Colosenses 3 - Mixteco del suroeste de Tlaxiaco Oaxaca

¹ Saájee nu̱u̱nꞌ nna̱tekuꞌ rán jín Cristo nsa̱ꞌá Ndiosíꞌ, kuéntáꞌ nxi̱nákóo re̱ꞌ yó jín Cristo nteñu rá níꞌiꞌ, saáva kuꞌun iniꞌ rán ya̱ kuneenu̱u̱nꞌ rán ya̱ íyó nu̱u̱nꞌ ñuunꞌ íyó súkún, nu̱u̱nꞌ nééꞌ Cristo ichi kuáꞌá Ndiosíꞌ, nu̱u̱nꞌ kúñáꞌnú Cristo.

² Kuꞌun iniꞌ rán kuneenu̱u̱nꞌ rán rá íyó nu̱u̱nꞌ ñuunꞌ íyó súkún, jee nsú jie̱ꞌe̱ꞌ rá íyó nu̱u̱nꞌ ñɨ̱vɨ́ yaꞌá.

³ Chi ya̱ ni̱ꞌi̱ꞌ rán jín Cristo, jee vitan jee íyó kutú ya̱ tékúꞌ rán jín re̱ꞌ, chi yɨ́ꞌɨ́ rán nu̱u̱nꞌ Ndiosíꞌ.

⁴ Jee ki̱vɨ̱ꞌ niji nijinꞌ Cristo, ya̱ xtékúꞌ re̱ꞌ yó jín re̱ꞌ nɨ́ɨ́nkání, saájee suni kiji nijinꞌ rán jín re̱ꞌ, jee viiꞌ kúñáꞌnú rán jín re̱ꞌ ranika̱ꞌ, nu̱u̱nꞌ tu̱u̱nꞌ maáréꞌ.

Jiáꞌnu ñɨvɨ ichi túꞌú ya̱ ntu̱ví sáma iniꞌ ráa jee jiáꞌnu ñɨvɨ ichi jiáá

⁵ Saáva xinóo rán ya̱ níyo iniꞌ rá ñɨvɨ ñɨ̱vɨ́ yaꞌá sáꞌá ráa, ya̱ ntu yɨ́ꞌɨ́ ráa xi̱ntíín Ndiosíꞌ, kuéntáꞌ ñaꞌniꞌ rán ya̱ níyo néꞌén iniꞌ rán, ya̱ íyó suꞌva: koto kúsíkɨ́ iniꞌ rán, koto sáꞌá néꞌí rán, koto ñúꞌún téní iniꞌ rán, koto níyo néꞌén iniꞌ rán, koto sáꞌá úꞌvi iniꞌ rán, ya̱ nuún kúvi‑i jín ya̱ néñu̱ꞌun rán nantíñú ya̱ nsú Ndiosíꞌ ví‑i.

⁶ Chi jie̱ꞌe̱ꞌ ya̱ sáꞌá ñɨvɨ rá tiñu yaꞌá, kítɨ́ꞌ iniꞌ Ndiosíꞌ néꞌyá re̱ꞌ ráa, jee kiji ya̱ xinóꞌo re̱ꞌ ráa, [ya̱ kújiááꞌ iniꞌ ráa nu̱u̱nꞌ re̱ꞌ].

⁷ Jee suni jíꞌín maárán nika rán jín rá tiñu yaꞌá rá tiempúꞌ ya̱ta̱ꞌ nékúvi, sáá ñaꞌnu rán ichi yukuán.

⁸ Soo vitan jee siíyo rán nu̱u̱nꞌ nta̱ká rá tiñu yaꞌá: ya̱ xe̱e̱nꞌ iniꞌ, ya̱ sáá xi̱ni̱ꞌ, ya̱ sáꞌá úꞌvi, ya̱ xtétu̱ꞌun, rá tu̱ꞌun néꞌí ya̱ kéne yuꞌú.

⁹ Jee koto kátúꞌún rán nu̱u̱nꞌ ɨɨn inka táꞌán rán, chi ya̱ nsu̱kuíta rán kua̱ꞌ níyo rán jín rá tiñu vá ya̱ nsa̱ꞌá rán tiempúꞌ ya̱ta̱ꞌ.

