Colosenses 1 - Mixteco del suroeste de Tlaxiaco Oaxaca

Tée Pablo tutuꞌ nu̱u̱nꞌ rá ñɨvɨ ya̱ kúneí iniꞌ ráa Cristo ya̱ kútútú ráa ñuunꞌ Colosas

¹ Nuꞌuꞌ Pablo, ya̱ nísotíñú ni̱ꞌ tiñu apóstol Cristo Jesús, chi nchu̱ichí re̱ꞌ nuꞌuꞌ sáni nkuíni Ndiosíꞌ, jee ni núvíꞌ ni̱ꞌ jín ñaniꞌ‑ó Timoteo,

² tájí ránꞌ tutuꞌ yaꞌá kua̱jiaaꞌ nu̱u̱nꞌ ránoꞌó ñaniꞌ, ya̱ nsa̱ꞌá sɨ́ɨ́n Ndiosíꞌ ránoꞌó, sáva kɨꞌɨ rán nu̱u̱nꞌ Cristo Jesús, ya̱ nééꞌ rán ñuunꞌ Colosas, ya̱ kúvi rán ñaniꞌ‑ó ya̱ síkúnkuvi na̱a̱ꞌ rán nu̱u̱nꞌ re̱ꞌ. Na̱ ka̱ꞌ koo ma̱ni̱ꞌ iniꞌ Tátáꞌ‑ó Ndiosíꞌ [jín I̱toꞌoꞌ‑ó Jesús ya̱ kúvi Cristo] kune̱ꞌyá ráa ránoꞌó, jín ya̱ kuneeꞌ va̱ꞌa rán saꞌá ráa.

Káꞌánꞌ Pablo jín Ndiosíꞌ jie̱ꞌe̱ꞌ rá ñɨvɨ kúneí iniꞌ ráa Cristo

³ Sukuáni jiáꞌa ránꞌ ya̱ kútaꞌviꞌ nu̱u̱nꞌ Ndiosíꞌ, ya̱ kúvi Tátáꞌ I̱toꞌoꞌ‑ó Jesús ya̱ kúvi Cristo, sáá káꞌánꞌ ránꞌ jín re̱ꞌ jie̱ꞌe̱ꞌ ránoꞌó.

⁴ Chi nteso̱ꞌo ránꞌ tu̱ꞌun jie̱ꞌe̱ꞌ ya̱ kúneí iniꞌ rán Cristo Jesús, jín jie̱ꞌe̱ꞌ ya̱ ñúnúunꞌ rán nta̱ká rá ñɨvɨ ya̱ nsa̱ꞌá sɨ́ɨ́n Ndiosíꞌ ráa sáva kɨꞌɨ ráa nu̱u̱nꞌ Cristo Jesús.

⁵ Jiáꞌnu rán suꞌva chi jie̱ꞌe̱ꞌ ni ka̱ꞌ íyó tu̱ꞌun neí iniꞌ rán ni̱ꞌi̱nꞌ rán ta̱ꞌvi̱ꞌ ya̱ nanitáꞌvíꞌ rán ya̱ ñúꞌún va̱ꞌa ne̱ ñuunꞌ íyó súkún nu̱u̱nꞌ íyó Ndiosíꞌ. Jie̱ꞌe̱ꞌ ta̱ꞌvi̱ꞌ vá ví ya̱ ya nteso̱ꞌo rán nu̱u̱nꞌ tu̱ꞌun na̱a̱ꞌ, ya̱ kúvi tu̱ꞌun váꞌa jie̱ꞌe̱ꞌ Cristo, naní evangelio.

⁶ Tu̱ꞌun vá nkenta nu̱u̱nꞌ rán, sáni kénta‑a nu̱u̱nꞌ rá ñɨvɨ nɨꞌɨ ñɨ̱vɨ́. Sáꞌá tu̱ꞌun váꞌa vá ya̱ váꞌa iniꞌ ráa, sánikua̱ꞌ ɨɨn yutun váꞌa kúun ya̱ vixíꞌ váꞌa, jee jiáꞌnu ka̱ꞌ tu̱ꞌun vá iniꞌ ráa. Suꞌva sáꞌá tu̱ꞌun vá sánikua̱ꞌ suni sukuán sáꞌá‑a jín rán ne̱ sáá ki̱vɨ̱ꞌ nteso̱ꞌo rán maa, jee nku̱káꞌnú noo iniꞌ rán ya̱ nááꞌ nijia íyó ma̱ni̱ꞌ iniꞌ Ndiosíꞌ néꞌyá re̱ꞌ yó, sú ntu íyó ni̱ꞌi̱nꞌ‑ó ya̱ koo ma̱ni̱ꞌ iniꞌ re̱ꞌ kune̱ꞌyá re̱ꞌ yó.

