Apoclipsis 2 - Mixteco del suroeste de Tlaxiaco Oaxaca

Tu̱ꞌun ya̱ kua̱ꞌa̱nꞌ nu̱u̱nꞌ ni uxáꞌ rá grupo ñɨvɨ jínúꞌ iniꞌ ráa Jesús Tu̱ꞌun kuáꞌánꞌ nu̱u̱nꞌ ñuunꞌ Éfeso

¹ ’Jee tee nú tu̱ꞌun yaꞌá kɨ̱ꞌɨ̱nꞌ‑ɨ nu̱u̱nꞌ ya̱ kúñáꞌnú nu̱u̱nꞌ grupo ñɨvɨ ya̱ jínúꞌ iniꞌ ráa nuꞌuꞌ, ya̱ kútútú ráa ñuunꞌ Éfeso, sáva naku̱ꞌva nú maa nu̱u̱nꞌ ráa: “Nuꞌuꞌ kúvi ya̱ ínaꞌá ni̱ꞌ ni uxáꞌ rá tiu̱u̱nꞌ ichi naꞌá kuáꞌá ni̱ꞌ, jee jíkónúun ni̱ꞌ nteñu ni uxáꞌ rá kantilerúꞌ oro. Tu̱ꞌun yaꞌá káchíꞌ nuꞌuꞌ:

² Jee jíníꞌ ni̱ꞌ ntáká tiñu váꞌa sáꞌá rán, jee íñɨ́ yɨ́ɨ́ rán yɨ́tíñú rán nu̱u̱nꞌ ni̱ꞌ, jín ya̱ káꞌnú íyó iniꞌ rán kúníꞌin rán íñɨ́ rán jín nuꞌuꞌ. Jee suni jíníꞌ ni̱ꞌ ya̱ ntu kúvi keꞌneꞌ iniꞌ rán ya̱ koo ñɨvɨ kánéꞌén nteñu rán. Jee jítotúníꞌ rán rá te̱e xínáꞌví ya̱ káchíꞌ ráa nika̱ꞌ ya̱ apóstol kúvi ráa ya̱ nchu̱ichí Ndiosíꞌ ráa, soo ntu̱ví, jee saáva jíníꞌ rán ya̱ kúvi ráa te̱e túꞌún ni.

³ Jee káꞌnú íyó iniꞌ rán kúníꞌin kutú rán íñɨ́ rán jín nuꞌuꞌ jín ya̱ jiéꞌnéꞌ iniꞌ rán nóꞌo rán tu̱nóꞌó sáꞌá kini rá ñɨvɨ ránoꞌó jie̱ꞌe̱ꞌ ínúꞌ iniꞌ rán nuꞌuꞌ, jee ni ntu núun iniꞌ rán saꞌá rán tiñu ni̱ꞌ.

⁴ ’Soo súka̱ꞌ sukuán íyó, soo íyó ɨɨn kua̱chi si̱kɨ̱ꞌ rán nu̱u̱nꞌ ni̱ꞌ, chi ntu káꞌ ñúꞌún tu̱ꞌun ñúnúunꞌ iniꞌ rán nuꞌuꞌ jín ɨɨn inka rán kuéntáꞌ kua̱ꞌ tiempúꞌ xíꞌnañúꞌún ya̱ nínúꞌ iniꞌ rán nuꞌuꞌ.

⁵ Saáva íyó naku̱ꞌun iniꞌ rán ya̱ ntántúníꞌ ñúnúunꞌ víꞌí rán nékúvi soo nkininkava rán ya̱ ntu ñúnúunꞌ rán ka̱ꞌ kua̱ꞌ nékúvi. Íyó nakani iniꞌ rán jee saꞌá rán tiñu sánikua̱ꞌ nsa̱ꞌá rán ya̱ ñúnúunꞌ víꞌí rán ne̱ rá tiempúꞌ va̱ji ya̱ta̱ꞌ sáá nka̱jiéꞌé ni̱nu̱ꞌ iniꞌ rán xíꞌnañúꞌún. Chi retú ntu̱ví, jee kenta ni̱ꞌ jee siíyo ni̱ꞌ kantilerúꞌ ránoꞌó sáva nsáꞌ kuvi rán grupo ni̱ꞌ ka̱ꞌ.

