Apoclipsis 3 - Mixteco del suroeste de Tlaxiaco Oaxaca

Tu̱ꞌun ya̱ kuáꞌánꞌ nu̱u̱nꞌ ñuunꞌ Sardes

¹ ’Jee tee nú nu̱u̱nꞌ tutuꞌ kɨ̱ꞌɨ̱nꞌ nu̱u̱nꞌ ya̱ kúñáꞌnú nu̱u̱nꞌ grupo rá ñɨvɨ ya̱ jínúꞌ iniꞌ ráa nuꞌuꞌ, jee suviráa ví ya̱ nééꞌ ráa nu̱u̱nꞌ ñuunꞌ Sardes: “Nuꞌuꞌ ví ya̱ kúmí ni̱ꞌ ni uxáꞌ espíritu Ndiosíꞌ ya̱ ntu túvi nijinꞌ jín ni uxáꞌ tiu̱u̱nꞌ. Suꞌva káchíꞌ nuꞌuꞌ: Jíníꞌ ni̱ꞌ rá tiñu sáꞌá rán, jee súka̱ꞌ káchíꞌ rá ñɨvɨ ya̱ tékúꞌ rán, soo nu̱u̱nꞌ nuꞌuꞌ chi kuéntáꞌ ni̱yɨ kúvi rán.

² Nataꞌvi iniꞌ rán jee nakeni rán jín yakuꞌ ka̱ꞌ ya̱ yɨ́tíñú rán nu̱u̱nꞌ ni̱ꞌ ya̱ sa̱néꞌ íyó kɨ̱naanꞌ‑a. Chi ya̱ jíníꞌ va̱ꞌa ni̱ꞌ ya̱ ntu síkúnkuvi na̱a̱ꞌ rán nu̱u̱nꞌ Ndiosíꞌ.

³ Jee naku̱ꞌun iniꞌ rán tu̱ꞌun na̱a̱ꞌ ya̱ nníꞌinꞌ rán ya̱ nteso̱ꞌo rán, jee kunikɨnꞌ rán maa, jee nakani iniꞌ rán. Chi retú ntu̱ví íyó nito rán maárán, jee sa̱naanꞌ ni kenta ni̱ꞌ nu̱u̱nꞌ rán kuéntáꞌ kua̱ꞌ ɨɨn ya̱ kuíꞌná jee xinóꞌo ni̱ꞌ ránoꞌó, jee ni nsáꞌ kuniꞌ rán ná hora kenta ni̱ꞌ.

⁴ ’Soo súka̱ꞌ sukuán íyó, soo íyó yakuꞌ rá ñɨvɨ nééꞌ nu̱u̱nꞌ ñuunꞌ Sardis ya̱ ntu nstívɨ́ ráa maáráa kuéntáꞌ ntu nkútéꞌén saꞌma ráa. Jee saáva suviráa vá kaka ráa jín nuꞌuꞌ kuꞌun ráa saꞌma kuíjín, chi íyó ni̱ꞌi̱nꞌ ráa maa.

⁵ ’Ñɨvɨ ya̱ kuneí‑i si̱kɨ̱ꞌ ya̱ níváꞌa jín nu̱u̱nꞌ kui̱ꞌna̱ꞌ kúñáꞌnú, saájee naku̱ꞌun‑u saꞌma kuíjín. Jee ni nsáꞌ xinónoo ni̱ꞌ súví ñɨvɨ vá nu̱u̱nꞌ tutuꞌ ya̱ níso súví rá ñɨvɨ ya̱ kutekuꞌ ráa nɨ́ɨ́nkání jín nuꞌuꞌ. Jee stúvi ni̱ꞌ nu̱u̱nꞌ Tátáꞌ ni̱ꞌ jín nu̱u̱nꞌ rá najiáꞌáꞌ ííꞌ re̱ꞌ, ya̱ yɨ́ꞌɨ́ nijia ñɨvɨ vá nu̱u̱nꞌ nuꞌuꞌ.

⁶ ’Ñɨvɨ ya̱ íyó so̱ꞌo, jee teso̱ꞌo va̱ꞌa nú rá tu̱ꞌun ya̱ káchíꞌ Ta̱chi̱ꞌ Ííꞌ nu̱u̱nꞌ rá grupo rá ñɨvɨ ya̱ jínúꞌ iniꞌ ráa nuꞌuꞌ.”