⁷ Suꞌva nku̱tu̱ꞌva rán maa sáni nxi̱néꞌénꞌ Epafras ránoꞌó. Suvire̱ꞌ ñúnúunꞌ‑ó re̱ꞌ, jee kúvi re̱ꞌ musúꞌ nu̱u̱nꞌ Cristo, ya̱ táꞌán sátíñú nkáá re̱ꞌ jín ránuꞌuꞌ nu̱u̱nꞌ tiñu Cristo. Chi síkúnkuvi na̱a̱ꞌ nijia re̱ꞌ nu̱u̱nꞌ tiñu Cristo, ya̱ kúvi ya̱ váꞌa ránoꞌó.

⁸ Jee suni nna̱kani re̱ꞌ nu̱u̱nꞌ ránuꞌuꞌ ya̱ ñúnúunꞌ rán ɨɨn inka táꞌán rán jie̱ꞌe̱ꞌ yɨ́ꞌɨ́ Ta̱chi̱ꞌ Ííꞌ Ndiosíꞌ iniꞌ ránoꞌó.

⁹ Saájee, ne̱ ki̱vɨ̱ꞌ ya̱ nteso̱ꞌo ráníꞌ tu̱ꞌun vá jie̱ꞌe̱ꞌ ránoꞌó, jee ntu̱ví síkɨ́kui̱ñɨ̱ꞌ ránꞌ maáránꞌ ya̱ káꞌánꞌ ránꞌ jín Ndiosíꞌ jie̱ꞌe̱ꞌ ránú. Jee jíkánꞌ táꞌvíꞌ ránꞌ nu̱u̱nꞌ re̱ꞌ ya̱ chitú noo rán kukáꞌnú iniꞌ rán ya̱ kuíni re̱ꞌ, jie̱ꞌe̱ꞌ ya̱ sáꞌá Ta̱chi̱ꞌ Ííꞌ re̱ꞌ ya̱ nta̱ká nu̱u̱nꞌ kuníchí xíniꞌ rán jie̱ꞌe̱ꞌ tu̱ꞌun re̱ꞌ, jín ya̱ ki̱ku̱ꞌun iniꞌ rán tu̱ꞌun re̱ꞌ.

¹⁰ Suꞌva jíkánꞌ táꞌvíꞌ ránꞌ nu̱u̱nꞌ Ndiosíꞌ, sáva kaka na̱a̱ꞌ rán sánikua̱ꞌ íyó kueꞌnu ñɨvɨ ya̱ yɨ́ꞌɨ́ ráa nu̱u̱nꞌ I̱toꞌoꞌ‑ó, sáva suꞌva sukuáni kuva̱ꞌa iniꞌ re̱ꞌ kune̱ꞌyá re̱ꞌ na̱sa jíka rán. Jee suꞌva saꞌá rán nta̱ká tiñu váꞌa, kuéntáꞌ ɨɨn yutun jiáꞌa ya̱ vixíꞌ váꞌa. Jee kukueꞌeꞌ ka̱ꞌ kukáꞌnú noo iniꞌ rán na̱sa iniꞌ Ndiosíꞌ.

¹¹ Jee jíkánꞌ táꞌvíꞌ ránꞌ ya̱ taji re̱ꞌ fuersáꞌ nu̱u̱nꞌ rán, ya̱ váji ne̱ nu̱u̱nꞌ nɨꞌɨ fuersáꞌ ííꞌ níꞌin níso re̱ꞌ, ya̱ na̱ ka̱ꞌ kúñáꞌnú, sáva kuni̱ꞌin rán kaka rán ichi re̱ꞌ jee káꞌnú koo iniꞌ rán.

¹² Jee sɨ̱ɨ̱ꞌ koo iniꞌ ánímaꞌ rán ku̱ꞌva rán ya̱ kútaꞌviꞌ rán nu̱u̱nꞌ Tátáꞌ‑ó Ndiosíꞌ, chi maáréꞌ nsa̱túꞌva yó sáá koo‑ó, sáva kuvi kuvisava‑ó ta̱ꞌvi̱ꞌ ya̱ ku̱ꞌva re̱ꞌ nu̱u̱nꞌ rá ñɨvɨ nxi̱nóo sɨ́ɨ́n re̱ꞌ ráa, sáva kuvi ráa se̱ꞌya ñuunꞌ íyó súkún, nu̱u̱nꞌ túúnꞌ ñuꞌunꞌ re̱ꞌ.

