Apoclipsis 6 - Mixteco del suroeste de Tlaxiaco Oaxaca

Ni uxáꞌ rá seyúꞌ

¹ Saájee niniꞌ ni̱ꞌ ya̱ Lanchi vá nsine re̱ꞌ ɨɨn rá uxáꞌ seyúꞌ vá. Jee nteso̱ꞌo ni̱ꞌ ya̱ nkaꞌanꞌ ɨɨn rá ni kúmíꞌ rá tékúꞌ vá kuéntáꞌ kua̱ꞌ káni tajia, jee nkachiꞌ‑i: ―¡Neꞌenꞌ! ―nkachiꞌ‑i.

² Saájee nna̱kune̱ꞌyá ni̱ꞌ, jee niniꞌ ni̱ꞌ ɨɨn kitɨ kuíjín, jee ɨɨn ya̱ yósóꞌ ya̱ta̱ꞌ kitɨ vá ínaꞌá‑a ɨɨn arco. Saájee nni̱ꞌi̱nꞌ‑i ɨɨn corona nna̱ku̱ꞌun xi̱ni̱ꞌ‑i, jee nkene‑e kɨ̱kantáꞌán‑a jee kuneí‑i, sáva kuneí‑i si̱kɨ̱ꞌ ntáká.

³ Jee sáá Lanchi nsine re̱ꞌ ya̱ uvíꞌ seyúꞌ, saájee nteso̱ꞌo ni̱ꞌ ya̱ nkaꞌanꞌ ya̱ uvíꞌ ya̱ tékúꞌ vá, jee nkachiꞌ‑i: ―¡Neꞌenꞌ! ―nkachiꞌ‑i.

⁴ Saájee nkene inka kitɨ ya̱ kuéꞌé ti̱ꞌ jee ɨɨn ya̱ yósóꞌ ya̱ta̱ꞌ kitɨ vá ni̱ꞌi̱nꞌ‑i nísotíñú‑u ya̱ siíyo‑o ya̱ nééꞌ va̱ꞌa rá ñɨvɨ ñɨ̱vɨ́, jín ya̱ saꞌá‑a ya̱ kaꞌniꞌ ráa ɨɨn inka táꞌán ráa. Jee nni̱ꞌi̱nꞌ‑i ɨɨn yuchiꞌ espada káꞌnú ínaꞌá‑a.

⁵ Jee sáá nsine re̱ꞌ ya̱ uníꞌ seyúꞌ nteso̱ꞌo ni̱ꞌ ya̱ uníꞌ ya̱ tékúꞌ vá, jee nkachiꞌ‑i: ―¡Neꞌenꞌ! ―nkachiꞌ‑i. Jee nna̱kune̱ꞌyá ni̱ꞌ, jee niniꞌ ni̱ꞌ ɨɨn kitɨ túún. Jee ɨɨn ya̱ yósóꞌ ya̱ta̱ꞌ kitɨ vá ínaꞌá‑a ɨɨn libra ya̱ chuku̱ꞌva.

⁶ Saájee ma̱ꞌñú ni kúmíꞌ rá tékúꞌ vá, nteso̱ꞌo ni̱ꞌ ɨɨn nusuyuꞌú, jee káchíꞌ‑i: ―Ɨɨn kilo trigúꞌ kɨya̱ꞌvi‑i ya̱ꞌvi ɨɨn ñɨvɨ ya̱ ki̱vɨ̱ꞌ, jee u̱ni̱ꞌ kilo cebada kɨya̱ꞌvi‑i ya̱ꞌvi ɨɨn ñɨvɨ ya̱ ki̱vɨ̱ꞌ. Soo aceite jín nixiꞌ vinúꞌ, chi koto stívɨ́ maa ―nkachiꞌ‑i.

⁷ Jee sáá nsine re̱ꞌ ya̱ kúmíꞌ seyúꞌ nteso̱ꞌo ni̱ꞌ nusuyuꞌú ya̱ kúmíꞌ ya̱ tékúꞌ vá, jee nkachiꞌ‑i: ―¡Neꞌenꞌ! ―nkachiꞌ‑i.

⁸ Saájee nna̱kune̱ꞌyá ni̱ꞌ, jee niniꞌ ni̱ꞌ ɨɨn kitɨ kuáán niyaa. Jee ɨɨn ya̱ yósóꞌ ya̱ta̱ꞌ kitɨ vá naní ya̱ sáꞌá ni̱yɨ. Jee ichi chatáꞌ‑a níkɨ́nꞌ Hades nu̱u̱nꞌ yɨ́ꞌɨ́ ánímaꞌ rá ni̱yɨ. Jee nni̱ꞌi̱nꞌ ráa nísotíñú ráa nu̱u̱nꞌ ɨɨn pedasúꞌ ya̱ kúmíꞌ pedasúꞌ ñɨvɨ ñɨ̱vɨ́, sáva kaꞌniꞌ ráa rá ñɨvɨ jie̱ꞌe̱ꞌ ya̱ saꞌá ráa ya̱ kantáꞌán rá ñɨvɨ, jín jie̱ꞌe̱ꞌ ya̱ saꞌá ráa ya̱ koo ta̱ma̱ꞌ, jín jie̱ꞌe̱ꞌ kue̱ꞌi̱ꞌ xéénꞌ, jín jie̱ꞌe̱ꞌ rá kitɨ xéénꞌ íyó ñɨ̱vɨ́.

