Apoclipsis 7 - Mixteco del suroeste de Tlaxiaco Oaxaca

Rá ñɨvɨ rá tataꞌ ñuunꞌ Israel ya̱ ña̱xin seyúꞌ ráa

¹ Sáá nkuvi rá yaꞌá jee niniꞌ ni̱ꞌ ni kúmíꞌ rá najiáꞌáꞌ ííꞌ Ndiosíꞌ ya̱ íñɨ́ ráa ni kúmíꞌ ichi ñɨ̱vɨ́. Jee chítuvi ráa ta̱chi̱ꞌ víjin ya̱ va̱ji ne̱ nu̱u̱nꞌ rá kúmíꞌ ichi ñɨ̱vɨ́, sáva ntu jiáꞌa ráa kɨꞌɨ‑ɨ nu̱u̱nꞌ ñu̱ꞌún iniꞌ ñɨ̱vɨ́, ni nu̱u̱nꞌ nteñúꞌún, ni nu̱u̱nꞌ ni ɨɨn yutun.

² Jee niniꞌ ni̱ꞌ inka ka̱ꞌ najiáꞌáꞌ ííꞌ Ndiosíꞌ ya̱ váji‑i ne̱ ichi nu̱u̱nꞌ kénta nka̱niiꞌ. Jee ínaꞌá‑a seyúꞌ Ndiosíꞌ tékúꞌ. Jee ni̱ꞌin xá nka̱najíín‑i xi̱ni̱ꞌ ni kúmíꞌ rá najiáꞌáꞌ ííꞌ vá ya̱ nni̱ꞌi̱nꞌ ráa ya̱ nísotíñú ráa ya̱ saꞌá kini ráa xináánꞌ ráa ñuꞌun ñɨ̱vɨ́ jín nteñúꞌún.

³ Jee nkachiꞌ najiáꞌáꞌ ííꞌ vá: ―Koto na̱ sáꞌá kini rán xináánꞌ rán ñuꞌun ni nteñúꞌún ni rá yutun, ne̱kua̱ꞌ xíꞌna ka̱ꞌ tee ránꞌ seyúꞌ te̱e̱nꞌ ntáká rá musúꞌ Ndiosíꞌ ya̱ yɨ́tíñú ráa nu̱u̱nꞌ re̱ꞌ ―nkachiꞌ najiáꞌáꞌ ííꞌ vá.

⁴ Jee nteso̱ꞌo ni̱ꞌ na̱ja rá ñɨvɨ ña̱kuneeꞌ seyúꞌ te̱e̱nꞌ ráa. Jee sientúꞌ u̱vi̱xiko ku̱mi̱ꞌ mil (144,000) rá ñɨvɨ ntáká tataꞌ rá se̱ꞌya Israel kúvi ráa.

⁵ Jee rá se̱ꞌya Israel yaꞌá ya̱ ña̱kuneeꞌ seyúꞌ te̱e̱nꞌ ráa kúvi u̱xu̱ꞌ u̱vi̱ꞌ mil (12,000) ñɨvɨ ya̱ kúvi ichiyúkúnꞌ tataꞌ nkene ráa nu̱u̱nꞌ Judá, jín u̱xu̱ꞌ u̱vi̱ꞌ mil (12,000) ñɨvɨ ya̱ kúvi tataꞌ nkene ráa nu̱u̱nꞌ Rubén, jín u̱xu̱ꞌ u̱vi̱ꞌ mil (12,000) ñɨvɨ ya̱ kúvi tataꞌ nkene ráa nu̱u̱nꞌ Gad,

⁶ jín u̱xu̱ꞌ u̱vi̱ꞌ mil ñɨvɨ ya̱ kúvi tataꞌ nkene ráa nu̱u̱nꞌ Aser, jín u̱xu̱ꞌ u̱vi̱ꞌ mil ñɨvɨ ya̱ kúvi tataꞌ nkene ráa nu̱u̱nꞌ Neftalí, jín u̱xu̱ꞌ u̱vi̱ꞌ mil ñɨvɨ ya̱ kúvi tataꞌ nkene ráa nu̱u̱nꞌ Manasés,

