Apoclipsis 9 - Mixteco del suroeste de Tlaxiaco Oaxaca

¹ Saájee najiáꞌáꞌ ííꞌ úꞌúnꞌ nti̱vɨ̱ꞌ‑ɨ trompeta‑a. Jee niniꞌ ni̱ꞌ ɨɨn tiu̱u̱nꞌ nkene‑e ne̱ súkún va̱ji‑i ñe̱te̱ꞌ‑e nu̱u̱nꞌ ñu̱ꞌún iniꞌ ñɨ̱vɨ́. Jee nni̱ꞌi̱nꞌ‑i nakáa ya̱ jíne‑e yuꞌú numaꞌ ya̱ ntu jínu nu̱u̱nꞌ kúnú‑u.

² Saájee nine‑e yuꞌú numaꞌ kúnú vá, jee nkene ñu̱ꞌma̱ꞌ yukuán kuéntáꞌ kua̱ꞌ kéne ñu̱ꞌma̱ꞌ ɨɨn i̱tu̱nꞌ máá nasɨ́ víꞌí. Jee ñu̱ꞌma̱ꞌ ya̱ kéne numaꞌ vá nna̱sáneenꞌ‑e nka̱niiꞌ jee ñasɨꞌ‑ɨ nu̱u̱nꞌ ta̱chi̱ꞌ víjin.

³ Jee nu̱u̱nꞌ ñu̱ꞌma̱ꞌ vá nkene víꞌí rá lito̱o̱ꞌ máá náꞌnú ya̱ kútáꞌán jín ñu̱ꞌma̱ꞌ, jee nkenta rátíꞌ nu̱u̱nꞌ ñu̱ꞌún. Jee nni̱ꞌi̱nꞌ rátíꞌ nísotíñú rátíꞌ ya̱ saꞌá kini rátíꞌ kuéntáꞌ kua̱ꞌ sáꞌá rá ti̱suꞌmaꞌ xe̱e̱nꞌ ya̱ íyó iniꞌ ñɨ̱vɨ́.

⁴ Jee nta̱túníꞌ nu̱u̱nꞌ rátíꞌ ya̱ ntu íyó saꞌá kini rátíꞌ iteꞌ ya̱ íyó iniꞌ ñɨ̱vɨ́, ni yu̱ku̱ꞌ kuíí, ni sú ɨɨn rá yutun, chisaꞌ kua̱chi kuitɨꞌ nta̱ká rá ñɨvɨ ya̱ ntu níso seyúꞌ Ndiosíꞌ te̱e̱nꞌ ráa ví ya̱ saꞌá kini rátíꞌ ráa.

⁵ Soo ntu nníꞌínꞌ rátíꞌ nísotíñú rátíꞌ ya̱ kaꞌniꞌ rátíꞌ ráa, chisaꞌ kua̱chi kuitɨꞌ íyó xinóꞌo rátíꞌ ráa u̱ꞌu̱nꞌ yo̱o̱ꞌ. Jee saꞌá rátíꞌ ya̱ kunoꞌo ráa kuéntáꞌ kua̱ꞌ nóꞌo ɨɨn ñɨvɨ ya̱ túvi ɨɨn ti̱suꞌmaꞌ xe̱e̱nꞌ maa.

⁶ Jee rá ki̱vɨ̱ꞌ yukuán jee nukú ráa na̱ja kuviꞌ ráa, soo ni nsáꞌ ni̱ꞌi̱nꞌ ráa na̱ja kuviꞌ ráa. Jee súka̱ꞌ ne̱ ñúkúvi iniꞌ ráa ya̱ kuviꞌ ráa, soo ni nsáꞌ ni̱ꞌi̱nꞌ ráa kuviꞌ ráa.