⁹ Jee sáá nsine re̱ꞌ ya̱ úꞌúnꞌ seyúꞌ, jee niniꞌ ni̱ꞌ maa nu̱u̱nꞌ chíñúꞌún ráa Ndiosíꞌ nu̱u̱nꞌ naní altar, jee niniꞌ ni̱ꞌ ya̱ chi̱ji yukuán yɨ́ꞌɨ́ rá ánímaꞌ rá ñɨvɨ ya̱ ni̱ꞌi̱ꞌ ráa chi ñaꞌniꞌ ñɨvɨ ráa jie̱ꞌe̱ꞌ ni̱nu̱ꞌ iniꞌ ráa tu̱ꞌun váꞌa Ndiosíꞌ jín ya̱ nstúvi ráa ya̱ naáꞌ jie̱ꞌe̱ꞌ tu̱ꞌun vá.

¹⁰ Jee ni̱ꞌin káꞌánꞌ ráa kákua̱chi ráa jee nkachiꞌ ráa: ―I̱toꞌoꞌ ráníꞌ, nóꞌo kúvi Ndiosíꞌ ííꞌ Ndiosíꞌ na̱a̱ꞌ. ¿Na̱sa ka̱ꞌ tiempúꞌ kukuéé nú, jee saꞌá náaꞌ nú nu̱u̱nꞌ rá ñɨvɨ ñɨ̱vɨ́ ya̱ ñaꞌniꞌ ráa ránuꞌuꞌ, jee nachunáán nú nu̱u̱nꞌ ráa? ―nkachiꞌ ráa.

¹¹ Saájee njia̱ꞌa re̱ꞌ saꞌma kuíjín kuꞌun ráa, jee nkachiꞌ re̱ꞌ nu̱u̱nꞌ ráa ya̱ najia̱ví ráa yakuꞌ ni ka̱ꞌ tiempúꞌ ne̱kua̱ꞌ chitú numero kaꞌniꞌ rá ñɨvɨ rá ñanitáꞌán ráa ya̱ kúvi táꞌán sáꞌá tiñu nu̱u̱nꞌ Cristo jín ráa jee kuviꞌ rává kuéntáꞌ maáráa.

¹² Jee nna̱kune̱ꞌyá ni̱ꞌ sáá nsine Lanchi vá ya̱ íñúꞌ seyúꞌ, jee nkiji ñutáan xéénꞌ, jee nnu̱neenꞌ chi nnu̱túún nka̱niiꞌ kuéntáꞌ ɨɨn saꞌma túún. Jee nu̱u̱nꞌ yo̱o̱ꞌ nɨ́ɨ́n nnuvi‑i kuéntáꞌ ni̱ñɨ̱ꞌ.

¹³ Jee rá tiu̱u̱nꞌ nééꞌ súkún ñe̱te̱ꞌ ráa nu̱u̱nꞌ ñúꞌún iniꞌ ñɨ̱vɨ́, kuéntáꞌ kua̱ꞌ jiétéꞌ rá higo yúté sáá kísɨ ta̱chi̱ꞌ xéénꞌ yutun higo.

¹⁴ Jee súkún chi nnu̱ñúꞌún‑u kua̱ꞌa̱nꞌ‑a kuéntáꞌ kua̱ꞌ kua̱ꞌa̱nꞌ nátuviꞌ ɨɨn tutuꞌ. Jee ntáká rá yuku jín rá ñuꞌun káá ma̱ꞌñú nteñúꞌún nkuiyo ráa nu̱u̱nꞌ níyo ráa.

¹⁵ Jee rá te̱e tátúníꞌ rá ñuunꞌ íyó ñɨ̱vɨ́, jín rá kúñáꞌnú, jín rá capitán, jín rá kúká, jín rá ñɨvɨ tátúníꞌ kéne nu̱u̱nꞌ, jín nta̱ká rá musúꞌ ya̱ nkeꞌen ñɨvɨ ráa, jín nta̱ká rá ñɨvɨ íñɨ́ núne ya̱ sáꞌá ráa tiñu maáráa, ña̱kɨ̱ꞌɨ yuꞌuꞌ ráa iniꞌ rá kava, jín nteñu rá kava íyó yuku.

¹⁶ Jee káchíꞌ ráa nu̱u̱nꞌ rá yuku vá jín rá kava vá: ―Nakuniꞌi rán ya̱ta̱ꞌ ráníꞌ, sáva chiyuꞌuꞌ rán ránuꞌuꞌ nu̱u̱nꞌ maáréꞌ ya̱ nééꞌ re̱ꞌ teyuꞌ nu̱u̱nꞌ tátúníꞌ re̱ꞌ, jín nu̱u̱nꞌ Lanchi Lúlí vá, chi maáréꞌ ví ya̱ taji re̱ꞌ tu̱nóꞌó xéénꞌ nu̱u̱nꞌ ránꞌ jie̱ꞌe̱ꞌ kítɨ́ꞌ iniꞌ re̱ꞌ néꞌyá re̱ꞌ rá kua̱chi ránꞌ.

¹⁷ Chi vitan ya̱ nkenta ki̱vɨ̱ꞌ káꞌnú ya̱ xinóꞌo ráa yó. Jee, ¿ne̱ ɨɨn ví ya̱ kuneí‑i rúja? ―nkachiꞌ ráa.