Apoclipsis 20 - Mixteco del suroeste de Tlaxiaco Oaxaca

Mil (1000) kui̱ya̱ꞌ

¹ Saájee kuíre niniꞌ ni̱ꞌ ya̱ ne̱ antivɨ́ súkún va̱ji nkuun ɨɨn najiáꞌáꞌ ííꞌ, jee ínaꞌá re̱ꞌ nakáa ya̱ jíne re̱ꞌ numaꞌ ya̱ ntu jínu nu̱u̱nꞌ kúnú‑u, jee suni ínaꞌá re̱ꞌ ɨɨn cadena ka̱a máá káꞌnú.

² Jee ntɨɨn re̱ꞌ ko̱o̱ꞌ mánasɨ́, ya̱ kúvi ko̱o̱ꞌ ya̱ íyó ne̱ yanaꞌán víꞌí, ya̱ kúvi‑i kui̱ꞌna̱ꞌ kúñáꞌnú ya̱ kúvi Satanás, jee niꞌniꞌ najiáꞌáꞌ ííꞌ vá maa kunuꞌniꞌ‑i ɨɨn mil (1000) kui̱ya̱ꞌ.

³ Jee nsi̱kéne re̱ꞌ maa iniꞌ numaꞌ ya̱ ntu jínu nu̱u̱nꞌ kúnú‑u, jee ñasɨꞌ kutú váꞌa re̱ꞌ yuꞌú numaꞌ vá jee ntee re̱ꞌ seyúꞌ maa, sáva ntu xináꞌví‑i ka̱ꞌ rá ñɨvɨ rá nación, nekuaꞌ ji̱nu ɨɨn mil (1000) kui̱ya̱ꞌ vá. Jee retú njia̱ꞌa tiempúꞌ vá jee íyó nakani núne re̱ꞌ maa yakuꞌ ni tiempúꞌ.

⁴ Jee kuíre niniꞌ ni̱ꞌ rá teyuꞌ nu̱u̱nꞌ nééꞌ rá tátúníꞌ, jee yukuán ña̱kuneeꞌ rá ñɨvɨ ya̱ nni̱ꞌi̱nꞌ ráa tiñu ya̱ kuvi sanáaꞌ ráa kua̱chi. Jee nna̱tekuꞌ i̱i̱ꞌ rá ánímaꞌ rá ñɨvɨ ya̱ ntéꞌneꞌ xi̱ni̱ꞌ ráa jie̱ꞌe̱ꞌ ya̱ njia̱ꞌa ráa ya̱ naáꞌ jie̱ꞌe̱ꞌ Jesús jín jie̱ꞌe̱ꞌ ya̱ niñɨ na̱a̱ꞌ ráa jín Tu̱ꞌun Ndiosíꞌ. Jee suviráa ví rá ñɨvɨ ya̱ ntu nnéñu̱ꞌun ráa kitɨ xéénꞌ kákini xíꞌnañúꞌún vá, ni jín santúꞌ ñunéꞌyúꞌ maátíꞌ. Jee ni ntu nníꞌínꞌ ráa seña ti̱ꞌ kuniso te̱e̱nꞌ ráa ni jín naꞌá ráa. Jee nna̱tekuꞌ i̱i̱ꞌ ráa, jee nta̱túníꞌ ráa tiñu jín Cristo ɨɨn mil (1000) kui̱ya̱ꞌ.

⁵ Jee yaꞌá kúvi ya̱ xíꞌnañúꞌún nna̱tekuꞌ i̱i̱ꞌ rá ni̱yɨ nkene ráa nteñu rá ni̱yɨ. Soo rá inka ka̱ꞌ ñɨvɨ níꞌiꞌ ntu nna̱tekuꞌ ráa, nekuaꞌ ji̱nu ɨɨn mil (1000) kui̱ya̱ꞌ yaꞌá.

⁶ Jee na̱ ka̱ꞌ netuꞌ ka̱ꞌ na̱ ka̱ꞌ i̱i̱ꞌ ka̱ꞌ kuvi ɨɨn ñɨvɨ ya̱ kuvi ɨɨn rá ñɨvɨ ya̱ natekuꞌ i̱i̱ꞌ ráa ya̱ xíꞌnañúꞌún, chi ni nsáꞌ yɨ́ꞌɨ́ rá ñɨvɨ vá xi̱ntíín ñuníyɨ nsáꞌ kuviꞌ ráa ka̱ꞌ ya̱ uvíꞌ íchí ya̱ nkúnoꞌo ráa ka̱ꞌ tu̱nóꞌó kiji. Chisaꞌ kuvi ráa su̱tu̱ꞌ nu̱u̱nꞌ Ndiosíꞌ jín nu̱u̱nꞌ Cristo. Jee tatúníꞌ ráa tiñu jín re̱ꞌ ɨɨn mil (1000) kui̱ya̱ꞌ.

⁷ Saájee sáá jínu ya̱ ɨɨn mil (1000) kui̱ya̱ꞌ vá, saájee nakani núne najiáꞌáꞌ ííꞌ vá Satanás nu̱u̱nꞌ nyɨ̱niꞌyuꞌ‑u.

⁸ Jee kene‑e sáva xináꞌví‑i rá ñɨvɨ rá nación ya̱ íyó ni kúmíꞌ ichi ñɨ̱vɨ́. Jee kɨ̱xináꞌví‑i rá ñɨvɨ rá ñuunꞌ Gog jín Magog, sáva saꞌá‑a ya̱ nutútú rá ñɨvɨ vá sáva kantáꞌán ráa jín rá ñɨvɨ Ndiosíꞌ. Jee kue̱ꞌe̱ꞌ víꞌí ntántúníꞌ ráa nutútú kuéntáꞌ kua̱ꞌ kue̱ꞌe̱ꞌ ñuítɨ́ káá yuꞌú nteñúꞌún.