Tu̱ꞌun ya̱ kuáꞌánꞌ nu̱u̱nꞌ ñuunꞌ Filadelfia

⁷ ’Jee tee nú nu̱u̱nꞌ tutuꞌ kɨ̱ꞌɨ̱nꞌ nu̱u̱nꞌ ya̱ kúñáꞌnú nu̱u̱nꞌ grupo rá ñɨvɨ ya̱ jínúꞌ iniꞌ ráa nuꞌuꞌ, jee suviráa ví ya̱ nééꞌ ráa nu̱u̱nꞌ ñuunꞌ Filadelfia: “Nuꞌuꞌ vá i̱i̱ꞌ ni̱ꞌ jín nuꞌuꞌ vá na̱a̱ꞌ ni̱ꞌ. Ínaꞌá ni̱ꞌ nakáa David, ya̱ nísotíñú ni̱ꞌ kuéntáꞌ kua̱ꞌ nta̱túníꞌ re̱ꞌ nu̱u̱nꞌ nación Israel yanaꞌán. Saáva nuꞌuꞌ ví ya̱ jíne ni̱ꞌ nu̱u̱nꞌ ki̱vɨ rá ñɨvɨ nu̱u̱nꞌ tátúníꞌ ni̱ꞌ, jee ni ɨɨn ntu kuvi nakasɨꞌ maa. Jee nuꞌuꞌ nakasɨꞌ maa, jee ni ɨɨn ntu kúvi nakune maa. Suꞌva káchíꞌ nuꞌuꞌ:

⁸ Jíníꞌ ni̱ꞌ ntáká tiñu váꞌa ya̱ sáꞌá rán. Kune̱ꞌyá, chi kuéntáꞌ ñani ni̱ꞌ ɨɨn yuvéꞌí núne ichinúúnꞌ rán ki̱vɨ rán nu̱u̱nꞌ nééꞌ ni̱ꞌ, jee ni ɨɨn ntu̱náꞌ kúvi kasɨꞌ maa nu̱u̱nꞌ rán. Chi súka̱ꞌ yakuꞌ fuersáꞌ níso rán, soo íñɨ́ ni̱ꞌin rán níkɨ́nꞌ rán tu̱ꞌun ni̱ꞌ, jee ni ntu nkáchíꞌ rán retú ntu jínúꞌ iniꞌ rán nuꞌuꞌ.

⁹ Soo kune̱ꞌyá, rá ñɨvɨ kútútú ráa veꞌi sinagoga ñɨvɨ Israel ya̱ yɨ́ꞌɨ́ ráa xi̱ntíín Satanás jee káchíꞌ ráa ya̱ ñɨvɨ ñuunꞌ Israel kúvi ráa ya̱ ñɨvɨ Ndiosíꞌ kúvi ráa, soo ntu̱ví, chisaꞌ kátúꞌún ráa, jee saꞌá ni̱ꞌ ya̱ kenta ráa nu̱u̱nꞌ rán, jee nakui̱ñɨ̱ꞌ ítɨ́ ráa nu̱u̱nꞌ rán saꞌá ni̱ꞌ, sáva kuniꞌ va̱ꞌa ráa ya̱ ñúnúunꞌ nijia ni̱ꞌ ránoꞌó.

¹⁰ ’Jie̱ꞌe̱ꞌ ya̱ niñɨ ni̱ꞌin rán nnikɨnꞌ rán tu̱ꞌun ni̱ꞌ, jee káꞌnú ni̱yo iniꞌ rán nkuni̱ꞌin rán, jee saáva sikáku ni̱ꞌ ránoꞌó hora kiji tu̱nóꞌó xéénꞌ kunoꞌo kua̱íyó rá ñɨvɨ íyó ñɨ̱vɨ́ ya̱ ntu yɨ́ꞌɨ́ ráa nu̱u̱nꞌ ni̱ꞌ, sáva kototúníꞌ ni̱ꞌ ráa jie̱ꞌe̱ꞌ rá tiñu nsa̱ꞌá ráa.

