Apoclipsis 22 - Mixteco del suroeste de Tlaxiaco Oaxaca

¹ Saájee najiáꞌáꞌ ííꞌ vá nxi̱néꞌénꞌ re̱ꞌ nuꞌuꞌ máá maá ntekáꞌnú jín nute ya̱ sáꞌá‑a ya̱ kutekuꞌ rá ñɨvɨ nɨ́ɨ́nkání. Jee máá nute kuíí xúꞌún nijia ví‑i kuéntáꞌ cristal kéne‑e teyuꞌ nu̱u̱nꞌ nééꞌ Ndiosíꞌ tátúníꞌ re̱ꞌ jín maáréꞌ ya̱ kúvi re̱ꞌ Lanchi Lúlí.

² Jee sava iniꞌ ichi káꞌnú ya̱ káá sava iniꞌ ñuunꞌ vá jíka nute vá, jee ni núvíꞌ íyó ichi yunúte vá íñɨ́ máá maá yutun ya̱ sáꞌá‑a ya̱ kutekuꞌ rá ñɨvɨ vá nɨ́ɨ́nkání. Jee u̱xu̱ꞌ u̱vi̱ꞌ (12) íchí kúun ya̱ vixíꞌ maa ya̱ kui̱ya̱ꞌ, chi ta yo̱o̱ꞌ kúun ya̱ vixíꞌ maa. Jee rá naꞌá yu̱ku̱ꞌ‑u íyótiñu‑u sáva xinúvi‑i rá ñɨvɨ ntáká nación.

³ Jee ntu̱náꞌ koo ka̱ꞌ ya̱ kɨꞌɨ chi̱ji tu̱ꞌun chisónínu Ndiosíꞌ. Jee nu̱u̱nꞌ ñuunꞌ vá koo teyuꞌ nu̱u̱nꞌ nééꞌ Ndiosíꞌ tátúníꞌ re̱ꞌ jín maáréꞌ ya̱ kúvi re̱ꞌ Lanchi Lúlí Ndiosíꞌ. Jee rá musúꞌ re̱ꞌ kɨtíñú ráa nu̱u̱nꞌ re̱ꞌ.

⁴ Jee kuniꞌ jínúunꞌ ráa nu̱u̱nꞌ máá maáréꞌ, jee kuniso súví re̱ꞌ yutéénꞌ ráa.

⁵ Jee ni nsáꞌ koo ka̱ꞌ yakuááꞌ. Jee rá ñɨvɨ ni nsáꞌ kuniñúꞌún ráa ka̱ꞌ ñuꞌunꞌ natee ráa, ni ya̱ kutuunꞌ ka̱ꞌ ñuꞌunꞌ nka̱niiꞌ. Chi maá I̱toꞌoꞌ‑ó Ndiosíꞌ stúúnꞌ re̱ꞌ nuva re̱ꞌ kutuunꞌ‑u nu̱u̱nꞌ ráa. Jee suni tatúníꞌ ráa nɨ́ɨ́nkání.

Ya kua̱kuyatin ya̱ niji tuku Cristo

⁶ Saájee nkachiꞌ najiáꞌáꞌ ííꞌ vá nu̱u̱nꞌ nuꞌuꞌ: ―Rá tu̱ꞌun yaꞌá sikúnkuvi na̱a̱ꞌ jee máá naáꞌ nijia kúvi‑i. Chi maá I̱toꞌoꞌ‑ó Ndiosíꞌ ví ya̱ chúꞌun re̱ꞌ Ta̱chi̱ꞌ Ííꞌ re̱ꞌ iniꞌ ánímaꞌ rá ñɨvɨ ñani re̱ꞌ sáva nákani ráa rá tu̱ꞌun kéne yuꞌú re̱ꞌ, jee nchu̱ichí re̱ꞌ najiáꞌáꞌ ííꞌ re̱ꞌ, sáva stúvi‑i nu̱u̱nꞌ rá ñɨvɨ kúvi musúꞌ re̱ꞌ rá tiñu ya̱ ya̱chi̱ꞌ ni kuvi‑i ―nkachiꞌ najiáꞌáꞌ ííꞌ vá.