⁶ Soo súka̱ꞌ sukuán íyó, soo íyó ɨɨn jie̱ꞌe̱ꞌ ya̱ váꞌa sáꞌá rán ya̱ nakeꞌen‑e ránoꞌó. Chi jíníꞌ u̱ꞌvi̱ꞌ rán rá tiñu níváꞌa sáꞌá rá ñɨvɨ níkɨ́nꞌ tu̱ꞌun nxi̱néꞌénꞌ Nicolás. Jee suni sukuán jíníꞌ u̱ꞌvi̱ꞌ ni̱ꞌ maa ranika̱ꞌ.

⁷ ’Ñɨvɨ ya̱ íyó so̱ꞌo, jee teso̱ꞌo va̱ꞌa nú rá tu̱ꞌun ya̱ káchíꞌ Ta̱chi̱ꞌ Ííꞌ nu̱u̱nꞌ rá grupo rá ñɨvɨ ya̱ jínúꞌ iniꞌ ráa nuꞌuꞌ. Jee ñɨvɨ ya̱ kuneí‑i si̱kɨ̱ꞌ ya̱ níváꞌa jín nu̱u̱nꞌ kui̱ꞌna̱ꞌ kúñáꞌnú, saájee ku̱ꞌva ni̱ꞌ ya̱ kajiꞌ ñɨvɨ vá rá vixíꞌ ya̱ kúun nu̱u̱nꞌ maá yutun ya̱ sáꞌá ya̱ kutekuꞌ ñɨvɨ nɨ́ɨ́nkání jín ni̱ꞌ. Jee yutun vá íñɨ́‑ɨ ne̱ nu̱u̱nꞌ viiꞌ víꞌí íyó nu̱u̱nꞌ nééꞌ Ndiosíꞌ.”

Tu̱ꞌun ya̱ kuáꞌánꞌ nu̱u̱nꞌ ñuunꞌ Esmirna

⁸ ’Tee nú tu̱ꞌun yaꞌá kɨ̱ꞌɨ̱nꞌ nu̱u̱nꞌ ya̱ kúñáꞌnú nu̱u̱nꞌ grupo rá ñɨvɨ jínúꞌ iniꞌ ráa nuꞌuꞌ, ya̱ kútútú ráa ñuunꞌ Esmirna: “Nuꞌuꞌ kúvi ya̱ ya íyó ni̱ꞌ nɨ́ɨ́nkání ne̱ xíꞌnañúꞌún ne̱ sáá ntiáꞌan kijiéꞌé kiko̱o ñɨ̱vɨ́, jee sáá nɨꞌɨ ñɨ̱vɨ́ jee koo ni̱ꞌ nɨ́ɨ́nkání, chi ni̱ꞌi̱ꞌ ni̱ꞌ soo nna̱tekuꞌ i̱i̱ꞌ tuku ni̱ꞌ. Tu̱ꞌun yaꞌá káchíꞌ ni̱ꞌ:

⁹ [Jee jíníꞌ ni̱ꞌ nta̱ká tiñu váꞌa sáꞌá rán] jee jíníꞌ ni̱ꞌ rá tu̱nóꞌó nóꞌo rán, jín suni jie̱ꞌe̱ꞌ tu̱nláꞌví nóꞌo rán. Soo súka̱ꞌ sukuán kúvi, soo kúká rán jín nɨꞌɨ ya̱ váꞌa níso tu̱ꞌun ni̱ꞌ, chi jínúꞌ iniꞌ rán maa. Jee suni jíníꞌ ni̱ꞌ ya̱ káꞌánꞌ niva̱ꞌa rá ñɨvɨ si̱kɨ̱ꞌ rán. Jee rá ñɨvɨ vá káchíꞌ ráa ya̱ ñɨvɨ ñuunꞌ Israel kúvi ráa ya̱ ñɨvɨ Ndiosíꞌ kúvi ráa, soo nsú ñɨvɨ Ndiosíꞌ kúvi ráa, jee kútútú ráa veꞌi sinagoga nu̱u̱nꞌ kútútú rá ñɨvɨ Israel soo ñɨvɨ ya̱ yɨ́ꞌɨ́ xi̱ntíín kui̱ꞌna̱ꞌ kúñáꞌnú naní Satanás kúvi ráa.