⁷ jín u̱xu̱ꞌ u̱vi̱ꞌ mil rá ñɨvɨ ya̱ kúvi tataꞌ nkene ráa nu̱u̱nꞌ Simeón, jín u̱xu̱ꞌ u̱vi̱ꞌ mil rá ñɨvɨ ya̱ kúvi tataꞌ nkene ráa nu̱u̱nꞌ Leví, jín u̱xu̱ꞌ u̱vi̱ꞌ mil rá ñɨvɨ ya̱ kúvi tataꞌ nkene ráa nu̱u̱nꞌ Isacar,

⁸ jín u̱xu̱ꞌ u̱vi̱ꞌ mil rá ñɨvɨ ya̱ kúvi tataꞌ nkene ráa nu̱u̱nꞌ Zabulón, jín u̱xu̱ꞌ u̱vi̱ꞌ mil rá ñɨvɨ ya̱ kúvi tataꞌ nkene ráa nu̱u̱nꞌ José, jín u̱xu̱ꞌ u̱vi̱ꞌ mil rá ñɨvɨ ya̱ kúvi tataꞌ nkene ráa nu̱u̱nꞌ Benjamín ví ya̱ ña̱kuneeꞌ seyúꞌ te̱e̱nꞌ ráa.

Ñɨvɨ kue̱ꞌe̱ꞌ ví ya̱ ñúꞌún saꞌma kuíjín

⁹ Jee sáá nkuvi yaꞌá, jee nna̱kune̱ꞌyá ni̱ꞌ, jee niniꞌ ni̱ꞌ kue̱ꞌe̱ꞌ víꞌí rá ñɨvɨ, ya̱ ni ɨɨn ñɨvɨ nsúkua kuneí‑i kaꞌvi‑i ráa. Va̱ji ráa nu̱u̱nꞌ ntáká nu̱u̱nꞌ rá ñɨvɨ, jín nu̱u̱nꞌ ntáká tataꞌ, jín nu̱u̱nꞌ ntáká ñuunꞌ, jín nu̱u̱nꞌ ntáká ñɨvɨ ya̱ káꞌánꞌ ráa sɨ́ɨ́n sɨ́ɨ́n nu̱u̱nꞌ tu̱ꞌun nkaku ráa. Jee íñɨ́ ráa yuꞌú teyuꞌ nu̱u̱nꞌ nééꞌ Ndiosíꞌ tátúníꞌ re̱ꞌ, jín nu̱u̱nꞌ maáréꞌ ya̱ kúvi re̱ꞌ Lanchi Lúlí vá. Jee ñúꞌún ráa saꞌma kuíjín, jee ínaꞌá ráa naꞌá yu̱ku̱ñu̱u̱nꞌ.

¹⁰ Saájee kánajíín ni̱ꞌin ráa, jee káchíꞌ ráa: Métúꞌún Ndiosíꞌ‑ó jín Lanchi Lúlí vá kúvi ya̱ síkáku‑u yó nu̱u̱nꞌ ya̱ níváꞌa jín nu̱u̱nꞌ kui̱ꞌna̱ꞌ kúñáꞌnú, jee Ndiosíꞌ ví maáréꞌ ya̱ nééꞌ re̱ꞌ teyuꞌ nu̱u̱nꞌ tátúníꞌ re̱ꞌ.

¹¹ Jee ntáká rá najiáꞌáꞌ ííꞌ ne̱ ni̱kótíyu ráa íñɨ́ ráa yuꞌú teyuꞌ nu̱u̱nꞌ tátúníꞌ Ndiosíꞌ, jín nu̱u̱nꞌ nééꞌ rá kúñáꞌnú, jín nu̱u̱nꞌ ni kúmíꞌ rá tékúꞌ vá, jee nna̱kui̱ñɨ̱ꞌ ítɨ́ ráa ña̱xin ráa nu̱u̱nꞌ ráa ne̱ nu̱u̱nꞌ ñu̱ꞌún ichinúúnꞌ teyuꞌ nu̱u̱nꞌ re̱ꞌ nu̱u̱nꞌ tátúníꞌ re̱ꞌ, jee chíñúꞌún ráa Ndiosíꞌ.