¹¹ ’Jee ñamani nenta ni̱ꞌ, saáva kunikɨnꞌ kutú rán kuiñɨ rán jín tu̱ꞌun ni̱ꞌ ya̱ jínúꞌ iniꞌ rán, sáva ni ɨɨn ntu̱náꞌ kuneí naneeꞌ ta̱ꞌvi̱ꞌ ni̱ꞌi̱nꞌ rán.

¹² ’Ñɨvɨ ya̱ kuneí‑i si̱kɨ̱ꞌ ya̱ níváꞌa jín nu̱u̱nꞌ kui̱ꞌna̱ꞌ kúñáꞌnú, jee saꞌá ni̱ꞌ ya̱ kuñáꞌnú ñɨvɨ vá kuéntáꞌ kúvi‑i nekaꞌ ya̱ yɨ́tuvi iniꞌ veñu̱ꞌun Ndiosíꞌ ni̱ꞌ. Jee ni nsáꞌ kene‑e nu̱u̱nꞌ nééꞌ Ndiosíꞌ yukuán. Jee tee ni̱ꞌ súví Ndiosíꞌ ni̱ꞌ ñɨvɨ vá, jín súví jiáá nuꞌuꞌ, jín súví ñuunꞌ Ndiosíꞌ ni̱ꞌ. Jee ñuunꞌ yukuán kúvi Jerusalén jiáá, jee va̱kuun ne̱ súkún nu̱u̱nꞌ nééꞌ Ndiosíꞌ maáníꞌ.

¹³ ’Ñɨvɨ ya̱ íyó so̱ꞌo, jee teso̱ꞌo va̱ꞌa nú rá tu̱ꞌun ya̱ káchíꞌ Ta̱chi̱ꞌ Ííꞌ nu̱u̱nꞌ rá grupo rá ñɨvɨ ya̱ jínúꞌ iniꞌ ráa nuꞌuꞌ.”

Tu̱ꞌun ya̱ kuáꞌánꞌ nu̱u̱nꞌ ñuunꞌ Laodicea

¹⁴ ’Jee tee nú nu̱u̱nꞌ tutuꞌ kɨ̱ꞌɨ̱nꞌ nu̱u̱nꞌ ya̱ kúñáꞌnú nu̱u̱nꞌ grupo rá ñɨvɨ ya̱ jínúꞌ iniꞌ ráa nuꞌuꞌ, jee suviráa ví ya̱ nééꞌ ráa nu̱u̱nꞌ ñuunꞌ Laodicea: “Nuꞌuꞌ kúvi ya̱ stúvi ya̱ suꞌva koo sáni káchíꞌ Tu̱ꞌun Ndiosíꞌ, chi síkúnkuvi na̱a̱ꞌ ni̱ꞌ máá tu̱ꞌun na̱a̱ꞌ jee jiáꞌa ni̱ꞌ ya̱ naáꞌ. Jee nuꞌuꞌ nsa̱ꞌá ni̱ꞌ ntáká nantíñú ya̱ nta̱túníꞌ Ndiosíꞌ ya̱ kiko̱o ne̱ tiempúꞌ xíꞌnañúꞌún. Tu̱ꞌun yaꞌá káchíꞌ nuꞌuꞌ:

¹⁵ ’Jíníꞌ ni̱ꞌ ntáká tiñu sáꞌá rán. [Ni ntu sáꞌá rán ya̱ ne̱kuva̱ꞌa iniꞌ ánímaꞌ ñɨvɨ kuéntáꞌ] sáꞌá nute vi̱jin nékúváꞌa iniꞌ ñɨvɨ, [ni ntu násaváꞌa rán iniꞌ ánímaꞌ ñɨvɨ kuéntáꞌ xínúvi] nute íꞌní rá ñɨvɨ. Kuíni ni̱ꞌ ya̱ kuéntáꞌ maá vi̱jin kuvi rán, áxí kuéntáꞌ maá íꞌní.

¹⁶ Soo jie̱ꞌe̱ꞌ ya̱ maá sava vi̱xi̱nꞌ rán, ya̱ ntu vi̱jin jín ntu íꞌní, jee kuéntáꞌ sa̱néꞌ nujien ni̱ꞌ ránoꞌó yuꞌú ni̱ꞌ.

