌún re̱ꞌ jie̱ꞌe̱ꞌ ránoꞌó, ya̱ suni kúvi re̱ꞌ táꞌán ñuunꞌ rán, jee kúvi re̱ꞌ musúꞌ ya̱ jiátíñú Cristo Jesús. Jee sáá káꞌánꞌ re̱ꞌ jín Ndiosíꞌ, jee sukuáni núnasɨ́ re̱ꞌ jíkánꞌ táꞌvíꞌ víꞌí re̱ꞌ jie̱ꞌe̱ꞌ rán, ya̱ kuiñɨ ni̱ꞌin rán, ya̱ kujia iniꞌ rán nu̱u̱nꞌ tu̱ꞌun kúneí iniꞌ rán, jee ya̱ koo kutú rán nu̱u̱nꞌ nɨꞌɨ ya̱ kuíni maá Ndiosíꞌ.

¹³ Chi nuꞌuꞌ Pablo nástúvi ni̱ꞌ ya̱ naáꞌ nu̱u̱nꞌ rán, ya̱ sátíñú ni̱ꞌin nijia re̱ꞌ jie̱ꞌe̱ꞌ ránoꞌó, jín jie̱ꞌe̱ꞌ rá ñɨvɨ ya̱ kúneí iniꞌ ráa Cristo, ya̱ nééꞌ ráa nu̱u̱nꞌ ñuunꞌ Laodicea, jín nu̱u̱nꞌ ñuunꞌ Hierápolis.

¹⁴ Jee Lucas, ya̱ kúvi te̱e tátán ya̱ kúvi medico ya̱ ñúnúunꞌ‑ó, tájí re̱ꞌ tu̱ꞌun jíkátu̱ꞌún re̱ꞌ jie̱ꞌe̱ꞌ ránoꞌó, jee suni sukuán tájí Demas.

¹⁵ Jee naku̱ꞌva rán xá tu̱ꞌun ni̱ꞌ nu̱u̱nꞌ rá ñanitáꞌán‑ó, ya̱ kúneí iniꞌ ráa Cristo, ya̱ nééꞌ ñuunꞌ Laodicea, jín nu̱u̱nꞌ Ninfas, jín nu̱u̱nꞌ rá ñanitáꞌán‑ó ya̱ nútútú ráa veꞌi ña, ya̱ jíkátu̱ꞌún ni̱ꞌ jie̱ꞌe̱ꞌ ráa.

¹⁶ Sáá nɨꞌɨ kaꞌvi rán tu̱ꞌun níso nu̱u̱nꞌ tutuꞌ yaꞌá nu̱u̱nꞌ nta̱ká rán, jee suni ku̱ꞌva rán maa nu̱u̱nꞌ rá ñɨvɨ ya̱ kúneí iniꞌ ráa Cristo ya̱ nútútú ráa ñuunꞌ Laodicea, sáva kaꞌvi ráa maa. Jee suni sukuán kaꞌvi rán tutuꞌ nta̱jí ni̱ꞌ nu̱u̱nꞌ ráa.

¹⁷ Jee kachiꞌ rán xá nu̱u̱nꞌ Arquipo: “Ya̱ kuniꞌvɨꞌ iniꞌ nú nu̱u̱nꞌ tiñu nni̱ꞌi̱nꞌ nú saꞌá nú nu̱u̱nꞌ I̱toꞌoꞌ‑ó, sáva sikúnkuvi nú maa.”

¹⁸ Nuꞌuꞌ Pablo, jín naꞌá maáníꞌ tée ni̱ꞌ nu̱u̱nꞌ tutuꞌ yaꞌá tu̱ꞌun káva̱ꞌa yaꞌá ya̱ jíkátu̱ꞌún ni̱ꞌ jie̱ꞌe̱ꞌ ránoꞌó. Kunaꞌán rán nuꞌuꞌ ya̱ núꞌníꞌ ni̱ꞌ iniꞌ veka̱a. Na̱ ka̱ꞌ koo ma̱ni̱ꞌ iniꞌ Ndiosíꞌ ka̱ꞌ kune̱ꞌyá re̱ꞌ ránoꞌó. Sukuán koo. Amén.