Colosenses 2 - Mixteco del suroeste de Tlaxiaco Oaxaca

¹ Chi kuíni ni̱ꞌ ya̱ kukáꞌnú iniꞌ rán ya̱ kue̱ꞌe̱ꞌ víꞌí núnasɨ́ ni̱ꞌ sáꞌá ni̱ꞌ fesáꞌ sáva kuvi ya̱ váꞌa ránoꞌó, jín rá ñɨvɨ ya̱ kúneí iniꞌ ráa Cristo ya̱ nééꞌ ráa nu̱u̱nꞌ ñuunꞌ Laodicea, jín ne̱ nta̱ká ñaniꞌ ya̱ ntu̱ví jíníꞌ ráa máá maáníꞌ.

² Sáꞌá ni̱ꞌ suꞌva sáva nuneí iniꞌ ánímaꞌ rá ñaniꞌ vá, jín sáva nuún koo iniꞌ ráa jie̱ꞌe̱ꞌ ñúnúunꞌ ráa ɨɨn inka rá táꞌán ráa. Jee sáva kuéntáꞌ kukúká ráa ya̱ kino̱o kutú ánímaꞌ ráa, jie̱ꞌe̱ꞌ ki̱ku̱ꞌun iniꞌ ráa Tu̱ꞌun Ndiosíꞌ, sáva kuniꞌ ráa tu̱ꞌun re̱ꞌ ya̱ nyɨ́ꞌɨ se̱ꞌí ne̱ yanaꞌán nékúvi, jee jie̱ꞌe̱ꞌ maá Cristo ví tu̱ꞌun vá.

³ Chi iniꞌ Cristo ñúꞌún nta̱ká tu̱ꞌun yɨ́yáꞌvi ka̱ꞌ ya̱ kúvi tu̱ꞌun níchí Ndiosíꞌ, jín ya̱ kúvi kuniꞌ‑ó jie̱ꞌe̱ꞌ Ndiosíꞌ.

⁴ Jee káchíꞌ ni̱ꞌ tu̱ꞌun yaꞌá nu̱u̱nꞌ rán, sáva ni ɨɨn ñɨvɨ ntu xínáꞌví ráa ránoꞌó jín tu̱ꞌun viiꞌ káꞌánꞌ ráa ya̱ nukú ráa sijínúꞌ ráa iniꞌ ránoꞌó.

⁵ Chi súnika̱ꞌ íyó íká ni̱ꞌ nu̱u̱nꞌ rán, soo ñúꞌún víꞌí iniꞌ ni̱ꞌ ránoꞌó. Jee kúsɨ́ɨꞌ víꞌí iniꞌ ánímaꞌ ni̱ꞌ chi jíníꞌ ni̱ꞌ ya̱ nuún jiáꞌnu na̱a̱ꞌ rán, jín ya̱ íñɨ́ ni̱ꞌin rán kúneí iniꞌ rán Cristo.

⁶ Jee saáva sánikua̱ꞌ njia̱ꞌayuꞌú rán ya̱ Cristo Jesús kúvi I̱toꞌoꞌ rán, jee suni sukuán kaka rán ichi na̱a̱ꞌ nu̱u̱nꞌ re̱ꞌ.

⁷ Jee kaka rán suꞌva jie̱ꞌe̱ꞌ kukutú rán kuiñɨ rán jín re̱ꞌ, kuéntáꞌ kúun ɨɨn yoꞌo yutun, jee kujia iniꞌ rán ya̱ kúneí iniꞌ rán re̱ꞌ, jee kuiñɨ ni̱ꞌin rán ya̱ kúneí iniꞌ rán re̱ꞌ, sánikua̱ꞌ nku̱tu̱ꞌva rán. Jee saꞌ víꞌí káꞌ ku̱ꞌva rán ya̱ kútaꞌviꞌ rán nu̱u̱nꞌ Ndiosíꞌ.

Nákueꞌnu jiáá‑ó sáꞌá Cristo chi yɨ́ꞌɨ́‑ó nu̱u̱nꞌ re̱ꞌ

⁸ Nito koo rán maárán ya̱ ntɨ́ɨn ñɨvɨ ránoꞌó, ya̱ sijínúꞌ ráa iniꞌ rán jín tu̱ꞌun váji xi̱ni̱ꞌ maáráa, jín tu̱ꞌun ka̱ꞌá ya̱ xínáꞌví. Chi rá tu̱ꞌun yukuán kétáꞌán jín rá ñujiínꞌ va̱ji ya̱ta̱ꞌ, ya̱ kétáꞌán jín rá costumbre xínéꞌénꞌ ñɨvɨ ñɨ̱vɨ́ yaꞌá, ya̱ ntu yɨ́ꞌɨ́ ráa naꞌá Cristo. Jee ntu kétáꞌán rá tu̱ꞌun vá jín tu̱ꞌun jie̱ꞌe̱ꞌ Cristo.

⁹ Chi yɨ́ꞌɨ́ kua̱ꞌ nɨꞌɨ ya̱ íyó maá Ndiosíꞌ iniꞌ Cristo ya̱ kúvi re̱ꞌ te̱e ya̱ íyó yɨkɨkúñu re̱ꞌ.