¹³ Chi maá Ndiosíꞌ nna̱kani núne re̱ꞌ yó nsi̱káku re̱ꞌ yó xi̱ntíín kua̱chi‑ó jín xi̱ntíín Satanás, nu̱u̱nꞌ níyo kuéntáꞌ ñaꞌnu‑ó nu̱u̱nꞌ neenꞌ. Jee nna̱siáꞌa re̱ꞌ yó naꞌá Se̱ꞌya re̱ꞌ ya̱ ñúnúunꞌ re̱ꞌ, jee tátúníꞌ‑i nu̱u̱nꞌ‑ó.

¹⁴ Jie̱ꞌe̱ꞌ yɨ́ꞌɨ́‑ó nu̱u̱nꞌ Se̱ꞌya re̱ꞌ, jee ni̱ꞌi̱ꞌ‑i sáva nchu̱náán nkáꞌnú‑u jie̱ꞌe̱ꞌ kua̱chi‑ó, sáva nakani núne Ndiosíꞌ yó nu̱u̱nꞌ kua̱chi‑ó. Jee yukuán kúvi ya̱ nékáꞌnú iniꞌ re̱ꞌ jie̱ꞌe̱ꞌ kua̱chi‑ó.

Nnuma̱ni̱ꞌ‑ó jín Ndiosíꞌ jie̱ꞌe̱ꞌ ya̱ níꞌiꞌ Cristo

¹⁵ Maá Se̱ꞌya Ndiosíꞌ ɨɨn ni kúvi re̱ꞌ jín Ndiosíꞌ, jee nkiji re̱ꞌ ñɨ̱vɨ́ yaꞌá sáva tu̱vi nijinꞌ sáá íyó Ndiosíꞌ ya̱ ntu̱ví túvi kuniꞌ nijinꞌ‑ó. Jee kúñáꞌnú Se̱ꞌya re̱ꞌ ka̱ꞌ nu̱u̱nꞌ nta̱ká ya̱ nsa̱ꞌá re̱ꞌ kuéntáꞌ ɨɨn se̱ꞌya xíꞌnañúꞌún.

¹⁶ Chi nsa̱ꞌá Ndiosíꞌ ya̱ nsa̱ꞌá Se̱ꞌya re̱ꞌ nɨꞌɨ kuitɨꞌ ya̱ ña̱ko̱o: nta̱ká rá íyó súkún jín rá íyó nu̱u̱nꞌ ñɨ̱vɨ́, nta̱ká rá túvi nijinꞌ néꞌyá‑ó, jín rá ntu̱ví túvi néꞌyá‑ó, [nta̱ká rá te̱e jín rá ta̱chi̱ꞌ jín rá najiáꞌáꞌ ííꞌ Ndiosíꞌ], ya̱ kúvi ráa rá i̱toꞌoꞌ ñáꞌnú ka̱ꞌ, ya̱ tátúníꞌ ráa, ya̱ nísotíñú ráa, ya̱ kúñáꞌnú ráa. Jee Ndiosíꞌ nsa̱ꞌá ya̱ nsa̱ꞌá Se̱ꞌya re̱ꞌ nta̱ká ya̱ íyó, jee nsa̱ꞌá Se̱ꞌya re̱ꞌ nɨꞌɨ sáva kuvi‑i vá.

¹⁷ Jee ya̱ íyó Cristo ne̱ ntiáꞌan ka̱ꞌ kijiéꞌé kiko̱o nta̱ká ya̱ íyó, jee néen kuéntáꞌ va̱ꞌa re̱ꞌ nɨꞌɨ.