¹⁰ Soo koto yúꞌví rán jie̱ꞌe̱ꞌ rá tu̱nóꞌó kunoꞌo rán. Chi kui̱ꞌna̱ꞌ kúñáꞌnú, jee saꞌá‑a ya̱ chiꞌi ñɨvɨ sava ránoꞌó veka̱a sáva kototúníꞌ‑i ránoꞌó retú kunikɨnꞌ nijia rán nuꞌuꞌ áxí ntu̱ví, jee kunoꞌo rán tu̱nóꞌó u̱ji̱ꞌ ki̱vɨ̱ꞌ. Soo kuiñɨ ni̱ꞌin rán sikúnkuvi na̱a̱ꞌ rán súka̱ꞌ ne̱ kuviꞌ rán, saájee taji ni̱ꞌ ta̱ꞌvi̱ꞌ nu̱u̱nꞌ rán, ya̱ suvi kuvi ya̱ ni̱ꞌi̱nꞌ rán ya̱ saꞌá Ndiosíꞌ ya̱ kutekuꞌ rán jín ni̱ꞌ nɨ́ɨ́nkání.

¹¹ ’Ñɨvɨ ya̱ íyó so̱ꞌo, jee teso̱ꞌo va̱ꞌa nú rá tu̱ꞌun ya̱ káchíꞌ Ta̱chi̱ꞌ Ííꞌ nu̱u̱nꞌ rá grupo rá ñɨvɨ ya̱ jínúꞌ iniꞌ ráa nuꞌuꞌ. Jee ñɨvɨ ya̱ kuneí‑i si̱kɨ̱ꞌ ya̱ níváꞌa jín nu̱u̱nꞌ kui̱ꞌna̱ꞌ kúñáꞌnú, jee ni nsáꞌ ni̱ꞌi̱nꞌ‑i ka̱ꞌ tu̱nóꞌó xinóꞌo Ndiosíꞌ maa ya̱ nku̱víꞌ tuku‑u ya̱ uvíꞌ íchí nu̱u̱nꞌ Ndiosíꞌ.”

Tu̱ꞌun ya̱ kuáꞌánꞌ nu̱u̱nꞌ ñuunꞌ Pérgamo

¹² ’Jee tee nú tu̱ꞌun yaꞌá kɨ̱ꞌɨ̱nꞌ‑ɨ nu̱u̱nꞌ ya̱ kúñáꞌnú nu̱u̱nꞌ grupo ñɨvɨ jínúꞌ iniꞌ ráa nuꞌuꞌ, ya̱ suviráa ví ya̱ nééꞌ ráa nu̱u̱nꞌ ñuunꞌ Pérgamo: “Maáníꞌ ví ya̱ kúmí ni̱ꞌ espada ya̱ xe̱e̱nꞌ ni núvíꞌ yuꞌú‑u. Suꞌva káchíꞌ nuꞌuꞌ:

¹³ [Jee jíníꞌ ni̱ꞌ ntáká tiñu váꞌa sáꞌá rán.] Jee jíníꞌ ni̱ꞌ ya̱ nééꞌ rán nu̱u̱nꞌ tátúníꞌ kui̱ꞌna̱ꞌ kúñáꞌnú naní Satanás. Soo súka̱ꞌ sukuán soo íñɨ́ ni̱ꞌin rán níkɨ́nꞌ na̱a̱ꞌ rán nuꞌuꞌ. Jee ni ntu nníkó iniꞌ rán ya̱ jínúꞌ iniꞌ rán nuꞌuꞌ, ni súnika̱ꞌ sáá nkuvi rá ki̱vɨ̱ꞌ nneeꞌ Antipas nteñu rán, ɨɨn te̱e ya̱ nsi̱kúnkuvi na̱a̱ꞌ re̱ꞌ nna̱kani na̱a̱ꞌ re̱ꞌ tu̱ꞌun ni̱ꞌ, jee ñaꞌniꞌ ráa maa nteñu rán yukuán ñuunꞌ nu̱u̱nꞌ nééꞌ Satanás.

¹⁴ ’Soo súka̱ꞌ sukuán íyó soo íyó yakuꞌ kua̱chi si̱kɨ̱ꞌ rán nu̱u̱nꞌ ni̱ꞌ. Chi nteñu ránoꞌó íyó sava rá ñɨvɨ ya̱ jínúꞌ iniꞌ ráa níkɨ́nꞌ ráa tu̱ꞌun ya̱ nxi̱néꞌénꞌ Balaam. Chi ne̱ tiempúꞌ yanaꞌán jee suvire̱ꞌ nxi̱néꞌénꞌ re̱ꞌ Balac na̱ja saꞌá máñáꞌ‑a sáva sikívɨ‑ɨ rá ñɨvɨ Israel nu̱u̱nꞌ kua̱chi, ya̱ kajiꞌ ráa rá nantíñú nso̱ko̱ꞌ nu̱u̱nꞌ rá santúꞌ ñunéꞌyúꞌ, jín ya̱ jiáꞌnu ráa jín tiñu téní.

¹⁵ Jee suni íyó sava rá ñɨvɨ nteñu rán ya̱ níkɨ́nꞌ ráa rá tu̱ꞌun xínéꞌénꞌ rá ñɨvɨ níkɨ́nꞌ tu̱ꞌun nxi̱néꞌénꞌ Nicolás, [ya̱ jíníꞌ u̱ꞌvi̱ꞌ ni̱ꞌ maa].

¹⁶ Saáva íyó nakani iniꞌ ráa xinóo ráa kua̱chi sáꞌá ráa. Chi retú ntu̱ví jee ñamani kenta ni̱ꞌ nu̱u̱nꞌ rán kantáꞌán ni̱ꞌ si̱kɨ̱ꞌ ráa jín yuchiꞌ espada kéne yuꞌú ni̱ꞌ xinóꞌo ni̱ꞌ ráa.

¹⁷ ’Ñɨvɨ ya̱ íyó so̱ꞌo, jee teso̱ꞌo va̱ꞌa nú rá tu̱ꞌun ya̱ káchíꞌ Ta̱chi̱ꞌ Ííꞌ nu̱u̱nꞌ rá grupo rá ñɨvɨ ya̱ jínúꞌ iniꞌ ráa nuꞌuꞌ. Jee ñɨvɨ ya̱ kuneí‑i si̱kɨ̱ꞌ ya̱ níváꞌa jín nu̱u̱nꞌ kui̱ꞌna̱ꞌ kúñáꞌnú, jee ku̱ꞌva ni̱ꞌ kajiꞌ‑i maná ya̱ íyó yuꞌuꞌ. Jee suni ku̱ꞌva ni̱ꞌ ɨɨn yu̱u̱ꞌ kuíjín nu̱u̱nꞌ ñɨvɨ vá, jee nu̱u̱nꞌ yu̱u̱ꞌ yukuán nééꞌ ɨɨn súví jiáá, ya̱ ni ɨɨn ñɨvɨ ntu jíníꞌ maa, chi sáni maá ni ñɨvɨ ya̱ ni̱ꞌi̱nꞌ yu̱u̱ꞌ vá ví ya̱ kukáꞌnú iniꞌ maa.”