¹² Jee nkachiꞌ ráa: Sukuán koo, na̱ ka̱ꞌ vá nakuetúꞌún‑ó Ndiosíꞌ‑ó nɨ́ɨ́nkání nta̱ká tiempúꞌ, jín ya̱ viiꞌ víꞌí kúñáꞌnú re̱ꞌ, jín ya̱ níchí víꞌí re̱ꞌ, jín ya̱ ku̱ꞌva‑ó ya̱ kútaꞌviꞌ nu̱u̱nꞌ re̱ꞌ, jín ya̱ nakuatáꞌví‑ó re̱ꞌ, jín ya̱ kuneí re̱ꞌ jín ntáká tiñu ya̱ sáꞌá re̱ꞌ, jín ya̱ níso re̱ꞌ fesáꞌ ííꞌ níꞌin re̱ꞌ nta̱ká tiempúꞌ nɨ́ɨ́nkání. Sukuán koo, nkachiꞌ rá najiáꞌáꞌ ííꞌ re̱ꞌ.

¹³ Saájee nkaꞌanꞌ ɨɨn rá kúñáꞌnú vá jín nuꞌuꞌ, jee nkachiꞌ‑i nu̱u̱nꞌ ni̱ꞌ: ―Rá ñɨvɨ yaꞌá ya̱ ñúꞌún saꞌma kuíjín, ¿né ɨɨn kúvi ráa rúja? Jee, ¿né núꞌ va̱ji ráa rúja? ―nkachiꞌ‑i.

¹⁴ Jee nkachiꞌ ni̱ꞌ nu̱u̱nꞌ‑u: ―Tátáꞌ ni̱ꞌ, noꞌó jíníꞌ ―nkachiꞌ ni̱ꞌ. Jee nkachiꞌ‑i nu̱u̱nꞌ ni̱ꞌ: Rá ñɨvɨ yaꞌá ví rá nku̱neí ráa njia̱ꞌa ráa nu̱u̱nꞌ máá maá tu̱nóꞌó xéénꞌ nnoꞌo ráa. Jee nno̱noo ánímaꞌ ráa jie̱ꞌe̱ꞌ ni̱ꞌi̱ꞌ maáréꞌ ya̱ kúvi re̱ꞌ Lanchi Lúlí vá, kuéntáꞌ nna̱kete ráa saꞌma ráa jee nnu̱kuíjín‑i sáꞌá re̱ꞌ jín ni̱ñɨ̱ꞌ maáréꞌ.

¹⁵ Jee jie̱ꞌe̱ꞌ yukuán íñɨ́ ráa ichinúúnꞌ teyuꞌ nu̱u̱nꞌ nééꞌ Ndiosíꞌ tátúníꞌ re̱ꞌ, jee yɨ́tíñú ráa nu̱u̱nꞌ re̱ꞌ nuví niñuꞌ sáꞌá ráa tiñu re̱ꞌ iniꞌ veñu̱ꞌun re̱ꞌ. Jee máá Ndiosíꞌ ya̱ nééꞌ re̱ꞌ teyuꞌ nu̱u̱nꞌ tátúníꞌ re̱ꞌ jee kúmí re̱ꞌ ráa chi nééꞌ re̱ꞌ jín ráa.

¹⁶ Jee ni nsáꞌ kujiso̱ko ráa ka̱ꞌ, ni nsáꞌ kujichiꞌ ráa ka̱ꞌ nute, jee ni nsáꞌ teñuꞌunꞌ ka̱ꞌ ñuꞌunꞌ nka̱niiꞌ ráa, ni jín ki̱ji íꞌní‑i.

¹⁷ Chi maáréꞌ ya̱ kúvi re̱ꞌ Lanchi Lúlí Ndiosíꞌ ya̱ íñɨ́ ma̱ꞌñú teyuꞌ nu̱u̱nꞌ nééꞌ Ndiosíꞌ tátúníꞌ‑i jee kúmí re̱ꞌ ráa kuéntáꞌ lanchi re̱ꞌ kúvi ráa. Jee kunaka re̱ꞌ ráa kɨ̱ꞌɨ̱nꞌ re̱ꞌ jín ráa nu̱u̱nꞌ kéne nute ya̱ sáꞌá ya̱ kutekuꞌ ráa jín re̱ꞌ. Jee sijíchíꞌ Ndiosíꞌ nɨꞌɨ ntenúúnꞌ nchinúún ráa.