¹⁰ Jee vitan jee nsama iniꞌ rán nnuvi rán ñɨvɨ jiáá. Chi násaꞌá jiáá Ndiosíꞌ iniꞌ ánímaꞌ ránoꞌó, ne̱kua̱ꞌ kuniꞌ va̱ꞌa rán re̱ꞌ, sáva koo rán ka̱ꞌ kua̱ꞌ íyó maáréꞌ ya̱ nsa̱ꞌá jiáá re̱ꞌ ránoꞌó.

¹¹ Jee saáva ntu̱náꞌ ítú iniꞌ retú ntu kúvi‑ó ñɨvɨ Israel, áxí kúvi‑ó ñɨvɨ Israel, retú níso yɨkɨkúñu‑ó seña ñɨvɨ Israel naní circuncisión, áxí ntu níso‑ó maa, retú kúvi‑ó rá to̱ꞌo̱ꞌ, áxí ñɨvɨ ñuunꞌ láꞌví, retú kúvi‑ó musúꞌ ya̱ kéꞌen ñɨvɨ maa, áxí ñɨvɨ ya̱ yɨ́tíñú nu̱u̱nꞌ tiñu maáa. Chi I̱toꞌoꞌ kua̱íyó kuitɨꞌ‑ó ví Cristo, jee yɨ́ꞌɨ́ re̱ꞌ iniꞌ kua̱íyó kuitɨꞌ‑ó.

¹² Saáva sama iniꞌ rán, chi nka̱ji Ndiosíꞌ ránoꞌó sáva kuvi rán ñɨvɨ maáréꞌ, ya̱ nsa̱ꞌá sɨ́ɨ́n re̱ꞌ ránoꞌó nu̱u̱nꞌ ya̱ níváꞌa, jee ñúnúunꞌ re̱ꞌ ránoꞌó. Jee koo rán suꞌva: ya̱ kunáꞌví iniꞌ rán rá táꞌán rán, jín ya̱ kuva̱ꞌa iniꞌ rán kune̱ꞌyá rán táꞌán rán, jín ya̱ kuꞌun láꞌví iniꞌ rán, jín ya̱ koo másúꞌ iniꞌ rán, jín ya̱ káꞌnú koo iniꞌ rán jín táꞌán rán,

¹³ jín ya̱ keꞌneꞌ iniꞌ rán jín táꞌán rán, jín ya̱ kunekáꞌnú iniꞌ rán kune̱ꞌyá rán ɨɨn inka táꞌán rán, retú íyó kua̱chi nsa̱ꞌá néni ɨɨn rán si̱kɨ̱ꞌ néni ɨɨn inka rán. Kuéntáꞌ kua̱ꞌ nne̱káꞌnú iniꞌ Cristo nne̱ꞌyá re̱ꞌ ránoꞌó, jee suni sukuán ranika̱ꞌ saꞌá rán.

¹⁴ Jee nu̱u̱nꞌ kua̱íyó nu̱u̱nꞌ nɨꞌɨ ví ya̱ kunu̱u̱nꞌ rán táꞌán rán, chi yaꞌá sáꞌá ya̱ viiꞌ nuún iniꞌ rán jín táꞌán rán sáni íyó koo.

¹⁵ Jee ku̱ꞌva rán ya̱ tatúníꞌ Cristo iniꞌ ánímaꞌ rán sáva kuneeꞌ ñunkúún rán jín ɨɨn inka rán. Chi nkana Ndiosíꞌ ránoꞌó sáva koo rán suꞌva, sáva ɨɨn nuún koo iniꞌ rán, kuéntáꞌ ɨɨn ni yɨkɨkúñu kúvi rán. Jee koo ya̱ kútaꞌviꞌ rán nu̱u̱nꞌ Ndiosíꞌ.

¹⁶ Saájee íyó kuꞌun kutú nasɨ́kuitɨꞌ ka̱ꞌ tu̱ꞌun jie̱ꞌe̱ꞌ Cristo iniꞌ ánímaꞌ rán, jee suꞌva xinéꞌénꞌ rán jee nakutíñú rán nu̱u̱nꞌ rá táꞌán rán jín nta̱ká tu̱ꞌun níchí. Jee ne̱ jín ánímaꞌ rán kata rán nu̱u̱nꞌ rá yaaꞌ Tu̱ꞌun Ndiosíꞌ naní salmo, jín rá yaaꞌ himno ya̱ nákuetúꞌún rán Cristo, jín rá yaaꞌ ííꞌ jie̱ꞌe̱ꞌ Ndiosíꞌ, jee nakuatáꞌví rán re̱ꞌ.