¹⁸ Jee maáréꞌ kúñáꞌnú yósóꞌ re̱ꞌ nu̱u̱nꞌ maáó ya̱ kúneí iniꞌ‑ó re̱ꞌ, kuéntáꞌ yósóꞌ xi̱ni̱ꞌ nu̱u̱nꞌ yɨkɨkúñu, jee maáó kúvi‑ó kuéntáꞌ yɨkɨkúñu re̱ꞌ, ya̱ kúvi‑ó ñɨvɨ ya̱ nstútú Ndiosíꞌ. Jee Cristo ví ya̱ xitékúꞌ re̱ꞌ yó nɨ́ɨ́nkání jín re̱ꞌ, chi xíꞌnañúꞌún re̱ꞌ ví ya̱ nna̱tekuꞌ i̱i̱ꞌ re̱ꞌ jín yɨkɨkúñu re̱ꞌ nteñu rá níꞌiꞌ, sáva máá kúñáꞌnú nasɨ́kuitɨꞌ kúvi re̱ꞌ nu̱u̱nꞌ kua̱íyó kuitɨꞌ.

¹⁹ Chi sɨ̱ɨ̱ꞌ nkuvi iniꞌ Ndiosíꞌ ya̱ nchi̱tú iniꞌ Cristo kua̱ꞌ nɨꞌɨ ya̱ íyó maá Ndiosíꞌ.

²⁰ Jee suni sɨ̱ɨ̱ꞌ nkuvi iniꞌ Ndiosíꞌ nnuma̱ni̱ꞌ re̱ꞌ jín nɨꞌɨ kuitɨꞌ jie̱ꞌe̱ꞌ Se̱ꞌya re̱ꞌ. Chi nnuma̱ni̱ꞌ re̱ꞌ jie̱ꞌe̱ꞌ níꞌiꞌ Se̱ꞌya re̱ꞌ nu̱u̱nꞌ kurúsiꞌ jee ñatɨ ni̱ñɨ̱ꞌ‑ɨ. Jie̱ꞌe̱ꞌ Se̱ꞌya re̱ꞌ nnuma̱ni̱ꞌ re̱ꞌ jín nɨꞌɨ, va̱ni nta̱ká ya̱ íyó iniꞌ ñɨ̱vɨ́ yaꞌá áxí va̱ni nta̱ká ya̱ íyó súkún.

²¹ Jee ránoꞌó chi tiempúꞌ ya̱ta̱ꞌ jee nkuvi rán to̱ꞌo̱ꞌ nu̱u̱nꞌ re̱ꞌ nékúvi, chi ne̱ antúníꞌ rán niniꞌ u̱ꞌvi̱ꞌ rán re̱ꞌ, jie̱ꞌe̱ꞌ rá tiñu niva̱ꞌa nsa̱ꞌá rán nékúvi. Soo vitan chi nnuma̱ni̱ꞌ re̱ꞌ jín rán,

²² jie̱ꞌe̱ꞌ níꞌiꞌ Se̱ꞌya re̱ꞌ sáá nkenta‑a kúvi‑i te̱e ñunéꞌyúꞌ. Nsa̱ꞌá re̱ꞌ suꞌva sáva saꞌá sɨ́ɨ́n re̱ꞌ yó sáva nkɨ́ꞌɨ‑ó ka̱ꞌ nu̱u̱nꞌ ya̱ niváꞌa, jee nkóo téꞌén si̱kɨ̱ꞌ‑ó, jee ni ntu̱náꞌ kúvi chikua̱chi ka̱ꞌ yó, sáá saꞌá re̱ꞌ ya̱ kuiñɨ‑ó ichinúúnꞌ re̱ꞌ.

²³ Jee sukuán sáꞌá re̱ꞌ, nu̱u̱nꞌ na̱a̱ꞌ nijia ya̱ kúníꞌin rán kúkutú rán kúneí iniꞌ rán Cristo, jee íñɨ́ ni̱ꞌin rán. Jee ntu núsɨ́ɨ́n rán nu̱u̱nꞌ ya̱ íyó tu̱ꞌun neí iniꞌ‑ó ya̱ nanitáꞌvíꞌ‑ó, ya̱ táji tu̱ꞌun váꞌa jie̱ꞌe̱ꞌ Cristo nu̱u̱nꞌ‑ó, ya̱ nteso̱ꞌo rán. Chi tu̱ꞌun váꞌa yaꞌá tékútu̱ꞌún‑u kua̱íyó rá ñuunꞌ ñɨ̱vɨ́ yaꞌá. Jee nuꞌuꞌ Pablo nkenta kúvi ni̱ꞌ ɨɨn ya̱ jiátíñú Ndiosíꞌ nuꞌuꞌ stékútu̱ꞌún ni̱ꞌ tu̱ꞌun váꞌa vá.