Tu̱ꞌun ya̱ kuáꞌánꞌ nu̱u̱nꞌ ñuunꞌ Tiatira

¹⁸ ’Jee tee nú nu̱u̱nꞌ tutuꞌ kɨ̱ꞌɨ̱nꞌ nu̱u̱nꞌ ya̱ kúñáꞌnú nu̱u̱nꞌ grupo rá ñɨvɨ ya̱ jínúꞌ iniꞌ ráa nuꞌuꞌ, rá nééꞌ nu̱u̱nꞌ ñuunꞌ Tiatira: “Nuꞌuꞌ kúvi ni̱ꞌ Se̱ꞌya Ndiosíꞌ ya̱ íyó rá titɨ nchinúún ni̱ꞌ kuéntáꞌ yáá ñuꞌunꞌ. Jee rá jie̱ꞌe̱ꞌ ni̱ꞌ jiánu̱te̱ꞌ ráa kuéntáꞌ kua̱ꞌ xiñúꞌ jiánu̱te̱ꞌ ka̱a kuáán ya̱ núlɨɨ‑ɨ. Tu̱ꞌun yaꞌá káchíꞌ nuꞌuꞌ:

¹⁹ Jee jíníꞌ ni̱ꞌ rá tiñu sáꞌá rán, chi ñúnúunꞌ rán ɨɨn inka táꞌán rán. Jee jínúꞌ nijia iniꞌ rán nuꞌuꞌ. Jee saꞌá rán tiñu ni̱ꞌ, jee káꞌnú íyó iniꞌ rán kúníꞌin rán íñɨ́ rán nu̱u̱nꞌ nuꞌuꞌ. Jee jíníꞌ ni̱ꞌ ya̱ saꞌ víꞌí ka̱ꞌ sáꞌá rán tiñu váꞌa vitan nsú káꞌ rá tiñu xíꞌnañúꞌún nsa̱ꞌá rán sáá nka̱jiéꞌé jínúꞌ iniꞌ rán nuꞌuꞌ.

²⁰ ’Soo súka̱ꞌ sukuán íyó soo íyó ɨɨn kua̱chi si̱kɨ̱ꞌ rán nu̱u̱nꞌ ni̱ꞌ. Chi yɨ́netuꞌ rán néꞌyá rán nu̱u̱nꞌ ɨɨn ñaꞌan naní Jezabel ya̱ káchíꞌ ña nika̱ꞌ ya̱ kúvi ña ñaꞌan ya̱ nákani ña tu̱ꞌun kéne yuꞌú Ndiosíꞌ, soo ntu̱ví. Jee xínéꞌénꞌ ña jee xínáꞌví ña rá musúꞌ ni̱ꞌ ya̱ yɨ́tíñú ráa nu̱u̱nꞌ ni̱ꞌ, sáva saꞌá téní ráa, jín ya̱ kajiꞌ ráa rá sókóꞌ ñɨvɨ nu̱u̱nꞌ rá santúꞌ ñunéꞌyúꞌ.

²¹ Jee ya̱ njia̱ꞌa ni̱ꞌ tiempúꞌ sáva nakani iniꞌ ña, soo ni ntu kuíni ña nakani iniꞌ ña xinóo ña ya̱ sáꞌá téní ña.

²² Saáva vitan jee saꞌá ni̱ꞌ ya̱ kikava ña kukuꞌviꞌ ña jee maáráa ya̱ nsa̱ꞌá téní ráa jín ña ntántúníꞌ kunoꞌo ráa, retú ntu̱ví nákani iniꞌ ráa xinóo ráa rá tiñu vá ya̱ xínéꞌénꞌ ña.