⁷ ―¡Kune̱ꞌyá rán!, chi ñamani niji tuku ni̱ꞌ ―nkachiꞌ Jesús― jee netuꞌ kuvi rá ñɨvɨ ya̱ chúꞌun iniꞌ ráa tu̱ꞌun nkene yuꞌú Ndiosíꞌ ya̱ nééꞌ nu̱u̱nꞌ tutuꞌ yaꞌá.

⁸ Nuꞌuꞌ, Juan, nuꞌuꞌ ví ya̱ nteso̱ꞌo ni̱ꞌ jee niniꞌ jínúunꞌ ni̱ꞌ ntáká rá tu̱ꞌun yaꞌá jín tiñu yaꞌá. Jee sáá nkuvi nteso̱ꞌo ni̱ꞌ rá tu̱ꞌun vá, jín rá tiñu niniꞌ jínúunꞌ ni̱ꞌ vá, jee nna̱kui̱ñɨ̱ꞌ ítɨ́ ni̱ꞌ jiáxin ni̱ꞌ maáníꞌ ne̱ nu̱u̱nꞌ ñuꞌun jie̱ꞌe̱ꞌ najiáꞌáꞌ ííꞌ vá ya̱ nstúvi‑i rá tiñu vá nu̱u̱nꞌ nuꞌuꞌ sáva kuneñu̱ꞌun ni̱ꞌ maa nékúvi.

⁹ Soo nkachiꞌ‑i nu̱u̱nꞌ ni̱ꞌ: ―Koto sáꞌá nú sukuán, chi suni táꞌán musúꞌ kúvi ni̱ꞌ jín noꞌó, jín rá ñanitáꞌán nú ya̱ kúvi ráa rá ñɨvɨ ya̱ nákani rá tu̱ꞌun kéne yuꞌú Ndiosíꞌ, jín maáráa ya̱ chúꞌun iniꞌ ráa tu̱ꞌun re̱ꞌ ya̱ nééꞌ nu̱u̱nꞌ tutuꞌ yaꞌá. Saáva kuneñu̱ꞌun nú máá maá Ndiosíꞌ.

¹⁰ Jee suni nkachiꞌ‑i nu̱u̱nꞌ ni̱ꞌ: ―Koto chíséꞌí nú rá tu̱ꞌun yaꞌá ya̱ nkene yuꞌú Ndiosíꞌ ya̱ nééꞌ nu̱u̱nꞌ tutuꞌ yaꞌá, chi ya̱ kua̱kuyatin tiempúꞌ ya̱ sikúnkuvi re̱ꞌ nɨꞌɨ tiñu yaꞌá.

¹¹ Saájee ɨɨn ñɨvɨ ya̱ sáꞌá‑a rá tiñu níváꞌa, jee kunikɨnꞌ‑ɨ saꞌá‑a rá tiñu níváꞌa. Jee ñɨvɨ néꞌí ya̱ sáꞌá‑a rá tiñu néꞌí, jee kunikɨnꞌ‑ɨ saꞌá‑a rá tiñu néꞌí. Jee ɨɨn ñɨvɨ ya̱ sáꞌá‑a mani tiñu na̱a̱ꞌ tiñu íyó váꞌa, jee kunikɨnꞌ‑ɨ saꞌá‑a tiñu na̱a̱ꞌ. Jee ɨɨn ñɨvɨ ya̱ nsa̱ꞌá sɨ́ɨ́n Ndiosíꞌ ya̱ ntu yɨ́ꞌɨ́‑ɨ nu̱u̱nꞌ tiñu níváꞌa, jee kunikɨnꞌ‑ɨ kueꞌnu‑u sukuán ―nkachiꞌ najiáꞌáꞌ ííꞌ vá.