Pablo néetiñu si̱kɨ̱ꞌ re̱ꞌ kuneen kuéntáꞌ re̱ꞌ rá ñɨvɨ ya̱ kúneí iniꞌ ráa Cristo

²⁴ Vitan jee nuꞌuꞌ, ne̱ ánímaꞌ ni̱ꞌ kúsɨ́ɨꞌ víꞌí iniꞌ ni̱ꞌ ya̱ nóꞌo ni̱ꞌ jie̱ꞌe̱ꞌ tiñu sáꞌá ni̱ꞌ jie̱ꞌe̱ꞌ ya̱ váꞌa ránoꞌó. Sáni nnoꞌo Cristo jie̱ꞌe̱ꞌ rá ñɨvɨ ya̱ kúneí iniꞌ ráa re̱ꞌ, suni sukuán ne̱ yɨkɨkúñu máá maáníꞌ nóꞌo ni̱ꞌ ni síkúnkuvi ni̱ꞌ tiñu Cristo jie̱ꞌe̱ꞌ ya̱ váꞌa maáráa, ya̱ kúvi ráa kuéntáꞌ yɨkɨkúñu re̱ꞌ, ya̱ kúvi ráa ñɨvɨ re̱ꞌ ya̱ nstútú re̱ꞌ.

²⁵ Chi nkenta ni̱ꞌ kúvi ni̱ꞌ ɨɨn ya̱ jiátíñú Ndiosíꞌ nuꞌuꞌ jie̱ꞌe̱ꞌ ya̱ váꞌa ráa. Sukuán nte̱tíñú Ndiosíꞌ nuꞌuꞌ ya̱ kuniso ni̱ꞌ tiñu vá sáva sikúnkuvi ni̱ꞌ ya̱ stékútu̱ꞌún ni̱ꞌ Tu̱ꞌun Ndiosíꞌ.

²⁶ Jee tu̱ꞌun yaꞌá nkuvi tu̱ꞌun yuꞌuꞌ ya̱ nyɨse̱ꞌí‑i nékúvi, nɨꞌɨ tiempúꞌ ya̱ta̱ꞌ, nu̱u̱nꞌ rá ñɨvɨ ntekuꞌ ráa tióꞌ ya̱ta̱ꞌ. Soo vitan chi ya nstúvi re̱ꞌ maa nu̱u̱nꞌ rá ñɨvɨ ya̱ nsa̱ꞌá sɨ́ɨ́n re̱ꞌ sáva kɨꞌɨ ráa nu̱u̱nꞌ re̱ꞌ.

²⁷ Jee nkuini iniꞌ re̱ꞌ ya̱ sikúkáꞌnú re̱ꞌ iniꞌ ráa, ya̱ na̱ ka̱ꞌ viiꞌ kúñáꞌnú yɨ́yáꞌvi ka̱ꞌ ví ya̱ váꞌa, ya̱ níso tu̱ꞌun yuꞌuꞌ yaꞌá, ya̱ jiáꞌa re̱ꞌ nu̱u̱nꞌ rá ñɨvɨ ntu kúvi Israel. Tu̱ꞌun yaꞌá kúvi ya̱ yɨ́ꞌɨ́ Cristo iniꞌ ánímaꞌ rán. Jee saáva íyó tu̱ꞌun neí iniꞌ‑ó ya̱ kuneeꞌ‑ó nɨ́ɨ́nkání jín re̱ꞌ, ya̱ nu̱u̱nꞌ viiꞌ nasɨ́kuitɨꞌ ví‑i.

²⁸ Jee jie̱ꞌe̱ꞌ Cristo stékútu̱ꞌún ránꞌ, jee stúꞌva ránꞌ, jee xínéꞌénꞌ ránꞌ nu̱u̱nꞌ nta̱ká ñɨvɨ nɨꞌɨ tu̱ꞌun níchí nta̱jí Ndiosíꞌ, sáva saꞌá ránꞌ ya̱ kujia iniꞌ nta̱ká ráa nu̱u̱nꞌ Ndiosíꞌ, ya̱ yɨ́ꞌɨ́ ráa nu̱u̱nꞌ Cristo.

²⁹ Jee saáva núnasɨ́ ni̱ꞌ saꞌá ni̱ꞌ fesáꞌ saꞌá ni̱ꞌin ni̱ꞌ tiñu yaꞌá, jie̱ꞌe̱ꞌ ya̱ sátíñú ni̱ꞌin Cristo iniꞌ nuꞌuꞌ, jín fuersáꞌ níso re̱ꞌ.