⁷ Jee rá lito̱o̱ꞌ vá íyó rátíꞌ kuéntáꞌ íyó kitɨ ya̱ íyó tu̱ꞌva ti̱ꞌ kɨ̱ꞌɨ̱nꞌ ti̱ꞌ nu̱u̱nꞌ kantáꞌán. Jee ñúꞌún xi̱ni̱ꞌ rátíꞌ ya̱ íyó kuéntáꞌ corona oro. Jee nu̱u̱nꞌ rátíꞌ íyó‑o kuéntáꞌ nu̱u̱nꞌ ñɨvɨ.

⁸ Jee ixi rátíꞌ íyó‑o kuéntáꞌ íyó ixi xíníꞌ ñaꞌan. Jee rá nu̱ꞌun rátíꞌ íyó‑o kuéntáꞌ íyó nu̱ꞌun nikaꞌa.

⁹ Jee ñúꞌún rátíꞌ saꞌma ya̱ násɨ́ꞌ ni̱ka rátíꞌ ya̱ íyó kuéntáꞌ saꞌma ka̱a ya̱ náma‑a rátíꞌ. Jee rá chi̱yo̱ꞌ rátíꞌ nɨ́ꞌɨn‑ɨ kuéntáꞌ nɨ́ꞌɨn nu̱u̱nꞌ kua̱ꞌánꞌ kue̱ꞌe̱ꞌ víꞌí rá kitɨ nu̱u̱nꞌ kantáꞌán jínu rátíꞌ siúꞌun rátíꞌ karretáꞌ.

¹⁰ Jee su̱ꞌma̱ꞌ rátíꞌ íyó‑o kuéntáꞌ íyó su̱ꞌma̱ꞌ ti̱suꞌmaꞌ, chi suni yósóꞌ iñu xi̱ni̱ꞌ su̱ꞌma̱ꞌ rátíꞌ. Jee su̱ꞌma̱ꞌ rátíꞌ íyó fuersáꞌ rátíꞌ sáva xinóꞌo rátíꞌ rá ñɨvɨ u̱ꞌu̱nꞌ yo̱o̱ꞌ.

¹¹ Jee íyó ɨɨn ya tátúníꞌ ya̱ kúñáꞌnú nu̱u̱nꞌ rátíꞌ. Kúvi‑i ɨɨn najiáꞌáꞌ kánéꞌén ya̱ kúmí‑i numaꞌ yukuán ya̱ ntu jínu nu̱u̱nꞌ kúnú‑u. Jee tu̱ꞌun káꞌánꞌ rá ñɨvɨ hebreo súví najiáꞌáꞌ vá ví Abadón, jee tu̱ꞌun káꞌánꞌ rá ñɨvɨ griego súví najiáꞌáꞌ vá ví Apolión.

¹² Jee suꞌva nkuvi jee njia̱ꞌa tu̱nóꞌó xíꞌnañúꞌún, jee na̱ ka̱ꞌ náꞌví ka̱ꞌ rá ñɨvɨ chi íyó u̱vi̱ꞌ ka̱ꞌ rá tu̱nóꞌó íyó kiji.

¹³ Saájee najiáꞌáꞌ ííꞌ íñúꞌ vá nti̱vɨ̱ꞌ‑ɨ trompeta‑a. Saájee nteso̱ꞌo ni̱ꞌ ta̱chi̱ꞌ yuꞌú ya̱ va̱ji‑i nteñu ni kúmíꞌ rá nikɨ esquina altar oro ya̱ íñɨ́ ichinúúnꞌ Ndiosíꞌ.

¹⁴ Jee nkachiꞌ‑i nu̱u̱nꞌ najiáꞌáꞌ ííꞌ íñúꞌ ya̱ ínaꞌá trompeta: ―Nanají nú ni kúmíꞌ rá najiáꞌáꞌ ííꞌ ya̱ núꞌníꞌ yunútekáꞌnú ya̱ naní Éufrates ―nkachiꞌ‑i.