¹² Saájee maá I̱toꞌoꞌ‑ó nkachiꞌ re̱ꞌ: ―¡Kune̱ꞌyá rán!, ñamani niji ni̱ꞌ. Jee kiji ni̱ꞌ jín ta̱ꞌvi̱ꞌ ya̱ naku̱ꞌva ni̱ꞌ nu̱u̱nꞌ ta ɨɨn ɨɨn rá ñɨvɨ, jie̱ꞌe̱ꞌ na̱ja kua̱ꞌ íyó sáni rá tiñu ya̱ nsa̱ꞌá ráa.

¹³ Nuꞌuꞌ kúvi ni̱ꞌ kuéntáꞌ kúvi letra A ya̱ kíjiéꞌé xíꞌnañúꞌún, jín letra Z ya̱ jínu nu̱u̱nꞌ nɨ́ꞌɨ. Nuꞌuꞌ kúvi ya̱ ya íyó ni̱ꞌ nɨ́ɨ́nkání ne̱ xíꞌnañúꞌún ne̱ sáá ntiáꞌan kijiéꞌé kiko̱o ñɨ̱vɨ́, jee sáá nɨꞌɨ ñɨ̱vɨ́ jee koo ni̱ꞌ nɨ́ɨ́nkání, jee nuꞌuꞌ kúvi ya̱ nka̱jiéꞌé ni̱ꞌ nɨꞌɨ jee suni nuꞌuꞌ sijínu ni̱ꞌ maa.

¹⁴ Saáva na̱ ka̱ꞌ netuꞌ ka̱ꞌ kuvi rá ñɨvɨ ya̱ nasánoo ráa iniꞌ ánímaꞌ ráa nu̱u̱nꞌ ya̱ níváꞌa, jee yukuán kúvi kuéntáꞌ nakete ráa saꞌma ráa. Jee sukuán íyó ni̱ꞌi̱nꞌ ráa ya̱ kuvi kajiꞌ ráa ya̱ vixíꞌ kúun yutun ya̱ sáꞌá ya̱ kutekuꞌ ráa nɨ́ɨ́nkání yukuán, jee íyó ni̱ꞌi̱nꞌ ráa ya̱ kuvi ki̱vɨ ráa rá yuvéꞌí ñuunꞌ ííꞌ yukuán.

¹⁵ Soo chatáꞌ ñuunꞌ vá kino̱o rá ñɨvɨ ya̱ kúvi ráa kuéntáꞌ tinaꞌ ya̱ sáꞌá ráa tiñu néꞌí, jín rá ñɨvɨ ya̱ sáꞌá tásɨ́, jín rá ñɨvɨ ya̱ kúsíkɨ́ iniꞌ ráa sáꞌá téní ráa, jín rá ñɨvɨ ya̱ sáꞌá ráa ni̱yɨ, jín rá ñɨvɨ ya̱ néñu̱ꞌun ráa na̱ni nantíñú ya̱ ntu kúvi Ndiosíꞌ, jín rá ñɨvɨ ya̱ táꞌán iniꞌ ráa tu̱ꞌun túꞌún jee kátúꞌún ráa.

¹⁶ ’Jee nuꞌuꞌ Jesús, nchu̱ichí ni̱ꞌ najiáꞌáꞌ ííꞌ ni̱ꞌ sáva stúvi re̱ꞌ nu̱u̱nꞌ noꞌó rá tu̱ꞌun na̱a̱ꞌ yaꞌá sáva ku̱ꞌva nú maa nu̱u̱nꞌ rá grupo rá ñɨvɨ ya̱ jínúꞌ iniꞌ ráa nuꞌuꞌ. Jee ne̱ nu̱u̱nꞌ David váji ni̱ꞌ ya̱ kúvi ni̱ꞌ Se̱ꞌya ichiyúkúnꞌ ya̱ nkene ni̱ꞌ ne̱ nu̱u̱nꞌ David. Viiꞌ víꞌí kúñáꞌnú ni̱ꞌ kuéntáꞌ kua̱ꞌ viiꞌ jiánu̱te̱ꞌ tiu̱u̱nꞌ xúꞌún ya̱ kenta ntáká ya̱neꞌenꞌ.