¹⁰ Jee kukánáa ánímaꞌ rán jín nɨꞌɨ kuitɨꞌ ya̱ váji ne̱ nu̱u̱nꞌ Ndiosíꞌ ne̱ natɨɨn rán iniꞌ maáréꞌ, jie̱ꞌe̱ꞌ ya̱ yɨ́ꞌɨ́ rán nu̱u̱nꞌ Cristo. Chi Cristo ví ya̱ kúñáꞌnú nu̱u̱nꞌ nta̱ká ya̱ nísotíñú ráa jín ya̱ kúñáꞌnú ráa, [va̱ni nu̱u̱nꞌ ñɨvɨ, va̱ni nu̱u̱nꞌ ta̱chi̱ꞌ, va̱ni nu̱u̱nꞌ najiáꞌáꞌ ííꞌ Ndiosíꞌ].

¹¹ Jee jie̱ꞌe̱ꞌ ya̱ yɨ́ꞌɨ́ rán nu̱u̱nꞌ Cristo, jee saáva níso rán seña Ndiosíꞌ, soo nsáꞌ kúvi ya̱ nsiíyo ñɨvɨ ntíꞌ ñɨɨn kuéntáꞌ sáꞌá rá ñɨvɨ Israel. Chisaꞌ nsiíyo re̱ꞌ ránoꞌó xi̱ntíín kua̱chi ya̱ níyo néꞌén iniꞌ rán saꞌá rán jín ñunéꞌyúꞌ kua̱chi. Suꞌva tée Cristo seña Ndiosíꞌ yó.

¹² Jee ya ña̱nuté rán kúvi kuéntáꞌ ni̱ꞌi̱ꞌ rán jee nyɨse̱ꞌí rán jín Cristo, sáá ni̱ꞌi̱ꞌ re̱ꞌ jee nyɨꞌɨ se̱ꞌí re̱ꞌ. Jee sukuán jee suni kuéntáꞌ nxi̱nátekuꞌ i̱i̱ꞌ Ndiosíꞌ ránoꞌó jín Cristo, jie̱ꞌe̱ꞌ kúneí iniꞌ rán fuersáꞌ ííꞌ ni̱ꞌin níso Ndiosíꞌ. Fuersáꞌ ííꞌ vá ví ya̱ ña̱tíñú re̱ꞌ sáva nxi̱nátekuꞌ i̱i̱ꞌ re̱ꞌ Cristo jee nxi̱nákóo re̱ꞌ maa jín yɨkɨkúñu‑u nteñu rá níꞌiꞌ.

¹³ Jee ránoꞌó chi nkuvi rán kuéntáꞌ ñɨvɨ níꞌiꞌ nu̱u̱nꞌ Ndiosíꞌ jie̱ꞌe̱ꞌ kua̱chi sáꞌá rán, jín jie̱ꞌe̱ꞌ chi ntu níso yɨkɨkúñu rán seña Ndiosíꞌ, chi nsú ñɨvɨ Israel ví rán. Soo vitan chi nna̱xtekúꞌ re̱ꞌ ránoꞌó nɨ́ɨ́nkání jín Cristo, sáá nna̱xtekúꞌ re̱ꞌ maa, chi nne̱káꞌnú iniꞌ re̱ꞌ jie̱ꞌe̱ꞌ nta̱ká rá kua̱chi rán.

¹⁴ Chi nsi̱jíta re̱ꞌ maá acta ya̱ níso rá kua̱chi si̱kɨ̱ꞌ‑ó ya̱ nsi̱jíta‑a yó, jie̱ꞌe̱ꞌ ya̱ nta̱túníꞌ re̱ꞌ nu̱u̱nꞌ‑ó. Jee nsiíyo re̱ꞌ acta vá, sáá ni̱ꞌi̱ꞌ Cristo nu̱u̱nꞌ kurúsiꞌ, chi íyó kuéntáꞌ nkani Ndiosíꞌ acta vá nu̱u̱nꞌ kurúsiꞌ, sáva nchu̱náán nkáꞌnú Cristo maa.

¹⁵ Jee sáá ni̱ꞌi̱ꞌ Cristo nu̱u̱nꞌ kurúsiꞌ, nku̱neí re̱ꞌ si̱kɨ̱ꞌ rá ta̱chi̱ꞌ kíni ya̱ kúñáꞌnú jín ya̱ níso ráa fuersáꞌ. Jee nstúvi nijinꞌ re̱ꞌ maa, kuéntáꞌ síáꞌa nijinꞌ rá ñɨvɨ ɨɨn te̱e nu̱chitú nu̱u̱nꞌ kua̱ꞌa̱nꞌ‑a veka̱a. Jee suꞌva nstúvi re̱ꞌ ya̱ kúñáꞌnú re̱ꞌ nu̱u̱nꞌ ráa, sáá ni̱ꞌi̱ꞌ re̱ꞌ nu̱u̱nꞌ kurúsiꞌ.