⁹ Jee kutenuun ráa kɨ̱ꞌɨ̱nꞌ ráa kua̱íyó nu̱u̱nꞌ ñu̱ꞌún iniꞌ ñɨ̱vɨ́. Jee chuti̱yu̱ꞌ ráa nu̱u̱nꞌ nééꞌ rá ñɨvɨ ya̱ yɨ́ꞌɨ́ rává nu̱u̱nꞌ Ndiosíꞌ, jín nu̱u̱nꞌ káá ñuunꞌ ya̱ ñúnúunꞌ re̱ꞌ. Soo ne̱ súkún nki̱nkuun ñuꞌunꞌ, jee nka̱yu̱ꞌ ráa.

¹⁰ Jee kui̱ꞌna̱ꞌ kúñáꞌnú ya̱ nxi̱náꞌví‑i ráa, jee nsi̱kéne Ndiosíꞌ maa nchuꞌun re̱ꞌ maa nu̱u̱nꞌ ñúꞌún xéénꞌ kuéntáꞌ nteñúꞌún nu̱u̱nꞌ káyúꞌ núꞌvéꞌ ñuꞌunꞌ jín sufríꞌ, nu̱u̱nꞌ ya̱ yɨ́ꞌɨ́ kitɨ xéénꞌ kákini vá jín inka ka̱ꞌ kitɨ xéénꞌ kákini ya̱ kúvi te̱e ya̱ káchítu̱ꞌún tu̱ꞌun túꞌún kéne yuꞌú kitɨ xe̱e̱nꞌ xíꞌnañúꞌún. Jee nu̱u̱nꞌ ñúꞌúnꞌ yukuán kuꞌun ráa kunoꞌo ráa nɨ́ɨ́nkání.

Teyuꞌ ñáꞌnú kuíjín nu̱u̱nꞌ kúnáaꞌ kua̱chi

¹¹ Jee niniꞌ ni̱ꞌ ɨɨn teyuꞌ kuíjín kúñáꞌnú nu̱u̱nꞌ kuna̱a̱ꞌ tiñu. Jee yukuán nééꞌ Ndiosíꞌ ya̱ tátúníꞌ re̱ꞌ tiñu. Jee nkuiyo ñɨ̱vɨ́ jín súkún nu̱u̱nꞌ re̱ꞌ. Chi ntu̱ví ka̱ꞌ né núꞌ koo ráa nu̱u̱nꞌ re̱ꞌ.

¹² Jee niniꞌ ni̱ꞌ kua̱íyó rá ni̱yɨ, va̱ni ya̱ kúñáꞌnú va̱ni ya̱ ntu kúñáꞌnú, íñɨ́ ráa ichinúúnꞌ re̱ꞌ. Jee nsa̱ꞌá re̱ꞌ ya̱ nnine rá tutuꞌ. Jee nsa̱ꞌá re̱ꞌ ya̱ nnine inka ka̱ꞌ tutuꞌ níso súví rá ñɨvɨ ya̱ kutekuꞌ ráa nɨ́ɨ́nkání jín Ndiosíꞌ. Jee nsa̱ꞌá náaꞌ re̱ꞌ jie̱ꞌe̱ꞌ rá ñɨvɨ sánikua̱ꞌ tiñu nsa̱ꞌá ráa ya̱ níso nu̱u̱nꞌ rá tutuꞌ yukuán.

¹³ Jee rá ñɨvɨ ya̱ níꞌiꞌ ráa nu̱u̱nꞌ nteñúꞌún jee nna̱tekuꞌ ráa nnene ráa nu̱u̱nꞌ nute, jee rá ñɨvɨ ya̱ níꞌiꞌ ya̱ ya íyó ráa nu̱u̱nꞌ nútútú ánímaꞌ rá ni̱yɨ suni nna̱tekuꞌ ráa nnene ráa yukuán. Jee nsa̱ꞌá náaꞌ Ndiosíꞌ jie̱ꞌe̱ꞌ tiñu na̱ja kua̱ꞌ tiñu nsa̱ꞌá ta ɨɨn ɨɨn ráa.

¹⁴ Saájee nxi̱náánꞌ re̱ꞌ ya̱ jíꞌíꞌ ñɨvɨ jee nu̱u̱nꞌ nútútú rá ánímaꞌ rá ni̱yɨ, nchuꞌun Ndiosíꞌ maa kua̱ꞌa̱nꞌ‑a nu̱u̱nꞌ ñúꞌún xéénꞌ iniꞌ nteñúꞌún nu̱u̱nꞌ káyúꞌ núꞌvéꞌ ñuꞌunꞌ. Jee tu̱nóꞌó kunoꞌo rá ñɨvɨ ya̱ kuꞌun ráa nu̱u̱nꞌ ñúꞌún xéénꞌ nteñúꞌún yukuán kúvi ya̱ naní‑i kuviꞌ ráa ya̱ uvíꞌ íchí.

¹⁵ Jee nu̱u̱nꞌ ñúꞌún xéénꞌ iniꞌ nteñúꞌún yukuán nu̱u̱nꞌ káyúꞌ núꞌvéꞌ ñuꞌunꞌ nchuꞌun re̱ꞌ ntáká rá ñɨvɨ ya̱ ntu níso rá súví ráa nu̱u̱nꞌ tutuꞌ níso rá súví rá ñɨvɨ ya̱ kutekuꞌ ráa nɨ́ɨ́nkání jín Ndiosíꞌ.