Apoclipsis 4 - Mixteco del suroeste de Tlaxiaco Oaxaca

Ntáká rá íyó ne̱ ñuunꞌ íyó antivɨ́ súkún chíñúꞌún ráa Ndiosíꞌ

¹ Sáá nkuvi rá tiñu sukuán, jee nuꞌuꞌ Juan nne̱ꞌyá ni̱ꞌ jee niniꞌ ni̱ꞌ ɨɨn yuvéꞌí núne ne̱ súkún. Jee maá nusuyuꞌú ya̱ nteso̱ꞌo ni̱ꞌ xíꞌnañúꞌún ya̱ ni̱ꞌin nkaꞌanꞌ‑a jín ni̱ꞌ kuéntáꞌ kua̱ꞌ tívɨ́ꞌ ɨɨn trompeta, jee nkachiꞌ‑i nu̱u̱nꞌ ni̱ꞌ: ―Tínkaa yaꞌá, jee xinéꞌénꞌ ni̱ꞌ nóꞌo ntáká rá tiñu ya̱ íyó kuvi tiempúꞌ ichinúúnꞌ ka̱ꞌ ―nkachiꞌ‑i.

² Jee kuíntañúꞌún niniꞌ ni̱ꞌ ya̱ nstúvi nijinꞌ kájí Ta̱chi̱ꞌ Ííꞌ nu̱u̱nꞌ nuꞌuꞌ. Saájee niniꞌ ni̱ꞌ antivɨ́ súkún ɨɨn teyuꞌ ya̱ íñɨ́ nu̱u̱nꞌ tátúníꞌ jín maáréꞌ ya̱ nééꞌ re̱ꞌ teyuꞌ vá tátúníꞌ re̱ꞌ.

³ Jee maáréꞌ ya̱ nééꞌ re̱ꞌ yukuán túvi re̱ꞌ kuéntáꞌ jiánu̱te̱ꞌ rá yu̱u̱ꞌ máá viiꞌ máá xiñúꞌ naní jaspe jín cornalina. Jee yuꞌú nu̱u̱nꞌ nééꞌ re̱ꞌ ni̱kótíyu ɨɨn ko̱ye̱ꞌlé, jee jiánu̱te̱ꞌ‑e kuéntáꞌ jiánu̱te̱ꞌ ɨɨn yu̱u̱ꞌ stíláꞌ máá viiꞌ máá xiñúꞌ naní esmeralda.

⁴ Jee nu̱u̱nꞌ teyuꞌ re̱ꞌ tátúníꞌ re̱ꞌ, yukuán ni̱kótíyu o̱ko̱ꞌ ku̱mi̱ꞌ (24) ka̱ꞌ teyuꞌ nu̱u̱nꞌ tátúníꞌ. Jee yukuán nééꞌ o̱ko̱ꞌ ku̱mi̱ꞌ (24) rá maá te̱e kúñáꞌnú. Jee ñúꞌún ráa máá saꞌma kuíjín, jee ñúxíniꞌ ráa corona oro.

⁵ Jee teyuꞌ nu̱u̱nꞌ nééꞌ maáréꞌ yukuán, kéne tajia ya̱ jiánu̱te̱ꞌ, nɨ́ꞌɨn jiáku, kána tajia. Jee ichinúúnꞌ teyuꞌ vá nu̱u̱nꞌ nééꞌ re̱ꞌ yukuán káyúꞌ u̱xa̱ꞌ itɨ sújié tɨ́ɨn ñuꞌunꞌ ya̱ kúvi ni uxáꞌ rá espíritu Ndiosíꞌ ya̱ ntu túvi nijinꞌ.

⁶ Jee ichinúúnꞌ teyuꞌ nu̱u̱nꞌ tátúníꞌ re̱ꞌ íyó kuéntáꞌ nteñúꞌún ya̱ kúvi kuéntáꞌ cristal ya̱ túvi ni núvíꞌ ichi kuéntáꞌ vidrio. Jee teyuꞌ nu̱u̱nꞌ nééꞌ re̱ꞌ nu̱u̱nꞌ tátúníꞌ re̱ꞌ jee yukuán ni̱kótíyu ku̱mi̱ꞌ rá tékúꞌ ya̱ ne̱ nchi̱tú ráa titɨ nchinúún ráa ichinúúnꞌ ráa jín ichi yátáꞌ ráa.