¹⁵ Saájee nna̱nají ni kúmíꞌ rá najiáꞌáꞌ ííꞌ ya̱ núꞌníꞌ vá, ya̱ ya íyó tu̱ꞌva rá najiáꞌáꞌ ííꞌ vá jie̱ꞌe̱ꞌ hora yukuán jín ki̱vɨ̱ꞌ jín yo̱o̱ꞌ jín kui̱ya̱ꞌ, sáva kaꞌniꞌ ráa ya̱ uníꞌ parte rá ñɨvɨ ñɨ̱vɨ́.

¹⁶ Jee nteso̱ꞌo ni̱ꞌ na̱ja tantúꞌ rá soldado kúvi‑i. Jee u̱vi̱ꞌ sientúꞌ millón (200,000,000) soldado íyó ya̱ yósóꞌ ráa rá kitɨ.

¹⁷ Jee suꞌva niniꞌ ni̱ꞌ ya̱ nxi̱néꞌénꞌ nu̱u̱nꞌ Ndiosíꞌ nuꞌuꞌ. Chi niniꞌ ni̱ꞌ rá kitɨ, jee suni niniꞌ ni̱ꞌ rá yósóꞌ ya̱ta̱ꞌ rátíꞌ. Jee ñúꞌún ni̱ka ráa ka̱a ya̱ náma ráa, jee rá ñúꞌún ráa ví ya̱ kuéꞌé, jín ya̱ léé, jín ya̱ kuáán. Jee rá kitɨ vá íyó xi̱ni̱ꞌ rátíꞌ kuéntáꞌ íyó xi̱ni̱ꞌ nikaꞌa, jee yuꞌú rátíꞌ kéne ñuꞌunꞌ jín ñu̱ꞌma̱ꞌ jín sufríꞌ.

¹⁸ Jee ni núníꞌ rá tu̱nóꞌó kéne yuꞌú rátíꞌ ñaꞌniꞌ‑i ya̱ uníꞌ parte rá ñɨvɨ ñɨ̱vɨ́. Jee rá yukuán kúvi ñuꞌunꞌ jín ñu̱ꞌma̱ꞌ jín sufríꞌ.

¹⁹ Chi fesáꞌ xe̱e̱nꞌ níso rá kitɨ vá iniꞌ yuꞌú rátíꞌ jín su̱ꞌma̱ꞌ rátíꞌ, chi su̱ꞌma̱ꞌ rátíꞌ íyó‑o kuéntáꞌ íyó ko̱o̱ꞌ, jee suni kua̱ꞌ íyó xi̱ni̱ꞌ koo íyó xi̱ni̱ꞌ su̱ꞌma̱ꞌ rátíꞌ, jee jiátíñú rátíꞌ xi̱ni̱ꞌ su̱ꞌma̱ꞌ rátíꞌ xtúfíꞌ rátíꞌ rá ñɨvɨ.

²⁰ Soo sava ka̱ꞌ rá ñɨvɨ ñɨ̱vɨ́ ya̱ ntu níꞌiꞌ ráa nu̱u̱nꞌ rá tu̱nóꞌó vá, jee ni ntu̱ví nnákani iniꞌ ráa xinóo ráa rá tiñu níváꞌa sáꞌá ráa jín naꞌá ráa. Chi ni ntu̱ví nxínóo ráa ya̱ néñu̱ꞌun ráa rá ta̱chi̱ꞌ kíni jín rá santúꞌ ñunéꞌyúꞌ nsa̱ꞌá maa jín oro, jín plata, jín ka̱a kuáán bronce, jín yu̱u̱ꞌ, jín yutun, asúnika̱ꞌ ntu̱ví kúvi kune̱ꞌyá rává, jee ni ntu kúvi teso̱ꞌo rává, jee ni ntu kúvi kaka rává.

²¹ Jee ni ntu nnákani iniꞌ ráa ya̱ sáꞌá ráa ni̱yɨ, ni ya̱ sáꞌá tásɨ́ ráa, ni ya̱ sáꞌá téní ráa, ni ya̱ sáꞌá kuíꞌná ráa.