Nánukú‑ó ya̱ váꞌa ya̱ íyó ne̱ súkún

¹⁶ Jee saáva koto jiáꞌayuꞌú rán ya̱ sijíta ñɨvɨ ránoꞌó jie̱ꞌe̱ꞌ rá yájíꞌ rán, áxí jie̱ꞌe̱ꞌ ya̱ jíꞌi rán, áxí jie̱ꞌe̱ꞌ ya̱ néñu̱ꞌun rán áxí ntu̱ví néñu̱ꞌun rán rá viko sáꞌá rá ñɨvɨ vá ta kui̱ya̱ꞌ, áxí rá viko sáꞌá ráa sáá nákuneeꞌ yúté yo̱o̱ꞌ, áxí rá ki̱vɨ̱ꞌ nájiáví.

¹⁷ Soo nɨꞌɨ ñujiínꞌ yaꞌá kúvi ráa kuéntáꞌ ɨɨn xi̱ne̱ꞌñu̱ꞌ ya̱ xínéꞌénꞌ‑e sáá koo maáréꞌ ya̱ kiji. Soo Cristo kúvi nijia ya̱ nkiji yaꞌá.

¹⁸ Jee koto jiáꞌa rán ya̱ xináꞌví ni ɨɨn ñɨvɨ ránoꞌó ya̱ kasɨꞌ ráa ni̱ꞌi̱nꞌ rán ta̱ꞌvi̱ꞌ rán, chi yɨ́tuvi ráa ya̱ xtúvi láꞌví ráa iniꞌ rán, jín ya̱ kuneñu̱ꞌun ráa rá najiáꞌáꞌ ííꞌ Ndiosíꞌ. Jee kíní ráa maáráa nu̱u̱nꞌ tiñu ya̱ ntu jíníꞌ kájíkuitɨꞌ ráa. Jee jiáni ka̱ꞌá téyɨ́ɨ́ iniꞌ ráa, chi antúníꞌ ráa yɨ́ꞌɨ́ xi̱ntíín ya̱ níyo néꞌén iniꞌ ráa, ya̱ ntu yɨ́ꞌɨ́‑ɨ naꞌá Ndiosíꞌ.

¹⁹ Chi ntu̱ví íñɨ́ ráa jín Cristo, ya̱ yósóꞌ‑o nu̱u̱nꞌ‑ó kuéntáꞌ kúvi re̱ꞌ xi̱ni̱ꞌ nu̱u̱nꞌ‑ó. Jee kúvi‑ó kuéntáꞌ yɨkɨkúñu re̱ꞌ, chi náketáꞌán‑ó jín re̱ꞌ, kuéntáꞌ nééꞌ táꞌán yɨkɨkúñu jín xi̱ni̱ꞌ jín rá nu̱u̱nꞌ ñútáꞌán jín rá tu̱chi fuersáꞌ. Jee táji re̱ꞌ ya̱ jíniñúꞌún‑ó sáva kujia iniꞌ‑ó sáni síkuéꞌnu Ndiosíꞌ yó.

²⁰ Jee nu̱u̱nꞌ ya̱ níꞌiꞌ rán jín Cristo nu̱u̱nꞌ kurúsiꞌ, jee ya ni̱ꞌi̱ꞌ rán nu̱u̱nꞌ rá costumbre xínéꞌénꞌ ñɨvɨ ñɨ̱vɨ́ yaꞌá, ya̱ ntu yɨ́ꞌɨ́ ráa naꞌá re̱ꞌ. Saáva, ¿na̱ kuvi chi chíꞌi rán maárán xi̱ntíín rá costumbre vá, sáva kaníjiá rán ya̱ tátúníꞌ ráa, kuéntáꞌ yɨ́ꞌɨ́ rán ñujiínꞌ ráa? Rá costumbre vá káchíꞌ kuéntáꞌ yaꞌá:

²¹ “Koto tɨ́ɨn rán yaꞌá, ni koto yájíꞌ rán yukuán, ni koto kéꞌí rán i̱ña̱ꞌ”, káchíꞌ ráa.

²² Chi rá costumbre vá káꞌánꞌ ráa jie̱ꞌe̱ꞌ rá nantíñú ya̱ náánꞌ‑a sáá jiátíñú‑ó maa. Chi rá costumbre vá kétáꞌán jín tu̱ꞌun máni ya̱ rá ñɨvɨ tátúníꞌ ráa jín xínéꞌénꞌ ráa.

²³ Jee jiáni iniꞌ ñɨvɨ ya̱ tu̱ꞌun níchí ví tu̱ꞌun yukuán, chi yɨ́tíñú ráa síkúnkuvi ráa maa sáva néñu̱ꞌun ni̱ꞌin ráa Ndiosíꞌ sáni kuíni ráa, jín ya̱ xtúvi láꞌví iniꞌ ráa, jín ya̱ xínóꞌo ráa yɨkɨkúñu ráa. Soo ntu̱náꞌ nu̱u̱nꞌ íyótiñu rá yukuán sáva kasɨꞌ‑ɨ nu̱u̱nꞌ ya̱ níyo néꞌén iniꞌ ráa saꞌá ráa jín yɨkɨkúñu kua̱chi ráa.