⁷ Jee xíꞌna ya̱ tékúꞌ vá íyó kuéntáꞌ íyó nikaꞌa. Jee ya̱ uvíꞌ íyó‑o kuéntáꞌ íyó chelu. Jee ya̱ uníꞌ chi néen‑e kuéntáꞌ nu̱u̱nꞌ ɨɨn ñɨvɨ. Jee ya̱ kúmíꞌ chi íyó‑o kuéntáꞌ íyó ɨɨn ta̱su̱nꞌ jíkó nu̱u̱nꞌ ta̱chi̱ꞌ víjin.

⁸ Jee ni kúmíꞌ rá tékúꞌ vá, íyó i̱ñu̱ꞌ chi̱yo̱ꞌ ta ɨɨn ɨɨn ráa. Jee kua̱íyó rá ya̱ta̱ꞌ chi̱yo̱ꞌ ráa vá, jín chi̱ji chi̱yo̱ꞌ ráa nchi̱tú nchinúún ráa. Jee nuví niñuꞌ ntu jiákui̱ñɨ̱ꞌ ráa ya̱ káchíꞌ ráa: ¡Na̱ ka̱ꞌ vá i̱i̱ꞌ, i̱i̱ꞌ kúvi I̱toꞌoꞌ‑ó Ndiosíꞌ, i̱i̱ꞌ kúvi re̱ꞌ! Maáréꞌ níso fesáꞌ ííꞌ nasɨ́kuitɨꞌ, chi kúñáꞌnú nasɨ́kuitɨꞌ re̱ꞌ nu̱u̱nꞌ kua̱íyó. Maáréꞌ vá íyó nɨ́ɨ́nkání tiempúꞌ va̱ji ya̱ta̱ꞌ, maáréꞌ vá íyó vitan, jee suni maáréꞌ ví ya̱ koo nɨ́ɨ́nkání.

⁹ Jee ta íchí káchíꞌ ni kúmíꞌ rá tékúꞌ vá, ya̱ máá kúñáꞌnú ví re̱ꞌ, jín ya̱ nákuetúꞌún ráa re̱ꞌ, jín ya̱ nákuatáꞌví ráa maáréꞌ, ya̱ nééꞌ re̱ꞌ teyuꞌ tátúníꞌ re̱ꞌ jín ya̱ tékúꞌ re̱ꞌ nɨ́ɨ́nkání,

¹⁰ jee ta íchí néñu̱ꞌun ráa Ndiosíꞌ sukuán saájee suni ni o̱ko̱ꞌ ku̱mi̱ꞌ (24) rá te̱e kúñáꞌnú vá, nákuíñɨꞌ ítɨ́ ráa jiáxin ráa maáráa ne̱ nu̱u̱nꞌ ñuꞌun nu̱u̱nꞌ re̱ꞌ ya̱ nééꞌ re̱ꞌ teyuꞌ tátúníꞌ re̱ꞌ, jee chíñúꞌún ráa maáréꞌ ya̱ tékúꞌ re̱ꞌ nɨ́ɨ́nkání, jee táváꞌ ráa rá corona ñúxíniꞌ ráa jiákɨ́nꞌ ráa maa ichinúúnꞌ teyuꞌ nu̱u̱nꞌ tátúníꞌ re̱ꞌ. Jee káchíꞌ ráa:

¹¹ I̱toꞌoꞌ ránꞌ ya̱ kúvi nú Ndiosíꞌ ránꞌ, chi nóꞌo kúvi ya̱ íyó ya̱ ni̱ꞌi̱nꞌ nú, ya̱ káchíꞌ ránꞌ ya̱ viiꞌ kúñáꞌnú nú, jín ya̱ nákuetúꞌún ránꞌ noꞌó, jín ya̱ níso víꞌí nú fesáꞌ ííꞌ, chi maánú nsa̱ꞌá ntáká ya̱ íyó, chi sáni nkuini iniꞌ maánú, jee nkenta ña̱ko̱o ráa, jee nsa̱ꞌá nú maa, nkachiꞌ ráa.