¹⁷ ’Chi ránoꞌó, jee káchíꞌ rán ya̱ kúká rán jín ya̱ nku̱kúká rán jín ya̱ ntu̱náꞌ jíniñúꞌún rán, soo ni ntu jíníꞌ rán ya̱ na̱ ka̱ꞌ náꞌví rán, jín ya̱ kuéntáꞌ nóꞌo láꞌví rán, jín ya̱ kuéntáꞌ kuáá rán, jín ya̱ kuéntáꞌ íyó ñɨɨn rán nu̱u̱nꞌ nuꞌuꞌ.

¹⁸ Saáva nákutíñú ni̱ꞌ nu̱u̱nꞌ rán ya̱ kunenu̱u̱nꞌ rán ya̱ yɨ́yáꞌvi ka̱ꞌ ya̱ va̱ji nu̱u̱nꞌ ni̱ꞌ kuéntáꞌ keꞌen rán ka̱a oro ya̱ ya nna̱ka̱yu̱ꞌ nu̱u̱nꞌ ñúꞌúnꞌ sáva saꞌá ninuꞌun maa, sáva kukúká nijia rán nu̱u̱nꞌ nuꞌuꞌ. Jee nunasɨ́ rán koo ninuꞌun rán nu̱u̱nꞌ ni̱ꞌ kuéntáꞌ keꞌen rán nu̱u̱nꞌ ni̱ꞌ saꞌma kuíjín sáva ntu koo tu̱nkánuun rán jie̱ꞌe̱ꞌ íyó ñɨɨn rán nu̱u̱nꞌ nuꞌuꞌ. Jee tɨɨn rán tu̱ꞌun ni̱ꞌ kuéntáꞌ keꞌen rán nu̱u̱nꞌ ni̱ꞌ ta̱ta̱nꞌ chuꞌun rán nchinúún rán sáva nu̱nijínꞌ nu̱u̱nꞌ rán.

¹⁹ ’Chi ntáká rá ñɨvɨ ya̱ ñúnúunꞌ ni̱ꞌ, jee núxeenꞌ ni̱ꞌ nu̱u̱nꞌ ráa jee xínóꞌo ni̱ꞌ ráa náchuꞌun na̱a̱ꞌ ni̱ꞌ ichi ráa. Saáva nakukáñá iniꞌ ráa nakunikɨnꞌ ráa ichi váꞌa jee nakani iniꞌ ráa.

²⁰ Kune̱ꞌyá rán, chi kuéntáꞌ íñɨ́ ni̱ꞌ yuvéꞌí rán síkájián ni̱ꞌ, retú néni ɨɨn rán teso̱ꞌo tu̱ꞌun káꞌánꞌ ni̱ꞌ jee chuꞌun iniꞌ rán maa jee ki̱vɨ ni̱ꞌ iniꞌ ánímaꞌ‑a kuéntáꞌ sine‑e yuvéꞌí jee ki̱vɨ ni̱ꞌ, jee kajiꞌ ni̱ꞌ i̱xta̱ꞌ jín‑i jee kajiꞌ ñɨvɨ vá jín nuꞌuꞌ.

²¹ ’Jee ñɨvɨ ya̱ kuneí‑i si̱kɨ̱ꞌ ya̱ níváꞌa jín nu̱u̱nꞌ kui̱ꞌna̱ꞌ kúñáꞌnú, jee ku̱ꞌva ni̱ꞌ ya̱ kuneeꞌ ñɨvɨ vá jín nuꞌuꞌ nu̱u̱nꞌ teyuꞌ ni̱ꞌ nu̱u̱nꞌ tátúníꞌ ni̱ꞌ, kuéntáꞌ kua̱ꞌ nku̱neí ni̱ꞌ si̱kɨ̱ꞌ tiñu níváꞌa jee nééꞌ ni̱ꞌ jín Tááꞌ ni̱ꞌ nu̱u̱nꞌ teyuꞌ re̱ꞌ nu̱u̱nꞌ tátúníꞌ re̱ꞌ.

²² ’Ñɨvɨ ya̱ íyó so̱ꞌo, jee teso̱ꞌo va̱ꞌa nú rá tu̱ꞌun ya̱ káchíꞌ Ta̱chi̱ꞌ Ííꞌ nu̱u̱nꞌ rá grupo rá ñɨvɨ ya̱ jínúꞌ iniꞌ ráa nuꞌuꞌ” ―nkachiꞌ Jesús.