¹⁷ Jee néni ɨɨn tu̱ꞌun káꞌánꞌ rán, áxí néni ɨɨn tiñu ya̱ sáꞌá rán, jee saꞌá va̱ꞌa rán nɨꞌɨ nu̱u̱nꞌ súví I̱toꞌoꞌ‑ó Jesús. Jee ku̱ꞌva rán ya̱ kútaꞌviꞌ rán nu̱u̱nꞌ Tátáꞌ‑ó Ndiosíꞌ, jie̱ꞌe̱ꞌ ya̱ nsa̱ꞌá Cristo jie̱ꞌe̱ꞌ ránoꞌó.

Na̱sa íyó sikúnkuvi ñɨvɨ ya̱ yɨ́ꞌɨ́ ráa nu̱u̱nꞌ Cristo nu̱u̱nꞌ rá táꞌán ráa

¹⁸ Ránoꞌó ñaꞌan nta̱na̱ꞌá, chiꞌi rán maárán naꞌá yɨɨ́ rán, chi yaꞌá íyó na̱a̱ꞌ ya̱ suꞌva sáꞌá rá ñaꞌan ya̱ yɨ́ꞌɨ́ ráa nu̱u̱nꞌ I̱toꞌoꞌ‑ó.

¹⁹ Jee ránoꞌó te̱e ya̱ nta̱na̱ꞌá, kunu̱u̱nꞌ rán ñaꞌan ya̱ kúvi ñasɨ́ꞌɨ́ rán, jee koto íyó xe̱e̱nꞌ rán jín ña.

²⁰ Jee ránoꞌó rá kuáchí, kaníjiá rán nu̱u̱nꞌ tátáꞌ rán jín nu̱u̱nꞌ nánáꞌ rán nta̱ká tiñu, chi kúváꞌa iniꞌ I̱toꞌoꞌ‑ó néꞌyá re̱ꞌ rá súchí kuáchí ya̱ sáꞌá ráa suꞌva.

²¹ Jee ránoꞌó ya̱ kúvi tátáꞌ, koto sáꞌá rán ya̱ kuꞌun táꞌvi iniꞌ rá se̱ꞌya rán, sáva nkúsóó iniꞌ ráa.

²² Jee ránoꞌó musúꞌ, nta̱ká tiñu kaníjiá rán rá te̱e ñunéꞌyúꞌ xí tiñu ya̱ kúvi i̱toꞌoꞌ rán. Nsú kua̱chi sáá néꞌyá ráa ránoꞌó kaníjiá rán, ya̱ kua̱chi núkú rán kuva̱ꞌa iniꞌ ráa kune̱ꞌyá ráa ránoꞌó. Chisaꞌ koo saɨn iniꞌ ánímaꞌ rán ya̱ kaníjiá rán ráa, jie̱ꞌe̱ꞌ sáꞌá ñáꞌnú rán nu̱u̱nꞌ Ndiosíꞌ.

²³ Jee néni ɨɨn tiñu ya̱ sáꞌá rán, jee ne̱ kukáñá iniꞌ ánímaꞌ rán saꞌá rán maa, ya̱ kuéntáꞌ nu̱u̱nꞌ máá I̱toꞌoꞌ‑ó Cristo sátíñú rán jee nsú nu̱u̱nꞌ ñɨvɨ.

²⁴ Chi ya̱ jíníꞌ rán ya̱ ni̱ꞌi̱nꞌ rán nu̱u̱nꞌ máá I̱toꞌoꞌ‑ó ta̱ꞌvi̱ꞌ, ya̱ jiáꞌa re̱ꞌ nu̱u̱nꞌ rá ñɨvɨ yɨ́ꞌɨ́ nu̱u̱nꞌ re̱ꞌ, chi nu̱u̱nꞌ maá I̱toꞌoꞌ‑ó Cristo sátíñú rán.

²⁵ Chi ñɨvɨ ya̱ sáꞌá tiñu niva̱ꞌa, suni sukuán ni̱ꞌi̱nꞌ‑i sánikua̱ꞌ tiñu niva̱ꞌa ya̱ nsa̱ꞌá‑a. Chi Ndiosíꞌ jee ntu tɨ́ɨn kuéntáꞌ re̱ꞌ na̱ ñɨvɨ kúvi ráa.