²³ Jee kaꞌniꞌ ni̱ꞌ rá se̱ꞌya ña. ’Saájee ntáká rá grupo rá ñɨvɨ kúneí iniꞌ ráa nuꞌuꞌ, jee kukáꞌnú iniꞌ ráa ya̱ nuꞌuꞌ ví ya̱ kávii kuitɨꞌ jíníꞌ ni̱ꞌ nɨꞌɨ ya̱ jiáni iniꞌ antúníꞌ ñɨvɨ jín nɨꞌɨ ya̱ ñúꞌún ánímaꞌ ñɨvɨ. Jee naku̱ꞌva ni̱ꞌ nu̱u̱nꞌ ta ɨɨn ɨɨn rá ñɨvɨ na̱ja kua̱ꞌ sáni tiñu ya̱ nsa̱ꞌá ráa.

²⁴ ’Soo rá inka ka̱ꞌ ránoꞌó ya̱ nééꞌ ñuunꞌ Tiatira, ya̱ ntu níkɨ́nꞌ rán tu̱ꞌun ya̱ xínéꞌénꞌ ñaꞌan yukuán, jee ni ntu yɨ́ꞌɨ́ rán ñujiínꞌ tu̱ꞌun, ya̱ káchíꞌ ráa ya̱ kúvi tu̱ꞌun yuꞌuꞌ kúñáꞌnú Satanás, jee káchíꞌ ni̱ꞌ nu̱u̱nꞌ ránoꞌó ya̱ ntu̱náꞌ inka ka̱ꞌ tiñu véi taji ni̱ꞌ nu̱u̱nꞌ ránoꞌó.

²⁵ Soo kua̱chi vá kunikɨnꞌ kutú rán maá tu̱ꞌun na̱a̱ꞌ ya̱ jínúꞌ iniꞌ rán ya̱ níkɨ́nꞌ rán, nekuaꞌ niji ni̱ꞌ.

²⁶ ’Ñɨvɨ ya̱ kuneí ráa si̱kɨ̱ꞌ ya̱ níváꞌa jín nu̱u̱nꞌ kui̱ꞌna̱ꞌ kúñáꞌnú, jín ya̱ sikúnkuvi na̱a̱ꞌ va̱ꞌa ráa tiñu ni̱ꞌ sáni kuíni ni̱ꞌ ne̱ nu̱u̱nꞌ nɨ́ꞌɨ, saájee saꞌá ni̱ꞌ ya̱ kúñáꞌnú rá ñɨvɨ vá jee tátúníꞌ ráa nu̱u̱nꞌ rá nación.

²⁷ Yɨ́ɨ́ tatúníꞌ ráa nu̱u̱nꞌ rá ñɨvɨ rá nación jín ɨɨn bastón ka̱a, jee xinóꞌo ráa rá ñɨvɨ ya̱ ntu chíꞌi rává maárává xi̱ntíín ni̱ꞌ kuéntáꞌ táꞌvíꞌ liꞌiꞌ ki̱sɨ ñuꞌun nkíxín jín bastón. Ku̱ꞌva ni̱ꞌ ya̱ tatúníꞌ ráa kuéntáꞌ kua̱ꞌ nni̱ꞌi̱nꞌ ni̱ꞌ tiñu níso ni̱ꞌ ya̱ ntaji Tátáꞌ ni̱ꞌ nu̱u̱nꞌ ni̱ꞌ,

²⁸ jee suni sukuán ku̱ꞌva ni̱ꞌ kuneeꞌ ráa jín nuꞌuꞌ ya̱ viiꞌ víꞌí kúñáꞌnú ni̱ꞌ kuéntáꞌ kua̱ꞌ viiꞌ jiánu̱te̱ꞌ tiu̱u̱nꞌ xúꞌún ya̱ kénta ntáká ya̱neꞌenꞌ.

²⁹ ’Ñɨvɨ ya̱ íyó so̱ꞌo, jee teso̱ꞌo va̱ꞌa nú rá tu̱ꞌun ya̱ káchíꞌ Ta̱chi̱ꞌ Ííꞌ nu̱u̱nꞌ rá grupo rá ñɨvɨ ya̱ jínúꞌ iniꞌ ráa nuꞌuꞌ.”