¹⁷ Jee Ta̱chi̱ꞌ Ííꞌ jín rá ñɨvɨ yɨ́ꞌɨ́ nu̱u̱nꞌ Ndiosíꞌ, ya̱ suviráa vá kuvi kuéntáꞌ ñaꞌan ya̱ tana̱ꞌá jín Jesús. Jee káchíꞌ ráa: ―¡Neꞌenꞌ! Jee ñɨvɨ ya̱ tésóꞌo‑o tu̱ꞌun re̱ꞌ yaꞌá, jee suni íyó kachiꞌ‑i: ―¡Neꞌenꞌ! Jee ñɨvɨ ya̱ kuéntáꞌ jíchíꞌ‑i nute jee ñúkúvi iniꞌ‑i Ndiosíꞌ, jee, ¡neꞌenꞌ!, natuꞌva nu̱u̱nꞌ re̱ꞌ jee tɨɨn saɨn‑ɨ nute koꞌo‑o ya̱ sáꞌá nute vá kutekuꞌ nú nɨ́ɨ́nkání jín re̱ꞌ.

¹⁸ Nuꞌuꞌ, Juan, jiáꞌa ni̱ꞌ ya̱ naáꞌ nu̱u̱nꞌ ntáká rá ñɨvɨ ya̱ teso̱ꞌo ráa rá tu̱ꞌun ya̱ nkene yuꞌú Ndiosíꞌ ya̱ níso nu̱u̱nꞌ tutuꞌ yaꞌá. Retú néni ɨɨn ñɨvɨ ya̱ nachisó‑o ka̱ꞌ tu̱ꞌun nu̱u̱nꞌ rá tu̱ꞌun ya̱ níso nu̱u̱nꞌ tutuꞌ yaꞌá, jee maá Ndiosíꞌ nachisó re̱ꞌ rá tu̱nóꞌó kunoꞌo ñɨvɨ vá ya̱ níso nu̱u̱nꞌ tutuꞌ yaꞌá.

¹⁹ Jee retú néni ɨɨn ñɨvɨ ya̱ xitá‑a tu̱ꞌun ya̱ nkene yuꞌú Ndiosíꞌ ya̱ níso nu̱u̱nꞌ tutuꞌ yaꞌá, jee maá Ndiosíꞌ suni xitá re̱ꞌ ta̱ꞌvi̱ꞌ ya̱ ni̱ꞌi̱nꞌ‑i ya̱ kuvi kajiꞌ‑i ya̱ vixíꞌ yutun ya̱ sáꞌá‑a ya̱ kutekuꞌ ñɨvɨ nɨ́ɨ́nkání jín re̱ꞌ, jee suni ni nsáꞌ ni̱ꞌi̱nꞌ‑i ki̱vɨ‑ɨ ñuunꞌ ííꞌ vá, jie̱ꞌe̱ꞌ ya̱ káchíꞌ tu̱ꞌun ya̱ níso nu̱u̱nꞌ tutuꞌ yaꞌá.

²⁰ Jee maá Jesús jiáꞌa ya̱ naáꞌ jie̱ꞌe̱ꞌ ntáká rá tu̱ꞌun yaꞌá, jee káchíꞌ re̱ꞌ: ―Máá naáꞌ nijia kúvi ya̱ ñamani niji ni̱ꞌ ―kachiꞌ re̱ꞌ. Jee nkachiꞌ ni̱ꞌ nu̱u̱nꞌ re̱ꞌ: ―¡Amén! ¡Sukuán koo! ¡Neꞌenꞌ I̱toꞌoꞌ ni̱ꞌ Jesús! ―nkachiꞌ ni̱ꞌ.

²¹ Jee na̱ ka̱ꞌ koo ma̱ni̱ꞌ iniꞌ I̱toꞌoꞌ‑ó Jesús kune̱ꞌyá re̱ꞌ ntáká ránoꞌó. Amén. Sukuán koo.